O Oe o se [Tagata o le] Au Paia?
Afai tatou te mananao e avea i tatou ma [tagata o le] Au Paia i o tatou aso, e tatau ona tavavae ese mai i tatou lava mai amioga leaga ma gaoioiga faatafunaina ua tumu ai le lalolagi.
Na ou i ai i ni tausaga ua mavae i Atalana, Georgia o se loia e fai ma sui o se alii na faatauina mai se pisinisi. I le mavae ai o ni nai aso o feutagaiga, na matou tasi loa i se maliliega ma fai loa le sainigalima faaiu [ua faamaeaina le faatauina mai o le pisinisi]. O lena afiafi na valaaulia ai i matou e se tasi o tagata faatau ina ia matou faiaiga e faailoga ai le faamaeaina [o le sainigalima]. Ina ua ou taunuu atu, sa ia ofoina mai ia te au se mea inu malosi sa faapea ona ou teenaina. Ona ia fesili mai lea, “O oe o se [tagata o le] Au Paia?” Ou te lei malamalama lelei i le uiga o lana faamatalaga ma na toe fesili mai, “O oe o se [tagata o le] Au Paia o Aso e Gata Ai?” Na ou tali atu, “Ioe, o lea lava,” ma na ia faapea mai sa ia maitauina lava ou uiga i le taimi o la matou feutagaiga ma na tonu ai ia te ia, a le o au o se AAG ia pe i ai foi se faaletonu i lou laualo. Na ma toē faatasi. Ona ia tauina mai lea ia te au e na o le toatasi le tagata o le Ekalesia na te silafiaina lelei lava, o David B. Haight lea. Na avea i laua ma ni alii pule i Chicago i se pisinisi na faatautaia ni faleoloa tetele i le mavae ai o le Taua Lona II o le Lalolagi. Na ia faamatala mai ia te au e uiga i aafiaga taua na faia e Elder Haight i lona olaga ma na te matuai faaaloalogia tele o ia.
Ao ou malaga atu i le fale i San Francisco, sa ou mafaufau i le mea na tupu, ae maise lava i ni manatu taua se lua: Sa ou tei i le lagona na ou lagonaina ina ua ia fesili mai pe o au o se [tagata o le] “Au Paia,” ma sa faagaeetia au i le aafiaga mautinoa na faia e se faataitaiga maoae—o Elder Haight—i lenei alii lelei.
O le a le uiga o le avea ma se [tagata o le] Au Paia? I le Ekalesia a le Alii, o ona tagata o le Au Paia ia o Aso e Gata Ai, ma latou te taumafai e mulimuli i faataitaiga a le Faaola, mulimuli i Ana aoaoga, ma maua ia sauniga faaola ina ia mafai ona mafuta faatasi i le malo selesitila ma le Atua le Tama ma lo tatou Faaola o Iesu Keriso.1 Na fetalai mai le Faaola, “O lau talalelei lenei; ua outou iloa foi mea e tatau ona outou faia i lau ekalesia; aua o galuega na outou vaai i ai ua ou faia ia faia foi e outou.”2
E le faigofie le avea ma se [tagata o le] Au Paia o Aso e Gata Ai. E le tatau ona faigofie. O le sini aupito taua o le mafuta ai i le afioaga o le Atua le Tama ma Lona Alo o Iesu Keriso, o se avanoa toetoe a le mafai ona malamalama i ai.
Faatasi ai ma tofotofoga aupito sili ona ogaoga na fetaiai ma le Ekalesia, o le Maliu fasia lea o le Perofeta o Iosefa Samita, ona sosoo ai lea ma le tutulieseina faamalosi o le Au Paia mai Navu. Ao latou agai atu i le ala e sopoia laufanua i ni tulaga sili ona leaga, na tusia ai e William Clayton le viiga maoae “O Mai, Outou o le Au Paia.” O se viiga na faaosofia ai o latou agaga ma fesoasoani latou te manatua ai la latou misiona paia. O ai o i tatou e le lagona le ootia, ao tatou lagonaina a latou taulaga, lototele ma tautinoga, pe a tatou pepese: “A tatou oti, ae lei au i ai, / Ua lelei! Faafetai!”3
O lenei viiga na tuuina atu ai ia i latou le lototele, mafanafana ma le faamoemoe, i se taimi o le ogaoga o faigata faatasi ai ma mea faafatiatamai na toetoe a le mafai ona gafatia. Na siitia ai o latou agaga ma faamamafaina ai le mea moni e faapea o lenei olaga faitino o se malaga i le va o le muai olaga ma le olaga faavavau i le lumanai—o le ala sili o le fiafia. O le viiga musuia a Uso Clayton o loo faamamafaina ai taulaga ma le uiga moni o le avea ma [tagata o le] Au Paia. Na fetaiai paionia o le Ekalesia ma luitau o o latou aso ina ia avea ai ma ni [tagata o le] Au Paia.
O le uiga o le upu au paia i le gagana Eleni o le “tavavae ese mai, aveese mai [ma] paia.”4 Afai tatou te mananao e avea i tatou ma [tagata o le]Au Paia i o tatou aso, e tatau ona tavavae ese mai i tatou lava mai amioga leaga ma gaoioiga faatafunaina ua tumu ai le lalolagi.
O loo tatou vaaia pea lava pea ia foliga vaaia o le fevatauai ma le ola le mama. O musika le lelei ma tusi ma ata mataga ua sili ona taliaina. O le faaaogaina o fualaau ma vailaau faasaina ma mea inu malolosi ua le mafai ona taofiofia. Ua itiiti le faatauaina o le faamaoni ma uiga lelei o se tagata. Ua fesiligia ia aia a le tagata lava ia, ae ua lafoai ia matafaioi ma tiute. Ua faateteleina le faaaogaina o gagana ma upu masoa ma le faaalia o mea leaga ma le le migao. Ua le malolo le fili i ana taumafaiga ina ia faatamaia le ala sili o le fiafia. Afai tatou te o ese mai mai lenei amioga faalelalolagi, o le a tatou maua le Agaga i o tatou olaga ma iloa ai le olioli o le avea ma ni [tagata o le] Au Paia o Aso e Gata Ai agavaa.
I le avea ai ma ni tagata o le Au Paia, e tatau foi ona tatou aloese mai le ifo i tupua o le lalolagi. Ua faailoa mai e Peresitene Hinckley lona naunau ina ia “maua e tagata uma ni mea lelei o le olaga” ae ua ia lapatai mai, “O le mana malosi i oa lena e aati ma faaumatia.”5
I le 1630 na faailoa mai ai e John Winthrop se faalepo mo le laueleele fou o (Amerika) e fai ma sui o isi tagata o le pasese ao folau atu o ia i le Arbella. Na lauiloa o le lauga i le “Aai i luga o le Mauga.” I le parakalafa mulimuli, na faatatau Winthrop i le Teuterenome e 30 ma lapatai mai e uiga i le ifo ma le auauna atu i isi atua—ma na faapitoa ona faamamafa mai ai ia “tuinanau o le lalolagi ma viiga.”6 E lei leva ona mavae atu, na fautua mai ai Peresitene Kimball e faapea, o fale, vaa, ma tusi faamaonia o le atamai o se tagata, tofiga po o tulaga ma isi taumafaiga faapena, e mafai ona ifo i ai o ni tupua pe afai latou te taitaieseina atu i tatou mai le alofa atu ma le auauna atu i le Atua.7
O le perofeta o Moronae, na saunoa e uiga i o tatou aso, na lapatai mai e uiga i le naunau i tupe ma mea uma ma fautuaina ai o le a sili na tatou naunau i na mea nai lo “le alofa i e matitiva ma e le tagolima, ma e mamai ma e puapuagatia.”8
Afai e fia avea ai tatou ma tagata agavaa o le Au Paia, e tatau ona tatou fesoasoani atu i isi ma usiusitai i le apoapoaiga a le Faaola ina ia alofa atu i le Atua ma o tatou uso a tagata.
O le o ese mai mea leaga o le lalolagi, e manaomia ai ona i ai faatasi ma le paia. O se tagata o le Au Paia e alofa i le Faaola ma mulimuli ia te Ia i le paia ma le faamaoni.9 O le faamaoniga o lenei ituaiga paia ma le faamaoni, e faaalia i le faapaiaina ma taulaga. Na aoao mai Peresitene Hinckley e faapea, “A leai se taulaga e leai se tapuaiga moni i le Atua.”10 O le taulaga o le suega aupito maualuga lea o le talalelei. O lona uiga o le faapaiaina o taimi, taleni, malosi ma mea ua maua i le lalolagi e faalauteleina ai le galuega a le Atua. I le Mataupu Faavae ma Feagaiga e 97, fuaiupu e 8, i le faaiuga: “O i latou uma … o e … ua loto malilie e tausia a latou feagaiga i le taulaga—ioe, o taulaga uma lava o le a poloaiina e au, le Alii—e talia i latou e au.”
O [tagata o le] Au Paia o e tali atu i le savali a le Faaola, o le a le taitaieseina i latou e gaoioiga faalavelave ma le faaumatia, ma o le a saunia i latou e faia ia taulaga e tatau ai. O le taua o taulaga ia i latou o e fia avea ma [tagata o le] Au Paia, ua faaalia i le taulaga Togiola a le Faaola ua faapea ona i ai i le totonugalemu o le talalelei.11
I le toe taua o le fesili muamua na fesili mai ai lau uo i Atalana, “O oe o se [tagata o le] Au Paia?” ou te fia fautuaina atu ni fesili se tolu e mafai ona fai ai sa oe lava iloiloga.
Muamua, pe o ogatasi ea le ala o loo tatou ola ai ma o tatou talitonuga, ma faamata e mafai ona iloa e a tatou uo ma aumea e pei ona sa iloa e le uo a Elder Haight, ua faapea ona tavavae ese mai i tatou lava mai mea leaga a le lalolagi?
Lua, pe o faalavelaveina ea i tatou e tuinanau o le lalolagi, viiga, ma isi taumafaiga faapena mai lo tatou mulimuli, tapuai, ma auauna atu i le Faaola i aso uma o o tatou olaga?
Tolu, ina ia mafai ona tatou auauna atu i le Atua ma faapaiaina, pe o tatou faia ea ni taulaga e ogatasi ma a tatou feagaiga?
O se faamanuiaga matagofie tele le avea ma se [tagata o le] Au Paia o Aso e Gata Ai. Ou te fiafia i upu o laina faaiu e lua o le viiga “Au Paia o Siona”:
Au Paia o Siona, savavali i ala na uia e
Outou tama faamaoni.
Siiae outou loto i le faafetai
Ma auauna atu i le Atua Soifua!12
Ou te molimau atu o le aloese mai mea leaga ma le faatafunaina, faapea ma le ositaulaga ina ia mafai ona tatou auauna atu, tatou te agavaa ai e iloa le olioli i le avea o ni Au Paia o Aso e Gata Ai faamaoni, ma e pei ona folafola mai e tusitusiga paia, o le a aumaia ai le “filemu i lenei lalolagi, ma le olaga faavavau i le lalolagi a sau.”13 I le suafa o Iesu Keriso, amene.