Ua Lava Lea
“E mafai ona faavavau aiga, i le ala a le Tama” (Tusipese a Tamaiti, 98).
E faavae i se tala moni
Na soloi e Carlitos loimata mai ona mata. Ua tele masina o ma’i lona tina. Mulimuli ane, na tauanauina ai e Tama o ia e alu i le taulaga, e tele kilomita e mamao ai mai lo latou nuu laitiiti i Chile, e vaai se fomai. Ina ua uma le tele o suesuega, na tau atu e le fomai i le tina o Carlitos na maua o ia i le kanesa.
Na musu Tina e faanoanoa mo ia lava. “O loo tele lava au mea e fia fai,” o lana tala lea.
I se tasi aso, na tutu atu ai ni alii talavou se toalua norteamericanos (Amerika i Matu) i le faitotoa o le latou tamai fale. “Ma te o mai mai le Ekalesia a Iesu Keriso o le Au Paia o Aso e Gata Ai,” o le tala lea a le isi i le faaSipaniolo taupanupanu.
Sa faalogo ma le totoa Tina ma fai ni fesili mai lea taimi i lea taimi. Sa vave ona ia taliaina le savali a alii talavou. “O le upumoni lea,” na ia fai mai ai.
E ui lava i le faamai na mafua ai le tele o ona tiga, ae sa naunau lava Tina ina ia papatisoina ma faamauina.
O le taeao o le Aso Toonai na malaga atu ai le aiga i le falelotu laitiiti lea na papatisoina ai o ia e Elder Metzer. Sa tetete o ia a o laa ese mai mai le faatanoa o le vai papatiso.
“Tina, ua e maalili,” na fai atu ai Carlitos ma fusi mai ona puimanava. “E tatau ona e alu i le fale e te faamafanafana ai.”
Na lulu le ulu o Tina. “E le’i lava. O le a ou nofo seia faamauina au. E faapefea ona ou maalili ao faamafanafanaina au e le talalelei?” Na faamauina o ia o se tagata O Le Ekalesia a Iesu Keriso o le Au Paia o Aso e Gata Ai.
Sa le’i malie Tina i le na o lena. Sa naunau o ia ina ia iloa e Tama ma Carlitos le talalelei toefuataiina e pei ona ia faia. “Afai lua te tatalo, o le a oulua iloa le moni o mea o loo talanoa mai ai faifeautalai,” sa ia tau atu ai ia i laua.
Sa aoaoina i laua e alii faifeautalai e uiga i le talalelei a Iesu Keriso. E tatau ona tuu le tapaa a Tama. Sa faalogo Carlitos i aoaoga a alii faifeautalai ma lagona ai le filemu na fusia ai lona loto. Sa amata ona malamalama o ia i le mafanafana lea na faamatalaina e Tina.
I totonu o se masina, na faapea ona tuu ai le ulaula a Tama. E le’i umi ae papatisoina loa ma faamauina ia Tama ma Carlitos. O ni nai vaiaso mulimuli ane, na maua ai e Tama le Perisitua Arona. E tatau ona faatali Carlitos mo ni tausaga se tolu ona faatoa mafai lea ona ia maua le perisitua.
Sa matuai vaivai lava Tina, ae sa mafai lava i taimi uma ona alu i le lotu ma asiasi ia i latou o le nuu o e na mamai.
Na tau atu e Tina ia Tama ma Carlitos i se tasi po, “O i tatou o tagata o le Ekalesia a le Atua, ae ua le lava lea.”
“O le a le mea e tatau ona tatou faia nei?” o le fesili lea a Carlitos. Sa fiafia o ia e aoao e uiga i le talalelei ma manao ia ola ai i soo se auala lava.
“E tatau ona faamauina i tatou i le malumalu,” o le tala lea a Tina.
O le malumalu i Santiago sa sili ona latalata atu i lo latou fale. Ae na le lava a latou tupe e malaga atu ai iina. Soo se tupe faasili lava na maua e Tama sa alu i le faatauga o vai a Tina.
Ona amataina lea e Tina se fagu o le malumalu. Sa ia tuuina i talane o le faitotoa. O sene sa ia aoina na faateleina seia oo ina lava tupe na maua e le aiga e faia ai le malaga. I totonu o le malumalu sa faapea ona faamauina ai lo latou aiga mo le taimi nei ma le faavavau atoa.
Sa suluia Tina i le fiafia. “Ua lava lea,” o lana tala lea.
“Ou te iloa sa foafoaina le lalolagi, ma sa toefuataiina mai le Ekalesia a le Alii ina ia mafai ai ona faamauina aiga ma faaeaina o ni iunite e faavavau.”
Elder Russell M. Nelson o le Korama a Aposetolo e Toasefululua, “Faafaileleina o Faaipoipoga,” Liahona, Me 2006, 36.