Kemm se Tkun Kbira l-Hena Tagħkom
Issa nistedinkom biex tieħdu l-għarfien tagħkom, flimkien mat-testimonjanzi li onorajtu tul ħajjitkom, u tmorru sservu missjoni.
Għeżież ħuti, illum se naqsam magħkom ftit ħsibijiet dwar il-ġabra ta’ Iżrael, dik li l-President Russell M. Nelson isejħilha “l-aktar ħaġa importanti li qed isseħħ illum fid-dinja. M’hawn xejn li tista’ tqabblu magħha fil-kobor, xejn li tista’ tqabblu magħha fl-importanza, xejn li tista’ tqabblu magħha fil-majestà.”1
Il-ġabra hija l-akbar għarfien li “il-valur tal-erwieħ hu kbir f’għajnejn Alla.”2 Xejn inqas u xejn aktar. Aħna qegħdin niġbru flimkien lil ulied Alla fl-dawn l-aħħar żminijiet ħalli huma jkun jista’ jkollhom “barkiet imsawba fuqhom”3 u l-wegħdiet “tal-ġid li jibqgħu għal dejjem.”4 U biex niġbru flimkien lil Iżrael neħtieġu l-missjunarji—ferm aktar milli qed iservu.5 Illum, nindirizza lil bosta anzjani ta’ esperjenza fil-Knisja li jistgħu jservu bħala missjunarji. Il-Mulej għandu bżonnkom. Aħna għandna bżonnkom fi New York u f’Chicago, fl-Awstralja u fl-Afrika, fit-Tajlandja u fil-Messiku, u f’kull post ieħor.
Ippermettuli neħodkom lura għas-sena 2015. Kont għadni kif ġejt imsejjaħ bħala membru tal-Kworum tat-Tnax-il Appostlu. Waħda mir-responsabbiltajiet sbieħ li aħna nġorru bħala Appostli hi li nassenjaw missjunarji għall-għelieqi tal-ħidma tagħhom. Jiena ħadt sehem f’dan il-proċess bħala membru tas-Sebgħin,6 iżda issa, bħala Appostlu, inħoss fuqi l-piż kollu ta’ dan l-essajnment. Jien nibda billi bl-għajnuna tat-talb inpoġġi numru kbir ta’ presbiteri u sisters żgħażagħ, wieħed wieħed, waħda waħda, f’missjonijiet madwar id-dinja. Imbagħad, indur fuq il-koppji anzjani. Fil-lista kien hemm 10. Mhux ħafna. Xi ftit sorpiż, jien staqsejt lill-kollega tiegħi mid-Dipartiment Missjunarju, “Kemm għandna bżonn din il-ġimgħa biex inlaħħqu mat-talba li għandna?”
Huwa wieġeb, “300.”
Dak il-mument ta’ sfida baqa’ f’moħħi: 10 koppji biex jimlew it-talba ta’ 300.
Il-President Russell M. Nelson ħeġġeġ lill-koppji biex “jinżlu għarkupptejhom u jistaqsu lill-Missierna fis-Smewwiet jekk huwiex il-mument opportun biex huma jservu missjoni.”7 Fost il-kwalifiċi kollha, huwa qal, “xewqa li sservu taf tkun l-aktar waħda importanti.”8
Kif tgħidilna l-iskrittura, “Jekk intom għandkom ix-xewqa li sservu lil Alla intom imsejħin għall-ħidma.”9 Dik il-ħidma hija kollha relatata mal-liġi tal-ħsad. Fi Ġwanni naqraw, “Min jiżra’ jifraħ hu wkoll bħal min jaħsad.”10
Jiena rajt b’għajnejja l-liġi tal-ħsad tiġi fis-seħħ fil-familja tiegħi.
Xi snin ilu, jiena kont qed inżur xi membri tal-familja tiegħi meta l-isqof talabni biex inkun l-aħħar kelliem fis-servizz tas-sagrament.11 Hekk kif kont nieżel minn fuq il-podju, ġiet fuqi waħda mara b’sebat itfal u introduċiet lilha nnifisha bħala Sister Rebecca Guzman.
Hija staqsietni, “Presbiteru Rasband, lil Rulon u lil Verda Rasband tafhom?”
Bi tbissima kbira weġibtha, “Dawk il-ġenituri tiegħi.”
Naħseb indunajtu kif se tkompli l-istorja. Bil-permess ta’ Rebecca, li tinsab hawn fiċ-Ċentru għall-Konferenza flimkien ma’ membri tal-familja tagħha, jiena se naqsam magħkom l-istorja tal-familja tagħha.12
Il-ġenituri tiegħi, il-Presbiteru Rulon u Sister Verda Rasband, kienu qed iservu bħala koppja anzjana fil-Missjoni ta’ Fort Lauderdale ġewwa Florida.13 Huma kienu qed ixandru l-kelma u bi gwida divina ħabbtu fuq il-bieb tad-dar ta’ Rebecca. Hija kienet għadha żagħżugħa u kienet tħobb tisma’ l-mużika ta’ the Osmonds, l-aktar ta’ seħibna Donny—li llum jinsab magħna.14 Hija kienet semgħet l-intervisti tagħhom fuq il-midja u saret taf li huma kienu membri tal-Knisja ta’ Ġesù Kristu tal-Qaddisin tal-Aħħar Żmien. Hija ħasset li kien hemm xi ħaġa differenti fihom, u għax bassret li setgħet kienet ir-reliġjon tagħhom, Rebecca għaddiet sentejn tirriċerka t-twemmin tal-Knisja fil-librerija tal-iskola. Għalhekk, meta koppja li kienet tidher veru minn tagħna ħabbtu fuq il-bieb tal-familja tagħha u introduċew lilhom infushom bħala missjunarji Qaddisin tal-Aħħar Żmien, kienet ta’ sopriża kbira għaliha.
“Ommi qaltli biex inkeċċihom ’l hemm,” kitbet aktar tard Rebecca, “iżda qalbi qalet ‘Le.’ Jien ħarist f’wiċċhom u ħassejt fihom sens kbir ta’ żelu u mħabba. Meta niftakar f’dan il-mument ifeġġ id-dmugħ f’għajnejja u nħoss sentiment profond f’qalbi.”15
Rebecca stednithom jidħlu ġewwa, u l-ġenituri tiegħi bħala missjunarji qasmu messaġġ magħha, maż-żewġ ħutha iżgħar minnha, u minkejja l-oġġezzjoni tagħha, ma’ ommha.
Rebecca ddeskriviet dan li ġej: “Il-ġenituri tiegħek it-tnejn kienu nies meraviljużi meta ġew biex jispjegawlna xi mistoqsijiet li kellna. Għadni nista’ nara wiċċhom quddiem għajnejja bħallikieku kien imdawwar bid-dawl. Aħna konna dejjem ngħannqu lil ommok hi u ħierġa u hi dejjem kienet tfittex kif tgħin lil ommi tħossha komda u rispettata. Għajnjen missierek dejjem kienu jiddu hekk kif kien ikun qed jgħallimna dwar Ġesù Kristu. Huwa pprova jinkludi lil missieri fid-diskussjonijiet u eventwalment irnexxielu. Missieri kien kok fi klabb lokali u beda jsajjar għall-ġenituri tiegħek, u fost l-ikel li kien jagħmel kien hemm it-torta tal-lumi, il-favorita ta’ missierek.”16
Meta l-Presbiteru u Sister Rasband staqsew lil Rebecca u l-familja tagħha biex jaqraw il-Ktieb ta’ Mormon, Rebecca qratu f’ħamest ijiem. Hija riedet titgħammed b’mod immedjat, iżda l-membri l-oħra tal-familja tagħha ma kinux għadhom lesti. Wara erba’ xhur, Rebecca insistiet li titgħammed u tingħaqad mal-Knisja vera. Hija tgħid, “Kull fibra ta’ ruħi kienet taf li din kienet vera.”17 Fil-5 ta’ April, 1979, il-missjunarji għammdu lil Rebecca, li kellha 19-il sena, lil ommha, u liż-żewġ ħutha. Missierha kien xhud waqt il-magħmudija.
Meta jiena ltqajt ma’ Rebecca u mal-familja tagħha fil-knisja, aħna ħadna ritratt mal-familja tagħha. Jiena ħadtu d-dar biex nurih lil ommi, li issa daħlet sew fiż-żmien, u hija għafsitu ma’ qalbha. Imbagħad hija qaltli, “Ronnie, dan hu wieħed mill-aktar jiem kuntenti ta’ ħajti.”
It-tweġiba ta’ ommi twassalni biex nagħmel mistoqsija lill-anzjani tagħna: “X’qed tagħmlu f’dan l-istadju ta’ ħajjitkom?” Hemm bosta ħwejjeġ li l-missjunarji anzjani jistgħu jagħmlu li ħadd aktar ma jista’ jagħmilhom. Intom forza meraviljuża għat-tajjeb, b’esperjenza kbira fil-Knisja, u tinsabu lesti biex tħeġġu u ssalvaw lil ulied Alla.
Xi wħud minnkom tafu tistaqsu: “Iżda dan ma jwassalx biex inħallu warajna lin-neputijiet tagħna? Nispiċċaw nimmissjaw mumenti importanti fil-familja, għeluq sninhom, lill-ħbieb, u anke l-pets tagħna.” Kieku jien staqsejt lil ommi għalfejn hi u l-Pa marru jservu missjoni, naf li kienet tweġibni hekk: “Għax jiena għandi n-neputijiet. Irridhom ikunu jafu li jien u missierek servejna fl-għalqa tal-missjoni, ridna nagħtu eżempju tajjeb lin-nisel tagħna, u aħna nħossuna mberkin, verament imberkin.”
Hekk kif jiena mort inżur bosta missjonijiet madwar id-dinja, jiena stajt nara s-servizz tal-għaġeb tal-leġjun ta’ missjunarji anzjani tagħna. Jidher ċar li huma qed jagħmlu b’ferħ “ir-rieda tal-Mulej” u qed iwettqu “il-ħidma tal-Mulej.”18
Għal xi wħud, u nittama li għal eluf minnkom, servizz missjunarju full-time f’xi naħa oħra tad-dinja taf tkun sewwasew l-aħjar għażla.19 Għal oħrajn, tafu tippreferu sservu missjoni fejn toqogħdu. Minħabba problemi ta’ saħħa u ċirkustanzi oħra, hemm dawk li ma jistgħux iservu. Dawk is-sitwazzjonijiet aħna nifhmuhom, u jiena nittama li intom issibu modi kif tgħinu lil dawk li qegħdin iservu. Imxu wara l-parir tal-profeta u itolbu biex tkunu tafu xi jridkom tagħmlu l-Mulej.
L-għelieqi tal-missjoni madwar id-dinja qed jitolbu l-għajnuna tagħkom. Il-President Nelson qal dan dwar il-missjunarji anzjani tagħna, “Huma żgħażagħ fl-ispirtu, għaqlin, u lesti biex jaħdmu.”20
F’dik l-għalqa, intom għandkom jistennewkom opportunitajiet bla għadd: intom tistgħu sservu f’uffiċċji tal-missjoni jew f’tempji, tistgħu ssaħħu lill-missjunarji żgħażagħ, tistgħu tgħinu fit-tkabbir ta’ fergħat żgħar, tistgħu taħdmu f’ċentri ta’ FamilySearch jew f’xi siti storiċi, tistgħu tgħallmu l-istitut, tipprovdu servizz umanitarju, taħdmu mal-adulti żgħażagħ, tgħinu f’ċentri tal-impjieg jew fl-irżieżet tal-Knisja. Id-dettalji dwar modi kif tistgħu sservu, x’inhu l-aħjar għalikom, fejn intom meħtieġa, u kif tistgħu titħejjew biex tmorru huma indirizzati fil-website” Missjunarju Anzjan.”21 Intom tistgħu titkellmu mal-isqof jew mal-president tal-fergħa tagħkom.
Jien sejjaħt bosta koppji biex iservu u stajt nosserva d-Dawl ta’ Kristu jiddi fuq wiċċhom.22 Wara li ġew lura huma ddeskrivew kemm kienu resqu aktar qrib il-Mulej u qrib xulxin, u kemm kienu jħossu l-Ispirtu tal-Mulej jissawwab fuqhom, u jafu li huma kienu qed jagħmlu differenza.23 Min ma jridx jesperjenza dan?
Missjoni taf tkun l-akbar kapitlu fil-ħajja ta’ koppja. Titlu tajjeb jaf ikun “Il-Mulej u s-Sid Tiegħi se Jkollu Bżonni.”24 Intom tafu tispiċċaw f’post li mhux familjari miegħu; madankollu, il-qawwa tal-Ispirtu tgħinkom biex tħossukom milqugħin.
Il-ġenituri tiegħi, u għexieren ta’ eluf ta’ koppji li reġgħu lura taw ix-xhieda tagħhom dwar l-hena li huma esperjenzaw fil-ħidma missjunarja. Fl-iskrittura tal-aħħar żmien il-Mulej qal: “U jekk għandu jkun li intom taħdmu ħajjitkom kollha biex ixxandru l-indiema lin-nies, u tressqu mqar ruħ waħda lejja, kemm tkun kbira l-hena tagħkom magħha fis-saltna ta’ Missieri!”25
Isaija tana deskrizzjoni mill-aktar poetika ta’ xi jfisser li sservi fl-“għalqa” tal-missjoni. L-iskrittura tgħidilna li “l-għalqa hija d-dinja.”26 Dan il-profeta tal-qedem mill-aktar kbir kiteb, “Iva, bil-ferħ għad toħorġu, u bis-sliem titwasslu. Quddiemkom f’għajjat ta’ ferħ jinfexxu l-muntanji u l-għoljiet, u ċċapċap idejha kull siġra tar-raba.”27 Il-muntanji, l-għoljiet, l-għelieqi, u s-siġar nistgħu nxebbhuhom mal-presidenti tal-missjoni, mal-isqfijiet, mal-mexxejja tad-distrett, mal-membri, u ma’ dawk li qed ifittxu biex “isiru jafu fejn jistgħu jsibuha.”28 Huma jixhdu li l-missjunarji anzjani jagħmlu differenza enormi fejn huma jservu bix-xhieda tagħhom tas-Salvatur u l-Feddej tagħna, Ġesù Kristu.
Bħala Appostlu tal-Mulej Ġesù Kristu, jien nitlobkom biex isservu bħala missjunarji fil-ġabra ta’ Iżrael u forsi terġgħu sservu għal darb’oħra. Aħna għandna bżonnkom—aħna għandna bżonnkom. Aħna grati lejkom l-anzjani, għall-ħajja li għextu u tal-eżempju li dejjem tajtu fi djarkom, u fl-oqsma u l-utied tagħkom. Issa nistedinkom biex tieħdu l-għarfien tagħkom, flimkien mat-testimonjanzi li onorajtu tul ħajjitkom, u tmorru sservu missjoni. Nitlob biex meta jkun imissni biex inpoġġi bilqiegħda sabiex nassenja lill-koppji anzjani jkun hemm mijiet fostkom li tkunu qed tistennew b’ħerqa s-sejħa tagħkom.
Inwiegħed ukoll li hekk kif intom isservu intom tħossu l-imħabba tal-Mulej f’ħajjitkom, issiru tafuh, Hu jsir jafkom, u “kemm tkun kbira l-hena tagħkom.”29 Is-servizz iddedikat tagħkom lejn Ġesù Kristu jwassal biex jispira u jbierek lill-familja tagħkom, lin-neputijiet tagħkom, u lill-proneputijiet tagħkom. “Is-sliem, u l-imħabba joktru”30 f’ħajjithom fis-snin li ġejjin. Jien inwiegħed dan. F’isem Ġesù Kristu, ammen.