E a Kabwaraaki Raoi Au Bure?
Te berita n tabwaninin ao kororaoin te kabwarabure e karaoaki ibukia aomata ni kabane—inanon ao rinanon ana Mwakuri ni kamaiu iesu Kristo ae akea tokina.
Tabeua te ririki n nako, Ngai ma Titita Nattress ti mwaing nako Idaho, ike ti kauka iai te karikirake ae boou. E bane ara tai ni mwakuri n te aobiti n te ngaina ma te bong. Ti karabwarabwa bwa, e aki raroa maekara ma ara tabo ni mwakuri. Ni katoa wiiki, Shawna ma natira aine teniman—aika a uarereke iaan onoua te ririki—a roroko n te aobiti ni katawanou ma ngaira.
N te bong teuana imwiin ara katawanou n ara utu, I kunea bwa natira te aine ae nimaua ana ririki, Michelle, e katuka ana rongorongo , ae koreia iaon te bebwa ao ni kanimmwa ma tarebonin au aobiti.
E taku taekana, “Tamau, ururingnga n tangirai. Tangiriko, Michelle.” Bon te kauring ae korakora nakon te kairake ni karo ibukin bwaai aika a rang ni kakawaki riki.
Tariu, ao mwaneu, I kakoaua bwa Tamara are i Karawa e ururingiira n taai nako ao E tangiriira ni koaua. Aio au titiraki: Ti Ururingnga? Ao ti Tangiria?
N ririki aika a nako, I beku bwa te tia kairiiri n te Ekaretia n ara tabo. Temanna te ataeinimwaane, ae Danny, e rianako n arona nako. E ongotaeka, nimamanei, raoiroi, ao n nakoraoi nanona. E ngae n anne, ngke e bane ana tai man te reirei ae rietaata, e moanna n rereitaki ma aomata aika a maiubuaka. E a irekereke n te kamanging, ae te methamphetamine, ao n iraanako angina ae reitinako nakon te kangaanga. Imwina riki, e a bon bitaki raoi tarakina. E a kangaanga kinaakina. Te bwai ae rangi ni bitaki irouna bon matana—itiakini moana e a taanako. A bati taai ae I kawaria, ma akea te bitaki. E aki butimwaea kawarana.
E rangi ni kananokawaki noorakin te ataeinimwaane aei ngkai e rootaki ao ni maiuakina te maiu ae kaokoro! E kona ni karaoi bwaai tabeua riki aika a raraoi.
N te bong teuana, e moanna n reke te kakai irouna.
E ira te bootaki n toa ngke e tibwaa ana kakoaua tarina ae e uarereke riki imwain mwanangana ni mitinare. N tain te bootaki, ao Danny e namakina te bwai ae e tuai man nanamakinna n te tai ae maan. E namakina ana tangira te Uea. N tokina ao e karekea te kaantaninga.
E ngae ngke iai nanona ni bitaki, e rangi ni matoatoa karaoana iroun Danny. Ma nanona nakon te turaki ni ikotaki ma namakinan ana bure iroura e kuri aki kona uotana.
Te bwakantaai teuana, ngke I kaitiaka uteuten rarikira, E kaoti Danny ao n tei n ana kaa n akea bukina ae I ataia. E a bon rangi n rootaki. I kamatea au mitiin ni koro uteute, ao ti kaai n tekateka n te nuun bwarantan te auti mai moa. Ikanne are e tibwai iai namakin ake i nanona. E bon tangiria raoi n oki. E ngae n anne, bitakina man anuana ae kareke ao aron maiuna e bon rang ni matoatoa. Ni ikotaki ma aio, e namakina te aki tau, te maamaa ibukin bwakana. E titiraki, “E boni kona ni kabwaraaki au bure? Iai te kawai n okirikaaki?”
Imwiin bunran nanona ma raraomana aikai, ti wareka Aramwa mwakoro 36 ngai ma ngaia:
“Eng, I uringii ni kabane bureu ma buakakau. …
“Eng, … te iango are iangoan okiu nako matan Atuau e bon kammaraka tamneiu n te maaku ae aki kona ni kabwarabwaraki” (kiibu 13–14).
Imwiin kiibu akanne, e taku Danny, “Bon aio raoi au namakin!”
Ti reitinako:
“Ngke I a karawawataki n uringakin au bure aika a mwaiti, nooria, I uringnga naba are I ongo ngke tamau e taetae ni burabeti nakoia aomata ibukin rokon Iesu Kristo, are Natin te Atua, bwa e na karaoa te mwakuri ni kamaiu ibukin buren te aonaba. …
“Ao O, te kimwareirei teraa, ao te oota ae tamaroa teraa are I a nooria” (kiibu 17, 20).
Ngke ti tabe n wareka te rongorongo, ao e a moanna n tang. Kimwareirein Aramwa bon te kimwareirei are e ukoukoria!
Ti marooroakinna bwa Aramwa e a bon tia n buakaka. Ma, ngke e raira nanona, e aki manga okiri arona ake a buakaka. E riki bwa ana tia reirei ae kakaonimaki Iesu Kristo. E riki bwa te burabeti! A takaneaua matan Danny. “Te burabeti?” e taku.
I kaeka, “Eng, te burabeti. Akea te kaumaki!”
Ti marooroakinna bwa ngkana aki roko korakoran ana bure Danny nakon are e riki iroun Aramwa, te berita ae aki bitaki n tabwanin ao kororaoin te rairannano e riki nakoia aomata ni kabane—inanon ao rinanon ana Mwakuri ni Kamaiu Iesu Kristo ae reitinako.
E a oota ngkai Danny. E ataia bwa tera ae riai ni karaoia: e na moana ana waaki man onimakinan te Uea ao n mwanuokina ana bure!
Bitakin nanon Danny bon akea ma ti te kakai ae kona ni buokia. Inanon taina, e bitaki moana, ao itiakin matana a manga oki. E riki bwa kaain te tembora ae tau! E a bon oki!
Imwiin tabeua namwakaina, I titirakina Danny ngkana e tangiria ni karina ana beebwa ibukin karaoan ana mwakuri ni mitinare. E katounako man kamiimi ana kaeka.
E taku, “I rangi n tangiria n karaoa au mwakuri ni mitinare, ma ko ataia bwa tera ae I tia n rinanona ao ni karaoia! I taku n au iango ngkoa bwa I aki katauaki.”
I kaeka, “Tao ko na koaua. Ma, akea te bwai ae e na totokoira man karaoan ara bubuti. Ngkana ko katauaki, ko na ataia bwa ko kaota korakoran nanom ni kan beku ibukin te Uea.” E taraa ni kukurei. E rangi ni kukurei n te iango aei. Irouna kanga e na kuri ni kangaanga, ma aio bon te kawai ae kukurei ngkana e karaoia.
Tabeua te wiiki imwiina, ao ni mimiina, e a manga riki te kakai teuana. E karekea weteana Danny bwa e na karaoa te mwakuri ni mitinare ae bwanin taina.
Tabeua te namwakaina imwiin rokon Danny n ana tabo ni mitinare, E roko au tareboon. E taku ana beretitenti, “Tera raoi iroun te ataeinimwaane aei? Bon te kabanea n nakoraoi ni mitinare ae I tibwa noria!” Ko nooria, te beretitenti aei e roko irouna Aramwa te Teei ni boong aikai.
Uoua te ririki imwiina, E okirikaaki Danny ma te karineaki, bwa e a tia ni beku ibukin te Uea ma nanona, maurungina, ana iango, ao korakorana ni kabane.
Imwiin ribotinan ana mwakuri ni mitinare n te bootaki n toa, I okira mwengau, ngke I a ongo te karebwerebwe n au mataroa. E tei ikekei Danny ma ranin matana aika wawanako. E taku, “Ti kona ni marooro teuana te tai?” Ti otinako nakon te tabo are ti tekateka naba ngkoa iai.
E taku, “Beretitenti, ko bon koaua bwa a kabwaraaki raoi au bure?”
Ngkai I a manga tang irarikina. I matau ao I noora ana reirei Iesu Kristo ae kakaonimaki are e a tia n anga ngaia ni kabane n reireia ao ni kakoua ibukin te tia Kamaiu. Bon te kamaiu ao te korakora n te mwaaka ae kona n nooraki n ana Mwakuri ni Kamaiu te Tia Kamaiu.
I taku, “Danny! Ko a tia n taraa te tirotaam? Ko a tia n noori matam? A kaonaki n te oota, ao ko raneanea n Tamnein te Uea. E koaua ae e a kabwaraaki am bure! Ko bon rang n tikiraoii! Te bwai ngkai ae ko na karaoia ko na waakina nako maium. Tai tanrikaaki! Waaki nako ma te onimaki nakon te otenanti are imwiina.”
E reitinako ana kakai Dany ni karokoa te bong aei. E mare n te tembora ao ni manga reirei, ike e karekea ana beebwa ae te master degree. E teimatoa ni beku ibukin te Uea ma te karinerine ao kakawakin weteana. Ae kakawaki riki, e a tia n riki bwa te buu te mwaane ae akea kabotauana ao te tama ae kakaonimaki. Boni ngaia ana reirei Iesu Kristo ae kakaonimaki.
E reirei Beretitenti Russell M. Nelson, “N akean ana Mwakuri ni Kamaiu ae akea tokina te [tia Kamaiu], ni kabane aomata a na bua.”1 E aki bua Danny, ao ngaira naba iroun te Uea. E tei n te mataroa n tabekiira, ni kakorakoraira, ao ni kabwarai ara bure. E uringnga n taainako n tangiriira!
Kaotan ana tangira te tia Kamaiu ibukin natin te Atua e tauaki mwiina n ana Boki Moomon: “Ngke e a tia Iesu n taekin taeka aikai, e taratara nako riki i aoia aomata ake a uanao, ao nooria a bon tang, ma ni kateimatoa aia taratara iaona n te aro are kaanga a na tuangnga bwa e na tiku riki teutana irarikiia.” (3 Nibwaai 17:5).
E a tia te tia Kamaiu ni kabanea te bong ae bwanin ni ibuobuoki nakoia aomata. Ma e bati riki ae e na karaoia—E nako nakoia Ana tiibu tabeman; E na nakon Tamana.
Kangaangan tibwangana, E kamataata bwa aomata a kainnanoia bwa e na tiku riki teuana. Imwiina, ma nanon te tia Kamaiu ae onrake n te nanoanga, e riki teuana te kakai ae korakora n rongorongon te aonaaba:
E tiku.
E kakabwaiaia.
E reirei nakoia natina, temanna imwiin temanna.
E tataro ibukiia; E tang ma ngaiia.
Ao E katoki aorakiia. (Taraa 3 Nibwaai 17.)
Akea tian ana berita: E na kamaiura.
Nakoia naake a tia ni bwaka man kawain te berita ae tabu, taiaoka ataia bwa iai n taainako te kaantaninga, iai n taainako te kamaiuaki, ao iai n taainako te kawai n oki.
Ana rongorongo ibukin te kaantaninga ae akea tokina bon te bai ni kamaiu ibukiia ni kabane ake a maeka n te aonaaba ae kangaanga. E taku te tia Kamaiu, “Boni ngai te kawai, ao te koaua, ao te maiu” (Ioane 14:6).
Tariu ao mwaneu, ti na ururingnga n Ukoria, n Tangiria, ao n Ururingnga n taainako.
I kakoaua bwa te Atua e maiu ao E tangiriira. I kakoaua naba bwa Iesu Kristo bon te tia Kamaiu te Tia Kabooa te Aonaaba. Boni ngaia te tia kamaiu ae korakora. I ataia bwa e maiu au Tia Kamaiu! N aran Iesu Kristo, amen.