O Lenei, e Silisili i Tisipenisione Uma
Ou te fia talanoa atu ia te outou e uiga i atugaluga faifaipea i le lalolagi ma nisi o luitau o loo tatou feagai. Talu mai le aso 11 o Setema, 2001, ua atili ai lo tatou fefefe ma ua sili atu foi ona tatou tete’i i mea o loo tutupu i atunuu mamao faapea foi ma le faaaogaina faasoloatoa o le uiga fou o le upu matau. Ou te iloa e toatele outou na tuufesili i o outou loto pe o le a le uiga o lenei mea e faatatau i le iuga o le lalolagi ma lou olaga. E toatele na fesili, “Pe o le taimi ea lenei o le Afio Mai Faalua o le Faaola faapea ma mea uma na valoia e faatatau i lena mea?”
E moni, o se taimi a o lei leva ona tuanai le 9/11, na fesili mai ai se faifeautalai ma le faamaoni uma ma sa tumu i le faatuatua, “Elder Holland, pe o aso mulimuli ea nei?” Sa ou vaaia le faamaoni i ona foliga ma le mata’u i ona mata. Sa ou fai atu, “Ioe, Elder, ua tatou i ai i aso mulimuli, ae o le mea moni, e le o se mea fou lena mea. O le Afio Mai Faalua o le Faaola na folafolaina mai, na amataina i le Uluai Faaaliga a le Perofeta o Iosefa Samita i le 1820. E mafai ona tatou mautinoa ua tatou i ai i aso mulimuli—e tele ma tele tausaga o aso mulimuli.” Sa ma lululima i se agaga o le faauo ma tuu atu o ia e alu. Sa ataata, na foliga mai ua sili atu ona toafilemu e tuu atoa lenei mea na tupu i tua, ma tuu maualuga teisi ae lona ulu a o ia tuua au.
E vave ona ou faapea atu ou te iloa le mea moni na fesili ai lenei alii talavou. O le uiga moni o lana fesili o le “Pe mafai ona uma lau misiona? Pe i ai ea se aoga o le maua o se aoaoga? Pe mafai ona ou faamoemoe mo se faaipoipoga? Pe i ai ea sou lumanai? O i ai ea se fiafia i le lumanai mo au?” Ma ou te tau atu ia te outou le mea na ou tauina atu ia te ia, “Ioe, e mautinoa lava—i na fesili uma.”
Ae e tusa ai ma le taimi o le molimauina faalauaitele o le manumalo o le Afio Mai Faalua faapea ma mea e tutupu e faagateteina ai le eleele, ou te le iloa po o afea o le a tupu ai lena mea. E leai se tasi na te iloa. Na fetalai mai le Faaola, e oo lava foi i agelu i le lagi latou te le iloa (tagai Mataio 24:36).
E tatau ona tatou vaavaai mo faailoga, e tatau ona tatou ola faamaoni i le mafai tatou te mafaia, ma e tatau ona tatou faasoa atu le talalelei i tagata uma ina ia mafai ona maua e tagata uma ia faamanuiaga ma puipuiga. Ae e le tatau ona tatou nofoa’i ona o lena aafiaga ma aafiaga e faatatau i ai o loo i luma atu o i tatou i se mea. E le mafai ona taofi lo tatou ola i le olaga. E moni, e tatau ona tatou ola i le olaga i se tulaga e sili atu le atoatoa, nai lo se isi taimi na tatou ola ai. Pe a mafaufau atu i ai, o le tisipenisione lenei o le atoaga o taimi.
Ia Faatuatua, Ae Le o le Atuatuvale
E na o le lua lava mea ou te fia tau atu ia te outou o e o loo popole e uiga i le lumanai. Ou te tauina atu ma le alofa ma e mai i lou loto.
Muamua, e le tatau ona tatou faatagaina le atuatuvale ma le tamā o le atuatuvale (o Satani lava lea) e taitai ese i tatou mai lo tatou faatuatua ma le ola faamaoni. O tagata uma lava mai tupulaga uma na tatau ona savavali i le faatuatua e agai atu i le mea na avea i taimi uma ma se le mautonu. O le fuafuaga lenei. Tau lava ina faamaoni. E pule lava le Atua. Na te silafia lou igoa ma Na te silafia ou manaoga.
Faatuatua i le Alii o Iesu Keriso—o le mataupu faavae muamua lena o le talalelei. E tatau ona tatou o i luma. Ua faamoemoe mai le Atua ia lava lou faatuatua, naunautai, ma faalagolago ia te Ia e agai ai pea i luma, ola ai pea, ma olioli ai pea. Ua faamoemoe o Ia ina ia le na o lou faasaga atu i le lumanai; E faamoemoe o Ia ina ia e talia ma faatulaga le lumanai—ia fiafia i ai, olioli i ai, ma talisapaia ou avanoa.
O loo faatalitali mai ma le naunautai le Atua mo le avanoa e tali ai au tatalo ma faataunuu au miti, e pei lava ona masani ai o Ia. Ae e le mafai ona Ia faia pe afai e te le tatalo, ma Na te le mafai ona faia pe afai e te le miti. I le faapuupuuga, e le mafai ona Ia faia pe afai e te le talitonu.
Mau e Lua o Faamafanafanaga
O mau nei e lua, e faatatau tonu lea ia i latou o e ola i taimi faigata.
O le mau muamua e mai le vaega 101 o le Mataupu Faavae ma Feagaiga. O lenei faaaliga na oo mai a o puapuagatia le Au Paia o e na faapotopoto i Misuri ona o sauaga matautia. Ou te masalo, i ona tulaga sili ona leaga, o le taimi aupito sili lea ona faigata ma matautia—sei ou faapea atu na “faatumulia i le atuatuvale”—na faapea ona iloa e le Ekalesia.
Ae i lena taimi o le atuatuvale, na fetalai mai ai le Alii i Lona nuu:
“O lea ia faamafanafanaina ai o outou loto e uiga i Siona; aua e i ou lima tagata uma lava; ia filemu ma ia iloa o au o le Atua.
“E ui lava ina faasalalauina ana fanau, e le aveeseina ai Siona mai lona nofoaga.
“O e loto mama o totoe, o le a toe foi, ma o mai i o latou tofi, o i latou ma a latou fanau faatasi ma pese o le olioli faavavau, e atiina ae mea lē aina o Siona—
“E faia foi ia mea uma ina ia faataunuuina ai le au perofeta” (MFF 101:16–19).
O lea ia faamafanafanaina ai o outou loto e uiga ia Siona. Ma ia manatua le uiga aupito taua o Siona ua tuuina mai ia i tatou: o i latou o e “loto mama” (MFF 97:21). Afai o le a outou faatumauina le mama o o outou loto, o le a mafai e outou ma a outou fanau ma fanau a a outou fanau ona pepese i pese o le olioli e faavavau a o outou fausia Siona—ma o le a le mafai ona aveesea outou ma o outou nofoaga.
O le isi fuaiupu ou te faatatau i ai e mai le Faaola, na fetalai atu i Ona soo a o feagai o Ia ma Lona Faasatauroga ma a o latou feagai ma le matatau, le mautonu, ma sauaga. I Lana fautuaga faalauaitele mulimuli ia i latou i le tino, na Ia fetalai atu ai: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele, ua ou manumalo i le lalolagi” (Ioane 16:33).
O lea la, i se lalolagi o faigata, ia tatou manatua lo tatou faatuatua. Ia tatou manatua ia isi folafolaga ma valoaga na tuuina mai, o folafolaga ma valoaga uma o faamafanafanaga, ma ia tatou ola i le olaga i le atoatoa, i le lototele ma le lototoa sili atu nai lo se isi lava taimi.
Ua fetalai mai o ia i o tatou taimi, e ao ona tatou fusi i o tatou sulugatiti ma saunia, E o i tatou le malo ma e le manumalo lava le fili ia i tatou (MFF 38:9).
Upusii Faaperofetaga e Tolu
O lena mea ua oo atu ai i le vaega lona lua ou te manao e tau atu e uiga i aso o loo tatou ola ai. O loo tatou ola i le lalolagi i lenei tisi-penisione sili ona maoae ua tuuina mai i le tagata, ma e tatau ona tatou faia i ai le mea sili.
O se upusii lenei e sili ona ou fiafia i ai mai le Perofeta o Iosefa Samita (1805–44): “O le fausiaina o Siona o se mafuaaga lea na faaosofia ai tagata o le Atua i soo se vaitausaga; o se autu lea na mafaufau i ai perofeta, faitaulaga ma tupu ma le fiafia uiga ese; ua latou sagisagi atu i ai ma le naunautai i le aso tatou te ola ai; ma musuia ai i moomooga faalelagi ma le olioli ia na latou pepese ai ma tusia ma valoia o tatou aso; … o i tatou o tagata alofaina na [filifilia] e le Atua e aumaia le mamalu i Aso e Gata Ai.”1
Matau le faamautinoaga talitutusa lenei mai ia Peresitene Uilifoti Uitilafi (1807–98): “E i ai le Silisili Ese ma lona nuu. O le a tatou maua faaaliga uma tatou te manaomia, pe afai tatou te faia o tatou tiute ma usitai i poloaiga a le Atua… . A o ou … ola ou te manao e fai lou tiute. Ou te manao i le Au Paia o Aso e Gata Ai e fai o latou tiute … . E tele ma maoae lo latou tiutetauave. O loo matau mai i tatou e le silafaga a le Atua ma perofeta paia uma. O le tisipenisione sili lenei sa tautalagia ina ua faatoa faavae le lalolagi. Ua faapotopotoina faatasi i tatou … i le mana ma le poloaiga a le Atua. O loo tatou faia le galuega a le Atua… . Ia tatou faataunuuina la tatou misiona.”2
Ma le mulimuli, sei ou faasoa atu le [upusii] lenei mai ia Peresitene Gordon B. Hinckley, lo tatou perofeta o aso nei, o le o loo taitaia i tatou i le taimi nei, i taimi luitauina o o tatou aso nei: “O i tatou i lenei augatupulaga, o taunuuga ia o mea uma sa muamua atu. E le lava le na ona iloa o [oe] o se tagata o lenei Ekalesia. Ua i o tatou luga se matafaioi paia. Ia tatou talia ma faataunuuina.
“E tatau ona tatou ola o ni soo moni o le Keriso, ma ia alolofa i tagata uma, taui atu le leaga i le lelei, aoao atu ala o le Alii e ala i faataitaiga, ma faataunuuina le galuega tele ua Ia tuu mai mo i tatou.
“Ia tatou ola agavaa mo le meaalofa mamalu o le malamalama ma le poto ma le upumoni e faavavau lea ua oo mai ia te i tatou e ala mai i faigata uma o aso ua mavae. I se isi itu, mai ia i latou uma sa soifua i le lalolagi, ua aumaia i tatou i lenei vaitau tulaga ese ma le matagofie. Ia loto faafetai, ae o le sili o na mea uma ia faatuatua.”3
Mo se vaitaimi umi, ua le taulai atu o tatou perofeta i le matautia o aso na latou ola ai, e le taulai atu foi i vaega taufaamatau o aso e gata ai, lea o loo tatou ola ai, ae na latou manatu e saunoa e uiga i le avanoa ma le faamanuiaga, ae o le mea sili, o le tiutetauave ina ia maua mai avanoa ua ofoina mai ia i tatou i lenei tisipenisione ua sili ona maoae i tisipenisione uma. Ou te fiafia i le saunoaga mai le Perofeta o Iosefa Samita e faapea, o perofeta, faitaulaga ma tupu “ua sagisagi atu i ai ma le naunautai i le aso tatou te ola ai; ma … pepese ai ma tusia ma valoia o tatou aso.” O le a le mea na o latou soona olioli ai? E mafai ona ou faamautinoa atu ia te outou, sa latou le taulai atu i le matau ma faalavelave. O saunoaga a Peresitene Uitilafi e faapea: “O loo matau mai i tatou e le silafaga a le Atua ma perofeta paia uma. O le tisipenisione sili lenei sa tautalagia ina ua faatoa faavae le lalolagi.” Sei ou toe tau atu upu a Peresitene Hinckley: “I se isi itu, mai ia i latou uma sa soifua i le lalolagi, ua aumaia i tatou i lenei vaitau tulaga ese ma le matagofie. Ia loto faafetai, ae o le sili o na mea uma ia faatuatua.”
Ou te le iloa po o a ni tou lagona e uiga i na mea uma, ae na faafuasei lava ona mouese atu mai ia te au soo se popolega le manaomia e uiga i taimi o loo tatou ola ai, ma ua faalotomaulaloina au, olioli faaleagaga, ma faaosofia i le avanoa ua tuuina mai ia i tatou. E puipui e le Atua Lana lalolagi, Lana Ekalesia, Ona taitai, ma e mautinoa lava Lona puipuia o outou. Ia mautinoa o i tatou o e “loto mama” ma o loo faatuatua. O le a matuai faamanuiaina lava outou. O le a matuai manuia foi a outou fanau ma fanau a a outou fanau.
Mafaufau i le fesoasoani ua tuuina mai ina ia tatou aveina atu le malamalama o le talalelei i se lalolagi pogisa. E tusa ma le 53,000 a tatou faifeautalai o loo i ai—ua sili atu le toatele nai lo se isi lava vaitaimi. Ma o lena numera e faateleina pea i tausaga tai lua uma e i latou o e o atu e suitulaga ia i latou e o mai i le fale! Ae tatou te manaomia pea nisi e toatele atu.
E sili atu ma le 2,000 tausaga pe a ua mavae, sa na o le tasi le malumalu i le Lalolagi Tuai, ae lua pe tolu malumalu i le talafaasolopito o le Tusi a Mamona, ae o le taimi nei, ua televave le faateleina o malumalu lea ua tau le mafai ona tatou faitauina!
Faaopoopo i ai ma le vavega o le komepiuta, lea e fesoasoani tatou te faamaumauina ai o tatou talafaasolopito faaleaiga ma faia sauniga faaola mo o tatou tagata ua maliliu. Faaopoopo i ai ma auala o femalagaaiga faaonaponei, lea ua mafai ai e le Au Pulega Aoao ona taamilo i le kelope ma tuuina atu le molimau patino e uiga i le Alii i le Au Paia uma i atunuu uma. Faaopoopo atu i lena, i nofoaga e le mafai ona tatou o atu i ai, ua mafai nei ona “auina atu,” e pei ona fai mai ai tusitusiga paia, i faasalalauga faasatelite (tagai MFF 84:62).
Faaopoopo uma i ai vaega o aoaoga, saienisi, tekinolosi, fesootaiga, femalagaaiga, vailaau faafomai, taumafa paleni, ma faaaliga ia e siomia ai i tatou, ona amata ai lea ona tatou iloa le uiga o le faamatalaga a le agelu o Moronae lea na fai faafia atu i le perofeta taulealea o Iosefa Samita, e sii mai le perofeta o Ioelu i le Feagaiga Tuai, e faapea, o aso amuli e liligi mai ai e le Atua Lona Agaga i luga i “tagata uma” ma o le a faamanuiaina uma tagata i le malamalama mai soo se itu o taumafaiga uma o se vaega o le Toefuataiga o le talalelei a Iesu Keriso (Ioelu 2:28; faaopoopo le faamamafa; tagai foi Talafaasolopito—Iosefa Samita 2:41).
Tatou te mafaufau i nei faamanuiaga uma ua tatou maua i lo tatou tisipenisione, ma tatou te taofi ma faapea atu i lo tatou Tama o i le Lagi, “Ua sili lava oe.”4
O Se Tausamaaga o le Faaipoipoga
Sei ou faaopoopo atu se isi vaega i lenei manatu o le tisipenisione. Talu ai ona o le tatou tisipenisione o le tisipenisione mulimuli ma le silisili lea o tisipenisione uma, talu ai o le a iu lava ina faaiuina mea uma ma faataunuuina i lo tatou vaitaimi, o le mea lea, o le tiutetauave faapitoa e tasi e pau tonu ia i tatou i totonu o le Ekalesia i le taimi nei, lea sa le’i tutusa le taulimaina e tagata o le Ekalesia i soo se taimi na muamua atu. Ua i ai sa tatou tiutetauave e saunia le Ekalesia a le Tamai Mamoe a le Atua e talia le Tamai Mamoe a le Atua—i le tagata, i le mamalu manumalo, i Lona tulaga faameleniuma o le Alii o Alii ma le Tupu o Tupu.
Ua ia i tatou se tiutetauave o se Ekalesia faapea ma tagata taitoatasi o lena Ekalesia, ina ia agavaa ina ia afio mai Keriso ia i tatou, ia agavaa ia mafai ona Ia faafeiloai ia i tatou, ma ia mafai ona Ia taliaina, tauaaoina, ma fusi ia i tatou. O olaga tatou te faaali atu ia te Ia i lena itula paia e tatau lava ona agavaa mo Ia!
I le gagana a tusitusiga paia, ua filifilia i tatou i le talafaasolopito uma o e e tatau ona saunia le faatoanofotane (o le Ekalesia) mo le Faatoafaiava (o le Faaola) ma ia agavaa mo se valaaulia i le tausamaaga o le faaipoipoga (tagai Mataio 22:2–14; 25:1–12; MFF 88:92, 96).
O lea la, o le tuuese ai o le fefe i le lumanai, ua lofituina ai au i se lagona o le [faia] o le tiute ia saunia lou olaga (ma e sili atu foi, ia ou fesoasoani e saunia olaga o tagata o le Ekalesia) mo lena aso ua loa ona valoia, mo le taimi o le a tatou faailoa atu ai le Ekalesia ia te Ia o le ana le Ekalesia.
Ou te le iloa po o afea o le a oo mai ai lena aso e tasi. Ou te le iloa foi poo ai o le a auai e vaai i ai. Ae o le mea lenei ua ou iloa: pe a afio mai Keriso, e tatau i tagata o Lana Ekalesia ona foliga ma amio e pei ona tatau ai ona foliga ma amio ai tagata o Lana Ekalesia, pe afai tatou te mananao ia talia i tatou e Ia. E tatau ona tatou faia Lana galuega, ma e tatau ona tatou ola i Ana aoaoga. E tatau ona vave ma faigofie ona Ia iloaina i tatou o ni Ona soo moni.
O le mea moni, o le pogai lena na saunoa mai ai Peresitene Hinckley: “E le lava le na ona iloa o [i tatou, o oe ma au, o aso nei, o lo tatou taimi lea] o se tagata o lenei Ekalesia… . E tatau ona tatou ola o ni soo moni o … Keriso.” O aso nei e gata ai, ma o oe ma au e tatau ona avea ma Au Paia o aso e gata ai aupito sili ona lelei tatou te mafaia.
Ola ma le Lagona Mautinoa
O i ai ea se lumanai fiafia mo oe ma lau fanau i nei aso e gata ai? Sao lelei! Pe o le a i ai ea ni taimi faigata pe a faataunuuina na lapataiga ma valoaga matautia o aso e gata ai? Ioe, o le a i ai. Pe o le a onosaia ea e i latou o e ua tumau i luga o le papa o Keriso ia matagi tetele, asiosio, ma uatoa i afa? Ua outou iloa o le a latou [onosaia]. Ua outou maua lena folafolaga mai se tagata faatuatuaina. Ua outou maua lena folafolaga mai Ana lava upu! O lena “papa ua atiina ae ai oulua … o le faavae mau lea, o le faavae foi lea, afai e ati ae tagata [alii ma tamaitai] i ona luga, e le mafai lava ona pauu i latou” (Helamana 5:12).
Ou te tuu atu ia te outou lou alofa ma lau molimau e le gata ina soifua le Atua, ae e alofa foi o Ia ia i tatou. E alofa o Ia ia te oe. O mea uma Na te faia e mo lo tatou lelei ma lo tatou puipuiga. O loo i ai le leaga ma le faanoanoa i le lalolagi, ae e leai se mea leaga po o se faatiga o ia te Ia. O Ia o lo tatou Tama—o se tama atoatoa—ma o le a Ia fesoasoani ia i tatou ia maua se sulufaiga mai le afa.
Ou te molimau atu e le gata o Iesu o le Keriso, o le Alo Pele e Toatasi ma le paia o le Atua, ae o loo soifua o Ia, ma e alofa o Ia ia i tatou, ma o le malosi ma le taua o Lana taulaga togiola, o le a tatou ola ai foi e faavavau.
O le Ekalesia ma le malo lenei o le Atua i luga o le fogaeleele. Ua toefuataiina mai le upumoni. Ola ma le lagona mautinoa, ma le manatu o le a lelei mea uma, faatuatua ma le faamaoni. Ia mafaufau loloto i luitau o le olaga ae le o le fefe pe lotovaivai foi ona o luitau. Ia lagona le olioli o le Au Paia i aso e gata ai—ae aua lava nei lagona le faapopoleina po o le leai o se faamoemoe e faatafunaina ai.
“Aua le matatau, le lafu mamoe itiiti… . Ia faalagolago [ia Keriso] i manatunatuga uma; aua le masalosalo, aua le fefe” (MFF 6:34, 36).
“E le’i ia te outou le malamalama i faamanuiaga e tele a le Tama e i ai … ua saunia mo outou… . Ia fiafia pea… . O le malo e o outou lava ma faamanuiaga o i ai e o outou ia, o oa foi o le faavavau e a outou ia” (MFF 78:17–18).
Ou te tuua ia te outou au faamanuiaga, lou alofa, ma le molimau faaaposetolo i le moni o nei mea.
Mai se saunoaga i le faeasaite a le Ofisa o Aoga a le Ekalesia na tuuina atu i le aso 12 o Setema, 2004.