O La’u Tauiviga ma Ponokarafi

Taofia le igoa

E tusa lava pe o le a lo’u taumafai malosi e aluese mai mai lo’u mausa, sa ou toilalo lava i le tauiviga. Na iu lava ina ou iloaina e le mafai ona ou faia na o au.

O le 10 o ou tausaga o le taimi muamua lea na ou tau ai i ponokarafi. Sa ou i ai i le fale o sau uo e matua [ia te au], sa ma matamata i le televise. Sa faliu atu o ia i lana komepiuta ma fai mai, e i ai se mea na te fia faaalia mai ia te au. Ina ua ou fesili atu po o le a, sa fai mai o ia, “O ata mananaia o teine.” Na ou tau atu ia te ia e le faatagaina i lau ekalesia ona matamata i na ituaiga ata, ae sa ia fai mai, “Oi e mo’i. E matamata tagata uma i mea faapenei—o le mea masani lava.” Na ou musu ou te tilotilo i ai ma na ou aluese loa.

O le lua tausaga mulimuli ane, sa ou toe i ai foi i le fale o lau uo. Ae o le eseesega la i le taimi lenei, na ou faatagaina le fiailoa ma le faaosoosoga e faatoilaloina au, ma sa ou malie ai loa e matamata i mea na ia faaali mai ia te au. O le mea sese aupito tele lea o lou olaga. O aso uma lava ou te moomoo ai maimau pe ana ou le faia le mea na ou faia.

Sa faaauau ona ou matamata i ponokarafi i lau komepiuta i le fale. Sa i ai i se nofoaga e le iloa e tagata, ae a faapea e maua atu au e se tagata, ou te fai i ai o se ata na oso faafuasei mai pe fai foi nisi alofaga. O le tausaga na sosoo ai na ou nanaina ai le tausalaina na ou lagonaina ma ou te le’i taumafai foi e tuu le matamata i ponokarafi. Sa ou faatalitonuina au lava, o se mea ua masani ai ma le amanaiaina soo se fautuaga mai le Ekalesia lea na aoaoina au e le o se mea lelei lea. Ou te le’i iloaina i le taimi muamua, ae na avea ma au mausa ia ponokarafi. Na amata ona sui lau tilotilo i teine, ma sa ou ma i ou manatu na i ai.

I se konafesi a le autalavou, na saunoa ai lou peresitene o le siteki e uiga i le avea o le matamata i ponokarafi ma mea e le agavaa ai alii talavou e faaaoga le perisitua. O lana saunoaga na uunaia ai au e tatau ona tuu. I le taimi muamua, sa ou faapea e mafai ona ou faia lava e au. Ou te le’i manao e tau i le epikopo ona ou te le’i manao na te faamasinoina au mo le mea na ou faia. Ae, sa na o lo’u tautino lava ina ia aua nei ou toe tilotilo i ai. Ae paga lea, sa le’i umi au tautinoga. Sa ou folafola ia te au lava i taimi uma o le taimi mulimuli lena, peitai sa matuai mauaa le mausa ia te au, o lea na iu ai ina ou matamata ma saga matamata ai pea.

E tele isi agasala na oo mai ona o se taunuuga o lenei matamata i ponokarafi. Sa faaauau ona ou alu i le lotu ae ou te le’i faalogo lelei. Sa ou faatagaina Satani e pule i lou olaga ma aveesea ai le faatosinaga a le Agaga. Sa ou pepelo e uiga i le faitauina o tusitusiga paia i le seminare. Sa ou pepelo e uiga i faamaumauga a Tama Sikauti. Sa oo foi ina ou kopi i le aoga. Na avea au ma se ituaiga tagata lea sa aoaoina au ia aua nei ou avea ai.

Ua mavae le lima tausaga o ou taumafai e faatoilalo lou mausa e ala i le tatalo ma le loto pulea. Ae sa le mafai ona ou faatoilaloina lea mausa na o au lava.

Na iu lava ina ou tauina i ou matua, na i ai sou faafitauli i ponokarafi. Sa ou fai atu ia i laua, “Ou te manaomia se fesoasoani. E le mafai ona ou faia toatasi lenei mea.” E ui lava ona sa faigata ia i laua, ae sa malamalama lava i laua ma taumafai e fesoasoani mai ia te au. Sa uunaia au e ou matua ina ia ou alu e talanoa i le epikopo.

Na ou iloaina na sao ou matua, ae sa ou fefe e talanoa i lou epikopo. Sa ou mafaufau ia te ia o se uo, ma sa ou le manao na te iloaina nei agasala uma na ou nanaina. Ma mulimuli ane, ina ua ou maua le lototele e feiloai atu ai ia te ia, sa faateia au i lona loto malamalama na i ai. Ou te le’i lagona sa ia faamasinoina au; ae sa na o le manao e fesoasoani mai.

O le taimi lava na ou tauina uma ai i le epikopo ma amata ona ou salamo, na vave lava ona toe lelei lou olaga. Na ou malamalama, ina ia salamo atoatoa i lau mausa o ponokarafi, e tatau ona ou salamo i au agasala uma. Sa ou toe faafoiina uma au tusipasi o le seminare ma pine o le Sikauti, ma tautino atu ou te le’i ausiaina ia mea. Sa ou tau atu foi i ou faiaoga i le aoga sa ou kopi.

Faatasi ai ma le fesoasoani a le epikopo, na ou iloa ai le taua tele o le tautau atu i le epikopo faapea foi ma le Alii (tagai MFF 58:43). O le taimi muamua, sa ou taumafai na o au lava e tauivi ma lenei mausa, ae o le taimi lenei, ua i ai ou matua, lou epikopo, ma le aupito taua, o le Alii i lau itu. O puipuiga malolosi nei e tetee ai i faaosoosoga.

Ua i ai se loka faalematua i luga o le komepiuta, ma ua amata ona ou tuuina latalata i ai ata o le malumalu po o le perofeta e faatumauina ai lou mafaufau i mea paia. Na ou iloaina o le suesue i aso uma i tusitusiga paia, o se tasi lea o mea aupito sili ona aoga e fausia ai au puipuiga faaleagaga. I le taimi na ou tilotilo ai i ponokarafi, ou te le’i iloaina pe na ou iloa le mea na i ai au tusitusiga paia. Ae o le taimi lenei, ua ou iloa e tatau ona ou faitauina au tusitusiga paia i aso uma ina ia mafai ona ou tetee atu i faaosoosoga.

Ua ou faaeteete atili foi i mea ou te matamata ma faalogologo i ai. E tele polokalama o le televise ma talanoaga i tifaga e talanoa ai i mea le mama e pei o se mea ua masani ai. Ua ou iloaina o se mea masani i le tagata o le lalolagi, o se fili i le Atua (tagai Mosaea 3:19). E na o le Togiola a Iesu Keriso ua mafai ai ona ou tuueseina le tagata o le lalolagi ma faamagaloina i au agasala. Ua ou iloa, afai e mafai e se tasi ona malamalama i le salamo na ou pagatia ai ona o au agasala, o le Faaola lava lea, o le na puapuagatia i mea uma.

O lenei la ua ou lafoaiina lou mausa o ponokarafi. Ua oo ina ou malamalama e faapea, e ala i le Togiola, o loo i ai se faamoemoe e faavavau. E ui ina o le a tumau pea ona ou mataala, ae faatasi ai ma le fesoasoani a le Faaola i lou olaga, o le a ou manumalo ai i le taua. Ou te iloa o le a taumafai pea le tiapolo e faaosooso au, ae o le a le mafai lava ona ia manumalo pe a i ai le Faaola i lau itu.

Na ou aoaoina i le ala faigata, e na o le tasi lava le taimi e faaosoina ai le amataga o se mausa umi lea e leai se mea e maua ai ae na o le faanoanoa. Na ou faatagaina le leaga o le fiailoa e taitaiina au i le agasala ma le leai o se faamoemoe, ae ua faaosofia au ina ia ou aloese mai lenei mala i aso o totoe o lou olaga. Ou te tulimatai atu i le auauna ai i se misiona, faaipoipo i le malumalu, ma iu ai ina toe mafuta faatasi ma le Tama Faalelagi ma Iesu Keriso.

Puipuiga

O le puipuiga sili lava i ponokarafi o le aluese mai ai. O nai motugaafa nei o le a puipuia ai oe mai le faia o le laasaga muamua agai atu i le mausa [o ponokarafi] ma ona faafitauli uma:

O le toatele o tagata o e tauivi ma ponokarafi na faailoa atu i ai e se uo. Afai e ofo atu soo se tasi e faaali atu ia te oe ia ponokarafi, ia e aluese vave loa. Ia filifili ma le totoa ia tagata e faaalu ai lou taimi.
Ia e maua le lototele e tape ai soo se ala o faasalalauga e faaalia ai pe talanoa i mea le mama, e tusa lava pe o le a le faatulagaga [o le matutua].
Tuu ia televise ma komepiuta i itu o le fale e toatele ai tagata e ui atu ai. Aua nei faaaogaina le komepiuta pe afai na o oe le fale.
Ia mautinoa o soo se komepiuta e te faaaogaina e te alu ai i le Initoneti, ia i ai se faamama lea e polokaina ai Uepi saite o ponokarafi. Ia puipuia oe lava mai afa o ponokarafi (tagai i le upusii mai ia Peresitene Hinckley i le itulau 34).
Aua nei tatalaina i-meli mai se tasi e te le iloaina. Afai e te tau faafuasei atu i se Uepi o ponokarafi, ia tape vave le komepiuta ae tau atu i se tagata matua.
Faalogo i musumusuga a le Agaga Paia. O le a ia lapataia oe pe a e i ai i se tulaga matautia.

Toe faaleleia

Afai ua maua oe i le mailei o ponokarafi, e tatau ona e salamo ma faatoilalo lea mausa. Galue i lou salamo faatasi ai ma le fesoasoani a lou epikopo po o le peresitene o le paranesi. Ua tuuina mai e le LDS Family Services ia fautuaga nei mo le toe faaleleia mai se mausa:

Tuu le taufaatauvaaina. E tatau ona tuu lou tauamiotonuina o lau amio e faatatau i mausa.
Faasalavei le taamilosaga o le mausa. Puipui le lio lenei o mausa mai le toe faia:
- Vaega 1: Faamamai—o le mafaufau pea i ata faalemafaufau e faaosofiaina ai tulaga o feusuaiga.
- Vaega 2: Masani—auai i faiga masani lea e oo atu ai i le faaaoga o ponokarafi.
- Vaega 3: Matamataina po o le faaaogaina o ponokarafi.
- Vaega 4: Leai se faamoemoe.
E mafai ona e faatoilaloina le faaosoosoga ia vaai atu i ponokarafi e ala i le motusiaina o le taamilosaga i soo se vaega o vaega e fa. O auala nei e taofi ai le vaega e tasi mai le oo atu i le isi vaega:
1. 1. Pulea ou mafaufauga ma faananauga. Faaaoga le faatuatua, anapogi, tatalo, ma le faitauina o tusitusiga paia e faatoilalo ai mafaufauga le mama. Sui mafaufauga le lelei i le taimi lava e oo atu ai i lou mafaufau e ala i le faalogologo i musika musuia, fai o mau ua taulotoina, pe mafaufau i mea lelei.
2. 2. Sui au amioga masani. Fai se mea e ese mai, e pei o le alu e savalivali, faitau tusitusiga paia, talanoa i se uo, po o le faataitai o se taaloga po o se mea fai musika.
3. 3. Lafoai le avanoa. Taofi oe lava mai le tilotilo atu i ponokarafi e ala i le taofia [o auala] e maua ai.
4. 4. Tatalo mo le faamoemoe e suia ai le leai o sou faamoemoe. Aua nei faatagaina ia faafitauli e faalotovaivaia ai oe. E ala i le salamo ma le faamagaloga, e mafai ai ona e lagona le faamoemoe nai lo le leai o se faamoemoe. O le foiaina o le mausa o se faagasologa e umi se taimi e alu ai. O i latou e manumalo ai e onosai pea.
Saili le fesoasoani faapolofesa. O mausa ogaoga e ono manaomia ai fautuaga faapolofesa. I nisi o eria, e mafai e lou epikopo po o le peresitene o le paranesi ona faailoa atu oe i se ofisa o le LDS Family Services e lata ane, lea o loo i ai se polokalama o le toe faaleleia o [tagata] e i ai mausa. Asiasi i le www.ldsfamilyservices.org mo nisi faamatalaga. O le tamaitusi a le Ekalesia o le Ia Teuteuina Ou Manatu i le Mama (aitema nu. 00460 890) o loo i ai foi faamatalaga aoga i le faatoilaloina o ponokarafi.

Saili le malutaga

Ata

“O le alofaga lava e faapea o [ponokarafi] ua faigata ona aloese mai ai, ma ua faigofie ona maua ma ua leai se mea e solaese mai ai. Faapea o se afa ua agi malosi ma ua ūū le matagi ma faataali’oli’o solo le kiona ia te oe. Ua e iloa e le mafai ona e taofia. Ae e mafai ona fai lelei ou ofu ma saili se malutaga ma o le a leai lava sou aafiaga i le afa.”

Peresitene Gordon B. Hinckley, “Ua Feagai i Tatou ma se Mala Matautia,” Liahona, Nov. 2004, 61.

Aloese mai le mailei

Ata

“O tusi ma ata mataga e aumaia ai taunuuga inosia o le ola le mama, o aiga ma olaga malepelepe. O tusi ma ata mataga, o le a faavaivaia le malosi faaleagaga e tumau ai. O tusi ma ata mataga, e pei uma lava o le oneone mimiti. E faigofie lava ona maileia ma lofituina ai oe i le taimi lava e te tuvae ai i totonu, ma e te le iloaina le matautia tele. O le mea moni lava, o le a e manaomia le fesoasoani e aluese ai mai le oneone mimiti o tusi ma ata mataga. Ae o le a sili atu le lelei o le le tu ai i totonu.”

Elder Joseph B. Wirthlin o le Korama a Aposetolo e Toasefululua, “Faamalosi Pea.” Liahona ma le Ensign, Nov. 2004, 102.