ʻAi Haʻo Ipu
Naʻá ma ʻeveʻeva mālōlō mo hoku husepāntí ki Pemiuta hili pē ha taimi siʻi mei heʻemau kau ki he Siasí. ʻI he ʻaho ʻe taha lolotonga ʻema ʻi aí ne u kau ki ha fakafiefia hoʻatā ne fai ʻi homa hōtelé. Lolotonga ʻeku sio ʻuakai he fanga kiʻi keke ifó, ne u nāmuʻi ʻa e tií. Ne namu ifo ʻeni ʻo hangē pē ʻi heʻeku fakakaukaú ʻoku pehē mai ha tahá, “ʻAi haʻo ipu.”
Talu ʻeku papi mo ʻeku tauhi faivelenga ki he Lea ʻo e Potó. Ne u pehē pē ʻi hoku ʻatamaí, “He ʻikai.”
Kae hangē ʻoku pehē mai pē ha kiʻi leʻó, “ʻAi foki.” “ʻOku ʻikai te ke ʻiloʻi ha taha heni, pea ʻokú ke mamaʻo mei ʻapi.”
Ne u toe fakapapauʻi ange ʻeku talí ʻi haʻaku pehē pē ʻi heʻeku fakakaukaú, “He ʻikai!”
Naʻe toe ongo mai pē ʻa e leʻo fakatauele ko ʻení: “He ʻikai teitei ʻilo ki ai ha taha.”
Ne u tali fefeka ange, “Te u ʻiloʻi ʻe au!”
Ne u tuʻu he taimi ko ʻení he tafaʻaki ʻo ha tangata tali tēpile naʻe fai ʻene lilingi tī. Ne u fakapapauʻi e meʻa te u faí peá u ʻalu mei ai. ʻI heʻeku kumi haku tēpilé, ne u ʻohovale hono ui mai ʻe ha taha hoku hingoá. Ne u ofo he vakai atu ki he mata malimali ʻo ʻeku pule ngāue ki muʻa kuo taʻu lahi ʻa e ʻikai ke ma toe fesiofakí. Naʻá ne lue mai, pea ʻi heʻema ō atu ki he tēpilé, naʻá ne pehē mai, “Ne u fanongo ai kuó ke kau ki he Siasi Māmongá. Talanoa mai angé ʻo fekauʻaki mo iá.”
Ne u fiefia ke vahevahe mo ia ha niʻihi ʻo e ngaahi tefitoʻi moʻoni ʻo e ongoongoleleí, ʻa ʻeku fiefia ke kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea mo ʻeku fakamoʻoní. Ne talamai ʻe he tokotaha ko ʻeni ne hoko ko hoku pule ki muʻá, ʻa ʻene fekumi ki hono hingoa fakafāmilí pea kuó ne hiki ha toʻu tangata lahi ʻo hono hisitōlia fakafāmilí. Naʻe fakamoʻomoʻoni ʻene fie fanongo ki he meʻa ne u vahevahe ange ʻo kau ki he Siasí, pea ʻi heʻema talanoá, ne u ongoʻi ʻene fonu Laumālieʻiá.
Lolotonga ʻema talanoá, ne haʻu ki hoku ʻatamaí e fakakaukau ko ʻení, “Ne mei hoko nai e pōtalanoa ko ʻení kapau naʻe ʻi ai ha ipu tī ʻi hoʻo laulaú?” Naʻá ku ʻiloʻi e talí. Kapau ne u fakavaivai ki he ʻahiʻahí, ne ʻikai hoko e pōtalanoa fakalaumālie fakangalongataʻa ko ʻení mo ha faingamālie ke vahevahe ai ʻeku fakamoʻoní.