Txoj Kev Kaj Npuab rau txoj Kev Kaj
Thaum peb txoj kev ntseeg Khetos muaj zog zuj zus tuaj, peb txais txoj kev kaj zuj zus tuaj mus txog thaum txoj kev kaj ua rau tag nrho qhov tsaus ntuj ploj mus.
Kuv cov kwv tij thiab cov muam, kuv zoo siab koom nrog nej thaum Hnub Caiv Easter zoo no thaum peb xav txog txoj kev kaj uas ci rau hauv lub ntiaj teb no thaum peb tus Tswv thiab tus Cawm Seej, Yexus Khetos, tau Sawv Rov Los.
Thaum Yexus ua Nws txoj hauj lwm qhuab qhia, Nws hais tias: “Kuv yog qhov kaj ci rau neeg ntiaj teb pom kev: tus uas nrog kuv mus, tus ntawd yuav tsis taug txoj kev tsaus ntuj, tiam sis nws yuav ua nws lub neej tshav ntuj nrig.”1 Khetos tus Ntsuj Plig “nyob hauv txhua yam uas ua rau txhua yam muaj txoj sia.”2 Nws kov yeej qhov tsaus ntuj uas nyob ib puag ncig peb.
Ntau xyoo tas los, thaum kuv nrhiav kev lom zem, kuv ob tug tub thiab kuv koom nrog ib pawg tub hluas mus rau lub Qhov Tsua Moaning, twb tis npe li ntawd vim muaj ib lub suab nrov uas tawm hauv lub ncauj qhov tsua. Lub qhov tsua ntawd zoo li ib raj pa taws uas muaj ib qhov chaw tob li 180 fiv (55 mev), yog qhov chaw hauv qhov tsua loj tshaj plaws nyob hauv California.
Tsuas muaj ob txoj kev rau yus nqis mus haud: cov ntaiv kiv uas nyab xeeb los sis muab hlua khi ces nqis mus rau hauv qhov tsua; kuv ob tug tub thiab kuv peb xaiv txoj kev muab hlua khi nqis mus. Kuv tus tub twb mus ua ntej es kuv thiab tus tub ntxawg txhob txwm mus tom qab wb thiaj li yuav nqis mus ua ke.
Tom qab cov kws coj qhia peb thiab muab peb khi rau cov twj khoom thiab khi rau ib txoj hlua muaj zog, peb tau txav rov qab mus txog ntawm tus teem ko taw thiab ua siab loj zuj zus, vim nov yog qhov chaw kawg uas peb tsum tau, thiab yog qhov chaw kawg uas peb yuav pom kev tshav ntuj los ntawm lub ncauj qhov tsua.
Peb txav ib ruam ntxiv xwb ces wb nqis mus rau hauv ib lub qhov tsuas uas siab thiab dav heev nws thiaj li dim tau tag nrho tus Mlom Ywj Siab (Statue of Liberty). Nyob ntawd peb twb dai vias ib me pliag thaum peb qhov muag pib pom zuj zus hauv qhov tsaus ntuj. Thaum peb nqis mus, cov teeb uas siv hluav taws xob ci ci rau cov ceg pob zeb uas rauv hauv lub qhov tsuas.
Ces ua ciav, cov teeb tuag tas lawm. Peb dai vias hauv lub qhov, es qhov tsaus roos peb tag nrho peb thiaj li tsis txawj pom peb txhais tes uas tuav txoj hlua tim ntsej muag. Ib lub suab hu rau kuv hais tias, “Txiv, txiv koj puas nyob?”
Kuv teb hais tias, “Me tub es, kuv nyob no; kuv nyob ntawm no.”
Lawv tua teeb kom qhia peb tias thaum tsis muaj hluav taws xob, ces qhov tsaus hauv lub qhov tsua yeej ua rau yus tsis pom kev hlo li. Qhov no yeej qhia peb zoo; zoo li peb “hnov tau” qhov tsaus ntuj. Thaum twg lawv taw teeb, ces qhov tsaus ntuj ploj mus, ib yam li qhov tsaus ntuj yeej yuav tsum ua, txawm yog muaj ib lub teeb me me xwb. Kuv ob tug tub thiab kuv peb yeej yuav nco qab txog qhov tsaus ntuj uas peb tsis tau pom dua, yuav zoo siab vim muaj txoj kev kaj, thiab peb yuav zoo siab vim peb paub tias peb tsis nyob peb ib leeg nyob hauv qhov tsaus ntuj.
Peb txoj kev nqis mus rau hauv lub qhov tsua ntawd yeej zoo li peb txoj kev ua neej hauv ntiaj teb no. Peb tau tawm hauv qhov kaj saum ntuj ceeb tsheej thiab nqis mus dhau ib daim ntaub thaiv ua rau peb tsis nco qab ces mus rau hauv ib lub ntiaj teb uas tsaus ntuj nti. Peb Leej Txiv Saum Ntuj Ceeb Tsheej tsis tau tso peb tseg kom nyob hauv qhov tsaus ntuj tiam sis Nws cog lus tias peb yuav txais txoj kev kaj rau peb lub neej dhau los ntawm Nws Leej Tub, Yexus Khetos.
Peb paub tias txhua yam yuav tsum muaj kev tshav ntuj hauv lub ntiaj teb no. Nyob hauv peb lub neej ntawm sab ntsuj plig peb kuj yuav tsum muaj txoj kev kaj uas los ntawm peb tus Cawm Seej. Vim Nws hlub peb tag nrho, Vajtswv muab Khetos txoj Kev Kaj rau txhua tus neeg “uas los nyob hauv ntiaj teb no”3 xwv kom lawv yuav “paub qhov zoo thiab qhov phem”4 thiab txais kev tshoov siab kom “ua zoo tsis tu ncua.”5 Txo kev kaj ntawd, uas tshwm sim los ntawm qhov uas peb hu ua peb txo kev paub ncaj, ua rau peb xav ua zoo dua, thiab ua tus neeg zoo tshaj npaum li peb ua tau.
Thaum peb txoj kev ntseeg Khetos muaj zog zuj zus tuaj, peb txais txoj kev kaj zuj zus tuaj mus txog thaum txoj kev kaj ua rau tag nrho qhov tsaus ntuj nyob ib puag ncig peb ploj mus. “Qhov uas yog Vajtswv li yog qhov kaj; thiab tus uas txais qhov kaj, thiab mus ntxiv nrog Vajtswv, yuav txais qhov kaj ntxiv; thiab qhov kaj ntawd yuav ci loj zuj zus mus txog hnub uas zoo tag nrho.”6
Khetos txoj kev kaj npaj peb txais tus Vaj Ntsuj Plig Dawb Huv lub hwj huam uas txhawb pab peb, uas yog “Vajtswv lub hwj chim uas tau los qhia … tias txoj Moo Zoo muaj tseeb.”7 Tus thib peb hauv Pawg Vajtswv, tus Vaj Ntsuj Plig Dawb Huv yog “ib tug Ntsuj Plig.”8 Lub teeb loj tshaj plaws uas Leej Txiv Saum Ntuj Ceeb Tsheej muab rau nej nyob hauv lub neej no yog los ntawm tus Vaj Ntsuj Plig Dawb Huv, tus uas Nws lub hwj huam “yuav ua kom [nej] lub siab to taub [thiab] ua kom [nej] tus ntsuj plig muaj txoj kev xyiv fab puv npo.”9
Nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, dhau los ntawm txoj cai pov thawj hwj, nej ua kev cai raus dej kom txais kev dim nej tej kev txhaum. Ces lawv tso tes saum nej taub hau thiab muab lub txiaj ntsim zoo kawg nkaus10 uas yog tus Vaj Ntsuj Plig Dawb Huv rau nej.
Txij thaum ntawd mus, thaum nej tej kev xav thiab tej yam nej ua tsom ntsoov rau txoj kev ua raws li kev khi lus, tus Vaj Ntsuj Plig Dawb Huv yog ib txoj kev kaj nyob hauv nej, es Nws yuav qhia thiab ua tim khawv txog qhov tseeb rau nej,11 ceeb toom txog tej xwm txheej ceev, nplij 12 thiab ntxuav,13 thiab muab kev kaj siab lug14 rau nej.
Vim “txoj kev kaj npuab rau txo kev kaj,”15 tus Vaj Ntsuj Plig Dawb Huv txoj kev ua nej tus khub yuav coj nej mus xaiv tej yam uas yuav pab nej nyob hauv txoj kev kaj; tiam sis, tej yam nej xaiv thaum tsis muaj tus Vaj Ntsuj Plig Dawb Huv lub hwj huam ntshe yuav coj nej mus rau hauv qhov tsaus ntuj. Txwj Laug Robert D. Hales qhia tias: “Thaum muaj txoj kev kaj, qhov tsaus ntuj yuav ploj mus thiab nyob tsis taus. … Thaum muaj tus Vaj Ntsuj Plig Dawb Huv txoj kev kaj ntawm sab ntsuj plig nyob, Dab Ntxwg Nyoog qhov tsaus ntuj yuav khiav mus.16
Tej zaum, nov yog ib lub sij hawm zoo nug nej tus kheej: Kuv puas muaj txoj kev kaj ntawd hauv kuv lub neej. Yog tsis muaj, ces zaum twg yog zaum kawg kuv muaj?
Ib yam li kev tshav ntuj ci ntsa iab rau lub ntiaj teb kom txhawb nqa nej txoj sia, nej yeej ua rau txoj kev kaj hauv nej ci zuj zus thaum nej xaiv coj raws li Nws—tus uas yog Yexus Khetos.
Kev tshav ntuj ci zuj ci zus txhua lub sij hawm nej thov Vajtswv; nyeem vaj lug kub kom “mloog Nws hais”;17 ua raws li kev tshwm sim uas los rau peb cov yaj saub; thiab mloog lus thiab ua raws li cov lus txib kom “coj raws li tus Tswv cov kab ke” tag nrho.18
Nej yuav cia kev tshav ntuj nkag rau hauv nej sab ntsuj plig thiab muaj kev kaj siab lug hauv nej lub neej txhau zaum nej hloov siab lees txim. Thaum nej txais lub cim nco txog txhua lub lim tiam kom ris tus Cawm Seej lub npe, kom nco ntsoov txog Nws thiab coj raws li Nws tej lus txib, Nws txoj kev kaj yuav ci rau hauv nej.
Muaj kev tshav ntuj hauv nej lub siab txhua zaus nej qhia txoj moo zoo thiab ua tim khawv. Txhua zaus nej ua hauj lwm pab lwm tus ib yam li tus Cawm Seej ua, Nws ua rau nej lub siab sov so. Leej Txiv Saum Ntuj Ceeb Tsheej txoj kev kaj yeej nyob hauv Nws lub tuam tsev dawb huv thiab rau tag nrho cov uas los txog tus Tswv lub tsev. Nws txoj kev kaj nyob hauv nej yuav loj tuaj thaum nej ua siab zoo, ua siab ntev, zam txim, ua siab hlub, thiab lwm tus yuav pom nyob hauv nej lub ntsej muag. Tiam sis, ntshe peb taug kev hauv duab ntxoo thaum peb npau taws sai los sis peb tsis kam zam txim rau lwm tus. “Thaum nej tig mus saib kev tshav ntuj, ces duab ntxoo yeej yuav nyob ntawm nej nraub qaum.”19
Thaum nej ua neej tsim nyog kom txais tau tus Vaj Ntsuj Plig Dawb Huv, nej yeej “kom nej sab ntsuj plig yuav haj yam muaj peev xwm txais kev tshwm sim.”20
Lub neej no ua rau peb raug teeb meem thiab raug kev cuam tshuam, thiab peb txhua tus muaj tej hnub tsaus ntuj thiab tej cua daj cua dub. Nyob hauv lub neej no, yog peb “cia Vajtswv yeej hauv peb lub neej,”21 ces tus Vaj Ntsuj Plig Dawb Huv txoj kev kaj yuav qhia peb tias muaj lub ntsiab thiab muaj nqi hauv peb tej kev sim siab, thiab tej ntawd yuav ua rau peb hloov los ua neeg zoo dua ntxiv uas muaj kev ntseeg ruaj nrees thiab cia siab ntsoov rau Khetos, vim peb paub tias Vajtswv nyob nrog peb thaum muaj lub neej tsaus ntsuj xwb. Ib yam Thawj Tswj Hwm Russell M. Nelson tau hais tias, “Kev tsaus ntuj uas muaj thaum peb raug kev sim siab ua rau Yexus Khetos txoj kev kaj haj yam ci ntsa iab.”22
Tej lub sij hawm nyob hauv peb lub neej peb yuav nyob hauv tej qhov chaw uas peb tsis xav. Yog tias kev txhaum ua rau nej nyob li ntawd, cia li rub daim ntaub ntawm kev tsaus ntuj thiab pib txo hwj chim thov nej Leej Txiv Saum Ntuj Ceeb Tsheej nrog ib lub siab mob thiab ib lub siab xav ua zoo thiab hloov siab lees txim. Nws yuav hnov nej tej lus thov. Ua siab loj hnub no, “txav los nyob ze [Nws] thiab [Nws] yuav txav los nyob ze nej.”23 Nej yeej yuav tsis nyob deb dhau kom Yexus Khetos txoj Kev Theej Txhoj lub hwj chim kho tsis taus nej.
Kuv muaj niam thiab txiv zoo thiab muaj cov poj koob yawm txwv rau siab ntseeg uas tau ua raws li Yexus Khetos txoj kev kaj thiab Nws txoj moo zoo, es Nws txoj moo zoo tau foom koob hmoov rau lawv lub neej thiab cov tiam neeg uas tuaj tom qab. Kuv txiv pheej hais txog nws txiv, Milo T. Dynches, uas qhia tias nws txoj kev ntseeg Vajtswv yeej yog ib txoj kev kaj rau nws txhua hnub txhua hmo. Kuv yawg yog ib tug kws saib hav zoov thiab pheej caij nees nws ib leeg nyob pem roob, cia siab rau Vajtswv tias Nws yuav coj thiab saib xyuas.
Muaj ib hnub, Yawg nyob nws ib leeg puag pem roob. Lub caij ntuj no no tau los thaum nws cia li khi lub eeb nees rau ib tug nees nws nyiam tshaj, laus Prince, thiab caij mus rau lub tsev txiav ntoo kom ntsuas cov ntoo uas ntej yuav txiav.
Thaum txog tsaus ntuj zuag, nws ua nws txoj hauj lwm tiav lawm thiab rov qab caij nees mus. Txog lub sij hawm ntawd, twb no no kawg, thiab cua hlob heev nplawm lub roob tag nrho. Tsis muaj ib lub teeb thiab tsis pom ib txoj kev, nws cia li muab Prince tig rau ib txoj kev uas nws xav tias yuav coj nws rov qab mus rau cov neeg saib hav zoov lub tsev.
Tom qab nws mus ntev lawm hauv kev tsaus ntuj, Prince maj mam mus, ces nws nres kiag. Yawg pheej txib kom Prince mus tom ntej, tiam sis tus nees tsis kam. Thaum muaj cov daus kiv ncig nws, Yawg paub tias nws yuav tsum tau Vajtswv txoj kev pab. Ib yam li nws tau ua tas nws lub neej, nws txo hwj chim “thov nrog kev ntseeg, tsis txhob ua xyem xyav.”24 Ib lub suab yau yau teb hais tias, “Milo, cia Prince mus raws li nws xav.” Yawg mloog lus, thiab thaum nws tso txoj hlua tsav tus nees, Prince tau tig mus thiab mus rau ib txoj kev txawv. Ob peb teev tom qab ntawd, Prince cia li nres thiab nyo hau. Dhau cov daus uas los loj heev, Yawg pom tias twb tau tuaj txog lub qhov rooj ntawm lub qhov chaw rau cov saib hav zoov lawm.
Thaum hnub tuaj lawm, Yawg saib Prince cov hneev taw hauv cov daus thiab taug txoj lw seb. Nws ua tsis taus pa thaum nws pom tias nws nyob qhov twg thaum nws cia Prince mus nws tus kheej: yeej nyob ntawm qab tsuas, ntshe nws mus ib ruam tom ntej xwb ces tus nees thiab tus caij nees mam li poob tuag saum cov pob zeb ntxhib heev.
Raws li zaj ntawd thiab lwm zaj thiab, kuv Yawg hais tias, “Tus khub zoo tshaj plaws uas koj yeej yuav muaj yog koj Leej Txiv Saum Ntuj Ceeb Tsheej.” Thaum kuv txiv hais txog Yawg zaj, kuv nco qab tias nws tau hais ib nqe vaj lug kub:
“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.
Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb.”25
Kuv ua tim khawv tias Yexus Khetos yog txoj kev kaj kav ib txhis uas “ci hauv kev tsaus ntuj.”26 Tsis muaj qhov tsaus ntuj yeej yuav tsis tsuj, tua, los sis kov yeej txoj kev kaj ntawd. Peb Leej Txiv Saum Ntuj Ceeb Tsheej ua siab dawb muab txoj kev kaj ntawd rau nej. Nej yeej tsis nyob nej ib leeg. Nws hnov thiab teb txhua zaj lus thov. Nws tau “hu nej tawm hauv qhov tsaus ntuj los nyob hauv qhov pom kev.”27 Thaum nej thov hais tias, “Txiv es, Txiv es, koj puas nyob?” Nws yeej yuav teb hais tias, “Kuv nyob no, kuv tus me nyuam; kuv nyob ntawm no.”
Kuv ua tim khawv tias Yexus Khetos tau ua raws li Leej Txiv Saum Ntuj Ceeb Tsheej txoj hau kev tiav lawm vim Nws yog peb tus Cawm Seej thiab Txhiv Dim;28 Nws yog peb txoj kev kaj, peb txoj sia, thiab peb txoj kev. Nws txoj kev kaj yeej yuav tsis qauj,29 Nws lub yeeb koob yuav tsis tu, Nws txoj kev hlub rau nej yeej nyob mus ib txhis—nag hmo, hnub no, thiab tas mus li. Los ntawm Yexus Khetos lub npe, amees.