O Mai e Faalogo i le Siufofoga o se Perofeta
Lototele i totonu o se Togasana
O le malamalama o loo susulu i ou foliga e sau mai le Alii. O lenei lava foi malamalama na taitaiina ai le ala mo le [tamaitai] 15 tausaga o Mary Elizabeth Rollins ma lona uso e 13 tausaga o Caroline, i se aso pogisa i Independence, Misuri.
I le 1833, na feoai solo ai ni tagata leaga ma le feita i magaala o Independence, ma faatupu ai ni vevesi. O le latou ala sa i ai le fale o Brother William W. Phelps, lea sa teu ai le masini lomitusi. Sa ia lolomiina faaaliga na maua e le Perofeta o Iosefa Samita. Na faaleagaina e tagata leaga le masini lomitusi ma tauai mea na talepe i le auala. Ae, sa latou faaputuina ia itulau na lolomiina i le lotoa ina ia latou susunuina i se taimi mulimuli ane.
O Mary Elizabeth ma Caroline na lalafi i talane o le pa, o ni tagata matamata na matuai fefefe i lenei faatamaiaga atoa. E ui lava ina sa fefe tele Mary Elizabeth, ae sa taulai atu ona mata i na itulau faapelepele. Sa tamomoe atu i laua ma lona uso mai lo la lafitaga, ma ao uma mai tusitusiga paia, ma taufetuli loa. Na iloa atu i laua e nisi o le vaega o tagata leaga, ma faatonuina ai i laua e taofi. Ae sa taufetuli atu teineiti lototetele i totonu o se faatoaga sana tele, lea na la faapalalasi ai i lalo i le eleele toetoe a momole [i le sesela]. Sa la folaina ma le faaeteete ia itulau o faaaliga i va o laina sana uumi, ona ufiufi lea o itulau e ala i le taooto ai luga. Sa sue solo e tagata leaga ia teineiti, na i ai taimi na toetoe lava a oo atu i ai, ae latou te le’i mauaina i laua. Na iu lava ina toe foi le latou sailiga.
Ou te talitonu o le malamalama o le Alii na taitaiina ai Mary Elizabeth ma Caroline i le mea e tatau ona fai ma o fea foi e o i ai mo le saogalemu. O lena malamalama e susulu atu mo oe, ma o le a taitaiina ai oe e pei ona faia i teineiti o le au Rollins. O le a faasaogalemuina ai oe e tusa lava pe o faatalitali mai puapuaga.
Au uo talavou pele, e mafai ona e tu ese mai mea leaga, e pei lava ona sa faia e le au uso o Rollins, pe afai o le a e atiina ae lau lava molimau e uiga i le Faaola. A e faia faapea, o le a e tuputupu ae i le malosi faaleagaga.
Mai se lauga o le sauniga Aoao a Tamaitai Talavou ia Aperila 2006.
MEA E MAFAUFAU I AI
-
E ui lava ina sa fefefe i laua, ae na lamatia ola o Mary Elizabeth ma Caroline ina ia faasaoina ai faaaliga lea na avea o se vaega o le Mataupu Faavae ma Feagaiga. E faapefea ona e faaalia le alofa i tusitusiga paia i aso nei?
-
O le fetaiai ma sauaga mai ni tagata leaga e manaomia ai le lototele. O a ni tau faamatau o loo outou feagai i aso nei e manaomia ai lou lototele?
-
E faapefea ona e atiina ae se molimau e uiga i le Faaola? E mafai faapefea ona fesoasoani lau molimau e te tu ese ai mai mea leaga?