Ko E MEʻA Naʻe Akonaki ʻAki ʻe SIOSEFA SĀMITÁ
Uouangatahá
Mei he Ngaahi Akonaki ʻa e Kau Palesiteni ʻo e Siasí: Siosefa Sāmita (tohi lēsoni ʻa e Lakanga Taulaʻeiki Faka-Melekisētekí mo e Fineʻofá, 2007), 316, 317, 318, 319.
Naʻe mahino kia Siosefa Sāmita ʻa e mālohi ʻoku maʻu mei he uouangatahá.
ʻI he ngaahi ʻaho naʻe kamakamata ai e Siasí, naʻe fekau ʻe he ʻEikí ki he Kāingalotú ke nau taha (vakai, T&F 38:27). Lolotonga e moʻui ʻa e Palōfita ko Siosefa Sāmitá, naʻá ne fokotuʻu mo fakatahatahaʻi e Kāingalotú ke lavaʻi e ngāue ʻa e ʻOtuá. Naʻá ne akoʻi, tataki mo fakalotolahiʻi kinautolu ke nau feilaulauʻi honau taimí, ngaahi talēnití, mo ʻenau koloá ki he ngāue ʻo Saioné. Ko ha niʻihi ʻeni ʻo ʻene ngaahi akonaki fekauʻaki mo e uouangatahá.
Ko e Founga Fakahoko ʻo e Ngāue ʻa e ʻEikí
“ʻOku tau fiefia moʻoni ke ʻilo ʻoku ʻi ai ha faʻahinga laumālie uouangataha pehē ʻoku ʻi he siasí fakakātoa, ʻi heni pea ʻi mulí na … ; he ʻi he tefitoʻi moʻoni ko ʻení, pea mo hono fakatahatahaʻi ʻo ʻetau ngāué, te tau lava ai ke fakahoko lelei ʻa e ngaahi taumuʻa ʻa hotau ʻOtuá.”
“Ko e uouangatahá ko ha mālohinga. … Tuku ke tanumaki maʻu ai pē ʻe he Kāingalotu ʻo e Fungani Māʻolungá ʻa e tefitoʻi moʻoni ko ʻení, pea kuo pau ke hoko mai ʻa e ngaahi tāpuaki nāunauʻia tahá, ʻo ʻikai kiate kinautolu fakafoʻituitui pē, ka ki he Siasí fakakātoa.”
Ko Hono Siʻaki ʻo e Ongoʻi Siokitá
“Tuku ke manatuʻi ʻe he Kāingalotú ko e ngaahi meʻa lalahí ʻoku makatuʻunga ia ʻi heʻenau ngaahi feinga fakafoʻituituí, pea ʻoku ui kinautolu ke nau hoko ko e kaungāngāue fakataha mo kitautolu pea mo e Laumālie Māʻoniʻoní ʻi hono fakahoko ʻo e ngaahi ngāue maʻongoʻonga ʻo e ngaahi ʻaho fakaʻosí; pea … ʻoua naʻa tanu hifo ʻa e siokita kotoa pē, ka ke fakaʻauha fakaʻaufuli.”
“Tuku muʻa ke mahino kiate kitautolu kuo pau ke ʻoua naʻa tau moʻui maʻatautolu pē, ka maʻá e ʻOtuá; pea ʻi heʻetau fai iá, ʻe ʻiate kitautolu leva ʻa e ngaahi tāpuaki maʻongoʻonga tahá, ʻi he moʻuí ni pea mo ʻitāniti.”
Ko e Tāpuaki ʻo e Uouangatahá
“ ʻI hono fai fakamātoatoʻi ʻetau ngāué, mo uouangataha ʻetau feingá, te tau lava ai ke fakahoko ʻa e ngāue maʻongoʻonga ʻo e ngaahi ʻaho fakaʻosí … , lolotonga iá, ʻe tuʻunga lelei lahi ange ʻa e ngaahi meʻa fakaetuʻasino mo fakalaumālie ʻoku tau tokanga ki aí, pea kuo pau ke lilingi hifo ʻa e ngaahi tāpuaki ʻo e langí kiate kitautolu ʻi ha matavai ʻoku ʻikai lava ʻo taʻofi.”
Siosefa Sāmita, ko e Siʻí, tā ʻe Brad Teare