Konwacack Mislac Sifacna
Nga pruhe tuh kowos in konwacack mislac, kahsruh mwet sahyac konwacack, ac oruh mislac in yohkwelihk.
Tamuhlwel ac tahmtahel sacohk wiyuck, kuht tuh ahkinsewowoyeyuck ke mwe luti mokleyuck ac on kahto ma ahkwoye kuht ke toeni in ikacslah luhn toeni luhlahp se inge. Kuht kuloh nuh suwos ke oasr lowos in wi ac ke luhlahlfongi lowos.
Mihsenge nga ac sramsram ke ma nga etwaclah ke ma usrnguck in sokwack mihslac sifacna, ke oacna sie ma sikyak nuh sesr. Mwet Lahngo El etuh tuh tuhlihk nuhkwewa nuhtin Pahpah Inkuhsrao suk mihslac, ac El fahk tuh El kuh in use nuh sesr. Kom esam kahs luhn Jisus Kraist sihmlac ke puk luhn John: “Nga filiyac misla yuruwos. Misla luk sifacna pa nga asot. Nga tia asot oana ke faclu asot. Nikmet fuhlwelah insiom in fosrnga ku toasr, oayapa nikmet sangeng.”1
Kalmacn mislac Lal ac ohiyac El kuh in use ahkkahlwemyeyuck ke moul luhn elos suc porongel fahk kahs ingacn. Lohng sramsram sel John ke sahflahiyacn kuhlwacnsap luhn Kraist fin facluh. Ma ahkfohs koluk srihke in tuhkuh nuh Yohrohl kuhnaosuhllah ac tiac paht nuh sin mwet tuhma lutlut Lal.
Pa inge kahs luhn Mwet Lahngo:
“Kowos fin luhngse nga, kowos ac ahkos masap luhk.
“Nga fah siyuk sel Papa, ac el ac fah sot Ngun Mutal nu suwos, su ac fah kasrekowos ac muta yuruwos nwe tok.
“El pa Ngun su akkalemye na pwaye ke God. Faclu koflana eisal, mweyen faclu koflana liyal ku etal. Tusruktu kowos etal, mweyen el mutana yuruwos ac el oasr in kowos.
“Nga fah tia filikowosi mwet mukaimtal. Nga fah foloko nu yuruwos.
“In kitin pacl na faclu fah tia sifil liyeyu, tusruktu kowos ac liyeyu; ac ke sripen nga moul, kowos fah oayapa moul.
“In len sac, kowos fah etu tuh nga oasr in Papa ac kowos oasr in nga, oana ke nga oasr in kowos uh.
“Kutena mwet su lohng ac liyaung ma sap luk, el lungse nga. Ac el su lungse nga, Papa tumuk El fah lungse pac el. Nga fah oayapa lungse el ac sifacna fahkyuyak nu sel.
“Judas el fahk nuh sel, tia Judas Iscariot el fahk, Leum, ac fuka kom in fahkkomyak nu sesr, a tia nu sin faclu?
“Jesus el topuk nu sel, El su lungse nga fah akos kas luk. Papa tumuk fah lungse el, na nga ac Papa tumuk fah tuku nu yorol ac muta yorol.
“El su tia lungse nga el tia akos kas luk. Ac kas ma kowos lohng sik tia ma luk sifacna, a ma sin Papa, su supweyume.
“Nga fahkot ma inge nu suwos ke nga srakna oasr yuruwos.
“Ngun Mutal el fah tuku ac kasrekowos, mweyen Papa El fah supwama inek, el fah luti kowos ma nukewa, ac oru kowos in esamak ma nukewa ma nga fahk tari nu suwos.
“Nga filiyac misla yuruwos. Misla luk sifacna pa nga asot. Nga tia asot oana ke faclu asot. Nikmet fosrnga ku toasr, oayapa nikmet sangeng.”2
Nga etwaclah ma limekohsr ke luti se luhn Mwet Lahngo ngacn.
Ma se met, mwe sang luhn mihslac tuhkuh tukun kuht luhlahlfongi in karihngihn masap Lal. Nuh selos suc mempucr ke wuhlweacng luhn Alu luhn Leum, ahkostwen pa ma kuht olwelah in oruh.
Ahkluo, Nguhn Muhtahl ac tuhkuh ac muhta yohrohsr. Leum El fahk tuh, ke kuht fahsr kampare ke luhlahlfongi lasr, Nguhn Muhtahl ac muhta yohrohsr. Pa inge olwelah ke pruhe in sackruhmacn tuh Nguhn in kawuck lasr ac tuh kuht in puhla, ke insiacsr ac nuhnak lasr, mihslac Lal.
Ahktolu, Mwet Lahngo El olwelah tuh ke kuht karihngihn olwelah lasr, kuht kuh in puhla luhngse luhn Pahpah ac Wen nuh sie sin sie ac nuh sesr. Kuht kuh in puhla fototo nuh Selos ke moul facluh lasr, oacna ke kuht ac ahkinsewowoyeyucklac in oasr Yohrohlos ne tohk ma pahtpaht.
Ahkahkosr, karihngihnyacn masap luhn Leum enenuh yohk liki ahkostwen na. Kuht in luhngse God ke insiacsr, kuhiyacsr, nuhnak, ac nguhn lasr kwewa.3
Elos suc tiac luhngse El tiac karihngihn masap Lal. Ac na elos ac tiac eis mwe sang luhn mihslac ke moul se inge ac ke facluh ma e tuhkuh.
Ahklimekohsr, kahlwem lah Leum El luhngse kuht in molwelah molin ma koluk lasr tuh kuht in—ke luhlahlfongi lasr Kacl ac auliyak lasr, orekmakihn Iwaclah Lal—eis mwe sang luhn mihslac ma “ahluhkwelah kahlwem nuhkwewa,”4 ke moul se inge ac nuh Sel ne tohk ma pahtpaht.
Kuhtuh suwos, sahp puhs suwos, tiac puhla mihslac ma Leum el olwelah. Sahp kom pruhe ke mihslac sifacna ac ahkkweyeyuck luhn nguhn. Tuh kom puhla tuh inkuhsrao tiac lohng siyuck lom.
Oasr mwet lokoalok se nuh ke nguhnum suc tiac kena kom, ac elos suc kom luhngse, in konwacack mihslac. El koflahna puhla sifacna. El orekma in kosrekomlac in finne kena konwacack mihslac ma Mwet Lahngo ac Pahpah tuhmasr Inkuhsrao kena kom in eis.
Orekma lal Satan in ahkyohkye sruhnga ac fohs ma raunikuhtlac luhman yohkwelihk. Kuht liye mwe loh ke ma inge inmahsrlon muhtuhn facl ac siti, ke mura, ke electronic media, fin facluh nohfohn.
Tuh oasr srihpac in engan: pa Kahlwem luhn Kraist ituckyang nuh in tuhlihk isuslac nuhkwewa. Ke mwe sang ma tuhkuh nuh sin mwet nuhkwewa sacn elos etuh ma wo liki ma koluk, kena in luhngse ac luhngseyuck. Oasr etwacack se ke ma suwohs ac ma pwacye ke tuhlihk nuhkwewa nuhtin God ke elos tuhkuh nuh ke moul se inge.
Finsrak lasr ke mihslac sifacna nuh sin tuhlihk ingacn oasr selos suc karuhnguhnuhlos. Fin mwet suc tuhfahllos ac kuhlwacnsuhpwaclos orekma in eis mwe sang luhn mihslac sin Mwet Lahngo, elos fah, ke srihkasrak ac mukwikwi lalos sifacna, ahkweye luhlahlfongi luhn tuhlihk in ahkfalye nuh ke mwe sang wolacna luhn mihslac.
Pa inge ma suhmuhslah uh olwelah: “Luti nu sin sie tulik inkanek fal elan fahsr kac, na ke el matula el fah tia fahsr liki.”5 Enenweyuck mwet se ma karihngihn ac tuhfahlah tuhlihk se inge in moul suwohs nuh ke nuh ke mwe sang luhn mihslac.
Ke ahsor, kuht nuhkwewa puhla ngal fin tuhlihk ma tuhflah yurin pahpah ninac wowo—kuhtuh pacl uh pahpah se muhkena kuh ninac se muhkena—sulaclah, tukun moulkihn moul in luhlahlfongi ac mihs ke pacl na loes se, in fahsr ke inkacnek in suhpwacr.
Finne ke ma suhpwacr sacn sikyak, finsrak luhk oasr ke siepac mwe sang luhn Leum. Pa ma se inge; lah El tuhfahlah pac mwet ahkiwe puhs inmahsrlon mwet tuhma lutlut Lal. Elos tuh puhla mihslac ac luhngse luhn God. Elos tuh puhla Nguhn Muhtahl insiaclos, ac Leum El kuh in kohlohlos in saplakyang nuh sin sip suc tuhlac.
Nga liye ke moul luhk ac fin facluh nohfohn. Kom oacyacpac liye. Oasr pacl, ke kom kolyucklac in moliyucklac, kom e liye muh accident se.
Sie pacl ah, nga siyuck sin mwet sac se nga ohsun se ke fuhfahsryucsr luhk, “Kuh kom kuh in sruhmuhn kuhtesrihk ke sucu lom an?” Sramsram se penyuclac in siyuck in liye petsac se luhn muhtwacn mahtuh nahtuhl, suc el fahk lah oasr elyah lal. Nga lut ke liye wolacnaiyacn muhtuhn tuhlihk muhtwacn se ke petsac sac. Pihrihkyuck inisiyuck in ngihsre email address lal ah. Tuhlihk muhtwacn se ingacn ke pacl sacn el tuhlac ac suk lah oasr pweng sin God nuh sel. Oasr. Pa inge: “Leum El luhngse kom. El tuh luhngse kom pacl nuhkwewa. Leum El kena kom in fohlohk. Mwe insewowo uliyuck lom srwackna oasr nuh sum.”
Mempucr ke Alu uh yen nuhkwewa tuh puhla mwe sang in mihslac sifacna sin Leum. El kwacfe mwet nuhkwewa in kahsruh mwet sahyac konwacack pacl in tuhkuh nuh Yohrohl ac eis mihslac se pacna nuh selos sifacna. Na, ke pacl lalos, elos ac sulaclah in suk fwackyuck tuh elos kuh in etwaclah fuhkah in tahfwelah mwe sang sacn nuh sin mwet sahyac.
Fihl tuhkuh inge fah ekihn mwet in kahsruh fihl ma ac tuhkuh. Yohkwelihk se inge fah oraclah ma usrnguck se. El fah yohkwelihk ac kapkapwack ke pacl, ac tohkohsrahi luhn Leum fin facluh fah ahkolah in ohsun nuh Sel ke sa luhn osana. Mihslac fah tuhkuh nuh facluh.
Nga fahk loh pwacye luhk lah Mwet Lahngo El moul ac El kol Alu se inge. Nga tuh puhla luhngse Lal ke moul luhk ac luhngse Lal ac lah El karihngihn tuhlihk nuhtin Pahpah Inkuhsrao. Nguhsr luhn Mwet Lahngo in tuhkuh nuh Yohrohl el mwe sang in mislac se.
Prestuhn Russell M. Nelson el pa mwet pahluh luhn God fin facluh nohfohn. El tuh fahk, “Ngwac usot nuh suwos ahkkweyeyuck luhk tuh oacna sie ohiyacn facluh ac ohiyacn moul lom sifacna, kom kuh in sun pacl ma e tuhkuh ke finsrak ac engan.”6
Nga akacsruhi luhngse luhk nuh suwos. Luhlahlfongi ac luhngse yohk lowos puhlakihnyuck sin mwet sahyac ac sang inkacnek se nuh sin Leum in ekuhlah insiac ac in eis pac kena se in sang nuh sin mwet sahyac mwe sang luhn mihs ma som ahluhkwelah kahlwem nuhkewa.
Nga pruhe tuh kowos in konwacack mislac, kahsruh mwet sahyac konwacack, ac oruh mislac in yohkwelihk. Na ac oasr yac tausin wolacna luhn mislac ke Leum El sulpac tuhkuh. Nga fahkwack ma inge ke engan ke inen Jisus Kraist, amen.