Mifala I Kam Ia blong Luk Tempol
Ris Bandli, Yuta, YSA
Wan dei long sisen blong ol lif oli foldaon long ol tri, long taem blong wok blong mi olsem wan man blong wok long Sol Lek Tempol, wan yangfala man mo ol fren blong hem, we oli no dresap gud blong wosip long tempol, oli bin kam.
“Mifala i kam ia blong luk tempol,” yang man ia i talem.
“Yu gat wan rekomen?” mi bin askem.
Yang man ia i tingting blong smol taem. Afta hem i talem, “Yes. Mama blong mi i gat wan Momon fren long Minesota. Hem i talem se mifala i mas kam luk tempol.”
Mi filim Spirit i gaedem mi blong mi mas pulum ol yangfala man i kam long saed mo toktok wetem olgeta. Yang man ia nem blong hem Lars. Mi eksplenem long hem se hem i save kam long tempol nomo, be Papa long Heven tu, i wantem hem blong i kam. Mi talem long Lars se fastaem, hem i mas rere blong kam long tempol, mo mi bin eksplenem olsem wanem blong mekem samting ia.
Long taem ia, mi bin aktiv insaed long Jos blong wan sot taem nomo. Mi bin sevem wan misin be afta mi bin lego Jos from we mi bin spendem tumas taem long entetenmen indastri mo yusum ol drag mo alkol. Mi ting se famle blong mi bae oli glad long mi wetem karia blong mi mo ol rij samting blong mi, be mama blong mi i no bin kea long eni samting ia. Be, oltaem, hem i putum nem blong mi long prea lis blong tempol, we i jes mekem mi, mi kros moa.
Woman we mi bin maredem i bin lego Jos tu. Kasem taem we gel blong mitufala, Tori i gat eit yia, Tori i stat blong askem ol kwestin abaot Jisas Kraes, mifala i bin kam daon bigwan long saed blong spirit. Nomata long misinari seves blong mi, mi no save tingbaot eni samting abaot Sevya.
“I gat ol man we oli kwalifae blong tijim yu abaot Jisas,” mi talem long Tori. “Yu no wantem blong go toktok long olgeta?”
Sam dei i pas, tu sista misinari i noknok long doa blong mifala. Tori i invaetem olgeta insaed mo i stat blong tekem ol lesen. Mi stap lisin long narafala rum, mi harem ol sista oli stap tijim ol doktrin we mi save se oli tru.
“Yu wantem blong baptaes?” wan sista i askem Tori afta long nambatri lesen.
“Yes,” Tori i ansabak.
“Papa blong yu i save baptaesem yu?”
Mi no bin go long jos blong 20 yia, be mi save se laef blong mi bae i rere blong jenis. Mi bin sidaon long ol las lesen, mifala i stat blong go long jos, mo waef blong mi mo mi i bin mit wetem bisop. Taem mi bin sakem sin, mi save mi mas mekem evri samting i posibol blong pembak ol samting we mi bin mestem long ol yia we mi no bin go long jos. Mi jenisim wok blong mi, mi bin wok strong long ol Jos koling blong mi, mi bin sil long waef mo gel blong mi, mo mi kam wan man blong wok long tempol. Hemia nao olsem wanem mi save se wan yang grup blong ol pipol we oli jes wantem lukluk tempol oli save kam klin inaf blong go long tempol.
Long nekis spring blong hem, Lars i bin raetem wan leta long mi, i talem tangkyu long mi blong eksplenem tru mining blong wan tempol rekomen. “Mi bin lanem moa abaot wan tempol rekomen,” Lars i bin raetem. “I tru, mi bin baptaes mo kasem wan tempol rekomen blong miwan long las Jenuware!” Ol ae blong mi i fulap wetem ol wota taem mi luk wan foto we hem i bin putum tu insaed wetem leta ia, wan foto blong hem wetem ol waet klos blong baptaes blong hem mo ol misinari we oli bin tijim hem.
Rod blong mi blong gobak long tempol hem i gud tumas, mo taem mi lanem abaot rod blong Lars hem i wan gudfala blesing we i mekem mi tingbaot long olsem wanem yumi save tajem ol laef long ol gud wei.