Tāmateʻi ʻa e TV!
Sonatane H. Uesiʻova, ʻIutā, ʻAmelika
ʻI he pō Tokonaki hili ʻa e ʻaho mālōlō Fakafetaʻí (Thanksgiving), naʻá ku fakatokangaʻi ʻoku ou tokotaha pē ʻi hoku loki nofoʻanga he ʻapiakó. Naʻe ʻikai lahi ha meʻa ke u fai, ko ia ne u fetongitongi holo leva ʻa e ngaahi sēnolo ʻo e TV kae ʻoua kuó u aʻu mai ki ha foʻi faiva naʻe toki kamata pē.
Naʻe ʻikai fuoloa ange ʻi ha ngaahi lauminiti kuó u fakatokangaʻi ʻoku ʻikai taau ʻa e foʻi faivá. Naʻá ku fakakaukau ʻi ha kiʻi miniti ʻo pehē, “Ko e hā ha fuʻu palopalema? ʻOku ʻikai ke toe ʻi ai ha taha. He ko hono moʻoní, ʻoku ʻasi ʻi he TV, pea kuo pau kuo ʻosi tuʻusi ʻa e ngaahi konga koví kotoa.”
Ka, naʻe ueʻi au ʻe he Laumālié ke u tāmateʻi ʻa e TV. Naʻá ku pehē leva ke u lau ha tohi.
ʻOsi mei ai ha haafe houa kuó u fanongo ki ha tukituki he matapaá. Ko ha taha ʻeni ʻo e kōlomu ʻo e kaumātuʻá, naʻá ne talamai ko e taha ʻo e kau finemui ʻoku faiako fakaʻapi ki aí ʻoku puke pea ʻokú ne fie maʻu ha faingāue. Ko e ʻosi ʻeni ha miniti ʻe 30 ʻene telefoni mo ʻene tukituki holo ʻi he ngaahi matapaá, ʻo feinga ke maʻu ha taha ʻoku kei ʻi ʻapi ʻe lava ke tokoni ange. Fāifai, pea aʻu mai ki hoku matapaá. Naʻá ku loto ke tokoni ki ai peá u fetongi fakavavevave leva ki hoku teunga lotú.
Lolotonga ʻema fononga atu ki hono lokí, ne u ʻeke ange pe ʻoku lahi fēfē hono puké. Ko e meʻa pē naʻá ne ʻiló ko ʻene maʻu ha telefoni fakavavevave mei he kaungā loki ʻo e finemuí, ʻo kole ke ʻalu ange he taimi pē ko iá.
ʻI heʻema aʻu atu ki he lokí, naʻe mahino naʻe ʻikai ke sai. Naʻe mofi lahi pea tea. Pehē ʻe hono kaungā lokí kuo lau houa mai ʻene puké, vaivaia, pea naʻe ʻikai ke toe lava ʻo kai koeʻuhí he ʻoku langa hono keté.
Naʻá ku pehē ʻe au te u tākai ʻaki ia ʻa e loló, ka naʻe kole mai ʻa e matāpule ko ʻeni mei heʻemau kōlomu ʻo e kaumātuʻá ke u fai ʻe au ʻa e fakamaʻú. Naʻá ku ongoʻi taʻe-taau pea naʻe ʻikai ke u fakapapauʻi pe ko e hā te u leaʻakí. Naʻe ʻikai ke u maʻu ha taimi ke u teuteu loto ai ke fai ʻa e tāpuakí, ka naʻá ku lotu loto pē ke tataki au ʻe he ʻOtuá ʻi heʻeku leá.
Hili hono tākaí, naʻá ku ui leva ʻa e finemuí ʻi hono hingoá mo fakahoko ʻa e tāpuakí. Naʻá ku fakatokangaʻi ʻoku ou fai ha ngaahi talaʻofa ke fakafoki mai ʻene moʻui leleí mo fai ha ngaahi lea fakanonga naʻe ʻikai ko haʻaku lea ʻaʻaku. Hili ia peá u fakaʻosi e tāpuakí. Ko e taimi ne mau ʻāʻā hake aí, naʻá ku fakatokangaʻi ha malimali lahi ʻi he fofonga ʻo e finemuí, pea fakamālō mai leva ʻi he faingāué. Naʻe ʻikai hano taimi kuo moʻui lelei pea foki ki heʻene akó ʻo ʻosi ʻa e fahaʻitaʻu fakaakó.
ʻI heʻeku fakakaukau ki he meʻa ko ia ne hokó, ʻoku ou ongoʻi ha loto houngaʻia lahi ʻi he faingamālie ke u maʻu ʻa e lakanga fakataulaʻeikí. Naʻe feʻunga pē meʻa ne hokó mo ha miniti ʻe 10, pea ʻoku ou tui pau kuo ʻosi ngalo ʻi he finemui puké ni ʻa e meʻa ko iá. Ka kuo ʻi ai hano ʻaonga tuʻuloa ʻiate au.
ʻOku ou fakamālō ki he fanafana ʻa e Laumālié, ʻa ē ne ne ueʻi au ke u fakaʻehiʻehi mei he fakatauelé mo kei mateuteu fakalaumālié. ʻIkai ngata ai, ʻoku ou fakafetaʻi ʻi hono tataki ʻe he Laumālié ʻa e matāpule mei heʻemau kōlomú ke haʻu ki hoku lokí.
Kae mahuʻinga tahá, ʻoku ou fakafetaʻi ʻi ha Tamai Hēvani angaʻofa, naʻá ne fakamālohia au ʻi heʻeku taʻe-tāú, ʻo tataki ʻeku ngaahi lea ʻi he faingāué pea mo fakahoko ʻa e ngaahi lea naʻá Ne ʻomi ke u lea ʻakí. ʻOku ou ʻiloʻi kapau te tau moʻui taau, te tau maʻu ʻa e Laumālié ke ne tataki hotau halá koeʻuhí ke tau lava ʻo mateuteu ke tokoni kiate kinautolu ʻoku tau feohí.