Taian te Uaa ae Aki Nakoraoi
E tei te Tia Kamaiu n tauraoi ni butimwaei ara kekeiaki aika mangori ao E na kakororaoi rinanon Ana akoi. Iroun Kristo, bon akea te tai n tai ae e aki nakoraoi.
Ngke te kairake n ataeinimwaane, I reiakina tangiran bibitakin kanoan te tai n te ririki i Meanginmaeaon Montana, te tabo are I rikirake iai. Te tai ae mamate nanou iai bon te fall—te bong n tai. E korakora aia kantaninga ao aia tataro ara utu bwa namwakaina ake ti mwakuri korakora iai e na kaniwanganaki ma te uaa ae korakora n tain te tai. A raraoma au karo ni kanoan te bong, marurungiia maan ao kai n amwarake, ao iaon bwaai aika a mwaiti ake akea aia kona n taua aroia.
Inanon rikirakeu, I a moanna n ataa te ingainga ni bwaai aika a irekereke iai. Aron maiura e katan iaon te uaa n tain te tai. Tamau e reireinai aron taian bwai ni mwakuri ake ti kabonganai n tain te tai. I matakuakinna ngkana e kabuta te bwai ni mwakuri nako nanon te tawaana, ni korei boota ni wiita aika uarereke ao imwiina e tuoi n taraia bwa taian wiita a tei raoi inanon neia ao aaki teweaki nako ma maange. E kaokioka karaoan aei n te tai ae mwaiti, ni kaekaeta te bwai ni mwakuri ni katoa tai. I biribiri irarikina ao ni kakabuta baiu ribuakon maangen te wiita ma ngaia bwa aongkoa I ata te bwai ae I karaoia.
Imwiin ae e kakoaua raoi bwa e a eti aron te bwai ni mwakuri, I kunei tabeua amui ni wiita ibuakon uteute iaontano ao n angana ma te mata n titiraki. N na bon aki mwaninga ana taeka tamau nakoiu: “E bon tau aron tamaroana ao are e kona ni karaoia te bwai ni mwakuri aei.” N aki rang n rauaki n ana kabwarabwara, I iangoa aron aki nakoraoin te tai n tai aio.
Tabeua te tai imwiina, ngke ea rangi ni kamaitorotoro n te tairiki, I matakuanii ngaa man aika swans ake a boborau, geese, ao taian take n ruo rikaaki nako nanon te tawana n kamarikeia imwiin aia mwananga ae abwabwaki mai maiaki. A kanii taian wiita ake a tiku mai imwiin ara tai are e aki nakoraoi. Te Atua ae kakororaoia. Ao akea te amwi ni wiita ae e bua.
E aki toki n riki bwa te kariiri n ara aonaaba ao ni bon katein te Ekaretia kaatuan te iango iaon te kororaoi. Bwaai n reitaki, te katautau ae aki koaua, ao n taai nako bairean taekara ibon iroura e karekea te namakin ae ti aki tau—ae e kangaanga reken te tamaroa ao e na bon aki reke iroura. Tabeman e bure otaia n ana kakao te Tia Kamaiu ae “kam na moaniban te raoiroi.”1
Uringnga bwa te riki ni kororaoi tiaki titebo ma te kororaoi iroun Kristo.2 Te riki ni kororaoi e kainanoa karaoan ae kangaanga, te waaki ae ti bon katokaa iaora ae kabotauan arora ma tabeman. Aio e karika te kairua, raraoma, ao te kona ni karikiira bwa ti na tangiria n tiku i bon iroura ao ni kararoaira mai irarikiia tabeman.
Te riki ni kororaoi iroun Kristo ai manga bon te bwai teuana. Bon te mwakuri ae waaki nako—ae kairaki ma te tangira iroun te Tamnei ae Raoiroi—n riki n aiaron te Tia Kamaiu. Te waaki aei e baireaki arona iroun Tamara are i Karawa ae akoi ao n atatai are e kamataata raoi n te berita ae tabu are ti kaoaki bwa ti na butimwaia. E kabebeteira man rawawatan te bure ao te aki tau, are e aki toki ni katereterea bwa antai ngaira imatan te Atua. Ngkai te waaki aei e tabekiira rake ao n uotiira bwa ti na nakoraoi riki, a bon taraaki arora man oin nanomatoara nakon te Atua are ti kaotia n ara kekeiaki ni Iriiria n te onimaki. Ngkai ti butimwaea ana kakao te Tia Kamaiu n roko Nakoina, ti kunea imwiina bwa ara kabanea n tamaroa e bon tau ao bwa Ana akoi te Tia Kamaiu ae nanoanga e na kakororaoa are imwiina n te kawai ae ti aki kona n iangoia.
Ti kona n nora te tua aio ni mwakuri ngke te Tia Kamaiu e kamwarakeia nimaua tenga te aomata.
“Ao ngke E kaeka matana Iesu, ao ngke E noria aomata aika uanao bwa a nako Ina, ao E taku nakon Biribo, Ti na kabo berena ia bwa kanaia aikai? …
“E kaeka Biribo, E aki tau te berena ae kaboaki n uabubua te tiring, bwa a na bane n amwarake teutana iai.
“E taku nako Ina ana reirei temanna are Anterea, are tarin Timoni Betero,
“Temanna te teinimwane ikai, ae nimaua te berena ae te barei rouna, ao uoman te ika, ma tera manen baikanne i buoakoia aomata aika uanao?”3
Tao ko a tia ni iangoia bwa tera ana namakin te Tia Kamaiu iaon te ataeinimwaane aei, are n ana onimaki te ataei e anga are e ataia ae bon te kangaanga bwa e aki tau ni kaitara te bwai ae e riki?
“Ao E anai berena akekei Iesu, ao E tataro ni katituaraoi, ao E tibai nakoia ake a tekateka; ao ai aron naba tibwakin ika n ai aron maitin ae a tangiria.
“Ao ngke a ngae, ao E taku nakoia ana reirei, Ikoti nikiran amwarake, bwa a kawa ni bua.”4
Te Tia Kamaiu e kakororaoa te karea ae nanorinano.
Tabeua te tai imwiin te bwai ae e riki aei, Iesu e karimoaiia Ana reirei iaon te booti. A kunea bwa a mena ibuakon buakan taari ngke e a karangaina. A rikirake ni maaku ngke a noora bangin te tamnei ae nakonako ni kawariia iaon te ran.
“Ao E taetae naba Iesu nako ia ni kangai, Kabebetei nanomi; boni Ngai; tai maku.
“Ao e kaeka Betero ni kangai, Te Uea, ngkana tao boni Ngkoe, ao Ko na tuangai ba N na nako Im i aon te ran.
“Ao e taku, Mai. Ao ngke e ruo Betero mai iaon te booti, e nakonako iaon te ran, n nakon Iesu.
“Ao ngke e nora te ang ba e baibati, ao e maku; ngke e tiba moa n inako, ao e takarua ni kangai, te Uea, ko na kamaiuai.
“Ao Iesu E arora naba baina, n taua, ao E taku nako ina, Ko aera ngkai ko nanokokoraki, ngkoe ae karako am onimaki?”5
Tariu ao mwaneu, tao tiaki anne tokin te marooro. I kakoauaa bwa ngke Betero ao te Tia Kamaiu a nakonako n oki nakon te booti n taubai, e rotoroto Betero ao tao e namakina nanobabana, tao te Tia Kamaiu e na taekina ae kangai: O, Betero, tai maku ao tai raraoma. Ngkana ko kona n nooriko n aron ae I nooriko, e na keenako raraomam ao e na rikirake am koaua. I tangiriko, Betero, ko otinako man te booti. Am angabwai e butimwaeaki, ao e ngae ngke ko taku bwa ko kabwaka, N na aki toki ni mena irarikim n tabekikorake man te mwanono, ao am angabwai a na riki ni kororaoi.”
E reirei Unimwaane Dieter F. Uchtdorf:
“I kakoaua bwa te Tia Kamaiu Iesu Kristo e na bon kan nooriko, n namakina, ao n ataia bwa Ngaia bon korakoram. Bwa man Ana ibuobuoki, akea tian te bwai ae ko kona ni kakoroa nanona. Bwa akea tian am konabwai. E na bon tangiriko bwa ko na taraiko n aron Ana taratara i bukim. Ao anne ae rangi ni kaokoro man aron ae nooriko iai te aonaaba. …
“E anga te korakora nakoia ake a kua; ao nakoia ake a namakina te aki konamaki, E karikirakea te korakora.”6
Ti riai n uringnga bwa tao tera ara kabanea n tamaroa ma ara anganano ae aki kororaoi, e kona ni kakororaoaki iroun te Tia Kamaiu. E aki taraaki bwa tao uarerekera ara kekeiaki, ti riai n aki kamemerea mwaakan te Tia Kamaiu. Te taeka n tangira ae bebete, te kakawari ae kimototo ma e karaoaki man te nano, ke te reirei man te Moanrinan e reiakinaki ma te tangira e konaa, man ana ibuobuoki te Tia Kamaiu, e karekea te rau, kamaraua te nano, ao e bitii maiu n akea tokiia. Ara kekeiaki ae aki barongaaki e kona ni kairi nakon te kakai, ao ni waakin anne, ti kona ni ira buakon taian te uaa ae kororaoi.
N taai nako ti kunea bwa ti mena n taai aika e na karikiira bwa ti na karaoa ae iaona riki. Ti na bae n aki namakinna ae ti tau nakon te beku. Ti na bae n taraiia naake ti buokiia ma te namakin ae e na aki roko ara mwakuri nakon are e kantaningaaki. Tariu ao mwaneu, ngkana ko namakin te aro aio, taraia mwaane ao aine aika a tamaroa aika a tekateka ibukiu ake I beku ma ngaia.
I namakina korakaimi.
I a tia n reiakinna, irarikina anne, bwa n aron ae te riki ni kororaoi bon tiaki titebo ma te kororaoi iroun Kristo, tarakin arora ni kabotaua ma tabeman bon tiaki titebo ma katotongan temanna. Ngkana ti kabotauiira ma tabeman, ana otinako mwiina aika ti uoua. Bwa tao ti na noriira bwa ti tamaroa riki nakoia tabeman ao ni motikitaeka ao n aki taekina ae raoiroi ibukiia, ke ti noriira bwa akea arora ni kabotauaki ma tabeman ao ti nanokokoraki, ni bon motiki taekara, ao ni bwaranano. Kabotauakin arora ma tabeman n tabetai e aki karika te rikirake, n tabekiira rake, ao n tabetai e karika te nanokawaki. Ni koauana, kabotau aikai e kona n uruana maiun tamneira, n totokoira man karekean te buoka n tamnei are ti kainanoia. Ni iterana are teuana, katotongaia naake ti karineia ake a kaota bannan aroaron Kristo e kona n kaetietiira, tabekakira rake, ao ni buokiira n riki bwa ana reirei Iesu Kristo aika tamaroa.
Te Tia Kamaiu e anganiira te banna are ti na iria ni iriira Arona ngkai e katotonga te Tama. E tuanga Ana reirei ae Biribo: “I a maan ra ni mena i roumi, ao ko aki ataai, Biribo? ane e a tia n norai ao e a tia n nora naba te Tama; ao e aera ngkai ko kangai, Kaota te Tama nako ira?”7
Ao imwiina e reirei, “Bwa noria, noria, E bon koaua ae I a tuangngkami bwa ane onimakinai ao e na karaoi mwakuri aika I karaoi,”8
E aki taraaki bwa tao uarerekera ara kekeiaki, ngkana e bon nako mai inanora, te Tia Kamaiu e na kabonganaira ni kakoroa nanon Ana mwakuri. Ngkana ti tii karaoa ara kabanea n tamaroa ti kona n onimaki Irouna ni karaoi ake ti aki kona ni karaoi, ti kona n riki bwa mwakoron te kakai ake a katobibiira.
E taku Unimwaane Dale G. Renlund, “Ko aki riai ni kororaoi, ma ti kainanoiko, ibukina bwa aomata ni kabane ake a kukurei a kona ni karaoa te bwai teuana.”9
N aron are e reireiniira Beretitenti Russell M. Nelson, “Te Uea e tangira te kekeiaki.”10
E tei te Tia Kamaiu n tauraoi ni butimwaei ara kekeiaki aika mangori ao E na kakororaoi rinanon Ana akoi. Iroun Kristo, bon akea te tai n tai ae e aki nakoraoi. E riai n iai iroura te ninikoria ni kakoauaa ae Ana akoi bon ibukira, bwa E na buokiira—bwa E na buokira, kamaiura man te mwarua ngkana ti bwaka, ao ni kakororaoi ara kekeiaki aika aki bati ni kororaoi.
N te kaikonaki ibukin te tia ununiki, te Tia Kamaiu e kabwarabwaraai koraa ake a unikaki n te tano ae tamaroa. Tabekai a karikii bubua, tabekai onobwi, ao ake tabeua tenibwi. Ni kabane bon mwakoron Ana tai n tai ae kororaoi.11
E kaoira ngaira ni kabane te burabeti Moronaai, “Eng, nakomai nakon Kristo, ma ni kakororaoaki irouna, … ao ngkana kam kaakeai bwaai ni kabane aika tiaki aron atua, ma n tangira te Atua ma korakorami, ami iango ao marurungimi, ao ngkanne e na tau ana akoi ibukimi, ao man ana akoi ao kam kona ni kororaoi iroun Kristo.”12
Tariu ao mwaaneu, I kakoauaa Kristo, are iai mwaakana ni kakororaoi ara angabwai aika a rangi ni mangori. Ti a bane ni karaoa ara kabanea n tamaroa, n uotii ake ti konai, ao, ma te onimaki, katikui ara angabwai ake aki kororaoi i Waena. N arana are Ngaia te Mataniwi n tain te tai ae kororaoi, ae Iesu Kristo, amen.