ʻOkú mo Fie Heka, Ongo ʻEletā?
Hili ia ʻeku fakaʻuli holo ʻi ha taimi lōloa heʻeku pasí ʻi Vikatōlia, ʻi ʻAositelēlia, ne u ʻave ʻeku uta fakaʻosí peá u foki ai pē ki ʻapi. ʻI heʻeku lele he halá, ne u sio ki he lue atu ʻa ha ongo talavou teunga lelei. Ne u fakakaukau ke tuʻu e pasí ʻo ʻeke ange pe te na fie heka.
Ne u fehuʻi ange hono ʻuhinga ne na tui pine hingoa, sote hina, mo hēkesi aí. Ne talamai ʻe he tokotaha ko e ongo faifekau kinaua ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI heʻeku fakafehuʻi ange ʻo kau ki heʻena ngāué, ne u ongoʻi ne ʻi ai ha faʻahinga meʻa naʻá ne fakafonu e loto pasí peá u toki ʻilo ki mui ko e Laumālie Māʻoniʻoní ia. ʻI heʻeku kole ange ke na fakamatala lahi ange ʻo kau kia Sīsū Kalaisí, naʻá ku fiefia lahi ʻi heʻena ngaahi talí.
Meʻapango ne fuoloa e poʻulí, ko ia ne u fakahifo e ongo faifekaú ʻi Tenitinonga. Ne u ongoʻi loto-mamahi kimui ai heʻeku toki fakatokangaʻi hake ne ʻikai te u maʻu hona fika telefoní. Ne u lotu ʻi ha ngaahi uike lahi ke mau toe fetaulaki. Naʻe aʻu pē ki heʻeku fakasio kinaua heʻeku fakaʻuli holo ʻi hoku halanga pasí. Ne ʻosi atu ha ngaahi māhina, pea fakaʻohovale ʻa e meʻa naʻe hoko ʻi hoku ʻaho fāʻeleʻí, ko e ʻaho 9 ʻo ʻAokosi, 2002.
Lolotonga ʻema kai hoʻatā mo hoku uaifí, ko Kamilia, ne fai mai ha tukituki he matapaá. ʻI heʻene ʻalu ke vakaí, ne u fanongo ki ha ongo leʻo ne u ʻiloʻi. Ko e ongo faifekau ko ia ne mau feʻiloaki he pasí! Ne na ʻohovale he sio kiate aú ʻo tatau pē mo ʻeku ʻohovale. Naʻe fai ʻena uiui ʻi homau halá ʻo na aʻu mai ai ki homa falé. Kuo tali ʻeku ngaahi lotú.
Naʻe kamata akoʻi leva kimaua ʻe ʻEletā Seisoni Foloniseni mo ʻEletā Sēmisi Fila. Ne foʻou kiate kimaua e Tohi ʻa Molomoná mo e Palōfita ko Siosefa Sāmitá, ka naʻe mahinongofua pē ʻa e ongoongoleleí he naʻá ma tupu hake pē he lotu faka-Kalisitiané. Ne kole mai e ongo faifekaú ke ma lotua mo fakalaulauloto ki he meʻa naʻá ma akó. ʻI heʻema fai iá, ne ma ongoʻi e Laumālié, ongoʻi ʻema fie maʻu lotú mo ha ueʻi ke ma papitaiso. Talu mei ai mo hono faitāpuekina kimaua.
Kuo ʻosi ha ngaahi taʻu lahi mei ai, pea ʻoku ou kei fakaʻuli pasi pē he ʻahó ni mo kei fakaheka ʻa e kau faifekaú heʻeku pasí. Ka ʻoku ou tokoni kiate kinautolu he taimí ni ʻi he ngāue fakafaifekaú ʻaki ʻeku fakafeʻiloaki kiate kinautolu ha kakai peá u vahevahe mo ʻeku kau pāsesé ʻa e Tohi ʻa Molomoná mo ha nāunau kehe ʻa e Siasí.
ʻOku fakatokangaʻi pē ʻe he kakai ʻi heʻeku pasí ʻa ʻeku fiefiá. ʻI heʻenau ʻeke mai hono ʻuhingá, ne u talaange, “Kuo fai ʻeni ʻe he ʻEikí maʻaku. Te Ne lava ʻo liliu hoʻomou moʻuí foki.”