Tauyavutaki ni Vuvale dau Wasea na Kosipeli

Elder M. Russell Ballard

Ena Kuoramu ni iApositolo Le Tinikarua

Na tauyavutaki ni dua na vuvale dau wasea na kosipeli e sala rawarawa duadua ka mana vakalevu sara, e rawa ni da wasea kina na kosipeli.

Kemuni na taciqu kei na ganequ, ena vica na macawa sa oti a sele ka veisautaki kina na duruqu ruarua. Niu kaya tiko niu vakavinavinaka vakalevu ni rawa niu mai tu e matamuni nikua, me kua ni vakawaleni. Ena gauna ni vakabulabula oqo au nanuma lesu na noda sa vakalougatataki ena noda kila na nona Veisorovaki na Turaga ko Jisu Karisito. Au vakadrukai niu vakasamataka na mosi kei na rarawa a sotava ko Koya ena vukuda e Kecisemani kei na kauveilatai. Na nona rawa ni vosota, au sega ni vakasamataka rawa. Ia au vakavinavinaka ga Vua, ka lomani koya vakalevu cake mai na veika e rawa ni tukuni.

Au vakavinavinaka talega vei Peresitedi Hinckley ena galala ni rawa meu tiko talega ena vanua ni sucu nei Parofita Josefa. Ena vukui Josefa Simici sa soli kina vakalevu vei keda na ka. Kevaka a sega na Veivakalesui mai eda na sega ni kila na veika dina me baleta na Kalou, na Tamada Vakalomalagi, se na veika vakalou e baleti keda ni da Luvena. Eda na sega ni kila na inaki tawamudu ni noda mai tu se me da kila ni rawa ni tawamudu na matavuvale.

Eda na sega ni kila rawa ni vosa tikoga na Kalou vei ira na Nona parofita ena noda gauna, a tekivu mai na iMatai ni Raivotu ka rau rairai kina na Tamana kei na Luvena vua na parofita ko Josefa Simici. Eda na sega ni vakila na veivakadeitaki malumu ni da liutaki tiko ena gauna oqo mai vua e dua na parofita, ko Peresitedi Gordon B. Hinckley.

Kevaka e sega na Veivakalesui mai eda na nanuma tu beka ni sa vosa taucoko sara ga ni Kalou na kena e kunei ena iVolatabu. Me vaka na talei kei na vakasakiti ni ivola ni ivolanikalou oqo, eda na sega beka ni kila na iVola i Momani kei na veivolanikalou tale eso ni gauna oqo ka ra vakavuvulitaka na veidina tawamudu ka na vukei keda me da toro voleka yani vua na Tamada Vakalomalagi kei na iVakabula.

Ni sega na Veivakalesui mai eda na sega ni rawata na veivakalougatataki ni veicakacaka tabu vakalotu ni matabete ka na yaga tu ena gauna oqo ki na tawamudu. Eda na sega ni kila na veika e gadrevi ena veivutuni ka da sega talega ni kila na dina ni tucaketale. Eda na sega ni rawata na veitokani ni Yalo Tabu.

Ni da sa kila dina sara na levu ni veivakalougatataki ni kosipeli i Jisu Karisito ki na noda bula, ni da sa ciqoma ka mareqeta na veidina tawamudu oqo ka vakatara me ra lutudromu yani vakatitobu ki utoda kei na yaloda, eda na vakila e dua na “veivutuni” e yaloda (raica Alama 5:14). Eda na vakasinaiti ena loloma kei na vakavinavinaka. Me vaka e vola ko Alama na parofita, eda vinakata me “da rekitaka na loloma eda sa vakabulai kina” (Alama 5:26) vei ira kece era na rogoca.

“Raica meu agilosi mada ga,” e kaya ko Alama, “meu tabalaka na domoqu me vaka na davui ni Kalou sa yavalati vuravura, meu vunauci ira kina na tamata kecega me ra veivutuni!

“Io meu vunautaka ena domo sa vaka na kurukuru, me ra veivutuni na tamata kecega me ra bula kina, io me ra veivutuni ka lesu vua na Kalou, me ra marau kina e delai vuravura” (Alama 29:1–2).

Sa dodonu me vakakina vei keda kemuni na wekaqu. Na noda lomana na Turaga kei na noda taleitaka na Veivakalesuimai sai koya na veivakauqeti eda gadreva me da wasea kina na veika e kauta mai vei keda na reki kei na marau. Oqori na ka dodonu sara me da cakava e vuravura, ia e lewe levu ga vei keda era se lomalomarua tiko ena nodra wasea na nodra ivakadinadina.

Ena veiyasai vuravura taucoko era sa kidava tiko na noda daukaulotu na reki ka vu mai na wase ivakadinadina oqo, ena kena wasei na kosipeli. E vuqa vei ira era sa curu tiko yani ki na KVK vata kei na nodra ilavelave ni idusidusi ni kaulotu, na Vunautaka na Noqu Kosipeli sa vakatakilakilataki ka vulici tu mai vakavinaka. Au marau meu tukuna, ena vakayagataki ni Vunautaka na Noqu Kosipeli, era sa rawata vakalevu cake tiko me ra veivakavulici ena nodra dui vosa ga ena kaukauwa ni Yalotabu ka rawa me ra moica na nodra lesoni me sotava na nodra gagadre o ira era na vakavulica. Sa yaco kina me vakaibalebale e vuqa na bula.

Ia na ka dina, ni ka era gadreva ena gauna oqo sai koya me levu cake na tamata me ra vakavulica. Na veika eda sa sotava mai e tukuna ni veivakavulici vinaka duadua sai koya na kena era vakaitavi kina na lewenilotu ena vakasaqaqara kei na veivakavulici. E sega ni ka vou oqo—o ni sa rogoca oti e liu. Eso vei kemuni o ni sa veivutunitaka tu beka na nomuni sega ni veivuke tiko vakavinaka vei ira na daukaulotu.

Nikua au sa sureti kemuni mo ni vakacegu ka biuta vakatikitiki na nomuni leqa ka vakanamata ga ki na nomuni lomana na Turaga, na nomuni ivakadinadina ena Nona dina tawamudu, kei na nomuni vakavinavinaka ena veika kece sa cakava vei kemuni. Kevaka ko ni sa vakauqeti dina ena loloma, na ivakadinadina, kei na vakavinavinaka, ko ni sa na cakava ga na veika kece sara ko ni rawata mo ni vukea kina na Turaga [me ra] “Tucake tale mai na mate na tamata kecega ka rawata na bula tawamudu” (Mosese 1:39) na luvena na Tamada. E dina, ena sega ni rawa ni dua e tarovi iko ena nomu cakava.

E vakaraitaka vei keda na kena sala na iVakabula sara ga Vakataki Koya ena Nona sureti ira na nona tisaipeli me ra “lako mai ka raica … na yasana sa tiko kina ko Koya … ka [rau] sa tiko vata kaya” (Joni 1:39). Na cava na nomu nanuma e cakava kina vaqori o Koya? E sega ni vakamacalataki ena kena itukutuku ena ivolanikalou na Nona iulubale, ia au vakabauta ni sega ni baleta me vinaka se me rawarawa vua. Me vaka na nona ivakarau, a veivakavulici tiko o Koya. Na sala vinaka cava tale beka me da vakavulici ira kina era muri keda mai na nona sureti ira me ra lako yani Vua me rawa ni ra raica ka vakila na Nona itukutuku buta katakata.

Sa vakakina, ni rawa me vuvale dau wasea na kosipeli na noda ni ra sa curuma yani na noda vale o ira na noda veikilai ka vakila na kosipeli buta katakata ena vosa kei na ivalavala. E rawa ni da wasea na kosipeli ena taudaku ni soqoni vakalotu. Na noda bula e rawa ni noda lesoni, ka rawa me noda itukutuku na yalotabu e basika mai na noda veivale.

Na wasei ni kosipeli e vale ena sega walega ni veivakalougatataki vei ira eda na kauta mai ki na noda vale, ia vei ira sara ga era vakaitikotiko kina. Ni da tiko ena dua na vuvale dau wasea na kosipeli ena qaqaco cake na noda ivakadinadina ka na vinaka cake na noda kila na kosipeli. Na Vunau kei na Veiyalayalati e vakavuvulitaka ni rawa ni vosoti na noda ivalavala ca ni da vukea e dua tale me veivutuni (raica V&V 62:3). Eda na marau ni da vukei ira eso me ra lako mai vei Karisito ka vakila na kaukauwa veivueti ni Nona loloma (V&V 18:14–16). Ena vakalougatataki na noda matavuvale ni sa tubu me levu cake na nodra ivakadinadina kei na vakabauta na itubutubu ruarua kei ira na gone.

Ena veivuvale dau wasea na kosipeli eda na masuta na veituberi me baleti keda, ka da masulaka na nodra tiko vinaka vakayago ka vakayalo na tani. Eda masulaki ira era vakavulici tiko mai vei ira na daukaulotu, o ira na noda veikilai kei ira era sega ni da vakabauta vata. Ena vuvale dau wasea na kosipeli ena gauna i Alama era dau “soqoni vata wasoma; io me ra lolo ka masulaki ira era sega tu ni kila na Kalou” ko ira na tamata (Alama 6:6).

Na tauyavutaki ni dua na vuvale dau wasea na kosipeli e sala rawarawa duadua ka mana vakalevu sara, e rawa ni da wasea kina na kosipeli vei ira na tani. Eda sega ni veivosakitaka tikoga oqo na matavuvale eda sa kila levu tu ka rau tiko ruarua na itubutubu kei ira na gone. E rawa ni ra tauyavutaka na gonevuli ena vuli torocake na vuvale dau wasea na kosipeli ni ra vakasuluma tu na lalaga ni nodra rumu ena veiyaloyalo ka tukuna tu na sasaga vakayalo ka sega na veika vakavuravura. O ira na veiwatini qase cake kei na sega ni vakawati era na vakaraitaka e dua na vuvale dau wasea na kosipeli ena nodra kidavaki ira na toki vou mai ki na itikotiko ka sureti ira ki lotu ka sikovi ira ena nodra veivale.

Na matavuvale dau wasea na kosipeli sai koya era na dau taleitaka na gone ena itikotiko me ra qito kina, ka na rairai matau kina na noda sureti ira kei na nodra matavuvale me ra lako mai ki lotu, ki na lotu vakamatavuvale, se dua tale na itavi qaravi. Era na sega ni madua me ra taro se ra vakaitavi ena masu vakamatavuvale na itabagone era veisiko yani ki na dua na matavuvale dau wasea na kosipeli.

Na veimatavuvale dau wasea na kosipeli era rawarawa sara. Era na sega beka ni savavuka sara se ra itovo vinaka sara na kena gone. Ia ena vanua ka laurai votu kina na nodra veilomani na lewe ni matavuvale, ka vakilai na Yalo ni Turaga vei ira era veisiko yani kina.

Ni da veivosakitaka tiko na vuvale dau wasea na kosipeli, ena vinaka beka me da veitalanoataka talega eso na ka eda na sega ni raica kina.

Na vuvale dau wasea na kosipeli e sega ni dua na parokaramu. E ivakarau ni bula. Na tauyavutaki ni vuvale dau wasea na kosipeli e kena ibalebale na noda sureti ira na noda itokani kei ira eda tiko veivolekati ki na uciwai ni itavi qaravi vakamatavuvale kei na Lotu. Ni da sureti ira na noda itokani ki na itavi qaravi oqori, era na vakila talega na Yalotabu.

Na tauyavutaki ni dua na vuvale dau wasea na kosipeli e sega ni kena ibalebale me da vagolea e dua na iwase levu ni gauna ena noda sotavi ira ka vakabulabulataka na isema ni veitokani me wasei kina na kosipeli. Era na curu mai ki na noda bula na itokani oqo; kevaka eda tadola tu me baleta na noda lewena na lotu mai na ivakatekivu, ena rawarawa sara na noda vakacuruma mai ki na noda veiwekani oqori na veitalanoataki ni kosipeli ka da na sega ni leqataka na duidui ni vakasama. Era na ciqoma na itokani kei na noda veikilai na veika oqori e tikida ga, ka ra na galala me ra taro.

Ena sega ni kilai e dua na vuvale dau wasea na kosipeli, ena nodra curu mai se sega na tamata ki na Lotu ena vuku ni nodratou veisureti vei ira. Na noda galala ka noda itavi me da veikauwaitaki, me da veiwasei, me da vakadinadinataka ka veisureti, ka qai laiva ki na tamata yadua me ra vakatulewa vakataki ira. Eda vakalougatataki ena noda sureti ira me ra vakasamataka mada na Veivakalesuimai, veitalia na vuana. Sa dua mada ga na ka ena rawa kina, na noda veiwekani vata kei na dua mai na dua tale na matavakabauta, ka rawa ni da na qai veiwekani tikoga.

Ena dua na vuvale dau wasea na kosipeli eda sega ni masulaka ga na nodra bula, na nodra taqomaki, kei na nodra rawa ka na noda daukaulotu e vuravura raraba. Eda dau masulaka talega na noda rawa ni cakava na cakacaka ni kaulotu o keda ka me da vakarau tu me da yavala ni yaco mai na kena veivakauqeti. Kau yalataka vei kemuni ni na yaco dina mai.

Ena sivia na 20 na yabaki sa oti au a vakatura kina ni idola vinaka ni nodra itavi na lewenilotu ena cakacaka ni kaulotu sai koya na cakacakataki ni vakabauta. E dua na sala mo vakaraitaka kina na nomu vakabauta na Turaga sai koya mo biuta e dua na tikinisiga ena masumasu mo sa vakarautaka rawa kina e dua me sota vata kei rau na daukaulotu. Au sa ciqoma e drau na ivola mai vei ira na lewenilotu era sa vakatovotovotaka ena sala rawarawa vakaoqori na nodra vakabauta. E dina ni na sega ni dua e tu ena nodra vakasama na matavuvale me ra na wasea kina na kosipeli, era biuta e dua na tikinisiga, era masu, ka veitalanoa vata kei ira e vuqa na tamata. Na iVakatawa Vinaka na Turaga ka kilai ira na Nona sipi era sa vakarau tu me ra rogoca na domona. Ena dusimaki keda o Koya ni da vakasaqara na nona veivuke vakalou ena kena wasei na Nona kosipeli.

A tarogi e dua na marama mai Varanise ena ka vuni ni nona qaqa. E qai kaya: “Au dau wasea ga na noqu marau. Au dau raici ira kecega na tamata me vaka ga ni ra sa lewena tu na Lotu. Kevaka au tu volekata tu e dua ka keirau veitalanoa, au dau wasea vata kei koya na levu ni noqu taleitaka na noqu veisoqoni ena Sigatabu. Ni ra taro o ira keimami cakacaka vata, ‘na cava o na cakava ena mua ni macawa oqo?’ Au na sega ni rika mai na bogi ni Vakarauwai ki na mataka ni Moniti. Au dau wasea vata kei ira niu lako ki Lotu, na veika e tukuni, kei na veika au sotava vata kei ira na Yalododonu. Au dau veivosakitaka na ivakarau ni noqu bula, na noqu vakasama kei na noqu nanuma.”

Ena vuvale dau wasea na kosipeli, sa dau ulutaga ni bose kei na veivosaki vakamatavuvale na noda dui sasaga yadua ni kaulotu. Eratou a veitalanoa e dua na matavuvale yalodina ena kena gadrevi vei ira yadua na lewe ni matavuvale me ra ivakaraitaki. E muri, a qai vakauta mai ki na Lotu e dua na cau na nona dauveituberi ena qito, ka sega ni lewe ni Lotu. Baleta na cava? Baleta ni vakauqeti koya na cauravou oqo ena nona yaloqaqa me tukuna na lomana vei ira na nona lewe ni timi ka kaya me ra vakasavasavataka na vosa era cavuta. E udolu na veika e rawa ni da wasea ena nodra mai lewena na Lotu eso ena vuku ni yalo kei na ivakarau ni bula era raica ena nodra bula o ira era lako mai na veivuvale era dau veiwasei ena kosipeli.

E rawa ni kauta mai ki na Lotu eso na kena itokani vovou na ivola kei na DVD ni Lotu. Sa dau marautaki talega mai vei ira na sega ni lewenilotu na veisureti ena nona vosa ena soqoni ni sakaramede e dua na lewe ni matavuvale se me ra tiko ena lotu ni nona papitaiso e dua na lewe ni matavuvale se me ra laki sarasara wavoki ki valenilotu. Ena ivakaraitaki kece sara sa tu, e sega ni dua na ka mana vakalevu cake e rawa ni da cakava vei ira na noda itokani mai na noda kaya “lako mai ka raica” ena nodra mai duavata kei keda ena soqoni ni sakaramede. Sa rui lewe levu era sega ni kila ni marautaki sara na nodra mai sokalou vata kei keda.

E dina sara, eda tokoni ira kece na noda veiliutaki ena tabanalevu ka da veivuke ena kena vakavotukanataki na ituvatuva ni tabanalevu ni cakacaka ni kaulotu. Se cava ga na noda ilesilesi ena Lotu, eda na vukei ira na veiliutaki ni matabete kei na mataisoqosoqo me ra vukei ira na daukaulotu, ena nodra kidavaki ka vakaitavitaki na vulagi, ka veiwasei vei ira na lewenilotu vou. E rawa ni o kerei rau na daukaulotu me rau vakaraitaka na nodrau ituvatuva ni veisiga mo raica kina na sala cava e rawa ni o na vukei rau kina me rau rawata na nodrau takete. Ni da cakacaka vata, ena sinai vutuvutu na noda veivalenilotu, noda valenivuli, kei na vale ni soqo ena yalo ni vuvale dau wasea na kosipeli.

Au vakadinadinataka ni kevaka eda na cakava ga eso na veika rawarawa oqo, ena tuberi keda na Turaga me da raici ira na udolu vakatini na luvena na Tamada Vakalomalagi era sa vakarau tu me ra vakavulici ena kosipeli. Na noda lomana na Turaga, na noda marautaka na Nona isoro ni veivakaduavatataki, kei na Nona cakacaka me lako yani Vua na tamata kecega ena solia na veivakauqeti kece sara eda gadreva me da qaqa kina ena kena wasei na kosipeli.

Me vakalougatataki kemuni na Turaga, kemuni na taciqu kei na ganequ, ena vakabauta levu kei na vakanuinui Vua ena nomuni sasaga yani ena gauna oqo mo ni tukuna na Vakalesui mai ni kosipeli i Jisu Karisito vei ira na tamata e vuravura, Au masuta ena yaca i Jisu Karisito, emeni.