Foom Koob Hmoov Tuav Nws lub Npe
Lub ntsiab rau peb txais lub pov thawj hwj yog kom cia peb foom koob hmoov rau lwm tus neeg sawv cev tam tus Tswv, pab li ntawd tuav Nws lub npe.
Kuv cov kwv tij, cov tub qhe hauv Vajtswv lub pov thawj hwj, yeej yog ib lub sam xeeb hais lus pub rau nej hmo no. Kuv saib nej rau nqi thiab ris nej txiaj. Thaum kuv nrog nej sib tham thiab hnov txog nej txoj kev ntseeg loj loj, ua rau kuv ntseeg hais tias lub hwj chim ntawm lub pov thawj hwj tab tom loj hlob tuaj hauv lub ntiaj teb, es muaj tej pawg thiab tej tug txiv neej tuav lub pov thawj hwj raws li kev ncaj ncees coob zuj zus tuaj.
Kuv hais ob peb feeb hmo no, tiam sis kuv xav hais rau nej cov uas xav siv nej lub pov thawj hwj pab lwm tus neeg zoo dua ntxiv. Nej paub hais tias nej raug txib kom ua rau nej txoj hauj lwm pab lwm tus neeg loj hlob tuaj.1 Tiam sis tej zaum nej xav paub saib kev rau siab ua nej txoj hauj lwm ntawd yuav txhais li cas rau nej.
Kuv yuav pib hais lus rau cov dis kas vim tej zaum lawv feem coob tsis tshua paub saib txoj kev ua kom lub pov thawj hwj tej kev pab loj hlob tuaj. Tej zaum cov txwj laug uas nyuam qhuav tsa ua txwj laug tshiab yuav xav mloog. Thiab ib tug npisov tshiab tej zaum yuav xav mloog thiab.
Yeej pab kuv uas kuv xav txog lub sij hawm yav nram ntej thaum kuv ua ib tug dis kas. $Kheev lam ib tug neeg tau qhia kuv lub tswv yim uas nim no kuv yuav muab rau nej. Tej zaum yuav tau pab kuv ua tag nrho tej hauj lwm ntawm pov thawj hwj uas tau los rau kuv txij thaum ntawd los—twb yog cov hauj lwm uas kuv txais niaj hnub nim no.
Lawv muab kuv tsa ua ib tug dikas hauv ib ceg ntseeg me me npaum li tias kuv yog tib tug dis kas thiab kuv tus tij laug Ted yog tib tug xib hwb. Peb yog tib tse neeg hauv ceg ntseeg ntawd. Tag nrho ceg ntseeg sib ntsib hauv peb lub tsev. Tus thawj coj ntawm lub pov thawj hwj rau kuv tus tij laug thiab kuv yog ib tug ntseeg tshiab uas nyuam qhuav txais lub pov thawj hwj thiab. Thaum ntawd kuv xav tias kuv tib txoj hauj lwm ntawm lub pov thawj hwj yog yais lub cim nco txog hauv kuv lub tsev chav noj mov xwb.
Thaum kuv tsev neeg nyaib mus rau lub xeev Utah, kuv los koom ib pawg dis kas loj tsawv. Thaum kuv xub mus rau txoj kev sib ntsib noj lub cim nco txog nyob ntawd, kuv pom cov dis kas—uas zoo li ib pab tug rog, tam li kuv xav—mus mus los los thaum lawv yais lub cim nco txog es zoo li ib pawg neeg uas tau xyaum ua ntau zaus.
Kuv ntshai heev yog li ntawd hnub Sunday tom qab ntawd kuv mus ntxov ntxov rau lub tsev sib ntsib kom nyob kuv ib leeg es tsis muaj leej twg pom kuv. Kuv nco qab tias yog Pawg Ntseeg Yalecrest nyob hauv Salt Lake City, thiab muaj ib tug mlom hauv tshav koom txoos. Kuv rau siab thov Vajtswv kom tau kev pab es tsis txhob yuam kev thaum kuv koom cov dis kas pab yais lub cim nco txog. Vajtswv teb kuv zaj lus thov txog Nws ntawd.
Tiam sis nim no kuv paub hais tias muaj dua ib txoj kev thov Vajtswv thiab xav hauv nruab siab thaum peb sim loj hlob tuaj ntawm peb lub pov thawj hwj tej hauj lwm pab. Lub tswv yim no los rau kuv thaum kuv to taub zuj zus tuaj hais tias yog vim li cas tib neeg txais lub pov thawj hwj. Lub ntsiab rau peb txais lub pov thawj hwj yog kom cia peb foom koob hmoov rau lwm tus neeg sawv cev tam tus Tswv, pab li ntawd tuav Nws lub npe.2
Twb yog tom qab kuv ua ib tug dis kas thaum kuv kawm saib qhov no txhais li cas tiag. Ua ib tug pov thawj hlob, kuv tau txoj hauj lwm mus xyuas ib lub tsev laus txoj kev sib ntsib noj lub cim nco txog. Lawv hais kom kuv yais lub cim nco txog. Thaum ntawd kuv tsis xav txog txoj kev yais los yog saib kuv ua zoo li cas thaum kuv yais lub cim nco txog, tsis yog li ntawd, kuv saib cov neeg laus txhua tus lub ntsej muag thiab xav txog lawv. Lawv coob tug los kua muag. Muaj ib tug poj niam saib kuv, tuav kuv tes tsho, thiab hais tias, “Auj, ua koj tsaug, ua koj tsaug.”
Tus Tswv tau foom koob hmoov rau kuv tej kev pab lwm tus neeg, kev pab uas tuav Nws lub npe. Hnub ntawd kuv tau thov Vajtswv kom tau ib txuj ci tseem ceeb los es tsis thov Vajtswv kom tau kev pab ua kuv lub luag hauj lwm zoo. Kuv tau thov Vajtswv kom cov neeg yuav hnov tau tus Tswv txoj kev hlub dhau ntawm kuv txoj kev pab lawv. Kuv tau kawm hais tias nov yog tus yawm sij rau txoj kev pab thiab foom koob hmoov rau lwm tus neeg tuav Nws lub npe.
Kuv hnov txog ib qho uas muaj los tsis ntev tas los no uas ua rau kuv xav txog txoj kev hlub ntawd. Thaum tag nrho lub Koom Txoos cov kev sib ntsib tso tseg vim yog phaum mob COVID-19, muaj ib tug kwv tij txhawb pab uas txais yuav ib txoj hauj lwm los ntawm nws pawg txwj laug tus thawj tswj hwm kom yais lub cim nco txog rau ib tug muam uas nws txhawb pab. Thaum nws hu mus ntsib tug muam thiab hais tias nws yuav npaj lub cim nco txog rau nws tus muam tsis tshua kam, tsis nyiam qhov uas tus kwv tij ntawd yuav tsum tawm nws lub tsev thaum muaj xwm txheej ceev thiab tus muam ntawd xav tias phaum mob yuav tsis kav ntev, tiam sis thaum kawg nws ho kam.
Thaum tus kwv tij tuaj txog tus muam lub tsev hnub Sunday yav sawv ntxov, tus muam muaj lus thov thiab. Xav kom nkawd mus rau lub tsev ntawm nws li ib sab thiab noj lub cim nco txog nrog nws tus neeg zej zog muaj 87 xyoo, puas tau? Tau tus npisov lus tso cai, tus kwv tij ntawd kam ua li ntawd.
Rau ntau lub lis piam, thiab ua ntau yam kom thiaj nyob sib nrug deb thiab ua raws li kev nyab xeeb, pawg neeg Ntseeg me me no sib sau txhua hnub Sunday noj lub cim nco txog ua ke. Ob peb daim khob cij thiab ob peb khob dej—tiam sis los kua muag ntau vim yog Vajtswv lub siab zoo.
Nyob nyob, tus kwv tij no, nws tsev neeg, thiab tus muam puav leej rov qab mus tshawj tau. Tiam sis tus poj ntsuam 87 xyoo ntawd, vim yog xav pov hwm nws zoo, tseem nyob tsev. Tus kwv tij txhawb pab no—nco ntsoov tias nws lub luag hauj yog rau tus poj ntsuam no tus neeg zej zog thiab tsis yog rau tus poj ntsuam ntawd—txawm yog li ntawd los tus kwv tij ntawd yeej meem mus rau tus poj ntsuam lub tsev txhua hnub Sunday kom muab lub cim nco txog tus Tswv yais rau nws.
Tus kwv tij no txoj kev pab ntawm lub pov thawj hwj, ib yam li kuv li hauv lub tsev laus thaum ntawd, yog muab los ntawm txoj kev hlub. Muaj tseeb tiag, tus kwv tij no tsis ntev tas los no nug nws tus npisov saib puas muaj lwm tus neeg hauv pawg ntseeg uas nws pab tau. Qhov uas nws xav ua kom nws lub pov thawj hwj txoj kev pab lwm tus neeg tau loj hlob tuaj thaum nws tuav tus Tswv lub npe thiab ua hauj lwm pab raws li tus Tswv paub qhia. Kuv tsis paub xyov tus kwv tij txhawb pab no puas tau thov Vajtswv, ib yam li kuv tau thov, rau cov neeg nws pab kom paub tias tus Tswv hlub lawv, tiam sis vim nws txoj kev pab yog tuav tus Tswv lub npe, yeej zoo ib yam li ntawd thaum kawg.
Tib qho muaj los thaum kuv thov Vajtswv ua ntej kuv siv lub pov thawj hwj foom koob hmoov rau ib tug neeg uas mob los sis xav tau kev pab li cas. Yeej muaj los ib zaug thaum nyob hauv ib lub tsev kho mob cov kws kho mob txhib kom kuv tsuag tsuag—tsis yog txhib kuv xwb—lawv txib kuv—siv lub pov thawj hwj foom koob hmoov rau tus neeg raug sab rau qhov lawv rawm maj heev. Kuv tau tos, thiab kuv tau foom koob hmoov rau nws. Thiab tus me ntxhais uas kuv foom koob hmoov rau hnub ntawd, tus uas cov kws kho mob xav tias yuav tuag, nws tsis tau xiam. Kuv yeej zoo siab heev uas hnub ntawd, kuv tsis tau xav txog kuv tus kheej xwb tiam sis kuv xav tias tus Tswv xav kom tus me ntxhais tau ib txoj koob hmoov. Thiab kuv paub tias kuv yuav foom koob hmoov dab tsi rau nws: kuv tau foom koob hmoov rau nws kom nws txais kev kho mob. Thiab nws tau rov zoo lawm.
Yeej muaj los ntau zaus thaum kuv foom koob hmoov rau ib tug neeg uas zoo li yuav tas sim neej, es muaj nws tsev neeg sawv ib ncig ntawm lub txaj, lawv puav leej cia siab tias txoj koob hmoov yuav kho tau tus neeg mob kom nyob ntev zog. Txawm tias kuv tsuas muaj ib nyuag feeb xwb, kuv thov Vajtswv pab kuv paub saib tus Tswv xav kom kuv foom koob hmoov li cas tuav Nws lub npe. Thiab kuv thov saib Nws xav foom koob hmoov li cas rau tus neeg thiab tsis yog kuv los sis cov neeg sawv ib ncig xav. Kuv yeej los pom tias txawm tias ib txoj koob hmoov tsis yog raws li lwm tus neeg lub siab xav rau lawv tus kheej los sis lawv tus neeg hlub ntawd, tus Ntsuj Plig yeej tshoov lawv lub siab kom tau kev paub tseeb thiab kev nplij siab tsis yog kev poob siab ntsus.
Tib txoj kev tshoov siab los thaum cov yawg suab yoo mov thiab thov Vajtswv pab coj lawv foom txoj koob hmoov uas tus Tswv muaj rau ib tug neeg twg. Ib zaug ntxiv, kuv tau hnov tej koob hmoov uas ua rau kuv xav tsis thoob, thiab kuj ua rau tus txais txoj koob hmoov ntawd xav tsis thoob thiab. Muaj tseeb tiag, txoj koob hmoov yog los ntawm tus Tswv los—cov lus ceeb toom thiab cov lus tseg tseg uas hais tuav Nws lub npe. Tus yawg suab txoj kev thov Vajtswv thiab txoj kev yoo mov tau nqi zog los ntawm tus Tswv.
Ua ib tug npisov, kuv kawm tias thaum kuv xam phaj cov neeg kuv yuav tsum thov txog tus Tswv kom pab kuv paub saib Nws xav kom tau li cas rau tus neeg uas kuv xam phaj ntawd, es muab tej kev tshoov siab rau kuv cais tawm ntawm kuv tej kev xav tau xav yuav. Qhov no nyuaj heev yog tias tus Tswv, raws li Nws txoj kev hlub, xav foom koob hmoov rau ib tug neeg dhau ntawm kev qhuab ntuas. Yeej yog ib yam uas yuav tsum xyuam ua kom paub tseeb saib tus Tswv xav tau li cas tawm ntawm qhov uas koj xav los sis tus neeg xav.
Kuv ntseeg tias peb ua tau rau peb lub pov thawj hwj txoj kev pab lwm tus neeg loj hlob tuaj hauv peb lub neej no thiab tej zaum tom qab lub neej no thiab. Qhov ntawd nyob ntawm saib peb puas yuav rau rau siab nrhiav kom paub tus Tswv lub siab xav thiab mloog Nws lub suab kom peb yuav paub zoo dua saib Nws xav ua dab tsi rau tus neeg uas peb ua hauj lwm pab sawv cev tam Nws. Qhov loj hlob tuaj ntawd tej zaum yuav maj mam tuaj. Tej zaum yuav los zuj zus, tiam sis yeej yuav los. Tus Tswv cog lus tias yuav muaj li nram qab no:
“Vim cov uas rau siab ua kom tau ob lub pov thawj hwj uas kuv tau hais txog no, thiab rau siab ua tej uas Vajtswv hu lawv ua, ces tus Ntsuj Plig yuav ua rau lawv hloov ua dawb huv kom lawv lub cev hloov dua tshiab.
“Lawv hloov los ua Mauxes thiab Aloos cov tub thiab ua Anplaham cov tub ki, thiab ua lub koom txoos thiab lub nceeg vaj, thiab ua cov neeg uas Vajtswv tau xaiv tseg lawm.
“Thiab tag nrho cov uas txais lub pov thawj hwj no txais yuav kuv, tus Tswv hais li.”3
Yog kuv zaj lus tim khawv hais tias cov yawm sij ntawm lub pov thawj hwj tau txum sim rov qab los rau tus Yaj Saub Joseph Smith. Tus Tswv cov tub qhe tau tshwm sim los saum ntuj los kom txum tim lub pov thawj hwj rov qab los npaj rau tej yam muaj los tseem ceeb uas twb muaj lawm thiab rau tej uas tseem yuav muaj los. Yuav muab Ixayees sib sau ua ke. Tus Tswv cov neeg yuav npaj lawm rau Nws txoj Kev Los Zaum Ob. Txoj Kev Txum Tim Txoj Moo Zoo yuav txuas ntxiv mus. Tus Tswv yuav qhia Nws lub siab xav rau Nws cov yaj saub thiab Nws cov tub qhe.
Tej zaum nej yuav xav tias nej me me piv rau tej yam uas tus Tswv yuav ua. Yog tias nej xav li ntawd, kuv caw nej thov Vajtswv thiab nug saib tus Tswv saib nej li cas. Nws paub nej tiag, Nws muab lub pov thawj hwj rau nej, thiab qhov uas nej sawv thiab ua kom lub pov thawj hwj ntawd loj hlob tuaj tseem ceeb rau Nws vim Nws hlub nej thiab Nws tso siab rau nej kom tuav Nws lub npe foom koob hmoov rau cov neeg uas Nws hlub.
Kuv foom koob hmoov rau nej tam sim no kom hnov Nws txoj kev hlub thiab Nws txoj kev tso siab rau nej los ntawm lub npe ntawm tus Tswv Yexus Khetos, amees.