O Le Mana o le Lotomaualalo
O le malosi o le Ekalesia o loo i totonu o le fia miliona o tagata lotomaualalalo o loo tauivi i aso taitasi e faia le finagalo o le Faaola.
I se taimi ua mavae i le fonotaga a le matou korama a faitaulaga sili, sa faailoa mai ai e le faiaoga le lesona e ala lea i le fesili mai ia i matou uma taitoatasi e tali atu po o ai ni o matou toa, ae pe aisea foi. A o auauai tagata uma e tali atu, o tali lava ia sa matou faamoemoe i ai. E moni lava sa i ai se tasi na fai mai o le Faaola, le Togiola o le lalolagi. O le isi na tali mai o Aperaamo Linikone, o le na faasaolotoina ia pologa, na taitaia le Iunaite Setete i se taua i le lotoifale, ma iu ai i le tuufaatasia o le atunuu. O isi na filifilia le Perofeta o Iosefa Samita ma lo tatou perofeta pele o loo i ai nei, o Gordon B. Hinckley. A o tau atu e tagata taitasi ia sana toa, sa ou toamalie lava i lo’u ioe atu foi i ai ma faailoa atu o i latou uma o ni alii agavaa e mulimuli i ai ma o le a avea ai au ma se tagata lelei pe afai ou te mauaina nisi o uiga na avea ai na alii ma ni tagata maoae.
Ina ua oo mai le avanoa ou te tali atu ai, sa ou faliu atu i lou uso sa i le itu taumatau, i nai nofoa agai i tua ma te va ai, ma ou faapea atu, “O la’u toa o Ken Sweatfield ma lona toalua o Jo Ann.” E 20 tausaga o ou vaai ia Ken ma Jo Ann o tausia le la tama tama na koma ma le alofa uma ma le onosai e mafai e se matua ona tuuina atu. E masani ona ou mafaufau loloto i faamoemoega na le taulau ma miti e mautinoa lava sa ia i laua mo Shane a o lei mafatia o ia i se faalavelave tau taavale matautia ae toe lua vaiaso amata lana misiona i Leeds, Egelani. Sa ou vaai ia Ken ma Jo Ann o tulei atu le nofoafaataavale o Shane i le susulu o le la po o le tulei atu o ia i le vaiaai, ma faamatala atu i ai ia vaaiga, ma faamoemoe atonu o le a lagona ma faalogoina e ia, ma le faamoemoe atonu o le a faafiafiaina e le felesi o le ea ma le susulu o le la lona agaga filemu. E 20 tausaga e leai ni tafaoga na faia ona o lenei tausiga, sa na o ni nai afiafi e tafafao ai, ae sa i ai pea lava se agaga o le faatuatua, faamoemoe, ma le lotofaafetai—e lei faaalia se ita, faanoanoa, po o se fesiligia o faamoemoega o le Atua.
Ona ou faliu atu lea i le uso sa i lou itu tauagavale ma faapea atu, “O lau toa o Jim Newton ma lona toalua o Helen.” E lei leva lava talu ona maua e Zach, o le tama tama a Jim ma Helen lona valaauga faamisiona, ae maliu loa i se faalavelave tau taavale. Ina ua ou faalogo i le faalavelave, sa ou faanatinati atu loa i le falemai ma le faamoemoe ou te faalogo atu o loo ola ia Zach ma o le a toe manuia. Sa faamatala mai e matua, i se tulaga mamalu ma le toamalie e faapea o Zach o le a auauna faamisiona i le isi itu o le veli. A o ou molimauina le mausali o le toafilemu o nei ulugalii malolosi e toalua, sa ou iloaina ai e ui i le tiga ma puapuaga ae o loo i ai lava se filemu lea e na o se faatuatua loloto ma mautu i se Tama alofa ma se Faaola na togiolaina, e mafai ona oo mai ai. Sa faamalosia lou faatuatua, ma o le latou faamalosiau na toe faamautuina ai lau faaiuga ina ia mulimuli i le latou faataitaiga i le faafetaiaia o ni faigata ma ni faalavelave faapena.
Na mafai foi lava ona ou tali atu faapea o lau toa o Tom Abbott ma lona atalii o John, o ou faiaoga o aiga faamaoni o e le mafai ona misi se tofiga o aoaoga i aiga e ui lava o lo matou aiga o se aiga e faigata ona maua i le fale. Na mafai ona ou tauina atu isi e toatele ou te faamemelo i ai ma e mafai ona ou tauina ia tagata uma o ni toa ia te au. O le toatele e leai ni o latou tofiga maualuluga i le Ekalesia e pei ona fai mai ai nisi, ae agavaa uma lava e umia soo se tofiga. E leai ma se tasi e lauiloa i le Ekalesia atoa, ae o i latou uma, ou te mautinoa, ua lausilafia i o latou igoa e lo tatou Tama Faalelagi.
I taimi e mafai ona ou auai atu ai i le sauniga faamanatuga a lau lava uarota, e masani ona ou manatunatu loloto i ai a o ou vaai atu i le aofia ma vaaia ai foliga lava nei i lea Aso Sa ma lea Aso Sa. O nisi ou te vaai soo lava i ai i sauniga faamanatuga mo le silia ma le 20 tausaga. Ae, o le toatele lava e le lauiloa i le Ekalesia, ae o loo auai atu pea i a latou sauniga ma ausia taitoatasi ia luitau o le olaga.
O nisi nei o tagata e toatele ou te vaai i ai, faamemelo i ai, ma faafetai i ai. Latou te le o sailia ni tofiga, tulaga, po o le lauiloa, ae o loo saili taitoatasi se nofoaga i le malo o lo tatou Tama e ala lea i le faia o tiute o le olaga i aso taitasi. O loo latou faia pea galuega e le o iloa e le toatele [ae e taua], o mea e foliga e le naunau i ai isi, ae o loo latou faia ma le faamaualalo ma le amiotonu mea taua. E i ai o latou luitau, ae o faigata o tauiviga latou te mafaia ai ona maua le toamalie lea e masani ona avea ma soa le leoa i faigata. O lenei vaaiga e vaaia faafiaselau i le fiaafe o uarota i le lalolagi atoa. O i latou O Le Ekalesia a Iesu Keriso o le Au Paia o Aso e Gata Ai.
Ioe, o le malosi o le Ekalesia o loo i totonu o le fia miliona o tagata lotomaualalalo o loo tauivi i aso taitasi e faia le finagalo o le Faaola—i lea aso ma lea aso, o lea laasaga ma lea laasaga. O nei tagata faamaualalalo e mai soo se atunuu, soo se ituaiga, ma soo se tulaga tau le tamaoaiga. O loo aofia ai i latou o e maualuluga tulaga tau le aoaoga e faapea foi ia i latou o e faamaualalalo o e o loo nonofo i nai tamai nuu i nofoaga sili ona mamao o le lalolagi—e faatumulia uma o latou loto i se molimau taua ia Iesu Keriso ma se naunautaiga e auauna atu i le Alii.
A o ou mafaufau loloto i nei tagata faamaoni, e taia lava au i ni uiga se lua e foliga mai e maua uma lava e i latou. Muamua, e tusa lava po o le a lo latou tulaga i le nuu po o le tamaoaiga, o lo latou lotomaualalo e taitaiina atu ai i le usiusitai i le finagalo o le Alii. Ma lona lua, e ui i fita ma faigata o le olaga, e mafai lava ona latou faatumauina se lagona o le faafetai mo faamanuiaga a le Atua ma le lelei o le olaga. O le lotomaualalo ma le lotofaafetai e moni lava o uiga masaga ia o le fiafia.
Sa faamatalaina se tala i se feiloaiga i le va o le Perofeta o Iosefa Samita ma Polika Iaga. I le faatasi ai ma se vaega toatele o uso, sa faapea ona matuai mamafa ai le aoaiina e le Perofeta o Iosefa o le Uso o Polika ona o nisi o ona tiute e lei faataunuuina. Ou te matea atonu sa ofo tagata uma, ma faatalitali po o le a se tali atu a Polika. Ae o le mea moni, o Polika, o le na lauiloa mulimuli ane o le Liona a le Alii, e le i ai ma sona matamuli. Sa tulai malie ae ia Polika i luga, ma i ni upu sa atagia moni ai lona tagata ma lona lotomaualalo, sa na o le punou o lona ulu ma faapea atu, “Iosefa, o le a se mea e te finagalo ou te faia?” I le faaauauina o le tala e faapea sa momoe mai Iosefa ma le tagi mai le pulelaa, ma opo atu ia Polika, ma faapea atu, “Ua e pasi, le Uso Polika, ua e pasi” (tagai i le Truman G. Madsen, “Hugh B. Brown—Youthful Veteran,” New Era, Ape. 1976, 16).
O le toatele o i tatou e ola pe faigaluega foi i se siosiomaga e masani ona le malamalama ai i le lotomaualalo ma faapea ai o se vaivaiga. E le tele ni faalapotopotoga po o ni sosaiete o loo aofia ai le lotomaualalo i faamatalaga o mea e faatauaina po o se uiga moomia i le latou pulega. Ae peitai afai tatou te aoao e uiga i galuega a le Atua, o le mana o se agaga lotomaualalo ma le usiusitai e matuai iloga lava. I le malo o le Atua, o le lauiloa e amata i le lotomaualalo ma le usiusitai. O lenei soa o uiga o uluai laasaga taua ia e tatalaina ai le faitotoa i faamanuiaga a le Atua ma le mana o le perisitua. E le afaina po o ai i tatou ae po o le a foi le maualuluga o o tatou faailoga e i ai. O le lotomaualalo ma le usiusitai i le Alii, e o faatasi ma se lotofaafetai, o lo tatou malosi ma lo tatou faamoemoega lea.
I le tuuina atu o tulaga moomia mo le avea ma tagata auai i Lana ekalesia, na fetalai ai le Alii, “O e faamaualalo i latou lava i luma o le Atua … ma o mai ma le loto momomo ma le agaga salamo [o i latou ia] o le a talia i lana ekalesia i le papatisoga” (MFF 20:37).
Ma o lea tatou te vaaia ai i tagata auai o le Ekalesia ia alii ma tamaitai o soo se ituaiga o gauai atu ma le faamaualalo i le fautuaga a le Atua. Tatou te vaaia ni tagata faipisinisi lauiloa o taliaina ma le faaaloalo ma aoaoina foi e se faiaoga o aiga lotomaualalo ma le matamuli. Ua tatou vaai i tagata e maualuluga le aoaoina o taliaina ma le lotomaualalo se fautuaga mai le latou epikopo, o nisi taimi o se [epikopo] e laitiiti se tulaga tau aoaoga na ia maua. Ua tatou vaai i e sa avea muamua ma epikopo ma peresitene o siteki o taliaina ma le fiafia ma le lotomaualalo ni valaauga e faiaoga ai i le Peraimeri, fesoasoani i le vasega pepe, po o le tuufaatasia o afifi o fesoasoaniga alofa ina ia auina atu i e matitiva i le lalolagi atoa. Ua tatou vaai i le fiaafe o ulugalii matutua ua tuua o latou fale mananaia ina ia ola i tulaga latou te le masani ai, ina ia auauna atu ma le lotomaualalo i e o loo matelaina i le fia aai i le lalolagi atoa—ma toe auauna ma saga auauna atu pea. Ua tatou vaai i e o matelaina i le fia aai i le lalolagi o ositaulagaina ma le lotomaualalo ina ia faasoa atu nai mea ua latou maua o le olaga ia i latou o e ua sili atu le matitiva. Ma o latou uma ia taitoatasi, o loo auauna atu ma le lotomaualalo, ma foai atu ma se lotofaafetai ma latou vivii atu i le Atua.
Na lapatai mai le Tupu o Peniamina e tatau ona tatou “[avea] e pei o se tamaitiiti, ua fia usiusitai, ma agamalu, ma ua faamaualalo, ma onosai, ma ua tumu i le alofa, ma le fia gauai i mea uma ua silafia e le Atua e tatau ona faatiga ai i [tatou]” (Mosaea 3:19).
O le gauai atu ma le faamaualalo o o tatou loto i le Tama e aumaia ai le mana o le Atua—le mana o le lotomaualalo. O le mana e faafetaiaia ai faigata o le olaga, le mana o le filemu, le mana o le faamoemoe, le mana o se loto ua faamaoni i le alofa ma le molimau i le Faaola o Iesu Keriso, le mana lava lea o le togiola. O lea le mafuaaga ua avea ai le Faaola ma o tatou faataitaiga silisili o le mana o le lotomaualalo ma le usiusitai. Ina ua mavae mea uma, sa Ia tuuina atu Lona finagalo i le Tama ma taunuu ai le mea silisili ua tupu i le talafaasolopito uma. Atonu o nisi o upu sili ona paia i tusitusiga paia uma o le, “Ae aua le faia lou loto, a o lou finagalo” (Luka 22:42).
O lea o loo i ai ni o tatou lotofaamaoni se fiaafe, ua faitau miliona—ou te matea e mafai ona tatou faapea ane o ni toa, ae atonu o se faamatalaga talafeagai i ai o ni soo lotomaualalo o le Faaola o Iesu Keriso. Ma, e pei foi ona poloaiina ai i tatou e Peresitene Hinckley, o loo latou faia foi le mea sili—i lea aso ma lea aso.
Ia avea se loto faamaualalo ma le usiusitai ma o tatou mana mai le Atua faatasi ai ma faamanuiaga uma e maua mai ai o lau tatalo faamaulalo lea. I le suafa o Iesu Keriso, amene.