O Le Tulaga ua I Ai le Ekalesia

Peresitene Gordon B. Hinckley

Ua na o le amataga lenei. E anoanoai mea e le i faia. O loo tatou galulue nei i se galuega mo agaga o alii ma tamaitai i nuu uma

Ou uso e ma tuafafine pele i le lalolagi atoa, matou te momoli atu o matou alofaaga i le suafa o lo tatou Togiola. E momoli atu o matou alofaaga faatasi ma faamanuiaga. Ou te avatu le faamalo tele ia te outou, ona o mea o loo outou faia e tulei ai i luma le galuega a le Alii.

Ou te manatunatu lemu lava i lea taimi ma lea taimi i le tuputupu ae o lenei galuega ma lona aafiaga. Ou te manatunatu i lena fonotaga sa auai ni nai tagata toaitiiti i le fale o le faatoaga a Pita Uitimera, i le aso 6 o Aperila, 1830. O iina sa faatulaga ai le Ekalesia ma o iina foi sa amata ai le savaliga umi lea na afua mai ai lona tulaga ua i ai nei.

Sa tauasa mai o tatou tagata i le pologa ma sauaga; sa mafatia i latou i le tutuliese faamalosi ma soo se ituaiga faiga mataga e mafaufau i ai. Ma o na mea uma, ua fanau mai ai se mea ua faamanuiaina ai le taimi nei ona ua maua.

I le tatalaina o lenei galuega sa fetalai mai ai le Alii:

“Ina faalogo mai ia, E outou tagata o la’u ekalesia e, ua faapea mai ai le siufofoga o le o afio i luga, o le o loo sisila mai ona fofoga i luga o tagata uma; ioe, e moni ou te fai atu: Ina faalogo mai ia outou tagata mai mea mamao; ma outou o e oi luga o motu o le moana, faalogo faatasi mai ia.

“Aua e moni ua oo atu le siufofoga o le Alii i tagata uma lava, ma e leai se sao ai; ma e leai se mata e le vaai, po o se taliga e le faalogo, po o se loto e le tuia …

“Ma o le leo o le lapataiga e oo atu i tagata uma lava, i fofoga o o’u soo, o e ua ou filifilia i nei aso e gata ai.

“Ma latou te o atu a e leai se e taofi ia i latou, aua o au o le Alii ua poloaiina i latou” (MFF 1:1–2, 4–5).

E le tatau ona i ai se faaletonu e faatatau i o tatou tiute e fai mo tagata i le lalolagi. E le tatau ona i ai se masalosalo o loo tatou agai i luma i le faataunuuina o lena tiute.

A o ou tautala atu ia te outou i le aso, o le toatele lava o tagata o le Ekalesia, pe o fea lava o i ai, e mafai ona lagona mai au. O se vavega lena mea. Mata lava o ai na iluilu ma talotalo i le popofou o le Ekalesia, e mafai ona tatou maua lenei vaitau o avanoa lea ua tatou ola ai?

Ua i ai nei ni a tatou faapotopotoga malolosi i setete taitasi uma o le Iunaite Setete ma itumalo uma o Kanata. Ua faapena foi i setete uma o Mekisiko, o nuu uma i Amerika Tutotonu ma malo uma i Amerika i Saute. Ua i ai a tatou faapotopotoga malolosi i Ausetalia ma Niu Sila ma Motu o le Pasefika. Ua mauaa foi i atunuu i Asia. Ua i ai foi i malo uma i Europa i Sisifo ma le tele o Europa i Sasae, ma ua tatou mauaa foi i Aferika.

Ua aloaia i tatou ona o tulaga maualuluga naua o a tatou polokalama ma le tele naua o le lelei ua tulai mai ona o ia polokalama.

Sa tusia talu ai nei i se nusipepa a Kalefonia e faapea: “E iloagofie lava le au ofu papae, o ato faafafa ma uila vilivae, tusa lava pe e te le i iloa atu le Tusi a Mamona.

“O se vaega o tagata e tutusa uiga ona o se mafuaaga lelei.

“O autau nei o alii talavou—faifeautalai i le Ekalesia a Iesu Keriso o le Au Paia o Aso e Gata Ai—e matua faatulagaina lelei ao latou galulue i misiona i le lalolagi atoa.

“E lua tausaga, latou te faaaluina ai le 60 itula i le vaiaso e fai ai galuega faalelotu, ma tatalo, suesue, ma faamatala atu i isi e uiga i le Talalelei ua uunaia ai i latou e tuua o latou auaiga, o uo ma le olaga manaia i le aiga.

“E na o tusi e mafai ona fesootai ai ma o latou aiga pele ae faalua ona telefoni i ai i le tausaga.

“Latou te ola faasoasoa tatau, i fale na o i latou ma fale mautotogi faatasi ma a latou soa faifeautalai, e alafa’i i le taeao i le 6 e suesue ma tatalo e taitai i latou i le galuega o le a latou faia seia te’a mamao le goto o le la …

“Latou te fai mai, o le olaga lenei, o se osigataulaga—ma o se olaga e aupito sili ona ‘malie’ nai lo se isi” (Priscilla Nordyke Roden, “Answering the Call,” San Bernardino County Sun, 26 Aug, 2003, p. B1).

Atonu ua silia ma le 120 atunuu ua tusia ai lenei mea e uiga i a tatou faifeautalai sa galulue ai.

O se matua vavega lava le tusa ma le 60,000 o i latou o i ai, ma o le toatele lava o i latou e talavou, ae o loo latou tuuina atu o latou taimi ma a latou molimau i le lalolagi.

Sa matou feiloai talu ai nei ma se vaega o faifeautalai o le a faamalolo i le aso na sosoo ai o le a toe foi i aiga. E eseese lava atunuu o le lalolagi e o mai ai, mai Monokolia e oo atu i Matakasa. Sa vaaia lo latou mama ma le mataalia ma le naunautai. Sa latou tautino maia lo latou alolofa i le Ekalesia, o lo latou peresitene o le misiona, ma a latou soa. O se mea matua ofoofogia ma tulaga ese lenei polokalama a le Ekalesia.

E faapena foi i isi polokalama.

E lei leva tele atu ona faaviivii ma faamalo mai le aufai nusipepa ia i tatou ona o le tuuina atu o le tolu miliona tala e fai ai tui faagata o tamaiti i Aferika e puipuia ai mai le misela. O lenei tupe e le’i aumaia i sefuluai. Na aumai i foai alofa a tagata faatuatua o le Ekalesia mo le galuega fesoasoani a le Ekalesia. Sa tatou auai faatasi atu i le Koluse Mumu a Amerika, o le Ofisa Faavae o Malo Aufaatasi, o Nofoaga Autu mo le Puipuia o Faamai, o Teugatupe a Malo Aufaatasi mo Tamaiti, o le Faalapotopotoga o le Soifua Maloloina i le Lalolagi, ma le Faalapotopotoga o le Soifua Maloloina o le Pan American, i se taumafaiga ina ia fai tui puipui mo tamaiti e 200 miliona ma ia puipuia ai le 1.2 miliona o tagata e maliliu ona o le misela i le isi lima tausaga o lumanai. O la tatou lava foai, o le a saunia ai tui mo tamaiti e tolu miliona.

E maeu lava le ofoofogia ma le matagofie o lenei mea. Ma e faapena foi a tatou polokalama taitasi e fesoasoani ai i tagata.

Toe tasi le isi mea lea ou te fia tautala atu ai.

I le aso 31 o Mati, 2001, sa ou faasilasila atu ai o loo faatuina e le Ekalesia se fuafuaga e fesoasoani ai i o tatou faifeautalai ua taliu mai misiona, ma isi talavou matutua ina ia maua ai aoga ma tomai e maua ai ni avanoa faigaluega e sili atu i atunuu e le o lava le tamaoaiga ma e laitiiti avanoa e maua ai.

Sa matou valaauliaina i latou e fia fesoasoani i lenei fuafuaga ina ia aumai a latou foai i se teugatupe ua faaigoaina o le Tupe Faaagaga mo Aoga, e faafoliga i le Tupe Faaagaga mo Femalagaaiga. Atonu tou te fia iloa se lipoti i le mea ua tupu i lena fuafuaga.

Talu ai a outou foai agalelei, o lea ua mafai ai ona tatou taulimaina le tulaga manaomia tele o nonogatupe [mo aoga]. E oo mai i le taimi nei, tusa ua 10,000 nonogatupe ua faamatuu atu e le Ekalesia i alii ma tamaitai talavou i Latina Amerika, Asia, Aferika, ma isi vaega o le Ekalesia. Ua uma ona tautino mai e nei talavou, o le a latou toe totogiina mai nei nonogatupe, ina ia mafai ai foi e isi ona sapi i nei lava avanoa ua latou maua.

E toatele foi ua uma ona faauu, ma ua latou aeae nei i faamanuiaga o a latou aoaoga i le anoano o galuega matagofie. E oo mai i le aso, e tusa ma le 600 alii ma tamaitai talavou ua maea a latou aoga. O le toatele lava o i latou nei, ua lelei a latou galuega. O le a toatele foi isi o le a faauu ma ulufale atu e faigaluega i o latou lava nuu i masina o lumanai nei. O le a latou faaeaea i o latou nuu, tausia o latou aiga, ma galulue auauna i le Ekalesia. O le toatele ua ausia nei faamoemoega.

Mo se faataitaiga, o Paterika o le tagata aoga muamua lea o le Tupe Faaagaga mo Aoga na maea le aoga i Iamaika. O lana aoga i mataupu mo pulega faavae, na maua ai sana galuega totogi lelei i le malaevaalele o le atunuu, ma o le a maua ai se lumanai manuia. Sa vave ona amata le toe totogiina o lana nonogatupe.

O Flavia, o se tuafafine mai se vaega matitiva o Amerika i Saute, sa na o si avanoa laitiiti lava na ia maua ma sina tupe itiiti e a’oga ai ma se galuega masani, seia oo ina maua le fesoasoani e ala i le Tupe Faaagaga mo Aoga e aoga ai i le faaaogaina o komepiuta. O le fesoasoani a le Ofisa o le Ekalesia mo le Sailia o Galuega, sa maua ai lana galuega i se kamupani lelei ina ua maea lana aoga. Fai mai lana lipoti, “O le taimi nei, o lea ou te vaaia le vaega mo le faafesootaiga o mea tau tupe i se tasi o falemai tele i Recife, e faaaoga ai se polokalama [lavelave] faakomepiuta. O au o se tasi o le vaega lea sa amatalia lenei polokalama o mea tau tupe i le kamupani.”

E mafai ona tele nisi faataitaiga ou te tuuina atu. Matou te fiafia e lipoti atu o loo solosolo lelei lava le polokalama, ma e iu lava ina faateleina a o tatou maua le poto masani. O uluai lipoti foi o le toe totogiina atu o nonogatupe, ua maua ai le faamalosiauga. Ou te toe faapea atu, faafetai i lo outou limafoai, o lo outou naunau mai, ma a outou tatalo mo le Tupe Faaagaga mo Aoga.

Sa i ai se taimi sa i ai se faaupuga faapea, e le goto lava le la i luga o le Malo o Peletania. Ua tuuitiitia nei lena malo. Peitai, e moni e le i goto lava le la i lenei galuega a le Alii aua o loo pa’i atu ai i olaga o tagata i le lalolagi atoa.

Ma ua na o le amataga lenei. E anoanoai mea e le i faia. O loo tatou galulue nei i se galuega mo agaga o alii ma tamaitai i nuu uma. E leai se tuaoi o la tatou galuega. O le a faaauau pea i lalo o le taitaiga a le Alii. Ua taulalata mai na malo ia te i tatou, ma o le a i ai se aso e matala mai ai. O lo’u faatuatua lena. O lo’u talitonuga lena. O la’u molimau foi lena.

O le maa na tofia mai le mauga e aunoa ma lima ua taavalevale atu seia tumu ai le lalolagi atoa (Tagai Tanielu 2:31–45; MFF 65:2).

Ou te faapea atu i le Au Paia o Aso e Gata Ai i soo se mea o outou i ai, a o tatou potopoto i lenei konafesi maoae, ia faamanuia atu le Atua ia te outou. Ia tumau i le faatuatua, ma ia faamaoni i au feagaiga. Ia savali i le malamalama o le talalelei. Ia atiina ae le malo o le Atua i le fogaeleele.

O loo i ai le Ekalesia i se tulaga matagofie ma e mafai, ma o le a faaleleia atili. O le a tuputupu ae ma malosi.

O i tatou o ni tagata faatauvaa o loo galulue i se taumafaiga maoae. O i tatou o ni alii o loo umia le perisitua a le Atua soifua. O i latou na muai atiina ae le Ekalesia, sa latou faataunuuina mea ofoofogia. Ua ia te i tatou le avanoa ma se luitau e faaauau ai lenei galuega tele, e le mafuatia i manatu lona lumanai.

Faafetai atu ou uso e ma tuafafine, mo lo outou faatuatua ma le faamaoni. Faafetai atu i le alofa o loo outou faaalia mo lenei galuega, a le Silisili Ese. O loo tatou ola i lenei lalolagi. Tatou te galulue foi i le lalolagi. Peitai, e tatau ona maualuga lo tatou tulaga nai lo le lalolagi, a o tatou faataunuuina le galuega a le Alii ma saili e atiina ae Lona malo i le lalolagi. Ia tatou auau faatasi nei i se konafesi mo le lalolagi atoa, o loo i ai alii ma tamaitai o ni uso ma ni tuafafine moni lava, o ni fanau foi a le Atua.

O nei aso e lua o le a tatou faalogologo atu ai i le toatele o pulega aoao ma taitai, e leai lava se tasi o i latou na ta’u i ai se mataupu e lauga atu ai, ae peitai, sa tofu augani atu i latou uma taitoatasi i le Alii ina ia mafai ona saunoa atu i se mea o le a fesoasoani, musuia, ma siitia ai i latou uma e faafofoga i ai.

Ia i ai faamanuiaga o le lagi ia te outou. Ia outou faamaoni ma tumau i le galuega tele ma le mamalu o loo outou punouai ai, o la’u tatalo lea ma le lotomaualalo, i le suafa o le Togiola, o le Alii ia o Iesu Keriso, amene.

O le taimi nei, o loo i ai se tufaaga faapitoa lava mo i tatou. Ou te fia valaau atu ia Uso David B. Haight e susu mai i le pulelaa. O se toa maoae lenei. Ua 97 tausaga o lona soifua. Ua sili atu ona umi tausaga o lona soifua nai lo se isi lava Aposetolo i le talafaasolopito o lenei tisipenisione. Sa faataotolia talu ai nei ma ua fai ai sina faigata teisi. Peitai, sa manao lava o ia e susu mai i lenei taeao e tau lava ina talotalo atu ia te outou, faatasi ai ma se lagona o le agaga faafetai ma lona agaga talisapaia mo outou ma lona alofa tele foi mo outou. Matou te fai atu ia te oe, le uo pele, ia faamanuia oe e le Atua ma faamalolo ia te oe. Matou te alolofa ia te oe, matou te lagolagoina oe, matou te tatalo foi mo oe. Ia i ai faamanuiaga o le lagi i ou luga, le Uso pele Haight. Faafetai lava.

Elder Haight: Faafetai lava.

Peresitene Hinckley: E te fia talotalo i le aofia?

Elder Haight: Ioe, e tatau lava. O lea ua ou talotalo i ai. Faafetai, faafetai lava. Manaia ua tatou mafuta.

Peresitene Hinckley: Faafetai lava.

Elder Haight: Faafetai foi.

Peresitene Hinckley: Faamalie atu o le a tuumuli lana susuga. O lea o le a susu e maimoa mai i le televise. O ia o se fitafita e matua maoae i le autau a le Alii. Faafetai tele lava, Uso Haight.