Pe Mata e Mafai Ona Ou Toe Tautala?
Sa ou faamisiona i lou lava atunuu o Peru mo ni nai masina i le taimi na ou feiloai ai ia Santiago. Sa auai o ia i se vasega o le Aoga Sa mo tagata fou, ae e le’i papatisoina o ia. Ma e le’i faia foi ana lesona e faifeautalai. Na ou iloaina e i ai se faafitauli i lana tautala lea na ia lagonaina ai le le mautonu ma faigata ai ona talanoa.
Mo le tele lava o lona olaga, sa manino lava le tautala a Santiago ma sa faamanuiaina foi i se leo pese matagofie. Ae na pagatia o ia i le pe o le tino. Ina ua mavae se taimi umi i se nofoaga e togafitia ai, na mafai ai ona toe savali o ia, ae na i ai lava le faafitauli i lana tautala.
Sa matou fiafia lava ina ua filifili Santiago matou te feiloai. I le matou asiasiga muamua, sa taumafai ai o ia e tautala, ma sa ma taumafai foi ia malamalama. Sa faapitoa lona fiafia e faitau leotele le Tusi a Mamona. Sa ma alolofa ma faamemelo ia te ia.
I se tasi aso a o matou talanoaina ia sauniga o le talalelei, na faapea mai Santiago ua saunia o ia e papatiso ma faamauina. Ina ua uma le matou lesona, sa tulai o ia, ma ona foliga susulu, ma le faigata tele ma fesili mai, “Susuga e, a uma ona papatisoina au, mata o le a mafai ona ou toe tautala e pei ona sa masani ai?”
Sa fai si ou te’i mo sina taimi ma o le taimi muamua, ou te le’i iloa ona tali i ai. Ae o le tali atu e ala i le uunaiga a le Agaga, sa ou faapea atu ai ma le toa, “Ioe, afai e lava lou faatuatua, o le a faataunuu e le Alii lou manao.”
I le aso o lona papatisoga, na ou manatuaina ai le fesili a Santiago ina ua talosagaina o ia e tuuina atu lana molimau. I le iloa ai o nisi o folafolaga a le Alii e le faataunuuina i le taimi lava lea, sa ou mafaufau pe mata o le a le fiafia Santiago pe afai e le vave mafai ona tautala. I aso na sosoo ai, sa tauivi lava pea o ia e tautala, ae na foliga mai e le’i popole i ai o ia.
E le’i umi ae siitia ese au ma ou le toe vaai ai ia Santiago seia oo i le faaiuga o lau misiona, ina ua ou alu atu ma te faatofa ae ou te le’i foi i le fale. Ma te le’i maua atu ma lau soa o ia i le fale ma amata loa ona ma tuumuli, ae na faafuasei lava ona ma faalogoina se leo malosi o valaau mai ia i maua. O Santiago!
Sa ma ulu atu i lona fale, ma sa talanoa mai i lona fiafia tele ona o le avea o ia o se tasi o le Ekalesia. Ina ua mavae ni nai minute, na ou iloa ai toetoe lava a lelei atoatoa lana tautala. I lou ofo, na ou fai atu ai, “Santiago, ua lelei lava lau tautala!”
Fai mai o ia, sa ia iloa lava o le a talia mai e le Alii lona manao. O lea sa ia faaalia ai le faatuatua ma fai lana vaega, o le faitau leotele mai le Tusi a Mamona ma fai faamalositino na fautuaina ai o ia e lana fomai. “Na silasila mai le Alii i au taumafaiga ma toe aumaia ai lou leo,” o lana tala lea. “Ma e le toe mamao ae Ia toe faamanuiaina au i le mafai ona ou toe pese.”
Sa le mafai ona taofiofi ou loimata. O lena aso, sa aoaoina ai au e Santiago i se lesona maoae. O folafolaga a le Alii e le faapea o taimi uma e vave faataunuuina ai, ae e faataunuuina lava.