Ia Faataunuu Mea Uma E Te Gafatia

Elder Richard G. Scott

O Le Korama a Aposetolo e Toasefululua

I lo’u malosi uma ou te mafaia [i le avea ai ma se Aposetolo] ou te fautuaina ai oe ina ia saili pe o ai moni oe… . Ou te uunaia oe ina ia e iloatino e ala i le agaga, lou tulaga gafatia faalelagi ua tuuina mai e te faia ai se mea.

Talu ai nei sa ou vaaia ai le silia i le 20,000 o alii ma tamaitai talavou o le Au Paia o Aso e Gata Ai, o faalogologo i se savali faaleagaga. Sa latou tusitusia ni faamatalaga ma uai atu i le failauga, ma le naunau e aoao mai ai. Sa mafai ona ou lagonaina na ia i latou taitoatasi se agaga malosi o le mama, amiotonu, ma le faamaoni. E leai se tasi na faamalosia i latou e o mai. Sa latou mananao ia i ai iina.

I se taimi mulimuli ane, sa ou feiloai atu ai i le silia i le 2000 faifeautalai faamisiona ua saunia e auauna atu. Na faatumulia le potu i le Agaga. Sa ou fesili atu ia i latou i ni fesili faigata. Sa matuai lelei ona latou taliina [ia fesili], e fai lava ma tauloto mai ni mau e lagolago ai. A o ou faatalofa atu i faifeautalai ma vaavaai atu i o latou fofoga, na ou lagonaina le mama ma le agaga o le faamaoni. O se aafiaga musuia lea. Ua taitasi i latou ma faataatitia ese mea e fiafia i ai ina ia talia le valaau e auai faatasi i se mea e mafai ona avea ma a tatou augatupulaga aupito sili ona maoae o faifeautalai.

E faapena foi isi ou aafiaga faatasi ma autalavou i le salafa o le lalolagi. Ua maitauina e faiaoga o a tatou iunivesite e tolu le siitia maualuga o le tulaga gafatia ma le malamalama faaleagaga o tagata o vasega. O loo i ai se mea maoae o loo tupu. Pe o outou maitauina lea mea? E moni lava, ao teenaina le usiusitai ma le ola mama i le lalolagi, ae o loo auina mai pea foi e le Alii ni agaga e sili ona lelei i le lalolagi. I le avea ai ma se tino po o se vaega [o tagata ua tuufaatasi], ua maualuga lo latou tulaga gafatia nai lo o outou augatuaa. E tele naua ni mea e mafai ona latou faia mo le tuputupu ae o le tagata lava ia faapea ma se sao maoae. I le avea ai ma ni matua ma ni taitai, o faapefea ona e galueaina lena tulaga gafatia? I le avea ai ma se alii po o se tamaitai talavou o lenei augatupulaga, o le a lau mea o fai ina ia faataunuuina ai mea maoae e te gafatia? Pe o le a e atiina ae ia mea e mafai ona e faataunuuina, ma e ausia ai mea maoae ma tele ai lou fiafia? E faapefea ona e tetee atu i taumafaiga a Satani e faavaivaia lou tulaga gafatia e ala i le solitulafono? E na o oe lava e mafai ona taliina nei fesili taua.

I lo’u malosi uma ou te mafaia [i le avea ai ma se Aposetolo] ou te fautuaina ai oe ina ia saili pe o ai moni oe. Ou te valaau atu ia te oe ina ia e tagai i tua atu o aga masani o le olaga i aso taitasi. Ou te uunaia oe ina ia e iloatino e ala i le agaga, lou tulaga gafatia faalelagi ua tuuina mai e te faia ai se mea. Ou te apoapoai atu ia te oe ina ia e faia ma le agaga tatalo ia filifiliga agavaa o le a faapea ona taitaiina atu ai oe ia e iloa mea uma e te gafatiaina.

O le a ou faamatalaina atu se faataitaiga o se auala mautinoa e tasi e mafai ona e amata ausia ai lena tuputupu ae. Ua ou vaai i ni faifeautalai totoa na onosaia le matagi maatiati i le malulu, e le i faafiti i le mamafa o timuga, ma le tauasa [i le susu ma le palapala] i magaala maseesee ma le palapala, ma faatoilaloina ai le fefe. E masani ona latou tuuina atu ni molimau mamana ae ua avea ma mea ua teena ma faitioina ai. Sa ou vaai o latou tauivi ma le tau faamatalaina atu o le upumoni i se gagana fou. O nisi taimi na o le sioa mai lava ia i latou o se tagata faalogologo ma le le malamalama. Ona vave ai lava lea ona iloa e le faifeautalai, e le o malamalama le tagata i le savali. Ae o le a ou le suia lava se mea, e tusa lava pe mafai ona ou suia, aua foi, e i ai lava ia taimi faaauro o le faamanuiaina, lea e tauaogaina ai ia faigata uma. O ia ituaiga taui, e oo mai pe a pai atu le Agaga i se loto mo se lelei e faavavau aua na i ai foi iina se tasi e pei o oe. O le fetufaai atu o le upu moni i ni tulaga faigata o le atili faatauaina foi lena. Pe a e faia se taumafaiga e sili atu nai lo lou iloa, i se tulaga e fou ma e te le masani ai, o le a faamalosia oe e le Alii. O le a amata faaalia ai le matagofie o lou agaga e faavavau.

Ua sili atu le malolosi o luitau i le taimi nei nai lo se isi lava taimi. O le mafuaaga lena ua manaomia ai e le Alii ni faifeautalai e sili atu ona malolosi, ma ua lava saunia lelei. Na te manaomia i latou o e e mama ma atoatoa, ina ia mafai ona taitaiina i latou e le agaga ma mafai ona molimau atu ma le mana e faaliliuina ai. Ia faaagavaaina loa oe lava ina ia e avea ma se tasi o na faifeautalai sili ona lelei. O le a le faigofie. Ae o anafea na i ai se taimi na faigofie ai se mea e sili ona taua?

Na faamanino mai e le Au Peresitene Sili ia tulaga maualuluga o le agavaa i le ola mama, ma le malosi faaletino ma le mafaufau ma le lagona, ua manaomia nei i le galuega faafaifeautalai. E faigata tele ia tulaga o le agavaa, ae e mafai ona outou ausia ia tulaga. O le a outou olioli i lagona o le filemu ma le mautinoa lea e oo mai i le ola ai i na tulaga. Na toe siitia i luga ia tulaga ma e le ina ia faafaigata ai, ae ona ua auauna atu nei faifeautalai i se siosiomaga lea e matua taua tele ai le taitaiga faaleagaga. Ma, ua uma foi ona faia ni suiga i le aoaoina atu o lesona. Ua le o toe taulotoina nei, ae ua aoaoina ia aoaoga autu ma tuuina atu e pei ona taitaia ai e le agaga. O le agavaa o le tagata lava ia e taua tele mo le faia o lena mea (tagai i le “Faamatalaga i le Galuega Faafaifeautalai” o loo faapipii i le tusi a le Au Peresitene Sili, 11 Tes. 2002).

O outou o se vaega o le augatupulaga iloga ma ni mafai e faataunuuina ai se mea e sili ona lelei. E leitioa a manao Satani e faavaivaia lena mafai e faataunuuina se mea e ala i le faaosoosoina o outou ia solia ia tulafono a le Atua. Ua ia silafia e leai sona mana na te mafaia ai le tagata amiotonu. Ae peitai, e atamai tele o ia i le faia o le agasala ina ia moomia e i latou o e lei faia ni filifiliga e faia ni misiona.

O tapenapenaga mo se misiona ma se olaga aoga e sili atu ona lelei e amataina i totonu o le aiga. I le avea ai ma se matua, o le tasi o meaalofa sili e mafai ona e tuuina atu i se atalii po o se afafine o le faafaileleina lea i taimi uma i se molimau tuputupu ae o le upu moni. Ia faafaileleina ma le onosai le malosi faaleagaga o le tamaitiiti. Ia faamalamalama atu ma le faaeteete le mana o aoaoga faavae a le Ekalesia ma le mana latou te tuuina mai pe a lelei ona latou soifua ai. O lena faavae o le a saunia lelei ai se tamaitiiti e tetee atu i le tiapolo o le lalolagi. Ia fautuaina ia atalii uma o e e malolosi faaletino ma le faalelagona ina ia saunia e auauna atu ma le agavaa i se misiona.

Epikopo, ma peresitene o siteki, faatasi ai ma taitai perisitua ma ausilali, ia faamalosia ia malosi faaleagaga o a outou tagata autalavou. Ia faia lena mea e ala i le fautuaina ina ia latou auai i gaoioiga a le Ekalesia lea e faamautuina ai aoaoga a matua.

O outou alii talavou, e tatau ona outou auai atu ma le malosi i a outou korama o le perisitua. O outou tamaitai talavou, e tatau ona outou auai atu i gaoioiga a vasega ma ia faamaeaina au sini o le Alualu i Luma o le Tagata Lava Ia. Ia outou auai e le aunoa i lesona o le Aoga Sa ina ia taofi mau ai i mea ua aoaoina. Ia auai atu i le Seminare ma le Inisititiuti ina ia maua mai ai se malamalamaaga taua o le upu moni. Aua le na ona faalogologo ina ia pasi ai au suega. Ia faaaoga mea o loo e suesueina i lou olaga.

Ia suesue i le Uluai Faaaliga e pei ona faamaumauina i le Talafaasolopito—Iosefa Samita i totonu o le Penina Tau Tele. Ia aoao e uiga i mea na tutupu mulimuli ane lea na faapea ona aumaia ai le atoaga o le toefuataiga o le upu moni, faatasi ai ma le mana o le perisitua ma sauniga e tatau mo le faaeaga. Ia maua sau lava molimau o nei mea. Ia faapipii i lou mafaufau ma lou loto.

Ia taumafai e faitau le Tusi a Mamona ona ua e manao i ai, ae e le ona e tatau lava ona e faitauina. Ia e iloa mo oe lava e moni le Tusi a Mamona. Ao e faitauina ia itulau taitasi ia e fesili ifo, “Pe mafai ona tusia e se isi lava tagata lenei tusi pe na oo mai e pei ona molimau mai Iosefa Samita?” Ia faaaoga ia aoaoga ua e aoaoina. O le a latou faamalosia oe e faasagatau atu i mea leaga a Satani. Ia mulimuli i le fautuaga a Moronae. Ia ole atu ma le faamaoni i le Atua le Tama, i le suafa o Iesu Keriso, ma le manatu tonu i ai, pe moni ia aoaoga a le Tusi a Mamona (tagai Moronae 10:3–5). Ia ole atu ma le manao ia maua mai se faamaoniga mo oe lava ia, ma ia le masalosalo. E tatau lava ona i ai se faamalamalamaga o lena tusi e mafai ona e umia i lou lima. Ou te iloa e mafai ona e maua se faamaoniga faaleagaga e faapea ua moni. O le a e iloa ai o loo soifua Iesu Keriso, ma o Iosefa Samita sa avea ma perofeta, ma o ia lava o se perofeta, ma O Le Ekalesia a Iesu Keriso o le Au Paia o Aso e Gata Ai o le Ekalesia a le Alii (tagai i le faatomuaga o le Tusi a Mamona, aemaise o le parakalafa mulimuli). O le a e faamaonia ai e taitaiina e le Faaola Lana Ekalesia e ala i se perofeta soifua. O nei upu moni o le a avea ma faavae mo lou olaga faamanuiaina.

Atonu e faapea mai se tasi: “Ou te le o mauaina uma ia faamanuiaga o se aiga atoatoa ma aafiaga atoa o le Ekalesia.” Ou te lei mauaina uma foi na faamanuiaga ma e faapena foi i isi uso o le Korama e Toasefululua. Ia faaleleia e ala i le mauaina o sau lava molimau le maluelue o le upu moni. Ia maua sau lava talitonuga e faapea, o le Ekalesia a Iesu Keriso ua toefuatai mai i le lalolagi ma e moni Ana aoaoga. O loo i ai ni auala eseese i le mauaina o lena oa faapelepele. E amatalia i lou naunau faamaoni e iloa. E mafai ona mate le mumu tele o lou faatuatua pe afai e te le fafagaina. Ae o lena mumu itiiti e mafai ona tupu ae ai se afi mumu saesae ma le le matineia e ala i tatalo faamaoni, suesue e le aunoa i le Tusi a Mamona, faapea ma isi tusitusiga paia. O le a tumau pea lena faatuatua pe a e faaaogaina mataupu faavae o loo e aoaoina.

Ia tumau i le agavaa. Pe a e malamalama lelei po o ai oe, o le a le faigata le tetee atu i faaosoosoga a Satani. Ma o le a le mafai ona ia taofia mai le alualu i luma o lou mafai moni e faataunuuina se mea.

I le avea ai ma se alii talavou, o se aafiaga o le tuputupu ae aupito maoae ma le malosi e mafai ona e maua i lenei taimi, ma e leai se alofaga, o se misiona faamanuiaina. Ona o le misiona e le mo le mauaina o ni mea a se tagata lava ia, ae e faamanuiaina e le Alii i latou o e auauna atu ma le totoa. Ia avea ma se tasi o le autau o faifeautalai maoae, saunia lelei, ma faamaoni, ua ausia le tulaga maualuga o le agavaa. Ia auai faatasi ma i latou o e ua filifili e auauna atu i le Alii, po o fea lava e tofia i ai, e tusa foi pe o le a le faigata atonu o le a i ai.

O le galuega faafaifeautalai e matuai faigata lava. Afai o i ai ni ou faafitauli faalelagona e mafai ona faaleleia ina ia mafai ai ona e gafatia ia luitau o se misiona, e mafai ona valaauina oe. Ae taua tele lou faaaogaina o na vailaau mai le falemai i le taimi o lau misiona pe seia oo ina fautuaina mai se isi tulaga e se tagata atamai faapitoa i tulaga faafomai. Ia outou silafia e tutusa lava ia luitau faalelagona ma le faaletino. E tatau i se tasi ona faia mea uma e mafai ina ia faaleleia ai lea tulaga, ona aoao lea ia ola i tuutuuga o totoe. E faaaogaina e le Alii ia luitau ina ia mafai ona tatou tuputupu ae e ala i le manumalo mai ai.

O lou tulaga faaletino po o le faalelagona, atonu o le a faatagaina ai oe e le Peresitene o le Ekalesia, e te malolo mai le galuega faafaifeautalai (tagai “Faamatalaga i le Galuega Faafaifeautalai” o loo faapipii i le tusi a le Au Peresitene Sili, 11 Tes. 2002). Mo oe lena, o loo i ai isi auala e tuuina atu ai se auaunaga taua e talafeagai ma lou tulaga. E mafai ona fesoasoani atu lou epikopo po o le peresitene o le siteki ia te oe e faailoa atu na ituaiga o auaunaga i le mea o loo e aumau ai. E mafai ona fai i le nofoaga autu o le Ekalesia mo talafaasolopito o aiga, malumalu, galuega faaleuelefea, nofoaga tutotonu mo galuega, po o totonu foi o se falemai i le alalafaga, nofoaga autu e tausia ai tagata e manaomia lea fesoasoani, nofoaga e tausia ai tagata ua leai ni aiga po o se isi lava mea. O loo tele ia nofoaga o loo manaomia ai le fesoasoani. E mafai lava ona e nofo i le fale ma faia ai se saofaga mamana. O na ituaiga o valaauga o lona umi a le o ni nai masina ia pe sili atu foi. O le a silafia lava e lau peresitene o le siteki le mea e tatau ona e auauna atu ai, ma po o le a foi le umi. Ona ia tuuina atu loa lea o se valaauga aloaia. Po o le a lava lou valaauga, ia suesue i le savali o le Toefuataiga i tusi ma risosi e mafai ona maua atu i faifeautalai faamisiona. Ona vaavaai lea mo ni avanoa e fetufaai atu ai lena savali. Ao e faia ma le faaeteete lena mea, o le a taitaiina atu oe i tagata taitoatasi o le a faapea ona mananao e fia iloa atili.

Ao ou tautala atu e uiga i le galuega faafaifeautalai atonu ua e manatu ane “E le o a’u e faatatau i ai lena mea.” Ou te aioi atu ia te oe ina e toe mafaufau i ai ma le agaga tatalo. O mea uma e aupito sili ona ou faapelepele i ai i le olaga, na amata ona mautu i totonu o le misiona. E mafai foi ona e maua ni faamanuiaga faapena.

Afai na e faia ni filifiliga le lelei, ia salamo nei. Ia aveese mai na ituaiga pa pupuni e faalavelavea ai lou alualu i luma ma le fiafia.

O oe o se alii po o se tamaitai talavou faapelepele. Ia faataunuu mea uma e te gafatia. Ia avea oe ma se taitai ma se faataitaiga ua finagalo le Alii e avea ai oe. Alii talavou, ia avea ma se vaega o le augatupulaga maoae o faifeautalai. Talavou agavaa e, ia e saunia mo le mauaina o sauniga o le malumalu ma ia tausia lou aiga e faavavau. E alofa le Atua ia te oe. Ou te molimau atu, ao e sailia Lana fesoasoani, o le a Ia taitaiina oe ina ia faataunuuina au miti taua, i le suafa o Iesu Keriso, amene.