Niufala Gospel Art Buk

I kam long Maekel J. Madsen

Jos Kurikulum Divelopmen

Wan jip buk wetem ol raon spring we i holem ol pej blong hem, naoia i mekem se ol Lata-dei Sent oli save gat 137 kala pikja we oli save yusum blong stap lanem mo tijim gospel.

Long ofis blong Presiden Tomas S. Monson i gat wan penting blong Sevya i hang long wol we i kam long Henrij Hofman. Profet i talem se penting ia i mekem hem i tingbaot blong mekem wanem we Sevya bae i wantem hem blong mekem. Ol pikja oli save gat bigfala paoa blong helpem wanwan blong yumi, olsem we penting ia i stap mekem long Presiden Monson.

Aot long wan strong tingting blong givim ol pikja we oli jip blong ol memba oli yusum long ol klas blong Jos mo long ol hom blong olgeta, Jos i bin mekem Gospel Art Buk ia wetem 137 penting mo foto. Ol pikja ia oli save go tugeta wetem ol lesen we oli tijim stat long Gospel Doktrin kasem Praemeri sering taem. Oli save yusum buk ia tu long ol famle haos naet, wanwan skripja stadi, misinari wok, hom mo visiting tijing.

Wanwan pikja long buk ia i invaetem wan taem blong tij—janis blong talem wan skripja stori mo tijim wan prinsipol. Blong helpem yumi, Gospel Art Buk ia i gat tu wan lis we i joenem ol pikja long ol stori blong hem long ol skripja. Blong stap lukaotem ol toktok long ol skripja ia bae i mekem save blong yumi bae i kam bigwan abaot ol taem we ol samting oli bin hapen, mo abaot ol gospel prinsipol we oli soemaot long wanwan pikja.

Hemia trifala (3) wei we oli save yusum Gospel Art Buk blong tijim wan lesen:

1. Traem blong invaetem wanwan man blong lukaotem ol skripja we oli go wetem wan pikja. Askem olgeta blong ridim skripja ia laod o talemaot sot stori ia taem yufala i stap toktok raon long pikja ia tugeta.

2. Traem blong askem wanwan man blong talemaot wanem oli luk long wan pikja. Wanem gospel prinsipol nao pikja ia i tokbaot? Olsem wanem nao yumi save yusum ol prinsipol ia long ol laef blong yumi tedei?

3. Afta yu tijim wan gospel prinsipol, invaetem ol narafalawan blong lukaot insaed long Gospel Art Buk, ol pikja we i soemaot prinsipol ia. Askem wanwan man olsem wanem nao oli filim naoia taem oli stap luk pikja we oli bin stap toktok raon long mining blong hem.

Long evri samting we yumi mekem blong lanem samting mo tijim gospel, letem yumi prea blong kasem toktok we i kam long God (luk long D&C 42:14–17). Taem yumi mekem olsem, bae Tabu Spirit i karem ol narafala tingting i kam long ol maen blong yumi, mo ol tingting ia, oli mekem blong i mitim ol nid blong olgeta we yumi stap tijim. Niufala Gospel Art Buk ia hem i wan impoten tul we i save helpem wanwan long yumi blong kam long Kraes mo kasem ol blesing blong laef we i no save finis.

Paoa long Ol Tul blong Help

“Ol tija we oli wantem blong mekem olgeta we oli stap oli andastanem mo lanem moa, bae oli save yusum tu ol tul blong help. Plante pipol bae oli save lanem gud samting mo tingbaot blong longtaem taem oli yusum ol pikja blong presentem ol tingting, ol map, ol grup blong ol toktok, o ol narafala tul blong help bitim we taem oli stap toktok nomo.”

Teaching, No Greater Call (1999), 182.

Olsem Wanem Nao Mi Save Kasem Gospel Art Buk?

1. Yu save faenem wan we i stap long intanet long www.gospelart.lds.org.

2. Yu save pem wan Gospel Art Buk (aetem namba. 06048 852) long distribusen senta blong yu.

3. Long Yunaeted Stet mo Kanada, yu save mekem oda blong buk blong yu tru long intanet long www.ldscatalog.com o ringim 1-800-537-5971.

Long lef: Huia Kraes, i kam long Henrij Hofman, K. Harrison Konroy Ko. i glad blong givim; ol foto pikja i kam long Matiu Rea, Hiun-Gyu Li, mo Kristina Smit