Tohi ki he ʻĒtitá
Maluʻi ʻe he Pōpoakí
ʻI he ʻaho ʻe taha naʻá ku ʻaukai ai he naʻe lahi e ngaahi faingataʻa ne u hohaʻa ki aí, peá u fakaava hake ʻa e Liahona ʻo Siulai 2007. Ne u fakakaukau ke u lau mei he Moʻui ʻa Palesiteni Sipenisā W. Kimipoló, ʻa e konga naʻe ui ko e “Tekeʻi e Ngaahi Mālohi ʻo e Koví,” ʻa ia naʻe ʻikai te u faʻa lau he naʻe ʻi he konga ia ʻa e fānaú. Naʻe tokoniʻi au ʻe he talanoa ko ʻení ke u hao mei he ngaahi ivi takiekina kovi naʻá ne ʻātakaiʻi au ʻi he ʻaho ko iá, pea naʻe maluʻi au ʻe he pōpoakí. ʻOku ou poupouʻi atu ʻa e tokotaha kotoa pē ke ne lau kātoa e Liahoná.
Ko e Liahoná ko ha maama ia mo ha maluʻi kiate au. Ko e ʻuluaki meʻangāue pē ia ʻoku ou fakaʻaongaʻi ke malangaʻiʻaki ʻa e ongoongoleleí ki hoku ngaahi kaungāmeʻá.
ʻĀleti Asi, ʻAivolī Kousi
Ko e Fakapulipuli ʻOku ʻIkai Lahi Hono ʻIló
ʻI he ʻaho ʻe taha lolotonga ʻeku teuteuʻi ʻa e lēsoni ʻa ʻeku Kau Finemuí, ne u ʻiloʻi naʻe ʻi ai e ngaahi konga ʻo e lēsoní naʻe fie maʻu ki ai ha nāunau fakalahi. Ko e taimi ia naʻá ku toʻo mai ai ʻa e fakapulipuli ʻoku ʻikai lahi hono ʻiló—ko e Ngaahi Maʻuʻanga Fakahinohino maʻá e Lakanga Taulaʻeiki Faka-ʻĒloné mo e Kau Finemuí. ʻOku ʻi he ngaahi fakahinohino ko ʻení ʻa e ngaahi fokotuʻu ki ha ngaahi talanoa mo ha fakamatala kimuí ni mai mei he palōfitá mo e Kau Taki Māʻolunga kehé ʻa ia ʻe lava pē ke fakalahi atu ʻaki ki he ngaahi lēsoni ʻa e Kau Talavoú mo e Kau Finemuí ke tokoni ki he toʻu tupú ʻi heʻenau fehangahangai mo e ngaahi meʻa ʻoku hoko he ʻaho ní.
ʻOku fakafiemālie ʻaupito e ngaahi maʻuʻanga tokoni ko ʻení kiate au ʻi heʻeku hoko ko ha takí he ʻoku ou ʻiloʻi kuo fakafou mai ʻa e ngaahi talanoá mo e fakamatalá ʻi he kakai totonu pea ʻoku ʻi ai ʻa e tokāteline moʻoní. ʻE lava ke fakaʻaongaʻi tauʻatāina pē kinautolu ke fakalahi ki he ngaahi lēsoní, ka ʻoku ʻikai ko hano fetongi.
Sinelo Uele, ʻIutā, USA
Ko e Konga ʻOku ou Manako Taha Aí
Ko ha tāpuaki maʻongoʻonga ia ke maʻu ʻa e tohi fakaʻofoʻofá ni, ʻa ia ko e Liahoná. Mālō mo e makasiní ni ʻoku mau lava ai ke maʻu e ngaahi lea ʻa e kau palōfitá mo ʻilo ki he ngaahi meʻa fakalaumālie naʻe aʻusia ʻe homau ngaahi tuongaʻane mo e tuofāfine ʻi māmaní kātoa. Ko e konga ʻo e makasiní ʻa ia ʻoku ou manako taha aí ko e Ngaahi Leʻo ʻo e Kau Māʻoniʻoni ʻi he Ngaahi ʻaho Kimui Ní. ʻOku faingataʻa ke u taʻeongoʻi e Laumālié ʻi he taimi ʻoku ou lau ai e ngaahi talanoa fakaʻofoʻofá ni.
ʻOku ou seivi ʻi heʻeku komipiutá ʻa e ngaahi tatau PDF ʻo e ngaahi makasini ʻoku maʻu ʻi he Uepisaiti ʻa e Siasí. Ki muʻa pea kamata ʻeku ngāue he ʻaho ko iá, ʻoku ou lau ha fakamatala koeʻuhí ke lava ʻo fakafonu au ʻaki ʻa e Laumālié. Fakamālō atu koeʻuhí ko e Liahoná.
ʻOsikā Havi ʻAlavalesi Komesi, Kolomupia
Ko ha Meʻangāue ʻAonga
ʻOku ou tui ko e Liahoná ko ha meʻangāue ʻaonga ia he ʻokú ne tuku ke tau ako ki he ngaahi fakamoʻoni mo e ngaahi meʻa ʻoku aʻusia ʻe he kāingalotú ʻi he funga ʻo e māmani. ʻOku ou houngaʻia foki ʻi heʻeku fanongo ki he ngaahi talanoa mei he kāingalotu kehé pea pehē foki ki hono maʻu ʻo e akonaki mei hotau kau takí. ʻOku hoko ʻenau ngaahi leá ko ha fakahinohino moʻoni. ʻOku toe hoko foki e makasiní ko ha founga ʻe lava ke tau houngaʻia ai ʻi he fakalakalaka mo e tupulaki ʻa e Siasí ʻi he funga ʻo e māmani.
Telise ʻAtolofi, Motu ko Liʻiunioní
Naʻa Mou ʻIlo Fēfē?
Naʻe lahi e taimi ne u fie tohi ai ki he kau Palesitenisī ʻUluakí mo e Kau Taki Māʻolungá ʻo fehuʻi ange, “Naʻa mou ʻilo fēfē?” Ko e taimi kotoa pē ne u fanongo ai mo lau e ngaahi lea ʻi he konifelenisí, naʻe hangē ia ʻoku folofola fakahangatonu mai pē ʻa e ʻEikí kiate au fekauʻaki mo ha ngaahi meʻa pau ne u tokanga ki ai. Kuó u ako mei he ngaahi meʻa ko ʻení ʻo ʻiloʻi ʻa e ʻofa lahi ʻa e Tamai Hēvaní ʻiate aú mo ʻEne fie tokoniʻi au ke u hoko ko ha tokotaha lelei angé. Naʻe aʻu mai e ngaahi pōpoaki ʻo e konifelenisí kiate au ʻi ha feituʻu pē naʻá ku ʻi ai, ʻo aʻu pē ki haʻaku ʻi ha ngaahi feituʻu mamaʻo. Naʻe hoko e ngaahi pōpoakí he taimi ʻe niʻihi ko ha ui kiate au ke u fakatomala, taimi ʻe niʻihi ko ha fakahinohino, pea taimi ʻe niʻihi ko ha fakafiemālie. Ne u faʻa ongoʻi hangē ko au ʻi he fānau ʻa e Tamai Hēvaní naʻá Ne ʻofa taha aí ʻi heʻeku sio ki Heʻene tokangaʻi lelei au ʻo fakafou ʻi he ngaahi pōpoaki ko ʻení.
Sālini Kelenisoa, Monitana, USA
Tā fakatātaaʻi ʻe Daniel Lewis