Klinim Ol Yad blong Tempol

I kam long Josua J. Peki

Ol Magasin blong Jos

Long Kentaki, long saot blong Yunaeted Stet, ples i hot nogud long sama. Wan dei, ol pipol oli luk se i gat wan grin lif we i stap grol long fanis we i raonem Luisvil Kentaki Tempol. Mo lif ia i no wan smolwan nomo—i gat plante!

Mekem se ol Praemeri pikinini blong Kriswud Seken Wod long Luisvil Kentaki Stek oli disaed blong mekem wan samting. Long wan wom dei long Jun oli bin gat wan aktiviti. “Mifala i karem ol pis kaliko mo ol baket blong wota mo sop blong klinim fanis mo help blong kipim haos blong Papa long Heven i klin,” Sera we i gat 10 yia i talem. Hem i bin wetwet evriwan, be “hem i wan gudfala taem blong pleiplei from ol fren blong mi oli stap tu.”

Jos H., 9 yia, i talem se hem i bin taed smol afta we oli bin klinim ol hae pat blong fanis ia. Be hem i gat plante help. I tru, kolosap evri pikinini blong Praemeri oli bin kam, kolosap 75 evriwan. Plante oli karem ol brata mo sista blong olgeta mo ol mama mo papa blong olgeta oli kam blong oli help.

Ol pikinini oli save se oli stap long yad blong tempol, mekem se oli traem blong stap revren. Mo i no gat wan i komplen abaot had wok. “Mifala i bin brasem strong from ol doti we i stap long fanis ia oli bin stap longtaem finis,” Megan H., 6 yia. Be hem i oraet nomo. “Mi save se mifala i stap tekem kea long hom blong Papa blong yumi long Heven.”

Sera i bin filim sem wei tu. Hem i talem “Mi bin filim Spirit from mi save se Papa long Heven i glad se yumi stap mekem samting ia.”

Afta wok i finis, grup ia oli bin kam tugeta long Jos bilding nekis doa blong kakae ol sosis wetem bred mo blong tokbaot wanem oli bin lanem.

Ol Praemeri pikinini oli no save wet blong oli save go insaed long tempol olgetawan blong mekem ol baptaes blong ol dedman. Be blong naoia, oli glad blong save se oli bin help blong mekem aotsaed long tempol i luk naes—olsem we haos blong Papa long Heven i mas luk.