Գերագույն համաժողով
Քայլել Քրիստոսի հետ ուխտի հարաբերությունների մեջ
2023 թվականի հոկտեմբերի գերագույն համաժողով

Քայլել Քրիստոսի հետ ուխտի հարաբերությունների մեջ

Նախագահ Էմիլի Բել Ֆրիմեն

Երիտասարդ կանանց գերագույն նախագահ

«Մենք պետք է հիշենք, որ Նա, ով հալածվել ու կոտրվել էր մեզ համար, թույլ կտա, որ մենք տուժենք մահկանացու կյանքի բացասական հետևանքներից ու մարտահրավերներից, բայց Նա մեզ չի խնդրում միայնակ դիմակայել դրանց:

Իմ լավ ընկեր Իլանը Իսրայելում ինձ մի արահետ ցույց տվեց: «Սա կոչվում է Հիսուսի արահետ, - ասաց նա, - քանի որ դա Նազարեթից Կափառնայում տանող ճանապարհն է, և շատերը հավատում են, որ Հիսուսը քայլել է այդ արահետով»: Ես հենց այդ պահին որոշեցի, որ ուզում եմ քայլել այդ արահետով, ուստի սկսեցի ուղևորություն ծրագրել դեպի Իսրայել:

Ճամփորդությունից վեց շաբաթ առաջ ես կոտրեցի ոտքիս կոճը։ Ամուսինս անհանգստանում էր վնասվածքի համար, իսկ իմ մեծագույն մտահոգությունն այն էր, թե ինչպես եմ քայլելու «Հիսուսի արահետով» մեկ ամիս անց: Ես բնավորությամբ համառ եմ, ուստի չցանկացա չեղարկել ինքնաթիռի տոմսերը։

Հիշում եմ, որ հանդիպեցի մեր իսրայելացի զբոսավարին հունիսյան այդ գեղեցիկ առավոտ: Ես դուրս թռա մեքենայից, ապա հանեցի մի շարք հենակներ և ծնկի սկուտեր: Միան՝ մեր զբոսավարը, մի հայացք նետեց իմ հարմարանքներին և ասաց, «Ահ, չեմ կարծում, որ դուք կարող եք քայլել այս արահետով այդ վիճակում»:

«Գուցե ոչ», - պատասխանեցի ես: «Բայց ոչինչ չի խանգարում ինձ փորձել»: Նա թեթևակի գլխով արեց, և մենք սկսեցինք: Ես սիրում եմ նրան, քանի որ նա հավատաց, որ ես կարող եմ կոտրված ոտքով քայլել արահետով:

Ես որոշ ժամանակ ինքնուրույն տեղաշարժվեցի զառիթափ արահետով և քարերի միջով: Այնուհետև, իմ հանձնառության անկեղծությունից հուզված, Միան հանեց մի բարակ պարան, կապեց այն իմ սկուտերի բռնակներին և սկսեց քաշել։ Նա ինձ քաշեց բլուրներով, կիտրոնի այգիների միջով և Գալիլեայի ծովի ափերով: Ճամփորդության ավարտին ես երախտագիտությունս հայտնեցի իմ գորովալից զբոսավարին, որն ինձ օգնեց իրականացնել մի բան, որը երբեք չէի կարողանա ինքնուրույն անել:

Երբ Տերը կանչեց Ենովքին՝ ճամփորդելու երկրով և վկայելու Իր մասին, Ենովքը վարանեց:1 Նա պարզապես մի «ծանրախոս» պատանի էր: Նա ինչպե՞ս կարող էր ճամփորդել ու վկայել իր այդ վիճակում։ Նա իրեն անհամապատասխան էր զգում, քանի որ կոտրված էր իր թերությունից: Տիրոջ պատասխանն այն բանին, թե ինչն էր խանգարում նրան, պարզ ու անմիջական էր. «Քայլիր ինձ հետ»:2 Ենովքի նման մենք պետք է հիշենք, որ Նա, ով հալածվել ու կոտրվել էր մեզ համար,3 թույլ կտա, որ մենք տուժենք մահկանացու կյանքի բացասական հետևանքներից ու մարտահրավերներից, բայց Նա չի խնդրում մեզ միայնակ դիմակայել դրանց:4 Անկախ մեր վիճակի ծանրությունից կամ մեր ուղու ներկա ընթացքից՝ Նա կհրավիրի մեզ քայլել Իր հետ:5

Մտածեք նեղության մեջ գտնվող երիտասարդի մասին, որն անապատում հանդիպեց Տիրոջը: Հակոբը տնից հեռու էր գտնվում։ Գիշերը նա իր երազում տեսավ ոչ միայն սանդուղք, այլև ուխտի նշանակալից խոստումներ, ներառյալ այն, ինչ ես սիրում եմ անվանել հինգ մատով խոստում:6 Այդ գիշեր Տերը կանգնեց Հակոբի կողքին, ներկայացրեց Իրեն որպես Հակոբի հոր Աստված, իսկ հետո խոստացավ.

  • Ես քեզ հետ եմ։

  • Ես կպահպանեմ քեզ:

  • Ես քեզ կվերադարձնեմ այս երկիրը։

  • Ես չեմ թողնի քեզ։

  • Մինչև որ չկատարեմ այն, ինչ որ ասել եմ քեզ։7

Հակոբը պետք է ընտրություն կատարեր: Նա կարող էր ընտրել և իր կյանքն ապրել՝ պարզապես ծանոթ լինելով իր հոր Աստծուն, կամ կարող էր ընտրել ապրել Նրա հետ ուխտի հարաբերություններում: Տարիներ անց Հակոբը վկայեց այդ ուխտի խոստումներով ապրած կյանքի մասին. «Աստված … լսեց ինձ իմ նեղության օրը և ինձ հետ էր իմ ճանապարհորդության ժամանակ»:8 Ճիշտ այնպես, ինչպես Տերը պատասխանեց Հակոբին, Նա կպատասխանի մեզանից յուրաքանչյուրին մեր նեղության օրը, եթե մենք ընտրենք կապել մեր կյանքը Նրա հետ: Նա խոստացել է մեզ հետ քայլել այդ ճանապարհով։

Մենք դա անվանում ենք քայլել ուխտի ճանապարհով. ճանապարհ, որը սկսվում է մկրտության ուխտից և տանում դեպի ավելի խոր ուխտեր, որոնք մենք կապում ենք տաճարում: Հավանաբար դուք լսում եք այս բառերը և մտածում եք թվարկվածի դիմաց՝ վանդակների մեջ ստուգանիշ դնելու մասին: Գուցե այն ամենը, ինչ տեսնում եք, պահանջների ուղի է: Ավելի ուշադիր նայելը բացահայտում է ավելի համոզիչ բան: Ուխտը միայն պայմանագիր չէ, թեև դա կարևոր է: Ուխտը ներառում է նաև հարաբերություններ: Նախագահ Ռասսել Մ. Նելսոնն ուսուցանել է. «Ուխտի ուղին հիմնված է Աստծո հետ մեր հարաբերությունների վրա»:9

Մտածեք ամուսնության ուխտի մասին: Հարսանիքի ամսաթիվը կարևոր է, բայց նույնքան կարևոր են այն հարաբերությունները, որոնք ձևավորվելու են հետո՝ միասին ապրած կյանքի ընթացքում: Նույնը վերաբերում է Աստծո հետ ուխտի հարաբերություններին: Պայմաններ են դրված, և այդ ճանապարհին ակնկալիքներ կլինեն։ Այնուամենայնիվ, Նա հրավիրում է մեզանից յուրաքանչյուրին գալ այնպես, ինչպես կարող ենք՝ սրտի ողջ նպատակով, և «առաջ մղվել»10 Իր աջակցությամբ՝ վստահելով, որ Իր խոստացած օրհնությունները կգան: Սուրբ գիրքը մեզ հիշեցնում է, որ հաճախ այդ օրհնությունները գալիս են Իր ժամանակին և Իր ձևով. 38 տարի,11 12 տարի անց,12 և անմիջապես:13 Ինչպես կպահանջի արահետը, այնպես էլ կլինի Նրա աջակցությունը:14

Նրա պատմությունը փրկագնման պատմություն է: Հիսուս Քրիստոսը կդիմավորի մեզ, որտեղ էլ որ լինենք, ինչ վիճակում էլ որ լինենք: Սա է պատճառը պարտեզի, խաչի և գերեզմանի: Փրկիչն ուղարկվեց, որպեսզի օգնի մեզ հաղթել:15 Բայց մնալ այնտեղ, որտեղ մենք ենք այժմ, չի բերի այն փրկությունը, որը մենք փնտրում ենք: Ինչպես Նա չթողեց Հակոբին այնտեղ՝ ցեխի մեջ, այնպես էլ Տերը մտադիր չէ մեզանից որևէ մեկին թողնել այնտեղ, որտեղ գտնվում ենք:

Նա նաև վերելքի առաքելություն է։ Նա կաշխատի մեր ներսում՝16 բարձրացնելու մեզ այնտեղ, որտեղ Ինքն է, և այդ ընթացքում մեզ հնարավորություն կտա դառնալ այնպիսին, ինչպիսին Ինքն է: Հիսուս Քրիստոսը եկավ՝ բարձրացնելու մեզ։17 Նա ցանկանում է օգնել մեզ, որ հաջողության հասնեք։ Ահա սա է տաճարի պատճառը:

Մենք պետք է հիշենք, որ միայն ուղին չէ, որ կբարձրացնի մեզ, դա ուղեկիցն է՝ մեր Փրկիչը: Եվ սա է ուխտի հարաբերությունների պատճառը:

Երբ Իսրայելում էի, այցելեցի Արևմտյան պատը։ Հրեաների համար սա Իսրայելի ամենասուրբ վայրն է: Դա այն ամենն է, ինչ մնացել է նրանց տաճարից։ Շատերը հագնում են իրենց ամենալավ հանդերձները, երբ այցելում են այս սուրբ վայրը. նրանց հագուստի ընտրությունը Աստծո հետ իրենց հարաբերություններին նվիրվածության խորհրդանիշն է: Նրանք այցելում են պատը՝ սուրբ գրություններ կարդալու, երկրպագելու և իրենց աղոթքները հեղելու համար: Նրանց մեջ մեծ ձգտում կա դեպի տաճարը, և ուխտի տան այս կարոտը կլանում է նրանց ամեն մի օրը և նրանց ամեն մի աղոթքը: Ես հիանում եմ նրանց նվիրվածությամբ։

Երբ Իսրայելից տուն վերադարձա, ավելի ուշադիր լսեցի իմ շուրջը տարվող ուխտերի վերաբերյալ խոսակցությունները: Ես նկատեցի, որ մարդիկ հարցնում էին. Ինչո՞ւ պետք է ես քայլեմ ուխտի ճանապարհով: Ես ինչո՞ւ պետք է Տիրոջ տուն մտնեմ ուխտեր կապելու համար: Ինչո՞ւ եմ ես հագնում սուրբ հագուստը: Ես ինչո՞ւ պետք է ջանքեր ներդնեմ Տիրոջ հետ ուխտի հարաբերություններում: Այս լավ ու կարևոր հարցերի պատասխանը պարզ է. կախված է նրանից, թե ինչ աստիճանի հարաբերություններ եք ցանկանում ունենալ Հիսուս Քրիստոսի հետ:18 Մեզանից յուրաքանչյուրը պետք է բացահայտի իր պատասխանը այդ խիստ անձնական հարցերին:

Ես քայլում եմ այս ճանապարհով որպես «երկնային ծնողների սիրելի դուստր»,19, աստվածայնորեն ճանաչված20 և խորապես վստահված:21 Ես՝ որպես ուխտի զավակ, իրավասու եմ ստանալու խոստացված22 օրհնությունները: Ես ընտրել եմ23 քայլել Տիրոջ հետ: Ես կանչվել եմ՝24 կանգնելու որպես Քրիստոսի վկա: Երբ ուղին ճնշող է թվում, ես զորանում եմ25 արտոնող շնորհով: Ամեն անգամ, երբ մտնում եմ Նրա տուն, ես զգում եմ ավելի խորացած ուխտի հարաբերություններ Նրա հետ: Ես սրբագործվել եմ26 Նրա Հոգով, օժտվել եմ27 Նրա պարգևներով և ձեռնադրվել եմ՝28 կառուցելու Նրա արքայությունը: Ամենօրյա ապաշխարության և հաղորդությունն ամեն շաբաթ ճաշակելու գործընթացի միջոցով ես սովորում եմ դառնալ հաստատակամ29 և շարունակել բարիք գործել:30 Ես քայլում եմ այս ճանապարհով՝ Հիսուս Քրիստոսի հետ որպես իմ առաջնորդ՝ անհամբեր սպասելով խոստացված օրվան, երբ Նա նորից կգա: Այնուհետև ես կկնքվեմ՝ որպես Նրանը,31 և կբարձրացվեմ՝ որպես Աստծո սուրբ32 դուստր:

Ահա թե ինչու եմ ես քայլում ուխտի ճանապարհով:

Ահա թե ինչու ես կառչում եմ ուխտի խոստումներից:

Ահա թե ինչու եմ ես մտնում Նրա ուխտի տունը:

Ահա թե ինչու եմ ես հագնում սուրբ հագուստը՝ որպես մշտական հիշեցում:

Քանի որ ես ուզում եմ ապրել Նրա հետ հավատարիմ ուխտի հարաբերություններում:

Հավանաբար դուք նույնպես։ Սկսեք այնտեղից, որտեղ գտնվում եք։33 Թույլ մի տվեք, որ ձեր վիճակը խանգարի ձեզ: Հիշեք, որ տեմպը կամ ուղու վրա տեղավորվելը այնքան կարևոր չէ, որքան առաջընթացը:34 Խնդրեք մեկին, որին վստահում եք, և որը գտնվում է ուխտի ուղու վրա, ներկայացնել ձեզ Փրկչին, որին նրանք ճանաչել են: Սովորեք Նրանից։ Ներդրումներ կատարեք հարաբերություններում՝ ուխտի մեջ մտնելով Նրա հետ: Կարևոր չէ ձեր տարիքը կամ վիճակը: Դուք կարող եք քայլել Նրա հետ:

Երբ մենք ավարտեցինք Հիսուսի արահետով քայլելը, Միան չվերցրեց իր պարանը: Նա այն կապած թողեց սկուտերին: Հաջորդ մի քանի օրերին իմ դեռահաս զարմիկներն ու նրանց ընկերը ինձ քաշում էին Երուսաղեմի փողոցներով:35 Նրանք ցանկանում էին, որ ես բաց չթողնեմ Հիսուսի պատմությունները: Նրանք ինձ հիշեցրեցին աճող սերնդի ուժի մասին։ Մենք կարող ենք սովորել ձեզանից: Դուք անկեղծ ցանկություն ունեք ճանաչելու առաջնորդին՝ Հիսուս Քրիստոսին: Դուք վստահում եք պարանի ուժին, որը կապում է մեզ Նրա հետ: Դուք օժտված եք ուրիշներին Նրա մոտ տանելու պարգևով:36

Բարեբախտաբար, մենք միասին քայլում ենք այս ճանապարհով՝ ճանապարհին քաջալերանք բաժանելով:37 Երբ մեր անձնական փորձառությամբ կիսվում ենք Քրիստոսի հետ, մենք կամրացնենք անձնական նվիրվածությունը: Այս մասին ես վկայություն եմ բերում Հիսուս Քրիստոսի անունով, ամեն:

Հղումներ

  1. Ենովքի մարդիկ մոլորվել էին, ուրացել էին Քրիստոսին, խավարի մեջ իրենց խորհուրդներն էին փնտրում (տես Մովսես 6.27–28): Այն ժամանակ, երբ Ենովքը կորցրել էր հավատը մարդկության հանդեպ, նա դիմեց Տիրոջը առաջնորդության համար: Ենովքին ուղղված այս կոչը նույն կոչն է, որ Տերն ուղղում է մեզ բոլորիս. «Քայլիր ինձ հետ» (Մովսես 6.34, տես նաև Մատթեոս 11.28:) Բայց միգուցե, Ենովքի նման, դուք վստահ չեք, թե կարող եք այս ճանապարհով քայլել ձեր վիճակում: Գուցե ինչ-որ կերպ կոտրված եք զգում: Հավանաբար պատճառը, որ մենք պետք է քայլենք ուխտի ճանապարհով, մեր վիճակն է, քանի որ մեզ ինչ-որ կերպ խանգարում են, և մենք Նրա օգնության կարիքն ունենք:

  2. Տես Մովսես 6.23-34։

  3. Տես “Jesus of Nazareth, Savior and King” (Hymns, no. 181):

  4. Sես Եթեր 12.27:

  5. Տես Մատթեոս 11.28–30:

  6. Իմ աղջիկները ցանկանում են ամեն առավոտ շշնջալ իրենց երեխաներին այս հինգ մատով խոստումը` հիշեցում Երկնային Հոր մասին, ով աստվածայնորեն տեղյակ է Իր երեխաներից յուրաքանչյուրի մասին:

  7. Տես Ծննդոց 28․10-22։ Այդ գիշերվա զգալի շեշտադրումն էր նաև Աբրահամական ուխտը: Աբրահամյան ուխտի այս տարրերը կենտրոնական դեր են խաղում մեր կյանքում և Հիսուս Քրիստոսի ավետարանում. (1) հավերժական ժառանգության խոստումը (հատված 13), (2) հավերժական սերունդ (հատված 14), և (3) օրհնությունն ու պատասխանատվությունը՝ օրհնելու երկրի բոլոր ազգերին (հատված 14):

  8. Ծննդոց 35․3, շեշտադրումն ավելացված է։ Հակոբի ծնողները նրան հրահանգեցին հեռանալ տնից, որպեսզի հեռանա Եսավից, որը սպառնացել էր սպանել նրան, և հնարավորություն ունենալ հանդիպելու մեկին, ում հետ նա կարող էր ամուսնանալ ուխտով (տես Ծննդոց 27.41–45, 28.1–2, 5):

  9. Ռասսել Մ. Նելսոն, «Հավերժական ուխտը», Լիահոնա, հոկտ. 2022, 11:

  10. 2 Նեփի 31.20:

  11. Տես Հովհաննես 5.5, Բեթհեզդայի ավազանի պատմությունը:

  12. Տես Մարկոս 5.25, կնոջ պատմությունը, որը դիպավ Քրիստոսի պատմուճանին:

  13. Տես Մատթեոս 14.31, Պետրոսի պատմությունը ջրի վրայով քայլելիս:

  14. Տես «Ինչ ամուր է հիմքը», Հիմներ, հ. 6:

  15. Տես 1 Նեփի 11.16–33:

  16. Տես Փիլիպպեցիս 1.6, 2.13, Մորմոնի խոսքեր 1.7:

  17. Տես Հովհաննես 12.32։

  18. Ճանապարհը հաճախ սահմանվում է հիմնական բնութագրերով, ինչպիսիք են ուղեցույցները կամ մղոն ցուցիչները: Դա միջոց է՝ համոզվելու, որ դուք ճիշտ ուղու վրա եք կամ առաջընթաց եք գրանցում ճիշտ ուղղությամբ: Հարաբերությունները կարող են սահմանվել նաև հիմնական հատկանիշներով: Դրանցից մի քանիսը ներառում են ակնկալիք (տես Երեմիա 29.11, Վարդապետություն և Ուխտեր 132.7), հնազանդություն (տես Մոսիա 3.19, Ալմա 7.23, 13.28), խոնարհություն, հնազանդություն, համբերություն, զիջում, վստահություն (տես Առակներ 3.5), և սեր (տես Հռովմայեցիս 8.31–39):

  19. «Երիտասարդ կանանց թեման», Ավետարանի գրադարան, շեշտադրումն ավելացված է տես նաև Բոնի Հ. Քորդոն, «Սիրելի դուստրեր», Լիահոնա, նոյ. 2019, 67:

  20. Տես Հովհաննես 4․1-29 ջրհորի մոտ գտնվող կնոջ պատմությունը:

  21. Տես Ալմա 38․1-3։

  22. Տես Թվոց 6.23-27:

  23. Sես Հեսու 24.22:)

  24. Տես Վարդապետություն և Ուխտեր 25.3, Էմմա Սմիթի պատմությունը:

  25. Տես Ա Կորնթացիս 15.9–10:

  26. Տես Բ Մնացորդաց 20.1–17, հատկապես հատված 14:

  27. Տես Վարդապետություն և Ուխտեր 109․1-46։

  28. Տես Ա Թագավորաց 2․31-13։

  29. Տես Եսթեր 4.16, Եսթերի պատմությունը:

  30. Տես Գործք Առաքելոց 10.38:

  31. Տես Եսայիա 43․1-5։

  32. Տես Երկրորդ Օրինաց 28․1-9։

  33. Մի լավ ընկեր ինձ հիշեցրեց, որ գործողությունների կոչը կարևոր է ցանկացած հարաբերություններում:

  34. Conversation with Kristen Olsen, Sept. 2023.

  35. To Mack Oswald, Camden Oswald, Ashton Matheny, and Jack Butler, thanks for pulling me along.

  36. «Դուք կհիշեք, որ ես հրավիրեցի Հիսուս Քրիստոսի Վերջին Օրերի Սրբերի Եկեղեցու երիտասարդներին ընդգրկվել Տիրոջ երիտասարդների գումարտակում, որպեսզի մասնակցեն Երկրի վրա այսօր գոյություն ունեցող ամենամեծ գործին՝ Իսրայելի հավաքմանը։ Ես այս հրավերն ուղղեցի մեր երիտասարդությանը, քանի որ նրանք անսովոր կերպով օժտված են ուրիշներին հասնելու և համոզիչ ձևով կիսելու այն, ինչին հավատում են» (Ռասսել Մ. Նելսոն, Վկաներ, Ահարոնյան Քահանայության քվորումներ, Երիտասարդ Կանանց դասարաններ Լիահոնա, նոյ. 2019, 39):

  37. «Աստծո թագավորությունը … նման է պաշարված քաղաքի, որը բոլոր կողմերից շրջապատված է մահով: Յուրաքանչյուր մարդ ունի իր տեղը պատի վրա՝ պաշտպանելու համար, և ոչ ոք չի կարող կանգնել այնտեղ, որտեղ մյուսը կանգնած է, բայց «ոչինչ չի խանգարում մեզ քաջալերանք հաղորդել միմյանց» (Martin Luther, in Lewis William Spitz, The Renaissance and Reformation Movements [1987], 335):