Toeni Luhlahp
Luti luhn Jisus Kraist
Toeni Luhlahp ke Eprel 2023


Luti luhn Jisus Kraist

Utuckuh nuh sesr ma suhmuhslah in kol moul lasr uh. Pweng luhk misenge uh nwacnwack ma ekahsr sulweyucklac ke kahs luhn Mwet Lahngo lasr—ma El fahk

Kuht luhlahlfongi ke Kraist. Ekihn mempucr ke Alu luhn Jisus Kraist luhn Mwet Luhlahlfongi ke Lwen-sahflah, kuht Ahkfuhlwactyacl ac ukwe luti Lal ke ma suhmuhslah.

Meet liki Puhtatlac sac, Pahpah tuhmasr Inkuhsrao El ngwetwacng na sramsram sel Adam ac Eve. In pacl sacn, Pahpah El ahkuhtweyac Wen Kuloh Sefana Nahtuhl, Jisus Kraist, in pa Mwet Lahngo ac Mwet in Molwelah lasr ac sapkihn nuh sesr in “lohngohl.”1 Ke inkacnek se inge kuht sifacna kuh in fahk muh ma suhmuhslah sihmlac ke fahk luhn “God” kuh “Leum” elos apkuhran in kahs luhn Jehovah, Leum moulyak lasr, Jisus Kraist.2

Utuckuh nuh sesr ma suhmuhslah in kol moul lasr uh. Ke mwet pahluh Nehpi luti nuh sesr, kuht enenuh in “mongo ke kahs luhn Kraist; tuh liye, kahs luhn Kraist fah fahk nuh suwos ma nuhkwewa ma kowos enenuh in oruh.”3 Inkaiyen ma suhmuhslah sruhmuhn luti lal Jisus fin facluh ahkuhtweyac ma El oruh. Pweng luhk misenge uh nwacnwack ma ekahsr sulweyucklac ke kahs luhn Mwet Lahngo lasr—ma El fahk. Kahs inge kahs sihmlac ke Wuhlweacng Sasuc (weacng pacna ma Joseph Smith el sang ah) ac ke Puk luhn Mormon. Inkaiyen ma sulweyucklac inge tahkihnyucklac suc ma Mwet Lahngo lasr el fahk.

“Nga fahk na pwaye nu sum; sie mwet el fin tia isusla ke kof ac Ngun, el koflana ilyak nu in Tokosrai lun God.”4

“Ac insewowo elos … nuhkwewa [suc] masrinsrwacl ac maluhkihn ma suwohswohs, tuh elos fah sesesslah ke Nguhn Muhtahl.”5

“Insewowo elos su akiwe mwet uh: Tuh pangpang elos tulik nutin God.”6

“Kowos long tuh fwack tari, Nik kom kosro:

“A inge nga fahk nu suwos: Kutena mwet suc ngetang nu sin sie mutan ac oasr nunak in kena lal nu sel, el orek kosro nu sel tari in nunak lun insial.”7

“Kowos lohng tuh fwack tari, Lungse mwet tulan lom, ac srunga mwet lokoalok lom.

“A inge nga fahk nu suwos: Lungse mwet lokoalok lowos, akinsewowoyalos su selngawi kowos, oru wo nu selos su srunga kom, ac pre kaclos su kalyei kowos;

“Tuh kowos fah ku in pangpang tulik nutin Papa tomowos su inkusrao. Tuh El oru kalmen faht lal uh in sreya mwet koluk ac mwet wo oana sie, ac El sang pac af nu fin mwet suwohs ac mwet sesuwos.”8

“Kowos fin nunak munas nu sin mwet su orekma koluk nu suwos, Papa tomowos su inkusrao El ac fah oayapa nunak munas nu suwos:

“A kowos fin tia nunak munas nuh sin mwet uh, na Papa tomowos El ac fah tiac pac nunak munas ke ma koluk ma kowos orala.”9

“Kowos funu ma lun facluh, na mwet faclu lukun lungse kowos oacna mwet lalos.Tusruktu kowos tia ma lun faclu mweyen nga sulekowosla liki faclu, pa pwanang mwet faclu srungakowos.”10

“A kowos in nunku meet ma nu ke Tokosrai lun God a ma lungse lal, na El ac fah asot ma inge nukewa nu suwos.”11

“Oru nu sin mwet saya ma kowos lungse elos in oru nu suwos; pa inge kalmen Ma Sap lal Moses ac mwe luti lun mwet palu.”12

“Kowos liyekowosyang liki mwet palu kikiap. Elos ac tuku nu yuruwos oana luman sheep, a nunak lalos oana luman wolf lemnak.

“Kowos ac akilenulos ke orekma lalos. Yac mwet uh kosrwacni grape uh ke puhlah, kuh fig uh ke mah fakfuhk?

“Soko sak wo fah oswe fahko wo, ac soko sak koluk el ac oswe fahko koluk.”13

“Tia mwet nukewa ma pangonyu Leum, Leum ac fah ilyak nu in Tokosrai lun kusrao, a elos na su oru ma lungse lun Papa tumuk inkusrao.”14

“Fahsru nu yuruk, kowos su orekma ac totola, tuh nga fah sot mongla nu suwos.

“Eis srenenu luk nu fowos ac lutlut sik, tuh nga fakpap ac inse pusisel; ac kowos fah konauk mongla.

“Tuh srenenu luk fisrasr, ac mwe utuk luk mulala.”15

“Kutena mwet fin lungse wiyu, el enenu in lafwekunul sifacna, srukak sakseng lal ac fahsr tukuk.

Ac ingena nuh sin mwet ma luhngse sruhkwack sahksin lal, enenuh elan lahfwekuhnlah ma fohkfohk nuhkewa lal, ma nuhkewa luhn facluh, ac karihngihn masap luhk.16

Ne ohinge, muhlkuhnlah facluh, ac molwelah moul lom; tuh ma suc wo nuh sin mwet uh, fin el sruokya kewa facluh nohfohn, ac tohlah moul lal sifacna? Kuh meac mwet se kuh in sang ahol nuh ke moul lal sifacna uh?17

“Kutena mwet su kena oru ma lungse lun God, el fah etu lah mwe luti luk ma sin God me ku ma sik sifacna.”18

“Ouinge nga fahk nu suwos: Siyuk, ac ac fah itukot nu suwos; suk, ac kowos fah konauk; towolak, ac ac fah ikakla nu suwos.

“Tuh elos nukewa su siyuk ac fah eis, ac el su suk el fah konauk, ac srungul ac fah ikakla nu sin kutena mwet su towolak.”19

“Oasr kutu pac sheep nutik su tia muta in kalkal se inge. Nga enenu in usalosme pac. Elos fah long pusrek, ac elos nukewa fah u sefannala, yurin mwet sheperd sefanna.”20

“Jesus el fahk nuh sel, “Nga pa akmoulyauk mwet uh liki misa nu ke moul. Kutena mwet su lulalfongi in nga fah moul, el finne misa:

“Ac kutena mwet su moul ac lulalfongiyu fah tiana misa.”21

“[Masap fuhlwact emeet ke masap uh pa:] Kom fah lungse Leum God lom ke insiom kewa, ke ngunum kewa, ac ke ku lom kewa.

“Pa inge ma sap se ma yohk oemeet ac yohk sripa oemeet.

“Ma sap se ahkluo yohk sripa oapana ma se meet an: ‘Kom fah lungse mwet tulan lom oana kom lungse kom sifacna.’

“Masap nuh kwewa lal Moses ac mwe luti nuh kwewa luhn mwet palu oan ye masap luo inge.”22

“Kutena mwet su lohng a liyaung ma sap luk, el lungse nga. Ac el su lungse nga, Papa tumuk El fah lungse pac el. Nga fah oayapa lungse el ac sifana fahkyuyak nu sel.”23

“Nga filiyac misla yuruwos. Misla luk sifacna pa nga asot. Nga tia asot oana ke faclu asot. Nikmet fuhlwelah insiom in fosrnga ku toasr, oayapa nikmet sangeng.”24

“Pa inge ma sap luk nu suwos: kowos in lungse sie sin sie, oana ke nga lungse kowos.”25

“Ngetma liye pouk ac niuk, ac liye lah nga pa inge. Kahlyuwi na kowos ac fa etu na pwaye, tuh inut uh wangin ikwa ac sri kac oana ke kowos lie keik uh.”26

“Ke ma inge kowos som nu yurin mwet in mutunfacl nukewa fin faclu, ac oru tuh elos in mwet tuhmuhk lutlut: baptaiselos ke Inen Papa, Wen, ac Ngun Mutal:

“Ac luti nu selos in akos ma nukewa nga sapkin nu suwos. Ac nga ac fah wi kowos pacl nukewa nwe ke safla faclu.”27

Tukun lutlut Lal ke acn Muhtahl, El sikyang nuh sin mwet suwohs ke muhtuhnfacl Macrike. Pa inge kuhtuh kahs ma El fahk ah:

“Liye, Nga pa Jisus Kraist Wen nuhtin God. Nga oraclah kuhsrao ac facluh, ac ma nuhkwewa ma oan loac. Nga tuh weluhl Pahpah e ke muhtwacwacackiyac ah. Nga oasr yurun Pahpah, ac Pahpah El oasr Yuruk; ac Keik Pahpah El kaksakihn Inel.”28

“Nga pa kahlwem ac moul luhn facluh. Nga pa Alpha ac Omega, muhtwacwacack ac sahflah.

“Ac kowos fah tiacna sifilpac orek kihsac nuh Sihk ke ahkkahkyelah luhn srah; ahok, mwe kihsac lowos ac mwe sang fihrihr lowos ac fah tilac orek, tuh Nga fah tiac eis kuhtwena sin mwe kihsac lowos ac mwe sang fihrihr lowos.

“Ac kowos fah sang ke sie mwe kihsac nuh Sihk ke inse muhsahl ac toasr in nguhn. Ac elos suc tuhkuh nuh yuruk ke inse muhsahl ac toasr in nguhn, elac fah pacptaislac sihk ke e ac ke Nguhn Muhtahl. …

“Liye, Nga tuhkuh nuh facluh in acse molwelah nuh facluh, in molwelah facluh liki ma koluk.”29

“Ac Nga sifilpac fahk nuh suwos, kowos enenuh in auliyak, ac pacptaislac ke Inek, ac eklac oacna sie tuhlihk srihsrihk, fin tiac kowos tiacna kuh in usrui tohkohsrahi luhn God.”30

“Ke ma inge Nga kena tuh kowos in suwohs finne in oacna Nga, kuh in oacna Pahpah tomowos suc oasr inkuhsrao El suwohs.”31

“Pwacyena, pwacyena, Nga fahk nuh suwos, kowos enenuh in karuhnguhnwacng ac pruhe pacl nuhkwewa, fin tiac kowos ac srihfeyuck sin devil, ac kowos kolyucklac srohoh sel.”32

“Ke ma inge kowos enenuh in pruhe pacl nuhkwewa nuh sin Pahpah ke Inek.”33

“Ke ma inge kuhtwena ma kowos fah oruh, kowos fah oruh ke Inek; ke ma inge kowos fah pahngon alu uh ke Inek; ac kowos fah pahngon Pahpah ke Inek tuh El fah ahkinsewowoye alu uh ke srihpuck.”34

“Liye Nga usot nuh suwos wosasuc Luhk, ac pa inge wosasuc ma Nga tuh usot nuh suwos—tuh Nga tuhkuh nuh facluh in oruh kena luhn Pahpah tuhmuhk, ke srihpen Pahpah tuhmuhk El suhpweyucme.

“Ac Pahpah tuhmuhk El suhpweyucme tuh Nga in kuh in srihpsrihpyak fin sahksin soko; ac tukun Nga srihpsrihpyak fin sahksin soko, tuh Nga kuh in kohlma mwet nuhkwewa nuh Yuruk … in nuhnuhnkweyuck ke orekma lalos, lah elos wo kuh elos koluk.”35

“Na pa inge masap: Auliyak, kowos nuhkwewa fin facluh, ac tuhkuh nuh Yuruk ac pacptaislac ke Inek, tuh kowos in kuh in ahknwacsnwacsyeyucklac ke eisyacn Nguhn Muhtahl, tuh kowos in kuh in tulac nwacsnwacs ye muhtuhk ke lwen sahflah.”36

Kuht luhlahlfongi ke Kraist. Nga ahksahfye ke ma El fahk muh kuht enenuh in etuh ac ukwe luti Lal:

“Nguhn Muhtahl, el fah tuhkuh ac kahsrwekowos, mweyen Pahpah El fah suhpwacma inek, el fah luti kowos ma nukewa, ac oru kowos in esamak ma nukewa ma Nga fahk tari nu suwos.”37

Nga fahkwack luhlahlfongi luhk ke ma pwacye inge ke ine muhtahl luhn Jisus Kraist, amen.