Meafaigaluega e Tolu e Fausia ai se Fale Paia
O gaoioiga o aso uma i totonu o o tatou aiga e ofoina ai avanoa e faataitai ai le alofa, auauna atu, usiusitai, ma le galulue faatasi.
Mo paionia, o le tausiaina o o latou aiga, e manaomia ai ni galuega mamafa ma le puipuiga mai le siosiomaga faaletino le alofa. Mafaufau i le tala e uiga ia Ann Howell Burt. Sa malaga mai o ia mai Uelese, faaipoipo, ma nofo i se fale e fai i palapala i Iuta i matu i le taimi o le taumalulu o le 1863. I le avea ai ma se tina talavou, sa tatau ai ona galue malosi o ia ina ia tumau le maopoopo ma tali atu i manaoga o lona aiga. Sa ia tusia i lana tusi o talaaga:
“O ni nai aso ua tea, sa ou tapeina ai se gata uogo i lau laau olo falaoamata, a o tolotolo mai i lalo o le fasitepu. Sa ou kukaina le meaai o le po a o i ai le pepe i luga o le fola po o le palapala foi… . Sa matuai ou fefe lava… .
“… O ni nai aso na tea atu, a o fuefue ese lago mai foliga o pepe a o moe … , na ou iloa ai … se apogaleveleve taufeu o totolo mai i le pepe. Na ou tosoina mai se salutu, ma sasa i le au le apogaleveleve taufeu ma ina ua mau lelei i le salu … sa faavave loa ona ou togiina i le afi.”1
E ui o le toatele o i tatou atonu tatou te le tau popole i ni apogaleveleve taufeu ma ni gata e osofaia o tatou fale, ae o loo i ai ni uunaiga e sili atu ona matautia e faamatauina ai i tatou. O o tatou apogaleveleve ma gata e faatatau i uiga lelei, ma e ese le maaleale. E aofia ai le faapau o pepe, le fiafia e faia galuega i le fale, o le faigata ona faatulaga taimi o taumafataga faaleaiga, suia o matafaioi mo tina ma tama, ma le faamutaina o faaipoipoga e ala i le tetea, nonofo faapouliuli, faaipoipoga a itupa tutusa. E manaia pe a mafai ona tatou sasaeseina nei mea faalafua i meafaigaluega o le fale, ae peitai, ua tele a tatou laau olo falaoamata ma a tatou salutu ua leiloloa.
Fai Ifo o le Olaga Faaleaiga
O aso nei ua avea ma masani le faalogo atu i tamaitai talavou o faamatalaina a latou sini mo le lumanai i faaupuga o fuafuaga mananaia mo galuega. Atonu foi e mananao nei tamaitai talavou e avea ma ni ava ma ni tina, ae o aso nei, e foliga mai ua sili atu ona taua le faasilasilaina muamua o sini mo se galuega. E ui ina tatou faatauaina nei avanoa mo tamaitai, ae ua toetoe lava a mou atu ia tulaga faatina ma le faatausiaiga mai le olaga i aso nei, o ni auala masani ma le taua mo tamaitai.
Nai lo lena, e foliga mai o le savali o le a i ai e faapea, afai e maua e tina ia mea mananaia o aso nei e tausia ai o latou fale ma aiga, ona tatau lea ona latou saoloto e saili le faamalieina o i latou lava. O le aiga e masani ona manatu sese i ai, o se nofoaga e tatau ona saoloto mai ai tamaitai. O nisi foi manatu e oo ai ni lagona i tamaitai e faapea, o tiute i le fale ua faatapulaaina ai o latou agavaa atoatoa, ma ua faaosoosoina ai tamaitai ma alii ina ia le amanaiaina le taua o tulaga o le olaga faaleaiga i aso uma—o le mea lea ua leiloloa ai a tatou laau olo falaoamata ma salutu.
A o faasaolotoina mai i tatou e mea mananaia o aso nei mai nisi o galuega o le tausiga o se aiga, ua faapea ona taitaiina atu ai i le fai ifo o le olaga faaleaiga. Ua faaosoosoina i tatou ia le amanaiaina le taua o gaoioiga faaleaiga i aso uma e pei o le faia o taumafataga faaleaiga, ma o lea faiga, ua le maua ai ni avanoa taua mo le tuputupu ae o tagata taitoatasi ma le aiga. Na faamalamalama mai e le tusitala o Cheryl Mendelson: “A o matele ina liliu atu tagata i faalapotopotoga i fafo e faataunuu ai o latou manaoga o [aso taitasi] … , o o [tatou] tomai ma faamoemoega … ua fai ifo, o lea e faaitiitia ai le avanoa e mafai ai e fale o tagata ona faamalieina o latou manaoga.”2
I le konafesi aoao, na lapatai mai ai Peresitene Spencer W. Kimball (1895–1985): “O le tele o puipuiga faatapulaa lea sa fesoasoani ia i tatou i aso ua mavae e faamalosia ma taofiofia ai le aiga, ua mou ese atu ma ua leai. O le a oo mai le taimi na o i latou lava e talitonu moni ma malosi i le aiga o le a mafai ona faasaoina o latou aiga i le totonugalemu o le taifanae o mea leaga e siomia ai i tatou.”3
Puipuia o o Tatou Fale ma Aiga
E mafai faapefea ona tatou puipuia lelei o tatou aiga mai lenei “taifanae o mea leaga” ma alualu i luma ia tatou sini e faavavau?
Muamua, e tatau ona tatou toefaafouina lo tatou aoaoina ma faasaoina le natura paia o le aiga ma ona faamoemoega. I le Bible Dictionary tatou te faitau ai, “E na o le aiga lava e mafai ona faatusalia i le malumalu lona paia.”4 Afai o o tatou aiga e faatusaina i le malumalu, o le a la le mea e faatatau i le aiga e mafua ai ona paia? Ua faauigaina e se tasi lomifefiloi le paia o le “e a le Atua po o le faapaiaina i le Atua; agavaa mo le faaaloalo; vaetofia mo po o le faapaiaina mo ni tagata, mea faitino, po o faamoemoega; lea e [faapea] e le tatau lava ona solia pe le amanaiaina; puipuia lelei, mai le vevesi po o mea faasalavei.”5
Ia faatatau lenei manatu o le paia i gaoioiga i aso uma i lou aiga e pei o taimi o taumafataga, musika, gaoioiga faafiafia, tagamea, ma le teuina o lou fale ma le fanua. O gaoioiga masani e mafai ona i ai se faamoemoega e maualuga atu ma e le tatau ona le amanaiaina; e aumaia ai avanoa tatou te tuputupu ae ai ma faataitai ai uiga lelei ma amioga tausaafia. O le faia o nei gaoioiga i aso uma, e mafai ai ona tatou aoao e uiga i upumoni lelei ma ola i le faamaoni, onosai, agaalofa, ma le agalelei faaleuso. O galuega i aso uma ma gaoioiga faafiafia i totonu o le aiga e maua ai ni siosiomaga lelei mo tamaiti ma tagata matutua e faia ai filifiliga ma aoao mai ai. Mo se faataitaiga, o se tamaitiiti, o se toalua, po o se tagata foi e potu faatasi, e mafai ona filifili e faia se sao i le aiga e ala i le vaaia o mea e tatau ona fai ma faia ma le fiafia. Po o le faatalitali foi seiloga e tau faatonu atu ona faaseā lea e uiga i le le talafeagai.
O gaoioiga i aso uma i o tatou aiga e foliga mai e faatauvaa lava, o lea tatou te le ano ai i lo latou taua—e pei o le fanauga a Isaraelu o e na taia i se mala o gata. Ina ia faamaloloina sa na o le tepa atu lava i le gata uamea i luga o se pou (tagai Numera 21:8–9), ae talu ai ona sa matuai faatauvaa lava, o lea na toatele ai i latou sa le’i faia. “Ona o le faatauvaa o le ala po o lona faigofie, ua toatele ai e na fano” (1 Nifae 17:41). O gaoioiga i aso uma i totonu o o tatou aiga atonu e faatauvaa, ae ona o lo latou faatauvaa, fai soo, ma fai faafia, e tuuina mai ai avanoa taua e tuputupu ae ai tagata taitoatasi ma aiga.
Lua, e tatau ona tatou faia taimi o taumafataga faaleaiga o se mea e tupu i aso uma. O aso nei, o le toatele ua faigofie atu ia i latou ona tausami le tagata ia i lona umukuka, aai i totonu o a latou taavale, po o le alu foi i se faleaiga latalata mo se meaai vave nai lo le saunia o se taumafataga ma saofafai faatasi i lalo o se aiga, ma aai.
O le a le mea ua tatou le mauaina? O taumafataga faaleaiga e i ai ni aafiaga aoga se tele. Ua tau mai e faamaoniga, o taumafataga faaleaiga e fesoasoani ai i tamaiti e maua se taumafataga paleni lelei atu6 itiiti ni faafitauli o le mafaufau, ma laiti foi ni amioga le lelei pe faaleaga ai le tagata lava ia.7 O taumafataga faaleaiga i se siosiomaga lelei e i ai foi sana matafaioi taua i le puipuia o faiga masani o le le pulea lelei o le puta [o le tino].8
O gaoioiga faatauvaa o le gaseseina o se meaai ma taumamafa faatasi ai, e fesoasoani lea i tagata o le aiga ina ia tumau ai le fesootai. E le faapea e tau fai se meaai taugata ina ia maua ai se taimi e fesootai ai ma iloa ai pe na faapefea mai le aso o tagata taitoatasi. O faasalavei mai fafo e mafai ona pulea ina ia tuu atu le faamamafa i le pasiina o le meaai, talanoa, ma fegalegaleai faatasi. E iloa ai e tamaiti ona fetufaai i meaai a le aiga nai lo le fai atu mo se oka a le tagata lava ia e pei ona latou faia i se faleaiga. O taimi masani o taumafataga faaleaiga e maua ai e tamaiti se lagona o le saogalemu aua ua latou iloa le mea e faamoemoe i ai i le faaiuga o aso taitasi. O se taimi foi e faailoa ai le agaga faafetai i le Atua e ala i le tatalo mo meaai ma isi faamanuiaga. Ae atonu o le mea aupito sili ona taua, o le aga masani o taumafataga faaleaiga e mafai ona siitia ai le tulaga o talatalanoaga faasamasamanoa e uiga i le talalelei.
Tolu, e tatau ona tatou iloa o gaoioiga faaleaiga e i ai ona aafiaga faaletino ma le faaleagaga. Ua tuuina mai e le Atua ia i tatou na o poloaiga faaleagaga; e leai se poloaiga e faaletino (tagai MFF 29:35). O le faaletino o lona uiga e na o le taimi nei lava e gata ai. O Ana poloaiga e faavavau. E mafai ona tatou faatatauina lea i o tatou aiga e ala i le iloaina o a tatou amioga i le lalolagi e i ai ni taunuuga faavavau. O a tatou amioga e foliga ai le tagata tatou te avea ai i le taimi nei ma le olaga a sau. Mo se faataitaiga, o le tane ma le ava “e alofa ma tausi e le tasi le isi ma a la fanau,”9 latou te uunaia le alualu i luma o uiga e mafai ai e i latou ma a latou fanau ona alualu i luma i le faavavau.
Tatou te aoaoina lesona o le olaga i le aiga e faapea ona fausia ai se uiga mausali faaletagata lava ia. Ua faamanatu mai e le tagata suesue e uiga i aiga o Enola Aird e faapea, o le aiga tatou te aoao ai e galulue ma pulea i tatou lava, tatou te aoao ai amioga faaaloalo ma uiga lelei, tatou te aoao ai le avea ma tagata ola tutoatasi—pe leai foi.10 “A aunoa ma galuega faaleleia a matua, atonu o le a fai si popoto o tamaiti, atamamai, ma faamanuiaina ae matuai mataū, manatu faapito, ma lē manatu popole e pei o le matuai le mafaufau lava—e le mafai ona ola i se agaga o le lotogatasi ma isi.”11
Afai tatou te iloa le taua o le olaga i aso uma, e mafai ona tatou iloa e oo lava i le tamaitiiti e aupito laitiiti e mafai ona lagonaina le pei o se tagata taua e ala i se galuega masani e pei o le gaugauina o le tagamea. E mafai e tamaiti laiti ona faatutusa totini, ilo lanu, gaugau solo, ma ia viia mo mea ua latou ausia. I le aluga o tausaga a o faateleina le faigata o feau, e maua e tamaiti le talitonuga i o latou tomai e filifili ma faia mea e aoga.
Faamalamalamaina o o Tatou Fale
O tiutetauave faaleaiga o avanoa ia e faataitai ai le mauaina o le malamalama ma le upumoni e ala i le usiusitai. O Iesu Keriso o le Malamalama o le lalolagi. A tatou mulimuli ia te Ia ma tausi Ana poloaiga, ua tatou savavali i Lona malamalama. O le latalata lava o le tatou mulimuli atu, o le tele foi lea o le malamalama ma le upumoni tatou te maua. E mafai ona tatou faataitaia le usiusitai mo a tatou fanau e ala i le faia o o tatou tiutetauave. Mo se faataitaiga, o le iloa ona fai feau i taimi uma, e mafai ai e matua ma fanau ona aoaoina le usiusitai ma le oso tatau i nai mea laiti, lea e tau le ogaoga ona taunuuga. Ma e saunia lelei ai i latou e tausia poloaiga ma osia feagaiga paia.
Faatasi ai ma faatonuga autu taua na tuuina mai ina ua faatulagaina le Ekalesia, sa i ai ma le fautuaga ina ia “faia tiute uma faaleaiga” (MFF 20:47, 51). E tolu tausaga mulimuli ane, na aoaiina ai nisi o le usoga o taitai o le Ekalesia ona o le tuulafoaiina o o latou tiute faaleaiga (tagai MFF 93:41–50). O aso nei, i le folafolaga i le aiga, ua toe faamanatu mai ai ia i tatou e uiga i o tatou tiute paia faaleaiga.
E masani ona tatou mafaufau i tiute faaleaiga e faatatau i le tatalo faaleaiga, afiafi faaleaiga, ma le faitauina o tusitusiga paia, ae e tatau foi ona tatou manatua o gaoioiga e pei o le fafagaina ma le faalavalavaina o i tatou lava e fesoasoani tatou te faamasani ai i le alofa, auauna atu, usiusitai, ma le galulue faatasi. O nei aga masani faigofie i aso uma, e i ai se mana malosi i o tatou olaga.
Pe mafai ona tatou faalatalata atili atu i le Alii e ala i le ola i aso uma—e ala i taumafataga faaleaiga ma gaoioiga faafiafia lelei? E moni lava. O le a le tele o le malamalama tatou te manaomia? Na folafola mai le Alii, “O le talia foi le malamalama, ma tumau pea i le Atua, e faateleina atu i ai le malamalama” (MFF 50:24), ma, “[Ou te] tuuina atu i e faamaoni lea fuaiupu ma lea fuaiupu, o lea mataupu ma lea mataupu; ma o le a ou tofotofoina ma faataitaiina ai outou” (MFF 98:12).
Ia faamaonia le faamaoni i nai mea iti, ma o le a faapea ona faaopoopoina mai ai mea tetele. O avanoa e aoao ma faataitai ai i totonu o le aiga e paia; o taimi ia e tuputupu ae ai faaleagaga ma faalatalata atili atu ai i le Faaola. O lenei faagasologa o le tuputupu ae o se tausinioga e faia i le olaga atoa, ma o o tatou siosiomaga i le aiga tatou te maua ai i taimi uma avanoa e faataitai ai ona avea ma tagata taitoatasi ma aiga e pei o se atua.
Mai se saunoaga i se faigalotu na tuuina atu i le Iunivesite o Polika Iaga i le aso 5 o Aperila, 2005.