ຈົ່ງປະດັບຕົວດ້ວຍອົງພຣະເຢຊູຄຣິດເຈົ້າ

ໂດຍ ຊິດສະເຕີ ເຈ ອາເນັດ ເດັນນິສ

ທີ່ປຶກສາທີໜຶ່ງໃນຝ່າຍປະທານສະມາຄົມສະຕີສົງເຄາະສາມັນ

ຜ່ານທາງການໃຫ້ກຽດພັນທະສັນຍາຂອງເຮົາ, ເຮົາໃຫ້ພຣະເຈົ້າສາມາດຖອກເທພອນຢ່າງຫລວງຫລາຍລົງມາ ທີ່ກ່ຽວຂ້ອງກັບພັນທະສັນຍາເຫລົ່ານັ້ນ.

ຂະນະທີ່ລູກຫລ້າສອງຄົນຂອງຂ້າພະເຈົ້າກຳລັງເຕີບໂຕ, ຂ້າພະເຈົ້າໄດ້ຄົ້ນພົບໜັງສືທີ່ໃຫ້ການບັນເທີງ ແລະ ດຶງດູດຄວາມສົນໃຈ ແຕ່ຍັງໄດ້ໃຊ້ສັນຍາລັກໃນເລື່ອງລາວນຳອີກ. ຂະນະທີ່ພວກເຮົາໄດ້ອ່ານນຳກັນໃນຕອນແລງ, ຂ້າພະເຈົ້າມັກຊ່ວຍລູກໆຂອງຂ້າພະເຈົ້າໃຫ້ເຂົ້າໃຈສັນຍາລັກທີ່ຜູ້ຂຽນໃຊ້ ເພື່ອສິດສອນຫລັກທຳທີ່ເລິກເຊິ່ງກວ່າ, ແມ່ນແຕ່ຫລັກທຳພຣະກິດຕິຄຸນ.

ຂ້າພະເຈົ້າໄດ້ຮູ້ວ່າສິ່ງນີ້ຈະເຂົ້າໃຈໄດ້ໃນມື້ໜຶ່ງ ຕອນທີ່ລູກຊາຍນ້ອຍຂອງຂ້າພະເຈົ້າຄົນໜຶ່ງຢູ່ໃນຕົ້ນໄວລຸ້ນຂອງລາວ. ລາວໄດ້ເລີ່ມອ່ານປຶ້ມເຫລັ້ມໃໝ່ ແລະ ຢາກມ່ວນຊື່ນກັບເລື່ອງລາວນັ້ນ, ແຕ່ຄວາມຄິດຂອງລາວໄດ້ພະຍາຍາມຊອກຫາຄວາມໝາຍທີ່ເລິກເຊິ່ງກວ່າໃນທຸກສິ່ງທີ່ລາວອ່ານຢູ່. ລາວຫງຸດຫງິດ, ແຕ່ຂ້າພະເຈົ້າໄດ້ຍິ້ມຢູ່ໃນໃຈ.

ພຣະເຢຊູໄດ້ສິດສອນຜ່ານທາງເລື່ອງລາວ ແລະ ສັນຍາລັກ¹—ເມັດຜັກກາດ ເພື່ອສິດສອນເຖິງພະລັງຂອງສັດທາ,² ແກະທີ່ເສຍ ເພື່ອສິດສອນເຖິງຄຸນຄ່າຂອງຈິດວິນຍານ,³ ລູກຊາຍທີ່ເສຍ ເພື່ອສິດສອນເຖິງຄຸນລັກສະນະຂອງພຣະເຈົ້າ.⁴ ຄຳອຸປະມາຂອງພຣະອົງເປັນສັນຍາລັກ ຊຶ່ງຜ່ານທາງນັ້ນ ພຣະອົງຈຶ່ງສາມາດສິດສອນບົດຮຽນທີ່ເລິກເຊິ່ງກວ່າ ຕໍ່ຜູ້ຄົນທີ່ມີ “ຫູຟັງຈົ່ງຟັງເອົາ.”⁵ ແຕ່ຜູ້ຄົນທີ່ບໍ່ໄດ້ສະແຫວງຫາຄວາມໝາຍທີ່ເລິກເຊິ່ງກວ່າ ຈະບໍ່ເຂົ້າໃຈ,⁶ ດັ່ງທີ່ຫລາຍຄົນຜູ້ທີ່ໄດ້ອ່ານປຶ້ມດຽວກັນນັ້ນທີ່ຂ້າພະເຈົ້າໄດ້ອ່ານໃຫ້ລູກໆຂອງຂ້າພະເຈົ້າຟັງ ບໍ່ເຄີຍຮູ້ເລີຍວ່າມັນມີຄວາມໝາຍທີ່ເລິກເຊິ່ງ ແລະ ມີຜົນປະໂຫຍດຢ່າງຫລວງຫລາຍຈາກເລື່ອງລາວເຫລົ່ານັ້ນ.

ເມື່ອພຣະເຈົ້າອົງເປັນພຣະບິດາໄດ້ສະເໜີມອບພຣະບຸດອົງດຽວທີ່ຖືກຳເນີດຂອງພຣະອົງໃຫ້ເປັນເຄື່ອງບູຊາແທນເຮົາ, ພຣະເຢຊູຄຣິດພຣະອົງເອງໄດ້ກາຍເປັນສັນຍາລັກທີ່ສູງສຸດເຖິງຄວາມຮັກທີ່ບໍ່ມີວັນສິ້ນສຸດຂອງພຣະບິດາຜູ້ສະຖິດຢູ່ໃນສະຫວັນຂອງເຮົາມີໃຫ້ເຮົາ.⁷ ພຣະເຢຊູຄຣິດໄດ້ກາຍເປັນພຣະເມສານ້ອຍຂອງພຣະເຈົ້າ.⁸

ເຮົາມີສິດທິພິເສດ ແລະ ພອນທີ່ຖືກເຊື້ອເຊີນໃຫ້ເຂົ້າຮ່ວມໃນຄວາມສຳພັນແຫ່ງພັນທະສັນຍາກັບພຣະເຈົ້າ, ຊຶ່ງໃນນັ້ນຊີວິດຂອງເຮົາເອງກໍສາມາດກາຍເປັນສັນຍາລັກຂອງພັນທະສັນຍານັ້ນ. ພັນທະສັນຍາສ້າງຄວາມສຳພັນທີ່ອະນຸຍາດໃຫ້ພຣະເຈົ້າຫລໍ່ຫລອມ ແລະ ປ່ຽນແປງເຮົາ ເມື່ອເວລາຜ່ານໄປ ແລະ ຍົກເຮົາຂຶ້ນ ເພື່ອໃຫ້ກາຍເປັນເໝືອນດັ່ງພຣະຜູ້ຊ່ວຍໃຫ້ລອດ, ດຶງເຮົາເຂົ້າໃກ້ພຣະອົງ ແລະ ພຣະບິດາຂອງເຮົາຫລາຍຂຶ້ນ⁹ ແລະ ໃນທີ່ສຸດ ກະກຽມເຮົາໃຫ້ເຂົ້າສູ່ທີ່ປະທັບຂອງພວກພຣະອົງ.

ແຕ່ລະຄົນຢູ່ເທິງໂລກເປັນບຸດ ຫລື ທິດາຂອງພຣະເຈົ້າ.¹⁰ ເມື່ອເຮົາເລືອກທີ່ຈະເປັນພາກສ່ວນຂອງພັນທະສັນຍາ, ມັນເສີມສ້າງ ແລະ ເຮັດໃຫ້ຄວາມສຳພັນຂອງເຮົາກັບພຣະອົງເລິກເຊິ່ງຂຶ້ນ. ປະທານຣະໂຊ ເອັມ ແນວສັນ ໄດ້ສິດສອນວ່າ ເມື່ອເຮົາເລືອກທີ່ຈະເຮັດພັນທະສັນຍາກັບພຣະເຈົ້າ, ຄວາມສຳພັນຂອງເຮົາກັບພຣະອົງສາມາດເລິກເຊິ່ງຫລາຍຂຶ້ນກວ່າທີ່ມັນໄດ້ເປັນ ກ່ອນພັນທະສັນຍາຂອງເຮົາ, ແລະ ມັນເຮັດໃຫ້ພຣະອົງສາມາດອວຍພອນເຮົາດ້ວຍຄວາມເມດຕາ ແລະ ຄວາມຮັກຂອງພຣະອົງເປັນພິເສດ, ພັນທະສັນຍາຮັກທີ່ອ້າງເຖິງວ່າ hesed ໃນພາສາເຮັບເຣີ.¹¹ ເສັ້ນທາງແຫ່ງພັນທະສັນຍາແມ່ນກ່ຽວກັບຄວາມສຳພັນຂອງເຮົາກັບພຣະເຈົ້າ—ຄວາມສຳພັນ hesed ຂອງເຮົາກັບພຣະອົງ.¹²

ພຣະບິດາຂອງເຮົາປະສົງຄວາມສຳພັນທີ່ເລິກເຊິ່ງກວ່າກັບບຸດ ແລະ ທິດາຂອງພຣະອົງທຸກຄົນ,¹³ ແຕ່ມັນເປັນການເລືອກຂອງເຮົາ. ຂະນະທີ່ເຮົາເລືອກທີ່ຈະເຂົ້າໃກ້ພຣະອົງ ຜ່ານທາງຄວາມສຳພັນແຫ່ງ ພັນທະສັນຍາ, ມັນອະນຸຍາດໃຫ້ພຣະອົງເຂົ້າໃກ້ເຮົາຫລາຍຂຶ້ນ¹⁴ ແລະ ອວຍພອນເຮົາຢ່າງເຕັມທີ່ຫລາຍຂຶ້ນ.

ພຣະເຈົ້າຈັດຕັ້ງເງື່ອນໄຂ ແລະ ພັນທະຂອງພັນທະສັນຍາທີ່ເຮົາເຮັດ.¹⁵ ເມື່ອເຮົາເລືອກເຂົ້າຮ່ວມຄວາມສຳພັນນັ້ນ, ເຮົາເປັນພະຍານເຖິງພຣະອົງ ຜ່ານທາງການກະທຳທີ່ເປັນສັນຍາລັກຂອງພັນທະສັນຍາແຕ່ລະຂໍ້ວ່າ ເຮົາເຕັມໃຈເຮັດຕາມເງື່ອນໄຂທີ່ພຣະອົງໄດ້ຈັດຕັ້ງໄວ້.¹⁶ ຜ່ານທາງການໃຫ້ກຽດພັນທະສັນຍາຂອງເຮົາ, ເຮົາໃຫ້ພຣະເຈົ້າສາມາດຖອກເທພອນຢ່າງຫລວງຫລາຍລົງມາ ທີ່ກ່ຽວຂ້ອງກັບພັນທະສັນຍາເຫລົ່ານັ້ນ,¹⁷ ລວມທັງອຳນາດທີ່ມີຫລາຍຂຶ້ນ ເພື່ອປ່ຽນແປງ ແລະ ກາຍເປັນເໝືອນດັ່ງພຣະຜູ້ຊ່ວຍໃຫ້ລອດຂອງເຮົາຫລາຍຂຶ້ນ. ພຣະເຢຊູຄຣິດຄືຈຸດໃຈກາງຂອງພັນທະສັນຍາທັງໝົດທີ່ເຮົາເຮັດ, ແລະ ພອນແຫ່ງພັນທະສັນຍາກໍຖືກເຮັດໃຫ້ເປັນໄປໄດ້ ຍ້ອນການເສຍສະລະຊົດໃຊ້ຂອງພຣະອົງ.¹⁸

ການບັບຕິສະມາໂດຍການລົງໄປໃນນ້ຳໝົດທັງຕົວຄືປະຕູທີ່ເປັນສັນຍາລັກ ຊຶ່ງຜ່ານທາງນັ້ນເຮົາເຂົ້າສູ່ຄວາມສຳພັນແຫ່ງພັນທະສັນຍາກັບພຣະເຈົ້າ. ການລົງໄປໃນນ້ຳໝົດທັງຕົວ ແລະ ການຂຶ້ນຈາກນ້ຳອີກຄັ້ງເປັນສັນຍາລັກຂອງການສິ້ນພຣະຊົນ ແລະ ການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດສູ່ພຣະຊົນຊີບໃໝ່.¹⁹ ຂະນະທີ່ເຮົາຮັບບັບຕິສະມາ, ເຮົາກໍຕາຍ ແລະ ເກີດໃໝ່ອີກຄັ້ງ ຕາມສັນຍາລັກ ສູ່ຄອບຄົວຂອງພຣະຄຣິດ ແລະ ສະແດງໃຫ້ເຫັນວ່າ ເຮົາເຕັມໃຈຮັບເອົາພຣະນາມຂອງພຣະອົງ.²⁰ ຕົວເຮົາເອງກໍປະກອບເປັນສັນຍາລັກແຫ່ງພັນທະສັນຍານັ້ນ. ໃນພຣະຄຳພີໃໝ່ ເຮົາອ່ານວ່າ, “ເພາະວ່າ ຄົນໃດໃນພວກເຈົ້າໄດ້ຮັບບັບຕິສະມາໃນພຣະຄຣິດແລ້ວ ຄົນນັ້ນກໍໄດ້ສວມຊີວິດຂອງພຣະອົງ.”²¹ ດ້ວຍການບັບຕິສະມາຂອງເຮົາ ເຮົາກໍສວມຊີວິດຂອງພຣະຄຣິດໂດຍສັນຍາລັກ.

ພິທີການຂອງສິນລະລຶກກໍຊີ້ໄປທີ່ພຣະຜູ້ຊ່ວຍໃຫ້ລອດນຳອີກ. ເຂົ້າຈີ່ ແລະ ນ້ຳເປັນສັນຍາລັກເຖິງພຣະກາຍ ແລະ ໂລຫິດຂອງພຣະຄຣິດທີ່ຫລັ່ງເພື່ອເຮົາ.²² ຂອງປະທານແຫ່ງການຊົດໃຊ້ຂອງພຣະອົງ ກໍເປັນການສະເໜີມອບໃຫ້ແກ່ເຮົາແຕ່ລະອາທິດໂດຍສັນຍາລັກ ເມື່ອທີ່ຜູ້ດຳລົງຖານະປະໂລຫິດ, ໂດຍເປັນຕົວແທນໃຫ້ແກ່ພຣະຜູ້ຊ່ວຍໃຫ້ລອດເອງ, ສະເໜີມອບເຂົ້າຈີ່ ແລະ ນ້ຳໃຫ້ເຮົາ. ຂະນະທີ່ເຮົາດຳເນີນການກະທຳຂອງການກິນ ແລະ ດື່ມສັນຍາລັກຂອງພຣະກາຍ ແລະ ໂລຫິດຂອງພຣະອົງ, ພຣະຄຣິດກໍກາຍເປັນພາກສ່ວນຂອງເຮົາໂດຍສັນຍາລັກ.²³ ອີກຄັ້ງເຮົາສວມຊີວິດຂອງພຣະອົງ ຂະນະທີ່ເຮົາເຮັດພັນທະສັນຍາໃໝ່ແຕ່ລະອາທິດ.²⁴

ຂະນະທີ່ເຮົາເຮັດພັນທະສັນຍາກັບພຣະເຈົ້າໃນບ້ານຂອງພຣະຜູ້ເປັນເຈົ້າ, ເຮົາເຮັດໃຫ້ຄວາມສຳພັນຂອງເຮົາກັບພຣະອົງເລິກເຊິ່ງຫລາຍຍິ່ງຂຶ້ນ.²⁵ ທຸກສິ່ງທີ່ເຮົາເຮັດໃນພຣະວິຫານຊີ້ໄປທີ່ແຜນຂອງພຣະບິດາຂອງເຮົາສຳລັບເຮົາ, ຊຶ່ງໃນຈຸດໃຈກາງນັ້ນກໍແມ່ນພຣະຜູ້ຊ່ວຍໃຫ້ລອດ ແລະ ການເສຍສະລະຊົດໃຊ້ຂອງພຣະອົງ.²⁶ ພຣະຜູ້ເປັນເຈົ້າຈະສິດສອນເຮົາເປັນບັນທັດ²⁷ ຜ່ານທາງສັນຍາລັກຂອງພິທີການ ແລະ ພັນທະສັນຍາ ຂະນະທີ່ເຮົາເປີດໃຈຂອງເຮົາ ແລະ ສະແຫວງຫາດ້ວຍການອະທິຖານ ເພື່ອຈະເຂົ້າໃຈຄວາມໝາຍທີ່ເລິກເຊິ່ງກວ່າ.

ໃນການເປັນພາກສ່ວນຂອງພິທີຮັບຂອງປະທານສັກສິດໃນພຣະວິຫານ, ເຮົາໄດ້ ຖືກອະນຸຍາດ ໃຫ້ໃສ່ເສື້ອຜ້າສັກສິດແຫ່ງຖານະປະໂລຫິດທີ່ສັກສິດ. ມັນເປັນທັງພັນທະທີ່ສັກສິດ ແລະ ສິດທິພິເສດທີ່ສັກສິດ.

ໃນປະເພນີທາງສາດສະໜາຢ່າງຫລວງຫລາຍ, ເສື້ອຜ້າພິເສດທີ່ສວມໃສ່ຂ້າງນອກກໍຖືກສວມໃສ່ເພື່ອເປັນສັນຍາລັກຂອງຄວາມເຊື່ອ ແລະ ຄຳໝັ້ນສັນຍາຂອງຄົນຄົນນັ້ນຕໍ່ພຣະເຈົ້າ,²⁸ ແລະ ເສື້ອຜ້າທຳພິທີ ສ່ວນຫລາຍແມ່ນນຸ່ງຖືໂດຍຜູ້ຄົນທີ່ນຳພາພິທີນະມັດສະການ. ເສື້ອຜ້າສັກສິດເຫລົ່ານັ້ນມີຄວາມໝາຍທີ່ເລິກເຊິ່ງສຳລັບຜູ້ຄົນທີ່ໃສ່ມັນ. ເຮົາອ່ານໃນພຣະຄຳພີວ່າ ໃນສະໄໝບູຮານ, ເສື້ອຜ້າທຳພິທີສັກສິດກໍຖືກສວມໃສ່ພ້ອມໆກັນກັບພິທີກຳພຣະວິຫານ.²⁹

ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົາຜູ້ທີ່ໄດ້ເລືອກຈະເຮັດພັນທະສັນຍາກັບພຣະເຈົ້າ ຢູ່ໃນບ້ານຂອງພຣະຜູ້ເປັນເຈົ້າ ສວມໃສ່ເສື້ອຜ້າທຳພິທີການສັກສິດຂ້າງນອກ ລະຫວ່າງການນະມັດສະການໃນພຣະວິຫານ, ທີ່ເປັນສັນຍາລັກຂອງເສື້ອຜ້າທີ່ຖືກສວມໃສ່ໃນພິທີກຳຂອງພຣະວິຫານສະໄໝບູຮານ. ເຮົາຍັງນຸ່ງຖືເສື້ອຜ້າສັກສິດແຫ່ງຖານະປະໂລຫິດສັກສິດນຳອີກ, ລະຫວ່າງການນະມັດສະການ ແລະ ໃນພຣະວິຫານ ແລະ ໃນຊີວິດປະຈຳວັນຂອງເຮົາ.³⁰

ເສື້ອຜ້າສັກສິດແຫ່ງຖານະປະໂລຫິດສັກສິດເປັນສັນຍາລັກ ແລະ ຍັງຊີ້ໄປທີ່ພຣະຜູ້ຊ່ວຍໃຫ້ລອດ ນຳອີກ. ເມື່ອອາດາມ ແລະ ເອວາ ໄດ້ຮັບສ່ວນໝາກໄມ້ ແລະ ຕ້ອງໄດ້ໜີອອກຈາກສວນເອເດນ, ເຂົາເຈົ້າໄດ້ຮັບເສື້ອທີ່ເຮັດດ້ວຍໜັງສັດເພື່ອນຸ່ງຫົ່ມ.³¹ ມີທາງເປັນໄດ້ວ່າ ສັດໜຶ່ງຕົວຖືກຖວາຍເປັນເຄື່ອງບູຊາເພື່ອຈະໄດ້ເສື້ອທີ່ເຮັດດ້ວຍໜັງສັດເຫລົ່ານັ້ນ—ເປັນສັນຍາລັກເຖິງການເສຍສະລະຂອງພຣະຜູ້ຊ່ວຍໃຫ້ລອດເອງແທນເຮົາ. Kaphar ເປັນຄຳສັບພື້ນຖານໃນພາສາເຮັບເຣີສຳລັບຄຳທີ່ວ່າການຊົດໃຊ້, ແລະ ຄວາມໝາຍຢ່າງໜຶ່ງຂອງມັນແມ່ນ “ເພື່ອປົກປິດ.”³² ເສື້ອຜ້າສັກສິດພຣະວິຫານເຕືອນເຮົາວ່າ ພຣະຜູ້ຊ່ວຍໃຫ້ລອດ ແລະ ພອນແຫ່ງການຊົດໃຊ້ຂອງພຣະອົງປົກປິດເຮົາໄປຕະຫລອດຊີວິດຂອງເຮົາ. ເມື່ອນຸ່ງຖືເສື້ອຜ້າສັກສິດແຫ່ງຖານະປະໂລຫິດສັກສິດແຕ່ລະວັນ, ສັນຍາລັກທີ່ງົດງາມນັ້ນກໍເປັນສ່ວນໜຶ່ງຂອງເຮົາ.

ຢູ່ໃນພຣະຄຳພີໃໝ່ ໃນພຣະທຳໂຣມ, ເຮົາອ່ານວ່າ: “ກາງຄືນກໍລ່ວງໄປຫລາຍແລ້ວ ແລະ ກາງເວັນກໍໃກ້ເຂົ້າມາແລ້ວ, ໃຫ້ພວກເຮົາເລີກເຮັດການຝ່າຍຄວາມມືດ ແລະ ຈົ່ງປະກອບຕົວດ້ວຍອາວຸດແຫ່ງຄວາມສະຫວ່າງ. … ຈົ່ງປະດັບຕົວດ້ວຍອົງພຣະເຢຊູຄຣິດເຈົ້າ.”³³

ຂ້າພະເຈົ້າກະຕັນຍູຫລາຍສຳລັບສິດທິພິເສດຂອງການນຸ່ງຖືເສື້ອຜ້າສັກສິດແຫ່ງຖານະປະໂລຫິດທີ່ສັກສິດ ເພື່ອເຕືອນຂ້າພະເຈົ້າວ່າ ພຣະຜູ້ຊ່ວຍໃຫ້ລອດ ແລະ ພອນຂອງການຊົດໃຊ້ອັນບໍ່ມີຂອບເຂດຂອງພຣະອົງ ປົກປິດຂ້າພະເຈົ້າສະເໝີຕະຫລອດການເດີນທາງໃນຊ່ວງມະຕະຂອງຂ້າພະເຈົ້າ. ມັນຍັງເຕືອນໃຈຂ້າພະເຈົ້າວ່າ ຂະນະທີ່ຂ້າພະເຈົ້າຮັກສາພັນທະສັນຍາທີ່ຂ້າພະເຈົ້າໄດ້ເຮັດກັບພຣະເຈົ້າ ຢູ່ໃນບ້ານຂອງພຣະຜູ້ເປັນເຈົ້າ, ຂ້າພະເຈົ້າກໍໄດ້ປະດັບຕົວດ້ວຍພຣະຄຣິດໂດຍສັນຍາລັກ, ພຣະອົງເອງທີ່ເປັນເຄື່ອງປ້ອງກັນແຫ່ງຄວາມສະຫວ່າງ. ພຣະອົງຈະປົກປ້ອງເຮົາຈາກຄວາມຊົ່ວຮ້າຍ,³⁴ ໃຫ້ພະລັງ ແລະ ຄວາມສາມາດທີ່ມີຫລາຍຂຶ້ນແກ່ຂ້າພະເຈົ້າ,³⁵ ແລະ ເປັນຄວາມສະຫວ່າງ ແລະ ການຊີ້ນຳຂອງຂ້າພະເຈົ້າ³⁶ ຜ່ານຜ່າຄວາມມືດ ແລະ ຄວາມຍາກລຳບາກຂອງໂລກນີ້.

ມີຄວາມໝາຍທາງສັນຍາລັກອັນເລິກເຊິ່ງ ແລະ ສວຍງາມ ໃນເສື້ອຜ້າສັກສິດແຫ່ງຖານະປະໂລຫິດ ແລະ ຄວາມສຳພັນກັບພຣະຄຣິດ. ຂ້າພະເຈົ້າເຊື່ອວ່າ ຄວາມເຕັມໃຈຂອງຂ້າພະເຈົ້າ³⁷ ທີ່ຈະໃສ່ເສື້ອຜ້າສັກສິດກາຍເປັນສັນຍາລັກ ຂອງຂ້າພະເຈົ້າ ຕໍ່ພຣະອົງ.³⁸ ມັນເປັນສັນຍານສ່ວນຕົວຂອງຂ້າພະເຈົ້າເອງຕໍ່ພຣະເຈົ້າ, ບໍ່ແມ່ນສັນຍານຕໍ່ຄົນອື່ນ.³⁹

ຂ້າພະເຈົ້າກະຕັນຍູສຳລັບພຣະຜູ້ຊ່ວຍໃຫ້ລອດຂອງຂ້າພະເຈົ້າ, ພຣະເຢຊູຄຣິດ.⁴⁰ ການເສຍສະລະຊົດໃຊ້ຂອງພຣະອົງເພື່ອເຮົາ ໄດ້ກາຍເປັນສັນຍາລັກແຫ່ງຄວາມຮັກອັນບໍ່ມີຂອບເຂດທີ່ຍິ່ງໃຫຍ່ທີ່ສຸດຂອງພຣະອົງ ແລະ ພຣະບິດາຜູ້ສະຖິດຢູ່ໃນສະຫວັນຂອງເຮົາ ທີ່ມີໃຫ້ເຮົາ,⁴¹ ດ້ວຍສັນຍາລັກທີ່ຈັບບາຍໄດ້ຂອງຄວາມຮັກ ແລະ ການເສຍສະລະນັ້ນ—ທີ່ເປັນຮອຍແຜໃນພຣະຫັດ, ພຣະບາດ ແລະ ຂ້າງຂອງພຣະຜູ້ຊ່ວຍໃຫ້ລອດ—ທີ່ຍັງຄົງຢູ່ແມ່ນແຕ່ຫລັງຈາກການຟື້ນຄືນພຣະຊົນຂອງພຣະອົງ.⁴²

ໂດຍການຮັກສາພັນທະສັນຍາ ແລະ ພັນທະພຣະວິຫານຂອງຂ້າພະເຈົ້າກັບພຣະເຈົ້າ, ລວມທັງການນຸ່ງຖືເສື້ອຜ້າສັກສິດແຫ່ງຖານະປະໂລຫິດທີ່ສັກສິດ, ຊີວິດຂອງຂ້າພະເຈົ້າສາມາດກາຍເປັນສັນຍາລັກສ່ວນຕົວ ເຖິງຄວາມຮັກ ແລະ ຄວາມກະຕັນຍູທີ່ເລິກເຊິ່ງຂອງຂ້າພະເຈົ້າທີ່ມີໃຫ້ແດ່ພຣະຜູ້ຊ່ວຍໃຫ້ລອດຂອງຂ້າພະເຈົ້າ, ພຣະເຢຊູຄຣິດ, ແລະ ຄວາມປາດຖະໜາຂອງຂ້າພະເຈົ້າທີ່ຈະມີພຣະອົງສະຖິດຢູ່ນຳຂ້າພະເຈົ້າຕະຫລອດເວລາ.

ຖ້າຫາກທ່ານຍັງບໍ່ທັນໄດ້ເຮັດເທື່ອ, ຂ້າພະເຈົ້າຂໍເຊື້ອເຊີນທ່ານໃຫ້ເລືອກຄວາມສຳພັນທີ່ເລິກເຊິ່ງກວ່າກັບພຣະເຈົ້າ ໂດຍການເຮັດພັນທະສັນຍາກັບພຣະອົງຢູ່ໃນບ້ານຂອງພຣະຜູ້ເປັນເຈົ້າ. ສຶກສາຄຳປາໄສຂອງສາດສະດາຂອງເຮົາ (ລວມທັງຄຳສອນທີ່ງົດງາມຢູ່ໃນຂໍ້ຄວາມຢູ່ລຸ່ມໜ້າຄຳປາໄສຂອງເພິ່ນ, ຊຶ່ງຄຳປາໄສສ່ວນຫລາຍຂອງກອງປະຊຸມໃຫຍ່ມີ). ເພິ່ນໄດ້ກ່າວຊ້ຳແລ້ວຊ້ຳອີກກ່ຽວກັບພັນທະສັນຍາເປັນເວລາຫລາຍປີ ແລະ ໂດຍສະເພາະ ຕັ້ງແຕ່ເປັນປະທານຂອງສາດສະໜາຈັກ. ຮຽນຮູ້ຈາກຄຳສອນຂອງເພິ່ນກ່ຽວກັບພອນທີ່ສວຍງາມ ແລະ ເພີ່ມພະລັງ ແລະ ຄວາມສາມາດ ຊຶ່ງສາມາດເປັນຂອງທ່ານ ຜ່ານທາງການເຮັດ ແລະ ຮັກສາພັນທະສັນຍາກັບພຣະເຈົ້າ.⁴³

ຄູ່ມືທົ່ວໄປ ລະບຸວ່າ ບໍ່ຈຳເປັນຕ້ອງມີການຖືກເອີ້ນໃຫ້ເປັນຜູ້ສອນສາດສະໜາ ຫລື ໝັ້ນທີ່ຈະແຕ່ງງານ ກ່ອນຈະເຮັດພັນທະສັນຍາພຣະວິຫານ.⁴⁴ ບຸກຄົນຕ້ອງມີອາຍຸ 18 ປີຂຶ້ນໄປ, ບໍ່ຕ້ອງເຂົ້າໂຮງຮຽນມັດທະຍົມປາຍ ຫລື ລະດັບເທົ່າທຽມກັນ, ແລະ ເປັນສະມາຊິກຂອງສາດສະໜາຈັກຢ່າງໜ້ອຍໜຶ່ງປີ. ຍັງມີຂໍ້ກຳນົດມາດຕະຖານຂອງຄວາມບໍລິສຸດສ່ວນບຸກຄົນນຳອີກ.⁴⁵ ຖ້າຫາກທ່ານປາດຖະໜາຢາກໃຫ້ຄວາມສຳພັນຂອງທ່ານເລິກເຊິ່ງກັບພຣະບິດາຜູ້ສະຖິດຢູ່ໃນສະຫວັນຂອງທ່ານ ແລະ ພຣະເຢຊູຄຣິດ ໂດຍການເຮັດພັນທະສັນຍາສັກສິດໃນບ້ານຂອງພຣະຜູ້ເປັນເຈົ້າ, ຂ້າພະເຈົ້າຂໍເຊື້ຶ້ອເຊີນໃຫ້ທ່ານເວົ້າລົມກັບອະທິການ ຫລື ປະທານສາຂາຂອງທ່ານ ແລະ ແຈ້ງໃຫ້ເພິ່ນຊາບເຖິງຄວາມປາດຖະໜາຂອງທ່ານ. ເພິ່ນຈະຊ່ວຍທ່ານໃຫ້ຮູ້ວິທີກຽມຮັບ ແລະ ໃຫ້ກຽດພັນທະສັນຍາເຫລົ່ານັ້ນ.

ຜ່ານທາງຄວາມສຳພັນແຫ່ງພັນທະສັນຍາກັບພຣະເຈົ້າ, ຊີວິດຂອງເຮົາເອງກໍສາມາດກາຍເປັນສັນຍາລັກທີ່ດຳລົງຢູ່ຂອງເຮົາ ແລະ ເປັນຄວາມຮັກທີ່ເລິກເຊິ່ງຕໍ່ພຣະບິດາຜູ້ສະຖິດຢູ່ໃນສະຫວັນຂອງເຮົາ, ເປັນ hesed ຂອງເຮົາສຳລັບພຣະອົງ,⁴⁶ ແລະ ຄວາມປາດຖະໜາຂອງເຮົາທີ່ຈະກ້າວໜ້າ ແລະ ໃນທີ່ສຸດກາຍເປັນເໝືອນດັ່ງພຣະຜູ້ຊ່ວຍໃຫ້ລອດຂອງເຮົາ, ກຽມພ້ອມທີ່ມື້ໜຶ່ງຈະເຂົ້າໄປໃນທີ່ປະທັບຂອງພວກພຣະອົງ. ຂ້າພະເຈົ້າເປັນພະຍານວ່າ ພອນທີ່ຍິ່ງໃຫຍ່ທີ່ສຸດຂອງຄວາມສຳພັນແຫ່ງພັນທະສັນຍານັ້ນແມ່ນມີຄ່າຫລາຍທີ່ສຸດ. ໃນພຣະນາມຂອງພຣະເຢຊູຄຣິດ, ອາແມນ.