Luti
Lah kuht oasr oyac, lwelah kuht in soklah ac karihngihn oacna ke Mwet Lahngo El oruh, yohk na nuh selos suc utuckuh kuht in luhngse ac kuhlwacnsuhpuh.
Tamuhlwel ac tahmtahel sacohk wiyuck, paing kowos nuh ke toeni luhlahp uh!
Tukun toeni luhlahp se ke Ohktohpa tari ah, nga ac tahmtahel Gong fahsr ke Acn in Toeni uh in fahk hello ac lohng puhla lowos ke wosasuc.
Mempucrs wiacsr Mexico fahk, “Hoy es el tiempo de Mexico.”
Kuht etwacack lah Gilly ac Mary kawuck Englacn se. Ke Mary el welah Alu uh, wacngihnlac acn in muhta lal. Gilly el engan in solwacl Mary elan tuhkuh weluhl muhta. Sesseslah ke luhlahlfongi, Gilly el fahk, “Nga tiac wihnna tahfuh luo lah Leum El wiyuc.” Ke toeni ah, Gilly el engan in sifwil ohsun nuh sin tahmtahel se ma lotwel ke yac 47 somlah.
Jeff ac muhtwacn kiacl, Melissa, wi toeni luhlahp se inge ac pacl se emmet lal Jeff. Jeff el mwet suhmaht se ke yakyu (el mwet in sasuc se) ac el ingena mwet in karihngihn mwet laslas. El fahk nuh sihk, “Mwe lut yohk se nuh sihk, nga apkuhran nuh ke pacptais ke srihpen nga puhla ma pwaye emet ac suwohs in moulkihn.”
Meet liki na, Melissa el taltal nuh sin tamuhlwel se srihsrngiyucki in lotwel Jeff ah, “Jeff el sruhnga ‘wes fasrfasr’ lin lohm sesr uh” Tamuhlwel se ma luti ah fahk, “Ngac suk sie inkacnek ah” Ingena el ac Jeff kawuck wowo. Ke pacptais lal Jeff ah, nga ohsun nuh sin sie u luhn mwet luhlahlfongi ke Lwen-sahflah suc pa Jeff, Melissa, ac tuhlihk muhtwacn se nahtuhlos, Charlotte, luhngse.
Ekihn mwet fahsr tukun Jisus Kraist, kuht suk in kuhlwacnsuhpuh mwet sahyac oacna ke El oruh ke srihpen moul uh tuhpan in eklac.
Ke Peggy el fahk nuh sihk lah mukul tuhmwacl, John, tukun eltahl pahyuck yac 31 elac pacptaislac nga siuck lah meac sikyak?
Peggy el fahk, “nga ac John lutlut ke Wuleang Sasuc Fahsruh, Fahsr Tukuk, ac John el kihsensiyuck ke mwe luti ke Alu uh.”
Peggy el fahk, “Lwelah kuht in suli misineris ah.”
John el fahk, “Wangihn misineri—nekena kawuck se luhk ah kuh in tuhkuh.” Ahluhkwelah yac10, tamuhlwel se ma lotwel John ah eklac kawuck na fokoko se lal. (Nga nuhnkuh lah, meac fin tamuhlwel se lotwel John inge tui tilac fahsr tukun pacl se, luo, kuh yac yuc?)
John el lihpsre. El riti Puk luhn Mormon ke insiacl. Ke misineri ah siyuck sel elan pacptaislac, el fahk ahok. Peggy el fahk “Nga puhtatlac liki siah luhk ah ac muhtacwacack tuhng.”
John el fahk, “Nga eklac ke nga fototoi nuh sin Leum uh.” Tohkohyang, John ac Peggy siliyucki lun tempuhl muhtahl. Tisacmpuh yac tari ah, John el eis monglac lal ke el yac 92. Peggy el fahk, “John el mwet na wowo se, tuhsruhk el eklac ke ohiyac na kahto se tukun el pacptaislac ah.”
Nga ac tahmtahel Gong ohsun nuh sel Meb ac Jenny ke video ah ke pacl se ma upac COVID ah. (Kuht ohsun nuh sin siyacnyacn wowo puhs ac kais sie ke video ke pacl se ma COVID ah, suc mwet inge ahkuhtweyucki nuh sesr yurin stek prestuhn lalos.)
Meb ac Jenny sruhmuhn lah elyah ke moul lalos sang elos in nuhnkuhn lah macruht lalos tempuhl uh wona kuh in saved, ac fin kuh, e fuhkah. Elos luhlahlfongi Iwaclah luhn Jisus Kraist ac olwelah elos oraclah kuh in kahsrelos.
Petsac elah engan luhk ke Meb ac Jenny eis pwepuh in lwelah sasuc lalos nuh tempuhl ac tuhkweni fohlohk nuh in lohm sin Leum. Tok Meb el luhkuhn misac. Fuhkah luhpan mwe insewowo se Meb ac Jenny fohlohkohnwack inmahsrlolos nuh sin Leum ac nuh sin sie sin sie, ac puhlakihn luhngse luhn mwet kuhlwacnsap raunweloslac.
Yen nuhkewa nga som nuh we, nga kaksak ke ma nga lotwelah yohrohlos suc kuhlwacnsap ac luhngse oacna Mwet Lahngo El oruh.
Fin acn Peru, nga ac tahmtahel Gong ohsun nuh sel Salvador ac tuhlihk wiyacl.1 Wacngihn sucu lal Salvador ac tuhlihk wiyacl inge. Lwen lal Salvador. Mwet kol ke Alu uh ac mempucrs ma fahsr kuhlwacnsuhpuh sucu se inge moklweyucyak. “Alu pwaye ac nwacsnwacs … pa inge, In karihngihn tuhlihk muhkahimtacl ac katinmas,”3 “ahkmuhlahlahye elos suc muhnahs, sruhkwack nuh lucng paho ma ahtlah nuh ten, … ahkkweye muhnahs luhn intwe.”4
Fin acn Hong Kong, prestuhn se ke u luhn elders fahk kahlwem lah u lalos inge tahkuhnlah na ahkfahsrye lohlngohk ke luti inge persacn 100 siofok. “Kuht pruhe in etuh in oraclah kampacniacnsip tuh met nuhkwewa in kuh in karihngihn met se ac karihngihnyuck pac elos,” el fahk “Kuht siyuck pacl nuhkewa sin kais sie kampacniacn inge ke mwet ma elos luti. Kuht tiac mahki pohk;, kuht kuhlwacnsuhpuh mwet luti ma luhngse karihngihn mwet lasr.”
Fin acn Kinshasa, Democratic Republic luhn acn Congo, Prestuhn Bokolo el sruhmuhn lah fuhkah tuh el ac sucu lal uh welah Alu fin acn France. Sie lwen ah, ke el riti mwe insewowo lal ke patriarch ah, Nguhn moklwe insiacl Tamuhlwel Bokolo elan fohlohk wi sucu lal ah nuh DR Congo. Tamuhlwel Bokolo el etuh lah elos e sun elyah na puhkantwen elos fin fohlohk. Ac Alu lalos, Alu luhn Jisus Kraist luhn Mwet Luhlahlfongi ke Lwen-sahflah sona akwucki fin acn Kinshasa.
Ne ohinge, ke luhlahlfongi, oacna inkaiyen mwet puhs, sucu Bokolo elos ukwe Nguhn luhn Leum. Fin acn Kinshasa, elos luti ac ahkinsewowoyaclos suc weluhlos, kuhtanglah ma upac, eis mwe insewowo ke nguhn ac mahno. Misenge, elos enganwack lah asr lohm sin Leum ke muhtuhnfacl selos.4
Mwet eklac se lutlut kihn ohiyac luhn sie mwet. Ke el mukul fuhsr, el sislah pacl lal in muhta lihkihnpot ah. Sie lwen ah, el fahk, “Nga liacackk tuhlihk muhtwacn na kahto se nukum nuknuk in yihyih na wowo se.” Lut, el fahlac siyuck lah efuh tuhlihk muhtwacn kahto se inge nukum nuknuk wowo se inge yihyih. Muhtwacn se inge mempucr ke Alu luhn Jisus Kraist luhn Mwet Luhlahlfongi ke Lwen-sahflah ac isracsr na siyuck, “Kom luhngse tuhkuh wi alu ke Sacnri?” El fahk ahok.
Yac puhs somlah, ke kunweyucki kuht in tuhkweni ah, Elder L. Tom Perry el akacsruhi ke el ac kampacniacn se lal inge kwacna luti tahmtahel se suc muhkwena muhta ke acn na tikuclkucl se Boston. Ke Elder Perry ac kampacniacn lal ai, tahmtahel sac elyah eluhltahl ange “Isohngma pwepuh in lwelah lowos nuh tempuhl an ye sruhnguhl an.” In srruhluhkihn tukun el liye pwepuh in lwelah nuh tempuhl na fah el ikacslah kain in lwak ac ikacslah sruhnguhl ah.5 Ahok pwacye, nga tiac fahk muh mwet forfor luti uh enenuh pwepuh in lwelah nuh tempuhl. Tuhsruhk nga luhngse nuhnak luhn elos suc ahkfuhlwactye olweacng ke kuhlwacnsap, ikacklah lohm ac ikacklah insiac.
Elder Perry el oacyacpac oraclah kahs in kahsruh na wowo. El fahk, “Sang nuh sin mwet forfor luti ingacn kunohkohn ekahsr, pruhe in sulwaclah, liye in wo acn ma wo fal in orekmakihnyuck in wo pacl in forfor uh.” Elac fahk, “Muhtacwacack meet yurin elos suc enenuh muhtwacta. Muhsahikom yurin elos suc paing kom ac topuk wo ke pacl in muhtwacta.” El tahfwelah in fahk, “Inswacneang ke luhlahlfongi use ma usrnguck.”
Luti fuhlwact ac muhtahl6 tuhkuh ke kuht pruhe ke “luhngse suwohs luhn Kraist”7 ac fahsr tukun Nguhn. El oacyacpac tuhkuh ekihn prestuhnsi ke u luhn elders ac Rilif Sosaiti, ye kohkoh lal pisrap, liye orekma ke luti, suc pa nuh ke kunweyac mwet in forfor luti. Nuhnak muhnahs sang nuh sin mukul fuhsr ac muhtwacn fuhsr inkacnek inge in weluhlos ac lotwelos yurin tamuhlwel ac tahmtahel forfor luti inge. Ac nuhnak muhnahs lwelah fihl se nahtuhsr mahtuhlah inge in moklwe tuhkweni luhn tamuhlwel ac tahmtahel forfor luti inge.
Ke kuhtuh acn sahyac ke Alu uh, oasr tui se ke luti uh. Kuh pac in fahk muh elos luti na in lutiyuck elos. Kuht sruhnga elyah in checki. Tuh kuhtuh pacl uh kuht enenuh hello se ke acn in fahsr ah kuh fahk kain “Nga kuh in kahsrekom?” ke acn in park stosah. Ke acn puhkantwen, kuht kuh in kohlah pahosr, etuh mwet sahyac ke ataclos, ac muhsahi akohnohki lasr ke kuht fahsri na mempucrs inge muhtwacta lohm selos. Nguhsr moklweyuck uh ekuhlah moul. Fin nguhsr uh kahsrekuht oraclah ac karihngihn olwelah muhtahl, kuht fototoeni nuh sin Leum ac nuh sin sie sin sie.
Fwack muh elos suc kahlwem ke nguhn pwacye luhn kuhlwacnsap uh oruh yohk liki meet ah, ac elos suc ma tiac kahlwem kac uh oruh srihk. Kuht oruh in yohk, oacna ke Mwet Lahngo El oruh. Oacna ke on in alu lasr uh fahk, el “mwe sang ke orekma ac luhngse.”8
Council ke ward, u luhn elders ac Rilif Sosaiti, nuhnak muhnahs lohng Mwet Sheperd Wo ac kahsrel “suk su tuhlac, … folokunulosme su fahla liki, … pwelah kinet kaclos, … akkeyalosla suc mas.”9 Kuht kuh in ahkpwacr “tia etu lah lipufan”10 ke kuht oruh in oasr infuckihl lin lohm Sel nuh sin nuhkewa.11
Luti moklweyuck uh ahkinsewowoye sucu ac kais sie; oacyacpac ahkkweye ward ac pracn. Nuhnkuh ke ward ac pracn lom an muh acn luhn nguhn. Ke nguhn ke Puk luhn Mormon sruhmuhn puhpuhlyuck se ke sahk olive soko, Leum luhn imac sac ac mwet kuhlwacnsap Lal oraclah fahko wowo ac ahkfokokoye kais sie sahk ke elos kapriyac ma fokoko ac ma muhnahs ke sahk ingacn nohfohn.12 Leum luhn Imac sac ac mwet kuhlwacnsap Lal kwacna siyuck, “Meac Nga kuh in oruh pac?”13 Elos, tuhkweni ahkinsewowoye insiac ac lohm, wards, ac pracns, ke luti moklweyuck wacngihn tui la.14
Luti—muhtwacta karihngihn mwet—oruh imac lasr uh in “ma sefanna”15—inimac muhtahl se. Kais sie sahk ke ke inimac se inge el sahk moul ke sucu se. Okah ac lah kac uh tuhkweni nuh sie. Kuhlwacnsap el ahkinsewowoye fihl nuh ke fihl. Ke enenweyuck kuhlwacnsap uh, pisrap lahlmwetmwet se, u luhn elders, ac prestuhnsi ke Rilif Sosaiti siyuck, “Suc companion forfor luti uh?” Ward council ac kihsensiyuck ke kuhlwacnsap inge tiac siyuck muhkwena ma upac kuh elyah tuhsruhk ngwetacng pac liye ke muhta ac engankihn luhngse kawihl puhkantwen luhn Leum ke moul lasr ke kuht kuhlwacnsap oacna El oruh.
Mwet Lahngo lasr uh oraclah srikasrak na wowo se nuh sesr.16 Ke srihpen El wo, El tuh forfor in acn nukewa ac oru ma wo.17 El ahkinsewowoyelah mwet se ac mwet 99. El oraclah atacn mwet in kuhlwacnsap se. Kuht kuh in oacna Jisus Kraist ke kuht oruh “nuh sin … sie suc srik liki nukewa” oacna ke kuht oruh nuh Sel,18 ke kuht luhngse mwet tuhlan lasr oacna kuht sifacna,19 ke kuht “luhngse sie sin sie; oacna ke Nga luhngse kowos,”20 ac fin “sie suwos fulat inmahsrlowos,el enenu in mwet kulansap lowos.”21
Jisus Kraist El luti. Lipufacn luti.22 Mwet fahsr tukun Kraist “kuhlwacnsuhpuh sie sin sie,”23 “engan yorolos su tung, ac tung yorolos su tung,”24 “liyacacng [ac] … kihtaclos [mwet] ke ma suc suwohswohs,”25 esam … mwet suhkahsruhp ac mwet enenuh, mwet mas ac mwet kihnet,”26 lwelah Inel in etweyuck ke kuhlwacnsap nuhkewa.27 Ke kuht kuhlwacnsap oacna El oruh, kuht liye mwe insewowo Lal ac ma usrnguck Lal.28 Kuht sruokyac “kunohkohn yohk srihpac se.”29
Pwacye lah kuht e ulac. Tuhsruhk ke kuht kuhlwacnsap Kacl kuht tiac“totola in oru ma wo.”30 Kuht ahkwot sang kuhiyacsr, tiac kahsruhsr muhi liki na kuhiyacsr,31 tuhsruhk luhlahlfongi, oacna ke Mwet Sap Paul el luti, lah “God el luhngse el suc insewowo in sang.”32 Tuh God “su asang fita nu sin mwet yukwiya, ac mwe mongo nu sin mwet uh, ac akkapye fita inge.”33 Ke fahk sahyac, God El ahkahsruhpye “ma nuhkewa in ouiya nuhkewa.”34 Elos “su yukwiyac fita pus fah kosrani ma pus.”35
Lah kuht oasr oyac ke pacl luhn Easter, lwelah kuht in soklah ac karihngihn oacna ke Mwet Lahngo El oruh, yohk na nuh selos suc utuckuh kuht in luhngse ac kuhlwacnsuhpuh. Ke oruh ohinge, kuht e fototoi nuh Sel Jisus Kraist ac sie sin sie, eklac oacna El ac mwet ukwe luhn Jisus Kraist ma El luhngse uh. Ke ine muhtahl Lal, Jisus Kraist, amen.