Stat wetem Prea
Yu stap lukaotem ol ansa? Ol yangfala ia blong Otawa, Kanada, oli talem se prea hem i ples blong stat wetem.
Taem Jeni we i gat 15 yia i tokbaot taem we hem i kasem ansa long wan prea blong hem, hem i stat wetem wan tok sore. Hem i sore blong talem se hem i no stap prea oltaem blong kolosap wan yia nao. Ol samting long laef blong hem oli no bin go gud—long skul, wetem ol fren blong hem, iven long jos.
Wan naet, Jeni i eksplenem se, hem i bin wantem blong lukluk wan muvi. Hem i bendaon blong luk sam muvi we i stap long las drowa blong sef blong ol buk taem hem i luk wan foto blong angkel blong hem we i jes ded i no longtaem tumas. Sek nomo, hevi blong evri samting we hem i stap wari from i mekem hem i wantem blong krae. “Mi save long taem ia se mi mas prea,” Jeni i talem. Hem i nildaon long weaples we hem i stap long hem mo hem i prea.
Jeni i tokbaot gud olsem wanem hem i kasem ansa blong hem: “Taem mi finisim prea blong mi, mi save ol ansa long ol kwestin blong mi. Mi filim se evri samting i oraet bakegen. Evri samting bae i oraet. Evri samting wetem angkel blong mi bae i oraet. Mi luksave se mi lavem skul mo ol fren blong mi. Taem mi finisim prea blong mi, mi save se bae mi mas go long jos from hem i wanem mi nidim. Mi sapraes long ol filing ia we mi bin kasem, mo mi filim gud mo wom. Mi save se Papa blong mi long Heven i lavem mi mo bae Hem i helpem mi tru long ol samting.”
Long Jeni, prea ia hem i wan long olgeta we hem i bin stap wantem blong talem be hem i no save. Naoia, taem hem i stap tingting bak, hem i kasem sem filing blong kamfot bakegen mo sem ful tras ia se ansa blong hem i kam long Lod.
Jeni Holt i blong Otawa, naesfala kapitol siti blong Kanada we oli bin bildim long ol saedsaed wud blong Otawa Reva. Jeni mo ol fren blong hem blong Otawa Ontario Stek, oli bin toktok wetem ol magasin blong Jos abaot olsem wanem prea i wok long ol laef blong olgeta.
Ol Ansa Oli Kam long Wea?
Wan long ol samting we i intresting long hem, hem i we ol yangfala blong Otawa oli bin toktok raon long olsem wanem i bin gat ansa long ol prea blong olgeta. Faswan, Susan Bruk i talem se, “Sapos yu wantem wan ansa, yu mas lisin from.”
Susan i talem se samtaem ol ansa oli kam taem yumi ridim ol skripja. Hem i gat wan gudfala eksampol: “Wan dei, mi bin taed tumas, mo mi bin nogud long evriwan. Mi no wantem blong toktok. Mi tingbaot se mi bin ridim ol skripja, be mi no tingbaot weaples, mo i talem, ‘Gat tingting we i stap daon.’ Mi jes andastanem. Hemia i ansa blong mi.” (Luk long D&C 112:10.)
Ariana Kit i stap lisin gud insaed long jos. “Mi ting se plante long ol ansa blong ol prea blong yumi oli kam tru long ol spika long jos,” hem i talem. “I gat wan taem, taem mi wantem petriakel blesing blong mi. Afta, long wik bifo bae mi go blong kasem, stek petriak i kam long wod blong mifala mo i toktok. Mi bin stap prea had from, mo taem mi harem hem i toktok, mi harem gud tumas.”
Makensi Loftos i talem se, plante taem, hem i kasem ansa blong ol prea blong hem tru long famle blong hem. Hem i bin prea from wan famle desisen, mo “mi bin filim Spirit wantaem, mo mi save se desisen ia we mifala i bin mekem hem i raet samting.”
Samtaem wan man wetem ansa we yu stap lukaotem i wokbaot stret i kam long yu. Taem Tomas Fransis mo famle blong hem oli bin muv i go long Otawa, hem i nidim blong mekem sam niu fren long wan niu skul. Hem i bin prea blong faenem sam gudfala fren. “Wan dei,” Tomas i talem, “wan boe long klas blong mi i kam long mi mo talem, ‘yu wantem kam mo mitim ol fren blong mi?’ Stat long taem ia, mitufala i bin kam ol fren. Samting ia i bin helpem mi plante.”
Doson Libet i gat wan samting we hem i impoten blong talem abaot ol ansa long ol prea. Hem i talem, “samtaem yu no kasem ansa olsem we yu wantem, be bae yu kasem ansa we yu nidim.” Hem i talem se samtaem yu no rili save luk stret ansa, be yu save taem yu lukluk i gobak.
Wan Man blong Toktok Wetem
Sam long ol yangfala ia oli talem se hem i naes blong gat wan famle we i stap prea tugeta. Kifin de Sousa i laekem blong save se famle blong hem oli stap prea tugeta evri naet. “Mifala i gat wan taem tebol blong mifala wanwan i save gat janis blong prea. Mi filim Spirit, mo mi save se sapos mi stap longwe long hom, olgeta oli stap prea from mi blong mi stap sef.”
Benedik Beliser i laekem blong prea wetem papa mo mama blong hem evri moning. “Mi go long rum blong tufala, mo mifala i prea,” hem i talem. “Mi gat wan testemoni se Tabu Spirit i stap wetem mi, mo sapos mi nidim help blong Hem, bae mi askem Papa long Heven from.”
Rut Dekadi, fren blong Benedik i talem, “hem i impoten tumas se taem yumi talem ol prea blong yumi, yumi save se Papa long Heven i stap lisin. I gat wan man i stap ia blong yu.”
Kati Kameron i laekem olsem wanem prea i mekem hem i filim. “Taem mi toktok long Lod, mi filim olsem we wan man i rili wantem blong toktok long mi. Mi save se mi save talem long Hem eni samting.”
Ol Prea we Oli Mekem from Ol Narafala Man
Ol yang man—speseli olgeta we oli gat yia blong ol pris olsem Ronan Filamon, Fred King, mo Doson mo Deved Libet—oli tokbaot impoten mo tabu diuti blong mekem ol sakramen prea blong ol memba long ol wod mo branj blong olgeta.
Doson i bin talem, “Prea ova long sakramen i mekem yu tingting moa klia long from wanem sakramen hem i impoten. Mi gat prishud atoriti, mo mi filim se mi no save yusum olbaot prishud ia.”
Fred i tingbaot we hem i stap talem ol sakramen prea taem oli bin odenem hem fastaem i kam wan pris: “hem i had fastaem, mo mi stap mekem ol mistek. Long wan taem mi bin ripitim prea ia plante taem. Be Spirit i bin wispa long mi se nomata hamas taem mi bin traem blong talem stret; be bae mi talem stret long en. Hem i wan naesfala filing.”
Tekem Taem blong Rere Bifo long Prea
Sam long ol yangfala oli bin tokbaot ol impoten samting we oli mas mekem blong rere blong prea. Mat Lason i gat wan skripja we hem i pinim long wol blong rum blong hem, Doctrine and Covenants 78:19, we i talem se hem we i kasem ol samting wetem fasin blong talem tangkyu bae oli mekem hem i kam antap; mo ol samting blong wol ia bae oli ademap long hem wan handred taem moa (luk long D&C 78:19). Skripja ia i mekem hem i tingbaot blong stap talem tangkyu from ol samting we Lod i bin givim long hem. Hem i save se i nidim blong fasin blong talem tangkyu i kam pat long ol prea blong hem.
Nik Molenbek i talem, “Prea i no wok sapos mi jes askem be mi no bin tingting gud long hem mo mi no mekem wetem wan tru hat.”
Merikel Paoa blong Prea
Siera Libet i gat wan bigfala stori abaot prea. Taem hem i gat tu yia, wan hos i bin stanap long han blong hem. Bigfala fingga long han blong hem i gat bigfala kil long hem, mo sam fingga blong hem, mit blong olgeta i bin open. Papa mo mama blong hem oli bin tekem hem i go kwik long wan hospital i go long wan narafala hospital blong faenem wan dokta blong katem man we i save fiksim problem ia we i luk olsem se i no posibol nating blong mekem. Siera i talem, “wan dokta i talem long papa mo mama blong mi se dokta blong katem man ia i no gat wan prea blong gat sakses long wok blong hem. Mama blong mi i talem long hem se dokta blong katem man ia i no gat wan prea nomo wetem hem—hem i gat plante prea. Mama blong mi i bin ringim tempol blong oli ademap nem blong mi long lis blong prea.”
Naoia, Siera i gat 13 yia, mo i gat wan han we i save wok. Bigfala fingga blong hem i wok gud nomo, mo hem i bin soemaot fingga blong hem antap blong ol gel long wod blong hem oli luk. Oli neva harem stori ia. Wan samting we oli save luk long han blong Siera hem i wan tintin mak we i stap raon long stamba blong bigfala fingga blong hem ia. Risal blong hem i wan bigfala sapraes tumas.
Siera i talem, “I mekem mi filim hapi blong save wanem nao prea i save mekem blong mi. Hem i wan gudfala samting long laef blong mi.”
Evriwan i agri wetem Kale Loftos taem hem i talem se, “Prea hem i wan gudfala fasin blong kasem.”
Antap: Brijit Leja, Jeni Holt, Doson Libet, Dena Konwei, Rebekah Wagona, mo Aleksanda Rija-Brule, wetem ol narafala yut blong Otawa Ontario Stek (lef); olgeta ia oli save se help we i kam long Papa long Heven hem i tru long wan prea nomo.
Antap, stat long antap olgeta: Fred King mo Ronan Filamon, tufala i agri se ol sakramen prea oli tabu tumas mo oli mas talem wetem fasin blong gat revren. Kifin de Sousa i glad from ol famle prea.
Ol yut long Otawa oli prea from kamfot long ol hadtaem, blong kasem help wetem ol skul wok mo ol fren blong olgeta, mo from ol blesing we oli wantem. Oli save se Papa long Heven i ansarem ol prea blong olgeta. “Samtaem yu no kasem ansa olsem we yu wantem, ” Doson Libet i talem, “be bae yu kasem ansa we yu nidim.”
Antap: Mat Lason i ridim wan skripja we hem i pinim long wol blong hem bifo hem i prea, mo Nik Molenbek i talem se prea i nidim hadwok.
Antap, long lef: Rut Dekadi, Katya Galan, and Benedik Beliser, tufala i agri se hem i wan gudfala aedia blong askem Papa long Heven blong sendem Tabu Spirit. Andanit: Kati Kameron, Karolyn Albas, mo Siera Libet oli laekem filing we oli kasem taem oli prea.
Blong Stap Lisin, i kam long Maekel Javis Nelson
Ol foto oli kam long Janet Tomas