Muaj Chaw hauv lub Tsev So
Thaum lub caij Easter, Yexus Khetos caw peb rais los mus ua, ib yam li Nws, ib tug Neeg Xamalis Zoo, kom ua rau Nws lub Tsev So (Nws lub Koom Txoos) ua ib qho chaw nkaum rau txhua tus.
Cov kwv tij thiab cov muam, txawm tias kuv txiv tso peb tseg tau 20 xyoo lawm, kuv tseem nco nws. Vim yog muaj Easter kuv yuav rov qab ntsib nws dua ib zaug ntxiv.
Thaum kuv kawm ntawv qib siab hauv teb chaws Askiv, kuv txiv tuaj xyuas kuv. Nws paub hais tias kuv kho siab nco kuv tsev neeg.
Kuv txiv nyiam ua ntau yam tshiab tiam sis nws tsis nyiam noj zaub mov tshiab. Txawm tias wb nyob hauv teb chaws Fabkis, uas nrov thoob ntuj vim yog nws cov zaub mov, los kuv txiv yuav hais tias, “Cia wb noj zaub mov Suav.” Kuv txiv tau ua ib tug yawg suab hauv lub Koom Txoos ntev, thiab nws mloog tus ntsuj plig thiab txawj hlub tshua lwm tus neeg. Muaj ib hmo, thaum cov tsheb saib xyuas xwm txheej ceev tso suab nrov thiab mus dhau lub nroog Paris, kuv txiv hais tias, “Gerrit, cov suab quaj ntawd yog tej qhov mob ntawm ib lub nroog.”
Thaum lub sij hawm ntawd, kuv hnov lwm tus lub suab quaj thiab pom lawv tej qhov mob. Muaj ib tug ntxhais hluas uas muag mis nyuj khov los ntawm ib lub laub thawb. Cov khob mis nyuj khov nyob hauv loj txaus rau ib dia mis nyuj khov xwb. Xyov yog tim li cas, tiam sis txawm muaj ib tug txiv neej loj tsawv thab tus ntxhais hluas ntawd. Ke qw ke thawb, nws thawb tus ntxhais hluas lub laub, ua rau nws cov khob mis nyuj khov nchuav. Kuv tsis muaj cuab kav ua dab tsi thaum tus yawm ntawd xuas nws ib txhais khau tsuam cov khob mis nyuj khov. Kuv tseem pom tau tus ntxhais hluas ntawd txhos caug hauv plawv kev, es sim cawm tej txhais khob uas tawg lawm, los kua muag si laws. Qhov uas kuv pom ntawd kuv pheej xav txog, yog ib lub cim qhia txog kev ua siab phem, kev ntxub ntxaug, kev tsis sib to taub uas peb coj ua ib leeg rau ib leeg.
Muaj dua ib tav su thaum kuv txiv wb nyob ze Paris, wb mus xyuas lub tsev teev ntuj nyob ntawm Chartres. Malcolm Miller,1 ib tug kws txuj txog lub tsev teev ntuj no, qhia wb txog peb xuv qhov rais ntawm Chartres uas tsuas xim rau. Nws qhia wb hais tias peb xuv qhov rais no qhia ib zaj dab neeg.
Thawj xuv qhov rais yog Adas thiab Evas tawm ntawm lub Vaj Edees mus.
Xuv thib ob hais txog zaj dab neeg piv txwv txog tus Xamalis Siab Zoo.
Xuv thib peb hais txog tus Tswv txoj Kev Rov Los Zaum Ob.
Ua ke, cov qhov rais uas tsuas xim rau hais txog peb lub neej uas yuav nyob mus ib txhis. Cov qhov rais no caw peb txais tos txhua tus neeg los rau hauv tus Khetos lub tsev so.2
iStock.com/digitalimagination
Ib yam li Adas thiab Evas, peb mus rau hauv ib lub ntiaj teb uas muaj pos chob.3
iStock.com/digitalimagination
Thaum peb tab tom taug kev mus rau Yelikaus, peb raug cib, raug sab, thiab raug mob.4
Txawm tias tsim nyog uas peb sib pab, los feem ntau peb hla kev mus sab tid, xyov yog vim li cas.
Tsis kav, vim Nws muaj kev hlub tshua, tus Neeg Xamalis Zoo nres thiab qhwv peb tej qhov mob siv dej cawv thiab roj txiv ntseej. Tej cim ntawm lub cim nco txog thiab lwm cov kab ke, cov cawv txiv hmab thiab cov roj ua rau peb xav txog Yexus Khetos txoj kev txawj kho peb sab ntsuj plig.5 Tus Xamalis Siab Zoo muab peb rau ntawm Nws tus zag los sis, hauv tej dab neeg, nqa peb rau ntawm Nws ob lub xub pwg. Nws coj peb los rau hauv lub tsev so, uas piv txog Nws lub Koom Txoos. Nyob ntawm lub Tsev So, tus Neeg Xamalis Zoo hais tias, “Ua zoo saib xyuas nws; … thaum kuv rov qab tuaj, kuv mam li them koj rov qab.”6 Tus Neeg Xamalis Zoo, ib lub cim txog peb tus Cawm Seej, cog lus tias nws mam li rov qab los, zaum no yuav yog muaj hwj huam thiab yeeb koob loj heev.
iStock.com/digitalimagination
Thaum lub caij Easter, Yexus Khetos caw peb rais los mus ua, ib yam li Nws, ib tug Neeg Xamalis Zoo, kom ua rau Nws lub Tsev So (Nws lub Koom Txoos) ua ib qho chaw nkaum ntawm tag nrho lub neej no tej kev mob doog ntshav thiab tej nag xob nag cua.7 Peb npaj rau lub sij hawm Nws Rov Los Zaum Ob thaum peb ua zoo rau “cov me tshaj plaws”8 txhua hnub ib yam li peb yuav ua rau Nws. “Cov me tshaj plaws” yog peb txhua tus.
Thaum peb nrog tus Neeg Xamalis Siab Zoo los rau hauv lub Tsev So, peb kawm tsib yam txog Yexus Khetos thiab peb tus kheej.
Qhov thib ib, peb los rau hauv lub Tsev So zoo li peb yog tam sim ntawd, nrog rau tej kev txhaum thiab tej yam tsis zoo uas peb muaj. Tiam sis peb txhua tus muaj tej yam uas peb ua tau kom pab tau lwm tus neeg. Peb txoj kev rov qab mus cuag Vajtswv yog ua ke mus. Peb sib koom siab yam li ua ib koog zej zog—txawm tias tiv kom dhau tej phaum mob, nag xob nag cua, thaj chaw kub hnyiab, teb chaws qhuav, los yog tej kev ua neej txhua hnub. Thaum peb sib sab laj ua ke peb txais kev tshoov siab, mloog txhua tus neeg, suav txhua tus muam, thiab rau tus Vaj Ntsuj Plig.
Thaum peb lub siab lub ntsws hloov thiab txais Nws lub meej mom ua peb lub meej mom,9 peb pom Nws thiab peb tus kheej hauv Nws lub Koom Txoos. Hauv tus Khetos, peb pom meej pem, tsis muaj kev ntxhov siab. Hauv Nws, peb muaj lub ntsiab coj peb los mus ua tej yam zoo, ua siab zoo, thiab rais los mus ua neeg zoo dua zuj zus mus. Hauv Nws, peb nrhiav tau kev ntseeg ruaj khov, kev ua siab dawb, kev hloov mus ua zoo, thiab kev tso siab rau Vajtswv. Nyob hauv Khetos lub Tsev So, peb nrhiav tau peb qhov kev sib raug zoo nrog Vajtswv Leej Txiv thiab Yexus Khetos thiab ntxiv dag zog rau qhov kev sib raug zoo ntawd.
Nws tso siab rau peb ua rau lub Tsev So peb tus kheej li, qhov chaw uas Nws yuav los nyob. Thaum peb muab peb tej kev txawj thiab tej kev rau rau siab pub rau Nws, Nws tej txiaj ntsim ntawm sab ntsuj plig kuj ntxiv dag zog thiab foom koob hmoov rau peb.10
Ib tug mej zeej uas txhais lus rau cov neeg Mev tau qhia kuv hais tias, “Txwj Laug Gong, kuv paub los ntawm tus Ntsuj Plig thiab lub txiaj ntsim hais lwm yam lus saib koj yuav hais li cas kom kuv thiaj txhais tau lus.”
Tej txiaj ntsim ntawm kev ntseeg thiab kev tso siab los, tshwm sim sib txawv raws li tej yam muaj los. Muaj ib tug muam uas txais kev nplij siab tom qab nws tus txiv tas sim neej vim yog tus mob COVID-19. Nws hais tias, “Kuv paub tias kuv tus txiv thiab kuv yuav nyob ua ke dua ib zaug ntxiv.” Hos lwm tus muam uas nws tus txiv raug mob COVID thiab, hais tias, “Kuv tau xav tias tsim nyog kuv taij thov nrog rau tus Tswv thiab cov kws kho mob kom ncua sij hawm me ntsis rau kuv tus txiv.”
Qhov thib ob, Nws caw peb los ua rau Nws lub Tsev So ua ib qho chaw dav thiab muaj kev hlub, es nyob ntawd, peb sib sau tau ua ke, muaj chaw rau txhua tus neeg. Ua Yexus Khetos cov thwj tim, peb ntseeg tias txhua tus neeg muaj vaj huam sib luag, tsis muaj ib pab pawg neeg uas nyob qis dua cov.
Peb yeej tos txais txhua tus neeg tuaj koom tej kev sib ntsib noj lub cim nco txog, lwm txoj kev sib ntsib thaum hnub Sunday, thiab tej yam ntxim saib ntxim ua.11 Peb ke pe hawm peb tus Cawm Seej, ke txawj xav ib leeg rau ib leeg. Peb pom thiab lees paub txhua tus neeg. Peb luag nyav, nrog cov uas tsis zaum lawv ib leeg xwb zaum ua ke, nug saib lawv hu li cas, suav cov ntseeg tshiab, cov kwv tij thiab cov muam uas rov qab tuaj koom, cov tub hluas ntxhais hluas, thiab txhua tus me nyuam yaus.
Xav txog yog tias peb yog lawv, peb txais tos peb cov phooj ywg, cov qhua tuaj, cov tsiv los nyob tshiab, cov muaj hauj lwm ntau uas ua ntau yam. Peb ib leeg quaj, zoo siab, thiab pab ib leeg. Thaum peb tsis ua raws li peb tej kev cai zoo, es ua siab ceev, tsis txawj xav, txiav txim rau lwm tus neeg, los yog xyeej lawv, peb yuav tsum sim ua zoo dua thiab ib leeg zam txim rau ib leeg.
Ib tse neeg tuaj Afikas teb tuaj uas nim no nyob hauv Amelikas Teb, hais tias, “Txij thaum thawj hnub uas peb ntsib lawv, cov mej zeej ntawm lub Koom Txoos yeej ua siab zoo thiab txais tos peb. Txhua tus ua rau peb xav tias peb nrog lawv koom ib tse neeg. Tsis muaj leej twg uas ua khib oom rau peb.” Leej txiv hais tias, “Phau Vaj Lug Kub Npaivnpaum qhia tias tej txiv uas txi los ntawm txoj moo zoo los ntawm tej cag uas cog rau hauv txoj moo zoo yam tob tob li.” Leej txiv thiab leej niam nkawd ob leeg hais tias “Hais txog cov tub txib, wb xav kom wb tus tub thiab wb tus ntxhais loj hlob tuaj ib yam li cov tub txib ntawd.” Cov kwv tij thiab cov muam, thov kom peb ua siab zoo txais tos txhua tus los rau hauv Khetos lub Tsev So.
Qhov thib peb, hauv Nws lub Tsev So, peb kawm hais tias kev ua zoo tag nrho yog nyob hauv Yexus Khetos, tsis yog kev zoo tag nrho ntawm lub ntiaj teb no. Lub ntiaj teb qhov zoo tag nrho uas pheej “zoo tag nrho li ib daim duab Insta” yog ib qho kev zoo tag nrho uas ua tau rau peb xav tias peb zoo tsis tsheej, es raug tau kev xyeej, kev liam, los sis kev nyiam. Qhov fab ntxeev, peb tus Cawm Seej Yexus Khetos paub txhua yam txog peb uas peb tsis xav cia leej twg paub, es Nws tseem hlub peb. Nws txoj moo zoo muab sij hawm rau peb hloov siab lees txim zaum thib ob thiab zaum thib peb,yog vim Nws tau theej peb lub txhoj.12 Nws caw peb txhua tus ua ib tug Neeg Xamalis zoo, tsis txhob txiav txim rau lwm tus neeg ntau thiab zam txim rau peb tus kheej thiab rau lwm tus neeg ib yam, tsis hais thaum peb sim ua raws li Nws cov lus txib ntxiv.
Peb pab peb tus kheej thaum peb ib leeg pab ib leeg. Muaj ib tse neeg kuv paub uas nyob ze ib txoj kev uas muaj muaj tsheb. Cov neeg taug kev mus los feem ntau yuav nres thiab thov kev pab. Muaj ib tag kis thaum kaj ntug tsev neeg ntawd hnov leej twg sib zog khob qhov rooj. Lawv sab nkees heev thiab txhawj xeeb txog saib leej twg yuav tuaj thaum 2 teev kaj ntug, thiab kheev lam lwm tus neeg yuav pab tau. Tiam sis tus neeg ntawd pheej sib zog khob, thiab lawv hnov nws qw nrov hais tias, “Kub hnyiab—nej lub tsev kub hnyiab!” Cov neeg Xamalis zoo yeej sib pab.
Qhov thib plaub, nyob ntawm Nws lub Tsev So, peb los koom ib koog zej zog ntawm txoj moo zoo uas muab siab npuab rau Yexus Khetos, uas muaj qhov tseeb txum tim rov qab los thiab cov yaj saub thiab cov thwj tim ua lub hauv paus, thiab dua ib zaj lus tim khawv txog Yexus Khetos—Phau Ntawv Maumoos. Khetos coj peb los rau hauv Nws lub tsev so thiab kuj coj peb los rau hauv Nws lub tsev thiab—lub tuam tsev dawb huv. Tus Tswv lub Tsev yog ib qho chaw uas, ib yam nkaus li rau tus neeg raug sab rau ntawm txoj kev Yelikaus, tus Neeg Xamalis Zoo yuav muab peb ntxuav thiab muab ris tsho rau peb hnav, npaj peb rov mus nyob hauv Vajtswv lub xub ntiag, thiab cia peb nrog Vajtswv tsev neeg koom ua ke nyob mus ib txhis li. Nws cov tuam tsev yeej qhib rau tag nrho cov uas ua neej raws li Nws txoj moo zoo, muaj siab ntseeg thiab mloog lus.
Tej kev xyiv fab txog ib lub tuam tsev yeej muaj qhov uas peb sib koom siab vim yog txoj moo zoo tiam sis tseem ua koob tsheej txog tej caj ces, tej kab lis kev cai, yam lus, thiab tiam neeg sib txawv. Nyob ntawm txoj kev khawb av rau lub Tuam Tsev Taylorsville Utah, muaj ib tug tub hluas 17 xyoo npe hu ua Max Harker uas qhia txog nws tsev neeg txoj kev ntseeg uas pib rau tiam neeg ua ntej dhau ntawm nws yawg suab Joseph Harker thiab nws poj niam, Susannah Sneath. Hauv Yexus Khetos txoj moo zoo uas txum tim rov qab los, peb txhua tus ua tau qhov uas txuas peb ib tiam neeg rau lwm tiam neeg.
Qhov kawg, qhov thib tsib, peb zoo siab uas Vajtswv hlub Nws cov me nyuam txawm peb yog haiv neeg twg los yog nyob li cas los xij, nyob hauv txhua lub teb chaws, haiv neeg, thiab yam lus, yeej muaj chaw rau txhua tus neeg hauv Nws lub Tsev So.
Tau 40 xyoo los lawm, cov mej zeej hauv lub Koom Txoos feem ntau tuaj txawv teb chaws tuaj. Txij thaum xyoo 1998, lub Koom Txoos cov mej zeej coob dua sab nraum Teb chaws Mes Kas thiab Kanadas. Txog thaum xyoo 2025, peb xav hais tias yuav muaj mej zeej ntawm lub Koom Txoos hauv Latin America coob ib yam li cov nyob Teb chaws Mes Kas thiab Kanadas. Txoj kev sau Leej Txiv Lihais cov xeeb leej xeeb ntxwv tab tom muaj raws li tej qhov uas yuav muaj los yav tom ntej. Cov ntseeg uas rau siab ntseeg, suav cov uas nyob thaj chaw uas cov pioneer nyob, tseem yog ib lub hauv paus rau kev rau siab thiab kev ua hauj lwm pab hauv lub Koom Txoos thoob ntiaj teb.
Tsis tas li ntawd xwb, cov mej zeej hauv lub Koom Txoos uas tiav nkauj tiav nraug lawm feem coob tsis tau yuav poj niam yuav txiv, los yog poj ntsuam yawg ntsuag, los yog raug sib nrauj lawm. Nov yog ib qho hloov loj heev. Nov suav ntau tshaj ntawm ib nrab cov poj niam hauv lub Koom Haum Niam Tsev thiab ntau tshaj ib nrab cov kwv tij tuav lub pov thawj hwj. Tau muaj li no raws ib tug qauv hauv lub Koom Txoos thoob ntiaj teb txij thaum xyoo 1992 thiab hauv lub Koom Txoos hauv Teb chaws Mes Kas thiab Kanadas txij thaum xyoo 2019.
Peb tsim nyog li cas rau ntawm tus Tswv thiab Nws lub Koom Txoos tsis yog nyob ntawm saib peb puas muaj poj niam muaj txiv tiam sis nyob ntawm saib peb puas coj ua raws li Yexus Khetos cov thwj tim zoo uas coj ruaj nrees.13 Cov neeg laus xav kom lwm cov neeg saib lawv ua neeg tiav nkauj tiav nraug lawm thiab lav ris lawv tej dej tej num thiab koom ua tej hauj lwm li neeg laus. Yexus Khetos cov thwj tim los ntawm txhua qhov txhia chaw los, txawm zoo li cas los xij, txhua tus muaj siab ntseeg, muaj tej kev xav ncaj ncees, tej kev txawj, thiab peev xwm foom koob hmoov rau lwm tus neeg thiab pab lawv. Peb txhua tus xav coj raws li Yexus Khetos nrog rau kev ntseeg kom hloov siab lees txim14 thiab kev xyiv fab uas kav ntev.
Hauv lub neej no, qee zaum peb tos ntsoov tus Tswv. Tej zaum peb tsis zoo npaum li peb cia siab thiab xav kom ua zoo dua nyob rau yav tom ntej. Muaj ib tug muam uas hais tias, “Qhov uas tos ntsoov tus Tswv kom tau Nws tej koob hmoov yog ib lub luag hauj lwm dawb huv. Tsim nyog lwm tus neeg yuav tsum tsis txhob pab peb tu siab, ua txuj hlub, los yog txiav txim rau peb, tsim nyog saib ua ib lub sam xeeb dawb ceev.”15 Mus txog thaum ntawd, peb ua neej nyob tam sim no, tsis tos kom lub neej pib.
Yaxayas cog lus tias: “Cov neeg uas cia siab ntsoov rau tus Tswv yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.”16
Peb tus Neeg Xamalis Zoo cog lus tias nws mam li rov qab los. Yuav muaj tej txuj ci tseem ceeb thaum peb ib leeg saib xyuas ib leeg zoo li Nws. Thaum peb los nrog lub siab mob thiab lub siab xav ua zoo,17 ces peb Yexus Khetos yuav ua peb lub suab, thiab puag peb nyob rau hauv Nws txhais tes uas nyab xeeb.18 Cov kab ke dawb huv ua rau peb koom siab koom ntsws los ntawm peb tej kev khi lus thiab “Vajtswv lub hwj chim”19 kom pab peb muaj lub siab xav ua ncaj thiab xav ua zoo. Nrog Nws txoj kev siab zoo thiab txoj kev ua siab ntev, Nws lub Koom Txoos yuav los ua peb lub Tsev So.
Thaum peb tsim chaw hauv Khetos lub Tsev So, es txais tos txhua tus neeg, tus Neeg Xamalis Zoo yuav kho peb kom zoo hauv peb lub neej. Nrog kev hlub dawb paug, peb Leej Txiv thiab Nws Leej Tub, Yexus Khetos, cog lus tias yuav muaj “kev kaj siab lug hauv lub ntiaj teb thiab txoj sia nyob mus ib txhis hauv lub neej tom ntej”20—“kom kuv nyob qhov twg los nej yuav nyob qhov ntawd thiab.”21 Kuv hais lus tim khawv li no los ntawm Yexus Khetos lub npe uas dawb ceev thiab dawb huv, amees.