Oqo na Gauna Me da Kaulotu Kina!
Sa rawa kina ki na veitabana ni kaulotu e vuravura raraba ena veivakauqeti ni Turaga me ra kacivi ira na cauravou kei na goneyalewa kei ira na veiwatini yalodina ki na veilesilesi dredre.
Ena dredre me da raitayaloyalotaka e dua na ka e rawa ni da cakava me taleitaki cake ni da cauravou, goneyalewa se veiwatini e vuravura nikua mai na daukaulotu tudei ena Lotu i Jisu Karisito ni Yalododonu Edaidai. Na itukutuku ni kosipeli vakalesui mai eda wasea e sa rui bibi sara. E vu mai vua na Kalou na Tamada Tawamudu me baleti keda yadua na Luvena e vuravura ka kena itakele na Luvena Daulomani, ko Jisu Karisito. Ni sa kilai ka bulataki na itukutuku, ena rawa ni vakaisosomitaka na tiko yavavala ki na bula sautu, na rarawa ki na marau, ka vakarautaka na iwali ni veika dredre ena bula.
Sa tu oqo vei keda na idusidusi matata me da qaqa kina ena veiqaravi ni kaulotu. E vakarautaki ena idusidusi na Vunautaka na Noqu Kosipeli kei na ivurevure eso e caka me ra salavata. Na veilesoni vovou ka tu sara e cake na kena yaga ena kaulotu era yavutaki ena veivakavulici ena Yalotabu ka sega ni da cavuqaqataka walega. Era sa vakavinakataka cake vakalevu sara na wasei ni kosipeli ki vuravura raraba. Era sa vakavulici sara vakavinaka na peresitedi ni kaulotu yadua ena ivakavakayagataki ni iyaragi vovou oqo. Sa basika kina e dua na ilala peresitedi ni kaulotu yalodina, nuitaki, ka gugumatua ka na rawa me ra veivakauqeti ka veivakayarayarataki ena kaukauwa vei ira na daukaulotu.
Na kena vulici ka vakayagataki e vuravura raraba na vakasama eso mai na Vunautaka na Noqu Kosipeli mai vei ira yadua na daukaulotu, sa vaqaqacotaka na noda rawa ni vunautaka na itukutuku ni Vakalesui mai kei na vakavuvulitaki ni yavu ni veivakabulai kei na ivakavuvuli tale eso ni kosipeli. Sa yaga vakalevu sara na kena laveti cake na ivakatagedegede ni bula kilikili. Sa levu cake na veiqaravi ena yalodina e kune ena buturara, sa kaukauwa cake na kedra isema ni veiwekani na veitokani, sa levu cake na veivakavulici mana, ka vakavinakataki cake na nodra maroroi o ira na saumaki mai.
E sega ni vakatauvatani rawa na veidusimaki vakararaba e soli me liutaki kina na cakacaka ni kaulotu. E tokona na sasaga kece sara ni kaulotu e vuravura raraba mai vei ira na Mataveiliutaki ni iWasewase, o iratou na vitu na Peresitedi ni Vitusagavulu, na Kuoramu ni Le Tinikarua, kei na nodratou gagadre yadua na Mataveiliutaki Taumada.
Sa rawa kina ki na veitabana ni kaulotu e vuravura raraba ena veivakauqeti ni Turaga me ra kacivi ira na cauravou kei na goneyalewa kei ira na veiwatini yalodina ki na ilesilesi dredre eso me veiganiti kei na nodra dui gagadre kei na veika era rawata yadua. Au reki ni rawa niu vakaitavi ena sasaga ni veirawai oqo ka ra sa vakalougatataki kina vakalevu e vuqa ena veiyasai vuravura.
Sa vosa ko Elder M. Russell Ballard me baleta na kena tauyavutaki na vuvale dau veiwasei ena kosipeli. Au na vosa ena sala me vakarautaki kina e dua ki na kaulotu tudei me daukaulotu, sisita, se dua na veiwatini.
Na iwalewale oqo e tekivu mai vale ni ra se bera sara ni yacova na yabaki ni kaulotu ena nodra conaka ena nodra vakasama kei na yalodra na cauravou yadua ko ira na itubutubu na vakasama ni “niu sa lako ki kaulotu,” ka sega ni “kevaka au na lako ki kaulotu.” Era na vakavulici vakavinaka duadua na gone ena dina ni kosipeli ena nodra veivale ni rawa ni moici kina na veidusimaki me ganita na nodra yabaki kei na veika era rawa ni ciqoma na gone yadua. Ena veivale e moici kina na iyaragi kece sara ni dina me rauta vakavinaka na nodra ivakarau ni bula yadua na gone. Na veivakavulici vakaitubutubu era na sotava vakavinaka kina na gone na bula ka vakarautaki ira na cauravou bula kilikili ki na reki ena veiqaravi vakadaukaulotu. Ena loma ni vuvale sa rawa kina vua e dua na goneyalewa gone me kila ni sa nona itavi tawamudu me marama radinivale ka tina. Ia ni sa tadodo na vakavakarau oqo ena rawa ni basika e dua na gauna me lako kina ki kaulotu tudei, ni sa muri na nodratou ivakasala na Mataveiliutaki Taumada: “E rawa ni ra vakaturi me ra laki kaulotu tudei na goneyalewa yabaki ruasagavulu kadua se sivia era bula kilikili … o ira na goneyalewa oqo e rawa ni ra na cau vakavinaka sara … , ia me ra kakua ni vakaukauwataki me ra kaulotu. Me ra kakua ni vakaturi ira mai na bisopi ki na kaulotu kevaka ena vakaleqaleqa ki na nona sa vakarau vakamau.”1
Era sa vakayagataka tiko e vuqa na itubutubu na tiki ni idusidusi na Vunautaka na Noqu Kosipeli me ra vakamacalataka kina na vakasama ka na qai vua mai ni sa matua cake na nodra ivakadinadina na luvedra ni ra sa susugi cake e vale. Ni o se cauravou lailai sa rawa ni o vulica na sala mo qarava kina vakavinaka na nomu itavi me vaka ni o taura tu na matabete. O na vukei mo kila ka vakayagataka na veivakavuvuli bibi ni Turaga. Ko na vaqaqacotaki mo bula kilikili me rawa kina ni o ciqoma na veicakacaka tabu vakalotu ni valetabu ka laki kaulotu. Na veika vakaoqori ena tura na yavu ni veivakalougatataki ni veigauna mai muri mo tagane vakawati ka tama vinaka kina.
Eso na tiki ni Vunautaka na Noqu Kosipeli ena vakarautaki iko ena nomu bula vagoneyalewa mo kila ka bulataka na ivunau me baleta na nomu itavi vakamarama radinivale ka tina. Kevaka o na mani digia mo laki kaulotu sa na tiko yani e dua na kena yavu. Ena vukei iko ena nomu bula vakacauravou se goneyalewa na parokaramu ni semineri me vakotori kina e dua na yavu ni bula marau kei na qaqa ena bula oqo. E koto ena parokaramu ni Yavulotu kei na tolu na Brigham Young University e dua na vuli digitaki ka na rawa ni vakarautaki iko ki na veiqaravi ni kaulotu. E yavutaki ena ivakavuvuli ka tu ena Vunautaka na Noqu Kosipeli ka sala vata vakavoleka sara kei na ivurevure kaukauwa o ya. Ena solia vei iko e dua na itekivu vinaka ena nomu sa kacivi mo laki veiqaravi.
Na kaukauwa kei na mana ni idusidusi na Vunautaka na Noqu Kosipeli me baleti ira na daukaulotu, na veiliutaki, lewenilotu kei na itubutubu e vakavotukanataki ena kena sa sivia vakalailai na dua na milioni na ilavelave e sa veisoliyaki me yacova mai oqo. Sa yaga tiko beka vei iko na nomu ilavelave?
Ni o bisopi se peresitedi ni tabana ena veivakatarogi ni veivakauqeti, e rawa ni o vakalougatataka na nodra bula na cauravou yadua ena nomu tabanalevu ka vakakina o ira na veiwatini e ganita ena nomu vakayaloqaqataki ira me ra vakavakarau ki na kaulotu. E sega walega ni o na vakalougatataki ira na vakarau laki kaulotu e rawa talega ni ko na sauma na nodra masu na itubutubu ka tiko e dua na luvedra tagane ka sega ni se vakadeitaka rawa me lako ki na kaulotu e dina ga ni ra sasaga tiko me basika na gagadre ko ya. Me vaka beka oqo: Mai na nona gauna ni gone me yacova ni sa qase cake, a rogoci rau na nona itubutubu, na luvei keirau goneyalewa, ko Mary Lee, ni rau veitalanoataka tiko na nodrau gauna ni kaulotu. Keirau vakamacalataka na kena sa vakavutuniyautaka na neirau bula na neirau kaulotu ka vakotora na yavu ni veika kece keirau dau vakamareqeta ena bula. Ia keirau vakavuvulitaka vua ni nona na lewa sara ga se me na kaulotu se kua. Ena nona gauna ni tubu cake tiko, e matata ni vinakata me kaulotu. Ia ni sa yaco mai na yabaki me kaulotu, sa tekivu me votu mai eso na veigauna vivinaka ena nona bula vakavuli ena univesiti. Ena dua na gauna ni tukuna ni rau sa veimulomulo tiko kei na veilecayaki oqo, a vakasalataki me vosa vei nona bisopi. Sa lokuci sara na gauna ni sota. Ni a dabe vata toka kei na dua na bisopi digitaki, e a taroga, “Na cava na nomu nanuma ena noqu laki kaulotu tudei?” E a rika mai ena nona idabedabe ka tavia na teveli, ka kaya, “Oqori na ka cecere duadua au rawa ni vakasamataka me baleti iko.” Na vosa sara ga oqori sa qai vakadeitaki koya.
E a qarava e dua na kaulotu vuavuaivinaka o Mary Lee mai Spain ka vakavotuya mai eso na ka e rawa ni rawata ka sega tu ni kilai, e matua cake kina na nona bula vakayalo ka vakavuna na kena seraka mai eso na ka sa mai vakalougatataka na nona bula vakawati kei na bula vakatina. Na bisopi ka tatara sara vakalevu ena bula nei luvequ goneyalewa sai J. Willard Marriott, Jr., ka lewe ni Vitusagavulu tiko ni iWasewase ena gauna oqo ka kilai raraba ni o koya na iliuliu ni Marriott Corporations. Ia keitou dau nanumi koya vakalevu cake me baleta na veika ka vakayacora vei Mary Lee na luvei keirau goneyalewa. Ia ni sa tiko oqo ena nona matavuvale vakataki koya vata kei na nodrau ivakaraitaki kaukauwa na tamana kei na tinana erau sa lesu mai ena kaulotu, e dua na luvena tagane kei na luvena yalewa. Na luvena tagane sa vo tiko e sa matata tu ni na kaulotu kei na itoioti ni luvena yalewa ena vakayacora na digidigi veiganiti. E dua tale na makubuqu sa lakova tale tikoga na we ni yavai tamana, e se qai kacivi walega oqo me veiqaravi ena Tabana ni Kaulotu na Mexico Cuernavaca.
Kemuni na bisopi kei na peresitedi ni tabana, e rawa ni tu vei kemuni na kaukauwa mo ni tara kina na nodra bula na daukaulotu ko ni vakayaloqaqataka ka vakarautaka ka vakatalega kina ena nodra bula na nodra kawa. Vakayagataka na nomu veiliutaki ni kuoramu ni Matabete i Eroni kei ira na dauvakasala, ka vakakina ko ira na bete levu, italatala qase, kei ira na iliuliu yalewa me ra vukei iko ena nomu vakarautaki ira ki na veikacivi na kena levu ga ni daukaulotu bula kilikili o rawata. Ena kena vakayagataki na ivurevure vou ni kaulotu sa vuqa kina vei ira na daukaulotu ko ni vakatura mai era sa dau yaco mai ki na buturara ni ra sa vakarau tu vakavinaka ka vakauqeti me ra veiqaravi. Era tu eso era sa vakarau tu me ra kaulotu ka na sega ni levu na cakacaka me baleti ira, e vica era gadreva na veisau lelevu me rawa kina ni ra lako. Ena nodra veitokoni na itubutubu ni vukei ira me ra sotava na ivakatagedegede.
Masulaka se na veiwatini cava e rawa ni ra vakayaloqaqataki me ra solia mai na nodra pepa ni veikacivi ki na veiqaravi ni kaulotu tudei. Era sa gadrevi sara vakabibi.
Au sa dau qoroqoro ena nona vakasotara vata na Yalo Tabu na ituvaki ni nodra bula kei na veika era gadreva na daukaulotu yadua kei na veiwatini ki na veitutu duidui ni veiqaravi vakadaukaulotu e vuravura raraba. Au sa raica tiko na nodra kacivi na cauravou kei na goneyalewa kaukauwa ka uasivi sara ki Amerika kei Kenada me ra vaqaqacotaka tikoga na wakatu ni Lotu mai kea. Au sa raica na kena vakavotui mai vei ira na daukaulotu era lesu mai ena ilesilesi matalia eso, me vaka na nodra segata me ra matau ki na itovo ni vanua me vaka ena Yatu Pasifika, Mongolia, se na veiulunivanua e Guatemala, se na nodra sega tu ni veitaratara rawa kei na nodra peresitedi ni kaulotu, na veika a sega tu ni kilai, e dui tu vei ira.
Ia meu tukuna mada mai vu ni yaloqu na kena ibalebale vei au na veiqaravi dokai vakadaukaulotu. Au a tubu cake ena dua na vuvale ka rau sa rui vinaka na kena itubutubu, ia na tamaqu e sega ni lewenilotu ka luluqa tu vakalotu na tinaqu. Ni cava na noqu kaulotu sa veisau oqori. Sa yaco me rau kaulotu kaukauwa ka rau veiqaravi ena yalodina ena valetabu—o koya e dauveivauci, na tinaqu e liganicakacaka tabu. Ia niu se cauravou e sega ni rawa niu vakatulewataka vakataki au na bibi ni kaulotu. Keirau a veidomoni kei na dua na goneyalewa vinaka. Ena dua na gauna bibi ni neirau veigadivi, a vakamatatataka ni na vakamau ga ena valetabu vua e dua na daukaulotu. Ena veivakauqeti oqori, au a kaulotu kina e Uruguay.
E a sega ni rawarawa. E a solia vei au na Turaga na veidredre eso ka yaco me ikakalawa ki na noqu tubu. E keri au a rawata kina na noqu ivakadinadina ni Kalou na Tamada kei na Luvena Daulomani erau a sikovi Josefa Simici me tekivu kina na kena vakalesui mai na dina, na dodonu ni matabete kei na Lotu dina e vuravura. Au rawata kina na ivakadinadina ni parofita dina ko Josefa Simici. Au vulica na ivunau yaga. Au kila kina na ibalebale ni noda liutaki ena Yalotabu. Ena vuqa na bogi au dau yadra mai ni sa moce tu na noqu itokani meu sovaraka na yaloqu vua na Turaga meu tuberi ka dusimaki kina. Au kerea meu rawata meu dau vakaraitaka vakavinaka ena vosa vaka-Sipeni na noqu ivakadinadina kei na dina au sa vulica tiko vei ira e dua na matatamata sa yaco meu lomani ira. A saumi mai vakalevu sara na masu oqori. Ena gauna vata oqori sa conaki tiko kina na watiqu e muri, o Jeanene, me yaco me yalewa vakawati ka tina vinaka ena nona tabana ni kaulotu.
Na ka bibi duadua, na veika au sa mai vakamareqeta tu oqo ena noqu bula a tekivu me bobota mai ena buturara ni kaulotu. Kevaka beka au a sega ni vakauqeti meu daukaulotu, keu na sega beka ni taukena tu na itokani tawamudu se na matavuvale talei au dau lomana vakalevu. Au vakadeitaka keu a sega beka ni mai rawata na veigauna vivinaka sa rawa ni mai vakalevutaki kina na veika au rawa ni rawata. Au vakadeitaka keu a sega beka ni ciqoma na veikacivi tabu kei na gauna vinaka ni veiqaravi kau na dau vakavinavinakataka tu ga me tawamudu. Sa vakalougatataki vakalevu sara na noqu bula baleta niu a kaulotu.
Ia sa rawa beka mo ni kila na vuna au sa rui gadreva kina meu vakauqeti kemuni yadua na cauravou mo ni kilikili kaya na kaulotu? E rawa beka ni o ni kila na vuna au vakayaloqaqataki kemuni kina na veiwatini qase mo ni tuvalaka, kevaka e vakatara o bula, mo ni qarava na Turaga ena kaulotu? E rawa beka ni o ni raica na vuna au vakatura kina me so vei kemuni na goneyalewa, kevaka ko ni gadreva, ka na sega ni vakaleqa na vakavakarau ni vakamau, mo ni vakasamataka sara vakabibi mo ni laki qarava na Turaga ena kaulotu? Na neitou vuvale sa vakalougatataki sara vakalevu mai vua e dua na yalewa vakawati ka tina ka a digitaka me laki kaulotu tudei ena noqu gauna ni veiqaravi.
Kevaka o iko e dua na cauravou o vakataroga tiko se dodonu mo laki kaulotu, kakua ni cakava duadua na vakatulewa bibi oqori. Vakasaqara na nodrau ivakasala na nomu itubutubu kei na nomu bisopi se peresitedi ni iteki. Ena nomu masu kerea me vakatakilai vei iko na lewa ni Turaga. Au kila ni na vakarautaka vei iko na kaulotu ena gauna oqo, kei na nomu bula taucoko na veivakalougatataki e duatani sara. Au vakauqeti iko mo kakua ni masulaka mo kila se mo lako se sega; ia, kerea na Turaga me dusimaki iko ena veika kecega ena yaga mo yaco rawa kina mo daukaulotu tudei kilikili ka gugumatua. O na sega vakadua ni veivutunitaka na nomu laki kaulotu, ia ko na rawa ga ni veivutunitaka na nomu sega ni lako, kevaka mo a digitaka vakakina.
Au kila ni Karisito ko Jisu, ni sa vakalesui oti mai ki vuravura na Nona Lotu kei na taucoko ni Nona kosipeli mai vua e dua na parofita duatani na kena bibi ko Josefa Simici. Au vakadinadinataka ni ivurevure ni marau levu kei na veivakalougatataki vutuniyau na veiqaravi vakadaukaulotu, e sega walega vei ira era rogoca na itukutuku ia vei ira talega era vakadewataka, ena veidusimaki ni Yalotabu. Ena yaca i Jisu Karisito, emeni.