O Lo Tatou Apitaga Faalelagi ua Faaatoatoaina
Mai se saunoaga i se faigalotu na tuuina atu i le Iunivesite o Polika Iaga i le aso 19 Setema, 2006. Mo le anotusi atoa i le Igilisi, asiasi i le http://speeches.byu.edu.
Afai e mafai ona tatou vavaeina le veli ma matamata atu i lo tatou apitaga faalelagi, o le a tatou maofa i mafaufau aoaoina ma loto o i latou o loo nonofo fiafia ai iina. Ou te manatu o o tatou matua faalelagi e matua mama ma atoatoa. I lenei talalelei maoae o faataitaiga, o se tasi o faamoemoega o lo tatou olaga faataitai i le lalolagi, o le avea faapei o i laua i auala uma, ina ia mafai ona tatou toamalie i le afioaga o matua faalelagi ma, i le gagana a Enosa, iloa atu o laua fofoga “ma le fiafia” (Enosa 1:27).
Na saunoa Peresitene Polika Iaga (1801–77), “O loo tatou taumafai e faataitai ia i latou o e o loo nonofo i le lagi; o loo tatou taumafai e mamanu o tatou olaga ia i latou, ia foliga ia i latou, ia savavali ma tautatala e pei o i latou.”1 Ou te fia vaai i tua atu o le veli lea o loo tuueseeseina ai i tatou mo se taimi le tumau mai lo tatou apitaga faalelagi ma vali ai se ata faamatala o tulaga faamamaluina, matagofie, ma le faamamaina o loo i ai iina. O le a ou tautala e uiga i le gagana, tusitusiga, musika, ma faatufugaga o le lagi, faapea foi ma le atoatoa o foliga vaaia o tagata faalelagi, aua ou te talitonu o le lagi o le a tatou maua ai nei tulaga taitasi i le mama ma le atoatoa.
O le latalata atu lava i le Atua, o le faigofie foi lena ona faagaeetia o tatou agaga i mea faamamaina ma matagofie.
Gagana
E tulei le Atua i gagana uma lava, ma Na te faaaogaina faalelei. E pulea lelei ma tausaafia Lana gagana. Ina ua faamatalaina e le Atua le faagasologa maoae o le foafoaga o lenei lalolagi, na Ia fetalai ai ma le totoa i se siufofoga ma ni fetalaiga faapea “ua lelei” (Kenese 1:4). O le a tatou le fiafia pe ana fai na faaaoga e le Atua le upu “maoae” po o isi faaupuga faafefeteina.
Fai mai le fatusolo a Peretania o Ben Jonson: “O le gagana e tele lava ina iloa ai se tagata. Saunoa mai, ina ia ou iloa ai oe.”2 O le tatou gagana e faaalia ai o tatou mafaufauga, uiga lelei, le mautonu, masalosaloga—e oo lava i aiga tatou te o mai ai. O le a sili atu ona tatou maua le toamalie i le afioaga o le Tama Faalelagi pe afai ua tatou atiina ae ni masani talafeagai o le gagana.
Ou te manatu o le gagana o le lagi, pe a tautalagia faalelei, e mafai ona oo mai i se ituaiga o musika. Pe na mafaufau i ai ia C. S. Lewis ina ua ia tusia, “Pe le o se mea malie ea ia nisi o tuufaatasiga o upu lea e te maua ai—toetoe lava a ese mai i o latou uiga—se fiafiaga e pei o musika?”3 I le fanau mai o Iesu na faaali mai agelu ma tautatala mai, sa lei pepese, “O le viiga i le Atua i mea aupitoaluga, ma le manuia i le lalolagi, o le finagalo alofa i tagata” (Luka 2:14). O le taimi nei ua tatou taumafai ai ia maua mai le matagofie o lena faamatalaga i le pese, ae o le uluai taua e agelu na tuuina mai i upu tautala.
I lana talatusia e uiga ia Ralph Waldo Emerson, na taua ai e Van Wyck Brooks na valaaulia Emerson e saunoa i le faamanatuina o le lona300 tausaga o le fanau mai o le fatusolo lauiloa o Siekisipia. Ina ua maea folasaga talafeagai ai na faailoa atu loa e Emerson ia lava i le pulelaa ona nofo loa lea i lalo. Na galo ia te ia ona manatu na tusitusi. Na sili atu ia te ia le leai o se tala e faia nai lo ni upu e le mafaufauina lelei. Mo nisi, o Emerson lea i se tasi o ona taimi sili ona tamalii.4
O le mama o le gagana e sili atu lea i lo le polesiina o le faaleoga o upu. E afua mai i le mama o mafaufauga ma le faamaoni o lagona. O le tatalo a se tamaitiiti mai lea taimi i lea taimi, e ono sili atu ona atagia mai ai le gagana o le lagi nai lo se tautalaga mai talafatu a Siekisipia.
O le faamamaina o le gagana e atagia mai e le gata i la tatou filifiliga o upu ae faapea foi i mea tatou te talanoa i ai. E i ai i latou e talanoa i taimi uma e uiga ia i latou lava; o i latou ia e le talitonu ia i latou lava pe faamaualuluga foi. E i ai i latou e talanoa i taimi uma e uiga i isi tagata; o i latou ia e masani lava ona faaiva tagata. E i ai i latou e talanoa i manatu faatupu manatu, tusifaitau faamalosiau, ma aoaoga musuia; o i latou toalaiti nei ua iloga so latou sao i lenei lalolagi. O mataupu e talanoaina i le lagi e le faatauvaa pe o ni mea masani; e musuia e sili atu nai lo mea tatou te mafaufau i ai. O le a tatou lagonaina le toamalie iina [i le lagi] pe afai na tatou faataitaia i lenei lalolagi le talanoa e uiga i mea mama ma faatamalii, ma afifi o tatou lagona i upu na mafaufauina ma le totoa.
Tusitusiga
Pe o le afiafi ea o le Aso Faraile o se taimi pisivale lea e sue ai po o fea o le a fai ai se faafiafiaga po o se gaoioiga? Mata e mafai e o tatou tagata i aso nei ona faia se Isaako Niutone po o se Wolfgang Amadeus Mozart? Pe mafai e alaata e 85 ma DVD e le mafaitaulia ona faamalieina lo tatou faananau manaotele ina ia faafiafiaina? E i ai ea se tasi e faavalevalea ma fai ma ana vaisu ia taaloga komepiuta po o le eva i le Initoneti, ma faapea ai ona misia ia aafiaga aoga atu o le faitau i tusi matagofie, talanoaga, ma le fiafia i musika?
Ou te le iloa pe i ai i lo tatou aiga i le lagi se televise po o se masini DVD, ae i lau vaai faalemafaufau i ai, e mautinoa lava le i ai o se piano tele ma se potutusi mataina. Sa i ai se potutusi manaia i le maota o Peresitene Gordon B. Hinckley (1910–2008) a o talavou. Sa le o se fale feilafi, ae o le potutusi na i ai ni tusi pe tusa ma le 1,000 o tusi faaoaina i tusitusiga o le lalolagi, ma na faaaluina e Peresitene Hinckley ona aso a o laitiiti i le faitauina o na tusi. Ae peitai, ina ia maua ni faitauga lelei, e le faapea ia e umia ni faaputuga tusifaitau taugata, aua e maua uma lava e tagata mauoa ma tagata matitiva i faletusi o le lalolagi.
Sa faaosofia Peresitene David O. McKay (1873–1970) e ala i le 4:00 i le taeao i aso uma lava, e faitau faatopetope pe lua ni tusi, ona amata ai lea o ana galuega i le 6:00 i le taeao. Na mafai ona ia sii mai ni solo se 1,000 mai mea na te manatua. Na ia taua matai sili [tusitala] o tusitusiga o “perofeta laiti.” O ia o se molimau ola o le apoapoaiga faaletusipaia o le, “ina saili atu ia outou i upu o le poto mai tusi sili ona lelei” (MFF 88:118).
Talu ai nei na ma faaaluina ai ma lou toalua ni tausaga se fa i se tofiga o le Ekalesia i Europa i Sasae. Sa masani ona ma femalagaa’i i le nofoaafi e alu i le auala i lalo o le eleele i Moscow, e taua o le Meto. Na ma matauina le punonou o ulu o tagata Rusia, aua sa latou faitauina tusi a Tolstoy, Chekhov, Dostoyevsky, po o Pushkin—ma o nisi taimi o Mark Twain. O tagata e matitiva, ae sa le lofituina i latou i lo latou matitiva. Na maua e i latou le faaoaina i tusitusiga, faatufugaga, ma musika a Rusia.
Na saunoa Peresitene McKay: “E pei ona faia i paaga, e faapena foi i tusi. E mafai ona tatou filifilia i latou o le a faia i tatou ma ni tagata lelei atu, atamamai atu, talisapaia sili atu o le lelei ma le matagofie i le lalolagi, pe tatou te filifilia ia lapisi, o mea mataga, o mea leaga, lea tatou te lagona ai e pei na tatou ‘lopala solo.’”5
E moni, o tusitusiga paia e tulaga ese lava i tusitusiga lelei, aua e lei faavaeina i manatu o tagata.
Musika
Ana mafai ona tatou vaai i tua atu o le veli faalelagi, e masalo o le a musuiaina i tatou e musika o le lagi, lea atonu e sili atu ona mamalu nai lo soo se musika ua tatou faalogoina i lenei lalolagi.
Pe a faaauau pea ona viia ni musika mo se taimi umi ma teufatuina e tagata lelei ma faamamaina, o lo tatou le talisapaiaina o nei musika e le o se tausalaina lea o musika maoae. O loo i totonu o i tatou lava le aveesea. Afai e ola ae se tagata talavou i se taumafataga masani o hamupeka ma pateta falai, ia atonu o le a le avea o ia ma se tagata e fiafia i meaai faapitoa. Ae o le sese e le o meaai lelei. Ae ona sa ola ae lava o ia i meaai e le lelei tele. O nisi na soifua ae lava i le taumafataga o musika a pateta falai.
O le taimi lelei lenei e ilo ai lau fata o musika ma filifili ai musika faagaeetia ma musuia. O le vaega lea o le faagasologa o le faatagata matua mo lau malaga e faavavau. O se taimi lelei foi lea e aoao ai ona tata se mea faimusika pe faaleleia atili ai ni tomai faamusika e le o atoatoa lelei ona iloa.
Na saunoa mai Elder Neal A. Maxwell (1926–2004) o le Korama a Aposetolo e Toasefululua: “Ua tatou … ola i se lalolagi ua matele atu i mea e leai ni taua, ae e tatau ona tatou tuuina atu se avanoa e atiina ae ai se manao mo musika sili ona lelei. Ma e faapena foi, ua tatou i ai i se lalolagi ua gauai atu i mea ua fiafia i ai le toatele i aso nei. E tatau ona tatou faatagaina tagata ina ia sili ona gauai atu i musika sili ona lelei o augatupulaga uma.”6
O le iloaina o faatosinaga malolosi o musika maoae, na fai mai ai se tasi o tagata faatino a Oscar Wilde, “Ina ua uma ona taina le musika o le Chopin, na pei lava na ou tagi ona o agasala ou te lei solia, ma faanoanoa i faalavelave e le a au ia.”7 Ina ua maea le faaaliga muamua o le Messiah, na saunoa Handel, i le tali atu i se saunoaga faamalo, “Lou alii e, e tatau ona ou faanoanoa pe afai sa na ona ou faafiafiaina o i latou—sa ou manao e faia ia latou lelei atu.”8 Na faia e Haydn “ni laei e sili atu ona mananaia e fatu ai se pese, aua na fai mai o ia, o loo alu atu i luma o le na faia o ia.”9
O nisi o mea e tutupu i le olaga e matua musuia lava lea e le mafai ona mafaufauina e aunoa ma le i ai faatasi o musika matagofie. E le mafai ona tatou maua se Kerisimasi e aunoa ma ni pese Kerisimasi po o se konafesi aoao e aunoa ma ni viiga paia. Ma e le mafai ona i ai se lagi e aunoa ma musika matua matagofie. Na saunoa Peresitene Iaga, “E leai se musika i seoli, aua o musika lelei uma e a le lagi ia.”10 O se matua faasalaga lava le alu i seoli ma lē faalogo ai i se nota se tasi o musika mo le faavavau atoa.
Faatufugaga, Foliga Vaaia, ma Uiga Faaalia
O mea ua ou faasoaina atu e uiga i le aumaia o gagana, tusitusiga, ma musika matagofie i totonu o le aiga, e mafai foi ona taua ma e tutusa lava le moni ma faatufugaga maoae—atonu e faaalia ma le fiafia i lo tatou apitaga i le lagi. E mafai foi ona faapena i o tatou foliga vaaia faaletino ma amioga, o le faatulagaga o o tatou aiga, faiga o a tatou tatalo, ma le ala tatou te faitauina ai le afioga a le Atua.
Sa i ai se taimi na ou asiasi puupuu ai i le tamaitai faitifaga lauiloa o Audrey Hepburn a o faia lana tifaga o le My Fair Lady. Na tala mai o ia i le vaaiga amata o le tifaga lea na avea ai o ia ma teine toto fugalaau faatauvaa, ma le taugaeleelea. O ona foliga na faapalapalaina i malala ina ia tau foliga o ia i lona siosiomaga. “Ae,” na ia fai mai ma faaivi lona mata, “na ou manogi lava i lau fagusausau. O totonu na ou iloaina lava o au o se tamaitai.” E le manaomia se fagusausau taugata e avea ai ma se tamaitai, ae e manaomia ai le mama, tauagafau, faaaloalo o le tagata ia te ia lava, ma le mitamita i ona lava foliga vaaia.
O ni tausaga se tele ua mavae, na tonu ai i se tasi o au uo o le a ia faafiafiaina lona toalua, e ala i lona faasoa atu i ai o se saafiafiga faapitoa i po taitasi e taunuu atu ai i le fale. O se tasi po na ia viia ai lana kuka. O se po lona lua na ia faafetaia ai lona poto e teufale. O le po lona tolu na ia faafetaia ai ana faatosinaga lelei i le fanau. O le po lona fa, ao lei fai atu lana tala, na fai mai lona toalua, “Ua ou iloa le mea ua e faia. Ou te faafetai atu mo lena mea. Ae aua e te toe fai mai i se mea o na mea. Tau lava o lou fai mai e te manatu ou te aulelei.”
Sa ia faaali atu sona manaoga taua na i ai. E tatau ona viia tamaitai mo meaalofa uma o loo latou umia—e aofia ai lo latou mataala i o latou lava foliga vaaia—lea e faaopoopo atu ma le le manatu faapito i le tamaoaiga o olaga o isi. E le tatau ona tatou tuu atu i tatou e o atu ma avea o ni tagata masani—pe fainaelo—i o tatou foliga vaaia ma tatou taumamao ai mai le matagofie ua tuuina mai e le lagi ia i tatou.
O isi e faaleano ma fai mai, “O ou foliga e leai lava ma se sootaga ma le finagalo o le Atua ia te au.” Ae e mafai ona i ai i matua faalelalolagi ma matua faalelagi ni faanoanoaga e le o faaleoina i a latou fanau e aunoa ma le tuuitiitia ai o le alofa.
Na i ai ia Peresitene Iosefa F. Samita (1838–1918), le Peresitene lona ono o le Ekalesia, ni nai meatotino, ae sa ia tausia lelei ia mea. Sa faaeteete o ia i ona foliga vaaia. Sa ia auliina ana tala pepa ia tea ai le maanuminumi. Na te le faatagaina se isi vagana lava o ia e teuina lana ato i le po. Na ia iloaina le mea na tuu ai mea uma, o nati, ma lave o le fale sa i ai, ma na tofu lava ma le mea na teu ai.
Pe tonu la lenei mea i le siosiomaga o loo e nofo ai? O se fale ea o le tulaga maopoopo? Pe manaomia ea ona e saluina le pefu, tapena, ma toe faatulaga ae e te lei valaauliaina le Agaga o le Alii i totonu o lou fale? Na saunoa mai Peresitene Lorenzo Snow (1814–1901): “E le o faamoemoe le Alii ia nonofo pea le Au Paia i pa ma ana o le lalolagi, ae ia latou fauina ni fale lelei. Pe a afio mai le Alii o le a le faamoemoe o ia e feiloai i ni tagata eleelea, ae o ni tagata faamamaina.”11
Na tusia e David Starr Jordan, o le sa avea ma peresitene o le Iunivesite o Stanford: “O le tufanua o le faia lea o le mea e le o le mea sili lea ona lelei o lea ituaiga amioga. O le faia o mea leaga i auala leaga, ma faamalieina ai i lena mea. … E tufanua le faia o ni lavalava palapala pe afai e le o faia e se tagata ni galuega palapala. E tufanua lou fiafia i musika leaga, le faitau o tusi mataga, le faitau i nusipepa le lelei, … le sailia o le ‘ata i tusifaitau leaga, le fiafia i tala faatino faatufanua, le sailia o le lotomalie i tausuaga eleelea.”12
Ua aveese mai oe e lou Tama oi le Lagi mai Lona afioaga ina ia e maua ni aafiaga na semanu e te le maua i lou apitaga i le lagi—e saunia ai oe mo le tuuina atu o se malo. E le finagalo o Ia e sepu lau vaai. O outou o se fanau a se tagata faaeaina. Na muai faauuina outou e avea o ni tupu ma ni tupu tamaitai. O le a e nofo i se apitaga ma se siosiomaga e faavavau lona faamamaina ma le matagofie, e pei ona atagia i le gagana, tusitusiga, musika, faatufugaga, ma le faatulagaga o le lagi.
Ou te faaiu atu i le saunoaga a Peresitene Iaga: “Ia tatou … faaali atu i le lalolagi o loo i ai ni a tatou taleni ma mea tatou te mananao i ai, ma faamaonia atu i lagi ua tamau o tatou mafaufau i le matagofie ma le atoatoa moni, ina ia mafai ona tatou agavaa e olioli i le saofaiga a agelu.”13
Ma le isi, talosia ia tatou agavaa e olioli i le mafutaga faamamaina a matua faalelagi, aua o i tatou o ituaiga a Atua, o “fanau a le Silisili Ese” (Salamo 82:6).
Ata na pueina e Robert Casey; pito i lalo: si’o na saunia e le Shambala Publications; taumatau: si’o na saunia e le Nova Development
Ata pue © Getty Images