Fren I Go long Fren
Ol Tempol Oli Wan Presen we I Kam long Papa long Heven
Aot long wan toktok blong jeneral konferens blong Epril 2000.
Evri pikinini we oli ded bifo oli kasem ol yia blong stap akaontebol oli sef finis long selestial kingdom long heven (luk longD&C 137:10).
Sam yia i pas, mi bin gat wan wok blong mekem long wan stek konfrens long Kalifonia. Long flaet blong mi i go long Yuta, wan naesfala woman we i gat samples 70 yia i sidaon narasaed long mi. Nem blong hem Pati, mo hem i laekem blong toktok.
Pati i talem long mi evri samting abaot famle blong hem—abaot hasban mo boe blong hem we tufala i bin ded finis. Storian blong mitufala i gogo kasem kolosap bae mifala i lan. Mi talem se, “Pati, yu bin toktok kolosap long ful flaet blong yumi. Bifo yumi lan long Sol Lek Siti, mi wantem blong askem yu sam kwestin.”
Mi askem gud hem, “Pati, yu save se bae yu luk bakegen hasban blong yu ia we i ded?”
Hem i talem se, “O, be hem i posibol?”
Afta mi askem, “Yu save se bae yu luk boe blong yu, Matiu, bakegen we i bin ded olsem wan bebi?”
Ol ae blong hem i stat blong gat wota, mo voes blong hem i stap seksek. Spirit blong Lod i bin tajem hem. Hem i bin sore tumas long tufala.
Afta wetem prea mi askem hem, “Pati, yu save se yu gat wan gud mo kaen Papa long Heven, we i lavem yu tumas?”
Hem i talem, “I tru ia, mi gat?”
Mi askem, “Pati, yu save se Papa blong yu long Heven i gat wan spesel plan blong yu mo se famle blong yu i save stap blong oltaem?”
“Mifala i save stap blong oltaem?” hem i bin ansa.
“Yu bin harem abaot plan ia bifo?” mi bin askem.
Hem i talem, “No.”
Wetem tru tingting mi askem hem, “Yu wantem blong save abaot plan ia?”
“Yes, mi wantem harem,” hem i bin ansa.
Spirit blong Lod i bin tajem hem bigwan.
Ol misinari oli bin tijim Pati. Tri wik afta, taem hem i stap yet long Yuta, Pati i bin ringim mi: Brata Kikuji, mi ia, Pati. Bae mi baptaes. Bae yu save kam long baptaes seves blong mi?”
Mi mo waef blong mi i bin go long baptaes blong Pati. Plante kaen memba oli bin stap mekem fren wetem hem. O, bae mi no save fogetem glad fes blong hem taem hem i kamaot long wota!
Bae mi neva fogetem ol swit wota blong ae blong hem long tabu olta long Sol Lek Tempol wan yia afta. Mi tingbaot fes blong hem ia we i saen wetem pis taem hem i bin sil long hasban mo boe blong hem we tufala i bin ded ia mo long gel blong hem we i stap laef, we i bin wan memba blong Jos finis.
Fren blong mi Pati i bin faenem Lod Jisas Kraes. From hem i bin sil long tempol, naoia hem i save se famle blong hem i blong oltaem long Lod.
Pikja i kam long Dilin Mas; famle Kikuji i glad blong givim ol foto ia, olsem we oli talem; foto blong ol karot © Getty Images; bakgraon: foto i kam long Welden K. Andesen
Elda Kikuji i werem wan kimono (kastom klos blong ol man Japan) long foto ia we oli tekem long seken betdei blong hem. Yu save luk pleiplei ia we hem i stap holem?
Elda Kikuji (lef long fored) taem hem i gat 13 yia wetem ol junia hae skul fren mo tija blong hem.