Kuv Nyiam Saib lub Tuam Tsev
Yog nyob hauv lub tuam tsev uas peb txais tau kev nplij siab vim peb paub tias peb yuav nrog peb tsev neeg nyob tom qab kev tuag thiab mus ib txhis li.
Kuv cov kwv tij thiab cov muam, kuv zoo siab uas kuv muaj lub cib fim nrog nej nyob hauv tuas thib ib ntawm lub tuam rooj sab laj. Cov uas tau hais lus, cov nkauj, thiab tus uas thov Vajtswv tau coj tus Ntsuj Plig los—thiab ua rau peb txais tau txoj kev kaj thiab kev cia siab.
Kev xav li ntawd ua rau kuv nco txog thawj hnub uas kuv tau nkag mus hauv lub Tuam Tsev Salt Lake. Kuv yog ib tug tub hluas. Kuv niam kuv txiv yog ob tug uas nrog kuv mus hnub ntawd. Nyob haud, nkawd nres ib pliag thaum ib tug uas ua hauj lwm hauv lub tuam tsev tos txais peb. Kuv twb mus tom ntej me ntsis, nyob kuv ib leeg rau ib me pliag.
Ib tug poj laug uas muaj plaub hau dawb thiab hnav ib daim tiab dawb zoo nkauj tau ntsib kuv. Nws saib kuv, luag nyav ces nws hais lus ntxhi hais tias, “Nyob zoo koj tuaj rau lub tuam tsev, tus Nus Eyring.” Tau ib me pliag kuv xav tias nws yog ib tug tim tswv vim nws paub kuv lub npe. Kuv tsis nco qab tias muaj ib daim ntawv me me uas sau kuv lub npe tso rau ntawm kuv lub ntsej tsho xuv.
Kuv mus ob peb ruam tom ntej ces kuv nres. Kuv ntsia saud rau qab nthab siab siab uas ua rau lub chav ntawd ci ci heev zoo li twb qhib plho pom tau lub ntuj. Thaum lub sij hawm ntawd, ua rau kuv xav hauv kuv lub siab txog tej lus meej no: “Kuv twb nyob hauv qhov chaw ci ntsa iab yav tas los lawm.” Tiam sis tom qab ntawd tej lus no tau los kiag rau hauv kuv lub siab, tsis yog los ntawm kuv lub suab, hais tias: “Tsis yog, koj tsis tau tuaj rau qhov chaw no dua. Koj nco txog ib lub sij hawm ua ntej koj yug los. Koj twb nyob hauv ib qho chaw dawb huv zoo li no.”
Nyob rau ntawm peb cov tuam tsev sab nraud, peb sau cov lus no “Kev Dawb Huv rau tus Tswv.” Kuv paub tej lus no muaj tseeb. Lub tuam tsev yog ib qho chaw dawb huv es kev tshwm sim yuav los yooj yim rau peb yog tias peb qhib siab thiab peb tsim nyog txais.
Tib hnub ntawd kuv twb rov qab hnov tib tug Ntsuj Plig ntawd. Txoj kab ke hauv lub tuam tsev muaj ib co lus uas ua rau kuv muaj kev kub lug hauv kuv lub siab uas pom zoo tias tej yam uas lawv txoj kev ua yeeb yam muaj tseeb. Qhov uas kuv xav yog ib yam txog yav tom ntej thiab qhov ntawd twb muaj tseeb 40 xyoo tom qab ntawd thaum tus Tswv hu kuv ua hauj lwm pab.
Kuv twb xav ib yam li ntawd thaum kuv yuav poj niam hauv lub Tuam Tsev Logan Utah. Thawj Tswj Hwm Spencer W. Kimball tau ua kev cai sib khi ntawd. Nws tsis hais lus ntau, tiam sis nws tau ntuas wb li no: “Hal thiab Kathy, cia li ua neej xwv kom thaum tus Tswv hu neb, ces yuav yooj yim rau nej mus.”
Thaum nws hais tej lus ntawd, kuv pom meej meej hauv kuv lub siab, muaj ntau yam xim, ib lub toj thiab ib txoj kev ntxhab uas mus txog saum toj. Ib txoj laj kab dawb nyob rau ntawm txoj kev sab laug thiab tsis pom lawm thaum txog ib kab ntoo nyob saum toj. Pom ib qho me ntsis ntawm ib lub tsev dawb dhau cov ntoo ntawd.
Ib xyoo tom qab ntawd, kuv nco qab lub toj ntawd thaum kuv tus yawm txiv tsav tsheb thauj wb nyob ntawm txoj kev ntawd. Yeej yog qhov uas kuv pom thaum Thawj Tswj Hwm Kimball hais lus ntuas wb nyob hauv lub tuam tsev.
Thaum peb txog rau ntawm saum toj, kuv yawm txiv nres nyob rau ntawm lub tsev dawb. Nws qhia wb tias nws thiab nws tus poj niam yuav thaj av ntawd thiab nws xav kom nws tus ntxhais thiab kuv nyob hauv lub tsev rau cov qhua. Nkawd yuav nyob hauv lub tsev loj, ze li ob peb fiv xwb. Yog li ntawd, nyob rau 10 xyoo uas wb nyob hauv lub tsev zoo kawg ntawd, kuv thiab kuv tus poj niam wb yuav hais yuav luag txhua hnub hais tias, “Wb yuav tsum zoo siab txog qhov no, vim wb yuav nyob no tsis ntev.”
Tus thawj coj kev kawm ntawv hauv lub Koom Txoos hu kuv, Neal A. Maxwell. Tam sim ntawd twb muaj raws li Thawj Tswj Hwm Kimball txoj kev ceeb toom kom wb txawj “yooj yim mus.” Yog kev hu kom kuv tawm mus rau ib qho chaw zoo kawg nkaus ua hauj lwm hauv ib qho chaw uas kuv tsis paub txog hlo li. Wb tsev neeg twb npaj mus thaum lub sij hawm ntawd vim muaj ib tug yaj saub, nyob hauv ib lub tsev dawb huv, ib qho chaw uas txais kev tshwm sim, pom ib lub sij hawm yav tom ntej wb thiaj li tau npaj zoo lawm.
Kuv paub tias tus Tswv cov tuam tsev yog tej qhov chaw dawb huv. Kuv hais txog cov tuam tsev hnub no vim kuv xav kom peb xav ua neeg tsim nyog thiab npaj peb tus kheej rau tej cib fim mus rau lub tuam tsev uas peb yuav muaj thaum yav tom ntej.
Qhov uas ua rau kuv xav ua neeg tsim nyog mus rau lub tuam tsev yog qhov uas tus Tswv tau hais txog Nws cov tuam tsev dawb huv:
“Thiab npaum li uas kuv cov neeg yuav ua ib lub tsev los rau kuv los ntawm tus Tswv lub npe, thiab tsis txhob pub ib yam dab tsi tsis huv los mus rau haud, kom lub tsev tsis txhob qias, ces kuv lub yeeb koob yuav nyob rau haud;
“Muaj tseeb tiag, thiab kuv lub yeeb haum yuav nyob ntawd, vim kuv yuav los rau haud, thiab tag nrho cov muaj lub siab dawb uas tuaj rau hauv yuav pom Vajtswv.
“Tiam sis yog hais tias ua rau lub tsev qias ces kuv yuav tsis los rau haud, thiab kuv lub yeeb koob yuav tsis muaj nyob ntawd; vim kuv yuav tsis los rau hauv tej tuam tsev tsis dawb huv.”1
Thawj Tswj Hwm Russell M. Nelson tau qhia meej rau peb tias peb “pom” tus Cawm Seej nyob hauv lub tuam tsev vim peb los paub txog Nws. Thawj Tswj Hwm Nelson hais li no tias: “Peb to taub Nws. Peb to taub Nws txoj hauj lwm thiab Nws lub yeeb koob. Thiab peb pib to taub Nws lub neej yeej pab txhua tus mus ib txhis li.”2
Yog nej los sis kuv mus rau lub tuam tsev es peb tsis yog neeg dawb huv txaus, ces peb yuav tsis txawj to taub, los ntawm tus Vaj Ntsuj Plig Dawb Huv lub hwj chim, txog tus Cawm Seej tej lus qhia txog sab ntsuj plig uas peb txais tau hauv lub tuam tsev.
Thaum peb tsim nyog txais tej lus qhia ntawd, ces los ntawm peb txoj kev mus rau hauv lub tuam tsev, peb yuav muaj kev cia siab, kev xyiv fab, thiab kev txawj xav zoo nyob thoob plaws peb lub ntiaj teb. Kev cia siab, kev xyiv fab, thiab kev txawj xav zoo ntawd los yuav muaj dhau los ntawm cov kab ke uas ua hauv cov tuam tsev dawb huv. Yog nyob hauv lub tuam tsev uas peb txais tau kev nplij siab vim peb paub tias peb yuav nrog peb tsev neeg nyob tom qab kev tuag thiab mus ib txhis li.
Ntau xyoo tas los, thaum kuv ua hauj lwm ua ib tug npisov, ib tug tub hluas zoo nraug tsis tshua xav ua raws li kuv caw nws kom hloov ua neeg tsim nyog nrog Vajtswv nyob thiab nrog nws tsev neeg nyob tas mus li. Nws qhia kuv txog tej lub sij hawm zoo nrog nws cov phooj ywg. Kuv cia nws hais lus. Ces nws qhia kuv txog ib lub sij hawm thaum muaj kev lom zem, thaum txhua yam nrov nrov, ces ua ciav nws paub kiag tias nws kho siab heev. Kuv nug nws seb tau muaj li cas. Nws hais tias nws nco qab txog ib lub sij hawm thaum nws yog ib tug me tub, nws zaum saum nws niam txhais ceg, es nws niam puag khawm nws. Rau ib me pliag thaum nws hais zaj ntawd, nws los kua muag. Kuv hais rau nws txog qhov uas kuv paub muaj tseeb: “Tib txoj kev koj yuav nrog koj tsev neeg mus ib txhis yog qhov uas koj ua ib tug neeg tsim nyog txais thiab pab lwm tus txais kab ke sib khi hauv lub tuam tsev.”
Peb tsis paub tias kev txheeb ze nrog peb tsev neeg nyob hauv lub ntuj ntsuj plig yuav zoo li cas los sis yuav muaj li cas tom qab peb sawv rov los. Tiam sis peb paub tias tus yaj saub Eliyas tau los raws li tus Tswv cog lus kom muab cov txiv lub siab tig mus rau cov me nyuam thiab cov me nyuam lub siab tig mus rau cov txiv.3 Thiab peb paub tias peb txoj kev zoo siab mus ib txhis nyob ntawm qhov uas peb ua zoo npaum li peb ua tau kom muab kev zoo siab uas kav ntev rau peb cov txheeb ze coob.
Kuv xav caw tsev neeg uas tseem muaj txoj sia kom lawv ua neeg tsim nyog txais thiab hwm txoj kab ke sib khi hauv lub tuam tsev. Nov yog ib feem ntawm kev muab Ixayees sau los ua ke hauv hnub nyoog kawg nyob ntawm ob sab ntawm daim ntaub thaiv.
Ib lub cib fim zoo tshaj plaws yog thaum peb tsev neeg tseem hluas. Thaum lawv yug los lawv muaj Khetos txoj Kev Kaj ua ib lub txiaj ntsim. Ua rau lawv paub tias dab tsi yog yam zoo thiab dab tsi yog yam phem. Yog li ntawd, qhov uas lawv pom ib lub tuam tsev los sis daim duab txog ib lub tuam tsev yuav pab lawv xav ua neeg tsim nyog nkag mus haud.
Ces hnub ntawd yuav los thaum lawv yog tub hluas ntxhais hluas es lawv txais tau ib daim ntawv tso cai nkag tuam tsev ua kev cai raus dej rau cov neeg tuag hauv lub tuam tsev. Thaum lub sij hawm ntawd, lawv yuav kawm ntxiv tias cov kab ke ntawm lub tuam tsev yeej qhia txog tus Cawm Seej thiab Nws txoj Kev Theej Txhoj. Thaum lawv xav tias lawv pab ib tug neeg hauv lub ntuj ntsuj plig muaj cib fim ntxuav lawv tej kev txhaum mus, ces lawv haj yam yuav paub tias lawv pab tus Cawm Seej ua Nws txoj hauj lwm dawb huv foom koob hmoov rau peb Leej Txiv Saum Ntuj Ceeb Tsheej ib tug me nyuam.
Kuv twb pom lub hwj chim ntawm lub sij hawm ntawd hloov ib tug ntxhais hluas. Ntau xyoo tas los kuv tau nrog kuv ib tug ntxhais mus rau lub tuam tsev thaum tav su. Nws yog tus kawg uas tau ua ib tug sawv cev hauv qhov chaw ua kev cai raus dej. Lawv thov kuv tus ntxhais nyob ntev me ntsis ntxiv kom ua cov kab ke rau tag nrho cov neeg uas tau npaj lawv npe lawm. Nws hais tias nws kam ua li ntawd.
Kuv saib thaum kuv tus me ntxhais nkag hauv lub dab ua kev cai raus dej. Lawv pib muab nws ua kev cai raus dej. Dej ntws mus rau ntawm kuv tus me ntxhais lub ntsej muag txhua zaus tau muab nws rub tawm cov dej los. Lawv pheej rov qab nug nws hais tias, “Koj puas kam ua ntxiv?” Txhua zaus nws hais tias nws kam ua.
Vim kuv yog nws txiv uas txhawj heev, kuv pib cia siab tias lawv mam li tso nws mus es tsis tas ua ntxiv. Tiam sis kuv nco qab thaum lawv thov nws seb nws puas kam ua ntxiv nws hais lus ruaj nrees teb hais tias “Kam mas.” Nws twb nyob mus txog thaum tau muab tus kawg ua kev cai raus dej los ntawm Yexus Khetos lub npe.
Thaum kuv tawm hauv lub tuam tsev mus hmo ntawd, kuv twb xav txog qhov uas kuv tau pom. Twb tau muab ib tug me nyuam txhawb nqa thiab hloov rau kuv pom thaum ua hauj lwm pab tus Tswv nyob hauv Nws lub tsev. Kuv tseem nco qab txoj kev kaj thiab kev kaj siab lug thaum wb taug kev tawm hauv lub tuam tsev mus.
Ntau xyoo twb dhau mus lawm. Nws tseem hais tias nws kam ua raws li tus Tswv xav kom nws ua ntxiv thaum nyuaj ua li ntawd. Kev ua hauj lwm hauv lub tuam tsev yuav hloov peb thiab txhawb nqa peb li ntawd. Kuv thiaj li cia siab rau nej thiab nej tsev neeg tag nrho kom nej yuav xav ua thiab rau siab ua neeg tsim nyog nkag mus hauv tus Tswv lub tsev ntau npaum li nej ua tau.
Nws xav tos txais nej nyob ntawd. Kuv thov kom nej yuav sim pab Leej Txiv Saum Ntuj Ceeb Tsheej cov me nyuam xav mus rau qhov chaw no, qhov chaw uas lawv yuav nyob ze Nws, thiab kom nej yuav caw nej cov poj koob yawm txwv ua neeg tsim nyog nrog Nws thiab nrog nej nyob mus ib txhis.
Tej lus no yog peb li:
Kuv yeej nyiam saib lub tuam tsev.
Muaj ib hnub kuv yuav mus
Kom hnov tus Ntsuj Plig Dawb Huv,
Kom mloog thiab thov Vajtswv.
Vim lub tuam tsev yog Vajtswv lub tsev,
Qhov chaw zoo nkauj ntawm kev hlub
Kuv yeej yuav npaj siab thaum kuv tseem hluas;
Li no yog kuv tej dej num.4
Kuv hais lus tim khawv tias peb yog Leej Txiv Saum Ntuj Ceeb Tsheej cov me nyuam uas Nws hlub heev. Nws tau xaiv Nws Leej Tub uas Nws Hlub, Yexus Khetos, los ua peb tus Cawm Seej thiab tus Txhiv Dim. Tib txoj kev kom rov qab nrog Nkawd nyob thiab nrog peb tsev neeg yog los ntawm cov kab ke hauv lub tuam tsev dawb huv. Kuv ua tim khawv tias Thawj Tswj Hwm Russell M. Nelson tuav thiab siv tag nrho cov yawm sij pov thawj hwj uas ua rau peb txais tau txoj sia nyob mus ib txhis rau tag nrho Vajtswv cov me nyuam. Kuv ua tim khawv li no los ntawm Yexus Khetos lub npe dawb ceev, amees.