Sramsram Wowo Se Emet ke Istuh ma Sruhmuhnyuck Ne Misenge
Liye Puk luhn Mormon ke kahlwem sasuc se ac nuhnkuh ke mwe loh se kac inge ma fahkwack ke ma pwacye ke moulyak luhn Kraist.
Lwacta se sin Prestuhnsi Se Met ke Istuh
Oacna kom esam kom lohng sie lwacta sin Prestuhnsi Se Met ritiyuck ke ward kuh pracns lom an ke wik ekahsr somlah ah. Lwacta sac sulkackihn lah Sacnri fahsruh uh—Sacnri in Istuh—ward ac pracns nuhkwewa in toeni nuh ke kuhfa luhn Leum muhkwena, in sang pacl yohk in suculac alu lohm ah in ahkfuhlwactye holiday yohk srihpac se emet inge.1
Lwacta se sin Prestuhnsi Se Met inge pwacnlah muhtuhk, ac oruh ngan motko ke ohiyac ma sucu luhk uh ahkfuhlwactye Istuh ke lusen yac nuh ke yac. Ke nga sislah pacl yohk in motko ke ahkfuhlwact lasr uh, yohk ma nga sokwack ke nga nuhnkuh lah fin kuht tiac oruh in oacyac in srihkkihn kalmac pwacye luhn holiday se inge, suc ma arulacna yohk srihpac nuh sin mwet luhlahlfongi nuhkwewa ke Jisus Kraist.
Facsin ke Christmas ac Istuh
Nuhnak ingacn kolyuclac in motko ke akwelac inmahsrlon ohiyac ma kuht ahkfuhlwactye Christmas ac Istuh. Ke Christmas, ke kuhtuh ohiyac kuht sang mwe ahkpwacr nuh ke “Jingle Bells,” tahkihn ma ke Christmas, ac mwe sang oan tahklac, kuhtuh pac facsin motkoeyucklac wo—ma oacna karuhnguhnuhlos suc oasr enenuh la, onkackihn on kuht luhngse, ac ahok ikacslah ma sruhmuhslah ac riti sramsram ke Christmas ke Luke 2. Yac nuhkwewa ke kuht riti sramsram luhngseyuck se inge ke sie Bible mahtuh luhlahp se, sucu lasr uh oruh ma sahp sucu lom an oruh uh—nokomlah tahol fin sifacsr ac fin pihsacsr ac nukum nuknuk in tahol in luhmuh Joseph, Mary, ac mwet puhs suc tuhkuh in alu nuh sin ahwowo Jisus, kuht etahi oruh sramsram sacohk ke Christmas ke isuslac luhn Mwet Lahngo.
Tuhsruhk, ahkfuhlwact luhn sucu lasr ke Istuh uh siena kuhtuh. Nga puhlakihn muh sucu lasr uh fungyang yohk in “som wi alu” in use srihpac yohk luhn Istuh suc siiyac na Kraist; ac na, ekihn sie sucu, kuht toeni in akacsruhi ke kuhtuh pac facsin sahyac ke Istuh. Nga luhngse liye tuhlihk nahtuhsr ac ingena nuhtin nahtuhsr ke elos sukok ahtro in Istuh ac ilucs fohtoh in Istuh lalos an.
Tuhsruhk lwacta se sin Prestuhnsi Se Met inge el sie pahng in ahkacsmak. Elos tiac suli kuht nuhkwewa in ahkpwacyeye lah ahkfuhlwact lasr ke mukwikwi yohk srihpac se emet ma sikyak fin facluh—Iwaclah ac Sifil Moulyak luhn Jisus Kraist—weacng ohi ac ahkfuhlwact ma fal nuh sin Leum, elos oacyacpac use nuh sesr pacl yohk in wi sucu ac kawuck lasr ke Sacnri in Istuh in oruh ohinge.
Kahs lal Mwet Pahluh Joseph Smith use pac kahs in ahkkahlwemye yohk srihpaciyacn ma sikyak ke Istuh ma fahk muh ip yohk srihpac ke alu lasr uh pa mwe fahkwack luhlahlfongi luhn Mwet Sap ac Mwet Pahluh, ke Jisus Kraist, lah El misac, pihkihnyucki, ac sifilpac tuhkahkwek ke lwen ahktolu, ac sowack nuh inkuhsrao; ac ma sahyac nuhkwewa ma kuhpahsr nuh ke alu lasr uh ma na in weacng muhkwena.2
Nga ac Lesa sramsramkihn ohiyac ma sucu lasr uh kuh in oraclah wo likina ke pacl in Istuh se. Sahp kihsensiyuck se kuht siyuck sesr sifacna an pa ma se ma kuht nohfohn kuh in motko kac: Kuht ac etahi fuhkah luti ac ahkfuhlwactyeyacn Moulyak luhn Jisus Kraist, sramsram ke Istuh, in oacna sie, fohnlah, ac kahsruhp ke isuslac luhn Jisus Kraist, sramsram se ke Christmas?
Oacna in muh kuht nohfohn srihke. Nga akihlen kampare yohk inmahsrlon Mwet Luhlahlfongi ke Lwen-sahflah nuh ke Istuh ma siiyac na Kraist. Ma se inge weacng in nuhnkuh ac akihlen yohk ke Sacnri in Palm ac Good Friday [Fracte Wo] oacna ke kuhtuh sin mwet Kristin wiyacsr oruh. Sahp kuht kuh pac in etahi oruh facsin fal wo ma siiyac na Kraist ke pacl Istuh ma sukokyak ac orekmakihnyuck sin acn sahyac.
Mwet pihsrlac ke luti ke Wuhlweacng Sasuc N. T. Wright el fahk: “Kuht enenuh in ahkfahsrye in ahkfuhlwactye Istuh ke ohiyac sasuc: ke sroal, ma sihmlac, sritacl luhn tuhlihk, poem, on, tacn, facr, tahpweng, concert sacohk. … Pa inge facr yohk se emet lasr uh. Eislah Christmas, na ke kahs in Bible an ac wacngihnlac sap luo ke Matthew ac Luke, wacngihn ma sahyac. Eslah Istuh, ac wacngihnlac Wuclwacng Sasuc; wacngihnlac mwet Kristen pac.”3
Istuh, Bible, ac Puk luhn Mormon
Kuht seko Bible uh ke ma nuhkwewa el luti kuht ke isuslac, luti, Acnwucki, ac Sifil Moulyak luhn Jisus Kraist. Wacngihn kahs tolu oacna ma oracni finsrak ac mwacta ma pahtpaht nuh sin mwet nuhkwewa likina ma suc fwacklac sin lupufacn inkuhsrao ke lututacng in Istuh in Imac ke Kulyuck sac: “Akmoulyeyukyak el.”4 Kuht tarilacna yohk ke ma suhmuhslah ke Wuhlweacng Sasuc ma sefiyac na sramsram ke Istuh ac luti ke Istuh luhn Mwet Lahngo in acn Judea ac Galilee.
Ke nga ac Lesa fahfahlacna in motko ac suk inkacnek luhn sucu lasr uh in ahkyohkye ahkfuhlwactyeyacn Istuh in siiyac na Kraist, kuht sramsramkihn lah meac mwe rit kuht kuh ahkkahlwemye nuh sin sucu lasr uh—ke Luke 2 fal nuh Istuh, kom fin kuh.
Na kuht eis mwe kahlwem inkuhsrao me: In sang weacng fuhs yohk srihpac ke Istuh ke Wuhlweacng Sasuc, kuht Mwet Luhlahlfongi ke Lwen-sahflah uh eis tari mwe sang muhtahl wowo se emet ke Istuh! Sie mwe sang ke mwe loh wo, siepac wuhlweacng ke ma usrnguck sikyak ke Istuh ma nein, sahp, ma suhmuhslah yohk se emet ke Istuh ke alu Kristin nuhkwewa. Nga fahk nuh ke Puk luhn Mormon ac, yohk na, nuh ke sramsram se ke Jisus Kraist ke El sikyang nuh sin mwet muhta ke Facl Sasuc, ke wolacnaiyacn sifil moulyak Lal.
Mwet Pahluh Joseph Smith el ahkuhtweyac Puk luhn Mormon muh “puk se ma pwacye emet sin kuhtwena puk,”5 ac muhtwacwacack ke 3 Nephi 11, sruhmuhn ke sramsram na wowo se ke sifiwil moulyak luhn Kraist som muhtwacta yurin mwet Nephi, luti in Istuh luhn Mwet Lahngo. Ma suhmuhslah ke Istuh inge, fin wo sum, ahklohye Moulyak luhn Leum Jisus Kraist.
Ke sapta ekahsr inge, Kraist el pahngon mwet sap singucul luo, luti mwet nuhkwewa ma toeni yohkna ke ma El tuh luti ke Luti Lal Fin Ohl uh, fahkwack lah El ahkfalyelah masap lal Moses, ac palye ke orekeni luhn Israel ke lwen-sahflah. El onwelah mwet mas ac pruhe kacn mwet uh ke sie ohiyac wolacna pwacnwacng “wacngihn lohoh kuh in sramsram, tiac pac kuh in sihmihsyucklac sin kuhtwena mwet, insiacn mwet uh tiac pac kuh in nuhnkuh ma na yohk srihpac ac wolacna oacna ke kuht kwewa tuh liye ac lohng ke Jisus El sramsram; ac wacngihn sie mwet kuh in nuhnkuh ke engan ma nwacklah nguhnasr ke pacl se ma kuht lohng ke El pruhe kacsr nuh sin Pahpah.”6
Istuh se inge, sucu lasr uh ac lohacng nuh ke fuhs 17 emet ke 3 Nephi 11, suc kom etuh tari kac. Kom esam un mwet pucspucs suc raunelah tempuhl fin acn Puhs suc tuh lohng puhsrwen God Pahpah ac liyacl Jisus Kraist oactui liki inkuhsrao in tahfwema suliyuck wolacna se emet ke Istuh.
“Tuyak ac tuhkuh nuh Yuruk, … tuh kowos in kuh in puhla iken osra ke pouk ac niuck, tuh kowos in kuh in etuh lah Nga pa … God luhn facluh nohfohn, ac tuh acnwucki ke ma koluk luhn facluh.
“Ac … un mwet pucspucs sac som, … kais sie … ac tuh liye ke muhtahlos sifacna ac tuh puhla ke paholos, … ac tuh fahkwack, lah El pa, …
“Ac … elos tuh tuhkweni wowoyak pacl sefanna, fahk:
“Osanna! Insewowo inen God Fuhlwactlacna Emet! Ac elos tuh puhtati nuh ke niyacl Jisus, ac tuh alu nuh Sel.”7
Ngwetlah liye: mwet Nephi ke Fin Ohl ke Tempuhl ke [elos] tuh kahlyac poun Leum se ma moulyak ah! Kuht finsrak in oruh tuh sapta ke 3 Nephi in ip yohk se ke facsin in Istuh lasr oacna nuh ke Luke 2 ke facsin in Christmas lasr uh. In moul uh, Puk luhn Mormon ahkacsruhi ke sramsram wowo se emet ke Istuh ma sruhmuhnyuck ne misenge. Lwelah in tiac sramsram wowo se emet ke Istuh ma tiacna sruhmuhnyuck.
Tuhsruhk nga suli kom in ngwetwacng nuh ke Puk luhn Mormon ke kahlwem sasuc ac motko ke mwe loh yohk ke pwacyeiyacn ahkmoulyeyuckyak luhn Kraist ac oacyacpac wolacnaiyacn ac loaliyacn mwe luti luhn Kraist.
Puk luhn Mormon Fahkack ke Jisus Kraist
Kuht kuh in siyuck, Riti ma suhmuhslah lin Puk luhn Mormon ke pacl in Istuh ac ahkinsewowoye fuhkah moul lasr ac lalos suc kuht luhngse ke inkacnek wo? Puhs liki sie kuh in ahkilen. Oacna sie pacl kuht riti ac lutlut ke Puk luhn Mormon kuht kuh in tuhpan muh e oasr ma wo tuhkuh kac.
Ke pacl puh somlah, nga ac Lesa som wi mas se luhn kawuck sacohk se, sie muhtwacn luhlahlfongi suc moul la sa na itucklac ke mas. Kuht toeni nuh yurun sucu ac kawuck fototo lal, akacsruhi ke mwe acsmakihn pwacr ke nguhna kahto se suc tuh ahkwoye moul lasr uh.
Ke kuht tu loes kuhtuh liki pohk sac sramsram nuh sin mwet sahyac, nga liye tuhlihk muhtwacn srihsirhk luo, matwac ma wi U luhn Tuhlihk Srihsrihk, elos fahsryak nuh ke pohk sac ac tu mayak ke kihfin niyaclos—muhtahlos sun acn lucng ke siskac ah—in wihlkacslac pacl sahflah nuh sin ninac se wiyacn ninac kiyaclos kuh pahpah tuhmwaclos. Wacngin mwet siskaclos, Lesa el som ac puhtati siskaclos in ahkkweyelos ac lotwelos. El siyuck lah elos fuhkah ac elos fin etuh lah ninac se wiyacn ninac kiyaclos kuh pahpah tuhmwaclos ah oasr oyac ingena. Elos akacsruhi ke ahsor lalos, tuhsruhk tuhlihk muhtwacn sacohk nuhtin God inge, ke luhlahlfongi tohlwack muhtahlos, elos fahk muh elos etuh muh ninac sac engan ingena ac el kuh oasr yohrohl Jisus.
Ke matwac kuhlwacng se inge, elos sokwack mislac ke plwacn in engan ac, ke ohiyacn matwacn tuhlihk lalos sifacna, elos fahkwack ke pwacyeiyacn ac kahtoiyacn Sifil Moulyak luhn Mwet Lahngo. Elos etuh ma se inge ke insiaclos ke srihpen lutiyuck wo luhn ninac pahpah, sucu, ac mwet kol ke U luhn Tuhlihk Srihsrihk suc ukwiyac sie fihtac in luhlahlfongi ke Jisus Kraist ac ke moul ma pahtpaht. Lahlmwetmwet liki matwaclos, ma pwacye puhs ma tuhlihk muhtwacn srihsrihk inge kahlwem kac tuhkuh nuh sesr ke pweng ke Istuh ac luti luhn Mwet Lahngo moulyak ac ke kahs luhn mwet pahluh oacna ke sruhmuhnyuck ke Puk luhn Mormon.
Nga liye ke Prestuhn Russell M. Nelson elac sang sie mwe sang ke Puk luhn Mormon nuh sin sie mwet ma tiac wi luhlahlfongi lasr uh, weacng mwet kol fin facluh, el kwacna ikacslah nuh ke 3 Nephi ac riti ke sikyak luhn Kraist suc sifil moulyak nuh sin mwet Nephi. Ke el oruh ohinge, mwet pahluh moul el ahkloh ke Kraist suc moul.
Kuht tiac kuh in tu oa mwet loh luhn Jisus Kraist ne ke na kuht kuh in fahkwack in loh Kacl. Puk luhn Mormon pa siepac wuhlweacng ke Jisus Kraist ke srihpen ke sra puk muhtahl kac an, sie mwet pahluh tukun sie pac elos tiac fahkwack muhkwena lah Kraist El ac tuhkuh, tuhsruhk oacyacpac lah El tuhkuh tari.
Ke Srihpacl
Nga sruok in pouk sie copy ke fihl se emet ke Puk luhn Mormon. Kwacna mokleyuc ke nga oruh uh. Inkaiyacn moul matwac mahtuh luhk, nga ke etuh, ac fwefwelac ke ma Joseph Smith fuhsr el tuh oruh in eis puk muhtahl ke ma suhmuhslah inge in luhngaslah ac oraclah nuh ke puk. Ma usrnguck ma tuh sikyak ah arulacna ahklut in nuhnkuh.
Tuhsruhk tiac pa oruh puk se inge mokleyuc uh. Ma ke srihpen puk se inge, yohk liki kuhtwena puk sahyac ma oreklac fin facluh, fahkwack ahkloh ke moul, kunohkohn, luti, Iwaclah, ac Moulyak luhn Jisus Kraist. Tamuhlwel ac tahmtahel sacohk wiyuck, lutlut pacl nuhkwewa ke puk se inge ke Jisus Kraist e fah ekuhllah moul lom an. E fah ikacslah motom nuh ke inkacnek sasuc ke moul lom an. E fah ahkyohkye finsrak lom ac nwekkomlac ke luhngse pwacye. Yohk liki na, e fah muhsaheack ac ahkfokokoye luhlahlfongi lom ke Jisus Kraist ac ahkinsewowoye kom, kom ac etuh na pwacye lah El ac Pahpah tuhmasr etwe kom, luhngse kom, ac kena kom in sokwack inkacnek kom in fohlohk nuh lohm ah, ke capital L.
Tamuhlwel ac tahmtahel sacohk wiyuck, pacl uh tuhkuh, sruhmuhnyuck sin mwet pahluh omeet ah, “ke etwacack luhn Mwet Lahngo fah fahsrelihk nuh ke muhtuhn facl, un mwet, puhsra, ac mwet nuhkwewa.”8 Kuht liye fohnlahiyacn pahluh se inge ye muhtahsr, yurin mwet loh luhn Jisus Kraist ma oasr lin Puk luhn Mormon.
Wacngihn kuhtwena puk oruh yohk liki na in ahkklahlwemye lah:
-
Ke srihpen Jisus Kraist, ma nuhkwewa eklac.
-
Ke Srihpacl, ma nuhkwewa wolac.
-
Ke Srihpacl, moul uh kuh in karihngihnyuck—yohkna ke pacl kweok an.
-
Ke Srihpacl, ma nuhkwewa kuh in oreklac.
Som Lal oa Mwet Lahngo sifil moulyak, sulkackihnyuck sin God Pahpah, pa sie pweng wolacna emet ac kuhtanglah ke Istuh. E fah kahsruh mwet ke sucu lasr sifacna in eis mwe fahkwack ke luhlahlfongi lalos sifacna ke Jisus Kraist oa Mwet Lahngo ac Mwet in Molwelah lasr, suc kuhnahoslah mwe kapihr luhn misac.
Nga kaliyac mwe fahkwack ke luhlahlfongi luhk ke pwacyeiyacn Puk luhn Mormon ac ke Jisus Kraist oa Wen nuhtin God moul. Ke inen Jisus Kraist, amen.