Me Rawa Kina ni Tikoga kei Keda na Nona Yalotabu
E dodonu me da dau tovolea me da kidava na gauna “[eda] sa yawa tani sara mai na Yalo ni Turaga”… [kei] na noda qarauna ka vuli mai na veidigidigi kei na veivakayarayarataki ka tawasei keda tani mai vua na Yalo Tabu.
Edaidai, au na vosa tiko kivei keda eda lewena Na Lotu i Jisu Karisito ni Yalododonu Edaidai ena veivakananumi kei na veivakadreti. Au sa masuta ka sureta na Yalo Tabu me vukei au kei kemuni ena noda vuli vata ena gauna oqo.
Na papitaiso ni tabadromuci ena wai me baleta na bokoci ni ivalavala ca “sa ikoya na ivakatekivu ni cakacaka tabu vakalotu ni kosipeli” i Jisu Karisito ka sa kena dodonu me salavata kei na vakabauta na iVakabula ena yalodina kei na taucoko ni veivutuni. “Na papitaiso ena wai … e dodonu me salamuria mai na papitaiso ni Yalotabu me rawa ni qai taucoko kina” (raica na Bible Dictionary, “Baptism,” p. 618). Me vaka e a vakatavulica vei Nikotimo na iVakabula, “Kevaka sa sega ni sucu e dua ena wai kei na YaloTabu, ena sega ni curu rawa ki na matanitu ni Kalou” (Joni 3:5). Na noqu itukutuku ena yakavi nikua e vakatabakidua ki na papitaiso ena Yalotabu kei na veivakalougatataki e drodro mai ena veitokani kei na Yalo Tabu.
Na Cakacaka Tabu Vakalotu kei na Veiyalayalati ka salavata kei na Papitaiso
Ena noda a papitaiso oi keda vakayaduadua, eda a duavata kei na Tamada Vakalomalagi ena dua na veiyalayalati bibi. E dua na veiyalayalati sa ikoya e dua na veidinadinati ena kedrau maliwa na Kalou kei ira na Luvena ena delai vuravura, ka sa ikoya e dua na ka bibi me kilai ni Kalou e vakatulewa ena ivakarau ni veiyalayalati kece sara ni kosipeli. O iko kei au e daru sega ni vakatulewa ki na lawa se iwalewale ni dua na veiyalayalati. Na kena dodonu, me vakayagataki na noda digidigi ni bula savasava, sa ikoya me da ciqoma na kena ivakarau kei na veika e gadrevi ena dua na veiyalayalati me vaka e a tauyavutaki ira na Tamada Tawamudu (raica Bible Dictionary, “Covenant,” p. 651).
Na kena taqomaki na cakacaka tabu vakalotu ni papitaiso e dodonu me vakaitavitaki koya kina e dua e sa tu vua na kaukauwa dina mai vua na Kalou. Na lawa taumada ni veiyalayalati ena noda yacova yani na wai ni veipapitaisotaki sa ikoya oqo: eda vakadinadinataka ni da sa yalodina me da na taura na yaca i Jisu Karisito, ka me da na dau nanumi Koya ena veigauna taucoko, ka da na dau muria na Nona ivunau. Na veivakalougatataki ka yalataki ena noda rokova na veiyalayalati oqo sa ikoya me tikoga kei keda na Nona Yalotabu ka sega ni mudu (raica V&V 20:77). E dua tale na kena itukutukuni, na papitaiso ena wai e tuberi keda ki na gauna kei na vakatulewa donu ni veitokani vata kei na ikatolu ni Le Tolu Vakalou ena veigauna taucoko.
Veivakadeitaki kei na Papitaiso ni Yalotabu
Ni oti na noda papitaiso, oi keda vakayadua e a tabaki na uluda mai vei ira era taukena tu na kaukauwa ni matabete ka da sa vakadeitaki me dua na lewe ni Lotu i Jisu Karisito ni Yalododonu Edaidai, ka sa vakatikori vei keda na isolisoli ni Yalo Tabu (raica V&V 49:14). Na itukutuku “ciqoma na Yalo Tabu” ena noda vakadeitaki sa i vakaro ni segati ni papitaiso ena Yalotabu.
E a vakatavulica na Parofita o Josefa Simici: “E rairai vinaka cake mo papitaisotaka e dua na taga nuku mai na dua na tamata, kevaka e sega ni caka me baleta na veivutunitaki ni ivalavala ca kei na kena ciqomi na Yalo Tabu. Na papitaiso ena wai sa ikoya ga na veimama ni dua na papitaiso, ka sega kina ni dua na kena yaga ke yali e dua tale na kena veimama—sa ikoya o ya, na papitaiso ena Yalo Tabu” (History of the Church, 5:499). Eda a papitaiso mai na tabadromuci ena wai me baleta na bokoci ni ivalavala ca. E dodonu talega me da papitaiso ka da tabadromuci ena Yalo ni Turaga, “ia dou na qai papitaisotaki ena Yalo Tabu kei na bukawaqa me bokoci kina na nomudou ivalavala ca” (2 Nifai 31:17).
Mai na noda rawa ka vata kei na Yalo Tabu, eda vulica kina ni sega ni dau tautauvata tu ga na cecere ni ivakatagedegede ni noda vakila na veivakayarayarataki ni Yalotabu. E sega ni dau lako mai vakawasoma vei keda na ivakatakilakila kaukauwa vakayalo. Ena noda sasaga sara mada ga me da yalodina ka talairawarawa tiko, ena sega tu ga ni dau liaci ena noda bula, na nona veidusimaki, veivakadeitaki, kei na veivakacegui ni Yalotabu. Na kena dina, na iVola i Momani e vakamacalataki ira na Leimani yalodina ka ra a “papitaisotaki ena bukawaqa kei na Yalo Tabu, ia era a sega ni kila” (3 Nifai 9:20).
Na veivakayarayarataki ni Yalo Tabu sa ikoya e vakamacalataki ena veivolanikalou me vaka “e dua na domo lailai” (1 Tui 19:12; raica talega 3 Nifai 11:3) kei na dua na “domo rogo lailai ga ka malumu” (Ilamani 5:30). Ia, na Yalo ni Turaga e dau veitaratara vata kei keda ena veigaunisala e vakadirorogo, malumalumu, ka tau malua.
Noda Vakasuka mai na Yalo ni Turaga
Ena noda dui vuli vakayadua kei na veivakaro ena valenivuli, eda taleva tale ka vakadreti ena bibi ni kena kauwaitaki na ivakaraitaki kei na veivakauqeti eda dau ciqoma mai vua na Yalo ni Turaga. E dodonu ka yaga vakalevu sara na rai vakaoqori. E dodonu me da vakasaqara vagumatua me kidavi ka saumi lesu na veivakauqeti ni yaco mai vei keda. Ia, na tikina bibi ni papitaiso ena Yalotabu e sega soti ni dau kauwaitaki vakawasoma ena noda tubu cake vakayalo.
E dodonu talega me da dau tovolea me da kidava na gauna “[eda] sa yawa tani sara mai na Yalo ni Turaga, ka sa sega ni tiko vata kei kemuni [keda] ko Koya me tuberi kemuni [keda] ena sala dodonu mo ni [me da] kalougata kina, ka sautu, ka taqomaki vinaka” (Mosaia 2:36). Na kena dodonu baleta na veivakalougatataki yalataki sa ikoya me tikoga kei keda na Nona Yalotabu ka sega ni mudu, e dodonu me da qarauna ka vuli mai na veidigidigi kei na veivakayarayarataki ka tawasei keda tani mai vua na Yalo Tabu.
Sa matata tu na kena ivakatagedegede. Kevaka e dua na ka eda vakasamataka, raica, rogoca, se cakava e vakayawaki keda mai vua na Yalo Tabu, ia e sa dodonu sara ga me sa muduki na noda vakasamataka, raica, vakarogoca, se vakayacora na ka o ya. Kevaka e nakiti me veivakalasai na ka o ya, me kena ivakaraitaki, me vakavulagitaki keda mai na Yalo Tabu, ia e sa vakadeitaka ni mataqali veivakalasai vaka o ya e sega ni yaga vei keda. Baleta ni Yalotabu e sega ni rawa me vakamuria na veika e lolovira, sega ni taucoko, se tawakilikili, ia sa vakamatatataka ni veika vakaoqori e sega ni yaga vei keda. Baleta ni da vakayawaki keda mai vua na Yalo ni Turaga ena gauna eda vakaitavitaki keda kina ena veitavi qaravi eda kila ni dodonu me da vagalalataki keda mai kina, ia na veika vakaoqori e sega ni yaga vakaidina vei keda.
Au kila ni da bula tiko ena dua na vuravura vakayago na tagane kei na yalewa ka da a lutu ka kena irairai ni sega ni tiko vata kei keda na Yalo Tabu ena veisekodi ni veiminiti ni veiauwa ni veisiga. Ia, na Yalo Tabu e rawa me tiko vata kei keda vakalevu, kevaka e sega, ni veigauna taucoko ga—kei na Yalotabu e rawa me tiko vakaidina vata kei keda vakalevu cake sara mai na kena sega ni tiko vata kei keda. Ena kena sa yaco me da tabadromuci vakadua me tawamudu ena Yalo ni Turaga, e dodonu me da segata me da kila na ivakatakilakila ena gauna era yaco mai kina kei na veivakayarayarataki se veika era yaco ka vakavuna tu vakasuka mai vua na Yalo Tabu.
Na noda taura “na Yalo Tabu me dusimaki [keda]” (V&V 45:57) e rawa ka yaga vakakina ena noda tubu vakayalo ka rawata na bula ena vuravura ka sa tubu cake tikoga kina na ivalavala ca. Ena so na gauna oi keda na Yalododonu Edaidai e dau vakavudua se vakacalaka na noda dau vosa ka vakayacora eso na ka vaka me da kila tu na veivakayarayarataki ni Yalo Tabu ena noda bula. E dodonu me da dau nanuma, ia, ni yalayala ni veiyalayalati sa ikoya me tikoga kei keda na Nona Yalotabu ka sega ni mudu. Na veivakalougatataki vakalou oqo e yaco kivei ira vakayadua na lewe ni Lotu era sa papitaiso oti, vakadeitaki, ka vakaroti me ra “ciqoma na Yalo Tabu.”
Na Liaona e dua na kena Mataqali ka iYaloyalo vei keda ena Noda Gauna
Ena gauna oqo na iVola i Momani sa ikoya na ivurevure taumada ka dodonu me da dau vakanamata kina ena noda vukei me da vulica na kena sureti na Yalo Tabu me dau veitokani vata voli ga kei keda. Na ivakamacala ni iVola iMomani ena Liaona, sa ikoya na idusidusi se kabasi ka a vakayagataka o Liai kei na nona matavuvale ena nodratou ilakolako ki na lekutu, e vakaraitaka ni a okati ena itukutuku volai me dua na kena mataqali ka iyaloyalo ni noda gauna ka vakakina ni sa dua na lesoni yaga me baleta na veika ka dodonu me da vakayacora me da marautaka kina na veivakalougatataki ni Yalo Tabu.
Ena noda segata me da veidutaitaka na noda ituvatuva kei na veika eda vakayacora me salavata kei na dodonu, e sa na yaco me noda na Yalo Tabu edaidai me vakataka na Liaona me baleti Liai kei na nona matavuvale ena nodra gauna. Na veika sara ga ka a vakavuna na cakacaka ni Liaona vei Liai ena vaka talega kina na sureti ni Yalo Tabu ena noda bula. Kei na veika sara ga e a vakavuna na sega ni cakacaka ni Liaona ena gauna e liu ena vaka talega kina na veika ena vakavuna na noda tu vakasuka mai vua na Yalo Tabu edaidai.
Na Liaona: iNaki kei na iVakavuvuli
Ena noda vulica ka tugana na inaki ni Liaona kei na ivakavuvuli e cakacaka kina, au vakadinadinataka ni da na ciqoma na ivakatakila ka veiganiti kei keda vakayadudua kei na ituvaki kei na veigagadre me baleta na matavuvale. E rawa ni da rawata ka vakalougatataki ena veidusimaki tikoga ni Yalo Tabu.
Na Turaga e a vakarautaka na Liaona ka soli kivei Liai kei na nona matavuvale ena nodratou biuti Jerusalemi ka lako tu ena lekutu (raica Alama 37:38; V&V 17:1). Na kabasi oqo se idusidusi e dusia tiko na sala e dodonu me muria o Liai kei na nona qiqi (raica 1 Nifai 16:10), ena “nodra ilakolako ki na vanua yalataki” (Alama 37:44). Na idusidusi ni Liaona e a cakacaka ga “mai na vakabauta, gumatua kei na nodra vakarorogo” (1 Nifai 16:28) mai vei ira na lewe ni ilakolako, ka a mani sega ni cakacaka ena gauna era a veiba kina na lewe ni matavuvale, viavialevu, vucesa, se guiguileca (raica 1 Nifai 18:12, 21; Alama 37:41, 43).
Na kabasi e a vakarautaka talega e dua na sala me rawa kina vei Liai kei na nona matavuvale me ratou “kila na ivakaro ni Turaga” (1 Nifai 16:29). O koya gona, na inaki taumada ni Liaona sa ikoya me vakarautaka ruarua na gaunisala kei na veidusimaki ena gauna ni dua na ilakolako balavu ka dredre. O koya na dauniveidusimaki sa ikoya e dua na iyaya vakayago ka veiqaravi me vaka e dua na ivakaraitaki e tautuba ni ituvaki vakayalo ni lomadra ena mata ni Kalou. E cakacaka me vaka na ivakavuvuli ni vakabauta kei na gugumatua.
Me vaka ga na nona a vakalougatataki o Liai ena veigauna makawa, e sa soli vei keda vakayadua edaidai e dua na kabasi vakayalo me rawa ni veidusimaki ka vakavulici keda ena gauna ni noda ilakolako vakayago. E a vakatikori vei iko kei au na Yalo Tabu ena noda a lako tani mai vuravura ka curu sara ki na Lotu ni iVakabula mai na papitaiso kei na veivakadeitaki. Mai na kaukauwa ni matabete tabu eda a vakadeitaki me da lewe ni Lotu ka da vakadreti me da vakasaqara na veitokani e veigauna vata kei na “Yalo Tabu sa vu ni ka dina, ko koya era sa sega ni vakabauta rawa na kai vuravura, ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya, ka na curumi kemudou” (Joni 14:17).
Ena noda dui itosotoso vakayadua ki liu ena gaunisala ni bula, eda ciqoma na veidusimaki mai vua na Yalo Tabu me vakataki Liai ena nona a dusimaki mai na Liaona. “Raica au sa kaya tale vei kemudou, kevaka dou sa curu ena matamata ka rawata na Yalo Tabu, ena vakaraitaka vei kemudou ko Koya na veika kece mo dou kitaka” (2 Nifai 32:5).
Na Yalo Tabu e cakacaka vakadodonu ena noda bula me vaka na cakacaka ni Liaona vei Liai kei na nona matavuvale, me vaka na noda vakabauta kei na gugumatua kei na vakarorogo.
“Mo qarauna me savasava tikoga na nomu vakanananu; ia ena taucoko sara kina na nomu vakabauta ena mata ni Kalou… .
“Ena sala vata voli ga kei iko na Yalo Tabu; ia na nomu itikotiko sa itikotiko ni yalododonu kei na dina sa tudei sara” (V&V 121:45–46).
Ena vakarautaka na Yalo Tabu vei keda edaidai na ivurevure me rawa kina vei keda me da ciqoma, “na veika lalai ka beci” (Alama 37:6), na vakalevutaki ni kila ka me baleta na ivakavuvuli ni Turaga. “Ia na Dauveivakacegui, na Yalo Tabu, ko koya ena tala mai ko Tamaqu ena yacaqu, ena vakavulici kemudou ena ka kecega kau a vosataka vei kemudou” (Joni 14:26).
E rawa me noda idusidusi na Yalo ni Turaga ka na vakalougatataki keda ena veidusimaki, ivakaro, kei na veitaqomaki vakayalo ena gauna ni noda ilakolako vakayago. Me da sureta na Yalo Tabu ena noda bula ena noda masumasu vakaibalebale yadudua kei na masumasu vakamatavuvale, vakani ena vosa i Karisito, gugumatua ka talairawarawa vakaidina, yalodina ka vakarorokotaka na veiyalayalati, kei na loloma, yalomalumalumu, kei na veiqaravi. E dodonu me da tudei ena noda levea na veika era tawakilikili, matailelevu, raravisa, ivalavala ca, se dukadukali ka vakavuna na noda tu vakasuka mai vua na Yalo Tabu.
Eda sureta talega me toso tikoga na veitokani ni Yalo Tabu me vaka na noda kilikili kaya ena kena vakayagataki ni sakaramede ena veisiga ni Vakacecegu yadua. “Raica sa kilikili sara mo qarauni iko vinaka me kakua ni tauvi iko na duka ni ka vakavuravura; ia mo lako ki na valenisoqoni ena noqu siga ni Vakacecegu ka qaravi au kina” (D&C 59:9).
Ena cakacaka tabu vakalotu ni sakaramede eda vakavouya kina na noda veiyalayalati ni papitaiso ka rawa me da ciqoma ka vakataudeitaka na vakabokoci ni ivalavala ca (raica Mosaia 4:12, 26). Me kena ikuri, eda taleva lesu tale e dua na vu ni yalayala vakamacawa me tikoga kei keda na Nona Yalotabu ka sega ni mudu. Ena noda qai segata tiko me da savasava ka kakua ni tauvi duka ni vuravura, sa da yaco kina me da waqa kilikili ka na dau tikoga kina na Yalo ni Turaga.
Ena vula o Feperueri ni 1847 e a rairai na Parofita o Josefa Simici vei Brigham Young ena dua na tadra se raivotu. E a tarogi Peresitedi Young na Parofita kevaka e tiko vua e dua na itukutuku me baleti ira na Veitacini. E sauma na Parofita o Josefa: “Tukuna vei ira kecega na tamata me ra yalomalua ka yalodina, ka vakadeitaka me ra maroroya na yalo ni Turaga ka na liutaki ira vakadodonu. Me ra qarauna me ra kakua ni gole tani mai na domo lailai e vinaka; ena vakavulici ira ena veika me ra kitaka kei na vanua me ra lako kina; ena vuataka na veivua ni matanitu” (raica Nodra iVakavuvuli Na Peresitedi Ni Lotu: Brigham Young [1997], 41; vakamatatataki). Na veidina taucoko e rawa me a vakatavulica na Parofita o Josefa vei Brigham Young ena veika tabu ka yaco o ya, e a vakabibitaka na kena rawati kei na taqomaki tikoga na Yalo ni Turaga.
Kemuni na taciqu kei na ganequ lomani, au vakadinadinataka ni bula dina tiko na Kalou na Tamada Tawamudu, kei na Luvena, o Jisu Karisito, kei na Yalo Tabu. Me da bula vakayadua oi keda ka me tikoga kei keda na nona Yalotabu ka sega ni mudu ka da na rawata kina na veivakalougatataki ni veidusimaki, veivakavulici, kei na veitaqomaki ka ra yaga ena gauna oqo. Ena yaca tabu i Jisu Karisito, emeni.