Mengeluolu er a Chedaol Lulekrael el Uchetemel a Llechud
A klaumera er kid er a chedaol ulekrael a mesterir a Uriul-klebesei el Santo a tokubets el ngerachel el mengeluolu e mesebechakl er a Uchetemel a llach er a Beluu er a Merikel me a osisechakl me a llach er a ikel basio el de kiei er ngii.
Chelechal dengara meringel el taem, e ak mla omelchesiu el mo mesaod el kirel a ulekrael el Uchetemel a llach er a Beluu er a Merikel. Tial Uchetemel a llach a klou a belkul el kirir a rechedal a ikelesia el ngara Beluu er a Merikel, eng di ng dirrek luchelel a betok el uchetemel a llach er a beluulechad el rokir.
I.
A uchetemel a llach a dodai er a kabelment. Ngochotii a teletelel me a olkael er a klisichel a kabelment. A Uchetemel a llach er a Beluu er a Merikel a kot el chuodel llechukl el uchetemel a llach el dirk mesisiich er chelechal sils. Me ngulemuchel el mekedmokl lokiu a mekesai el beluu, eng di ngmocha okesiu el mo er a beluulechad. Chelecha el sils, e a bek el beluu ng di kldei a diak a mla mo llechukl a uchetemel a llach er tir.1
Chelsel a cheldechedechak eng diak kusaod a ngii di el chelechad er a balatiks a lechub e ngii di el cheldebechel. Ak mesaod el kirel a Uchetemel a llach er a Beluu er a Merikel, el bla kusuub er ngii el betok er a okolem el rak. Ak mengedecheduch lultuil ak siluub er a kot lurerek el chad er a llach el mo er a Chief Justice er a Kort er a Beluu er a Merikel. Ak mengedecheduch lultuil er a teruich me a eim el rak el kulisechakl a tekoi er a llach me a edei me a tedobech el rak el kchad er a llach er a Supreme Court er a Beluu er a Utah. E sel kmal ngaruchei, e ak mengedecheduch lultuil er a okedei me a euid el rak el Apostol er a Jesus Kristo, el kirek el mesuub a belkul a ulekrael Uchetemel a llach er a Beluu er a Merikel el kirel a urerel a mla moluut el Ikelesia er Ngii.
A Uchetemel a llach er a Beluu er a Merikel a tokubets le Dios a ulechotii el kmo Ngii a mo “kudmeklii” el kirel a lemeltir me a ulekerreuir a rokui el chad(Doctrine and Covenants 101:77; dirrek mesa bades 80). Sei a uchul e tial uchetemel a llach a klou a belkul er a Ikelesia er a Jesus Kristo er a Uriul-klebesei el Santo er a beluulechad el rokir. A otireklel a llach er a chelsel er a kakerous el beluu er a beluulechad a kmal di mo iior er a ikal beluu lomdasu.
Ngera mle moktek er a Dios er a teketekel a Uchetemel a llach er a Beluu er a Merikel? Kede mesang er a osischeklel a mimokl lomelilt. Sera kot luchelel a mlamoluut el Ikelesia, e a Uriul-klebesei el Santo a mla er a ringel er a berrotel lodechelakl me a dirrek lodechelakl er a beluu. A telkib el uchul tiang sel lomtok el kirel a ousibai er a tara chad el mla er ngii er a Beluu er a Merikel. Chelsel aikaikid el kerior el teletael, e a Dios a ulechotii lokiu a Profet Joseph Smith a diak a ulebengelel klemrang el kirel Osischeklel.
A Dios a mla mesterir a rengelekel a iilmokl el melilt—el klisiich el di kid lomdasu e melilt. Sel kot lungil teletael er a usbechelel a mimokl lomelilt a sel ngarbab el iilmokl el chad a di ngii lomdasu e meruul loltirakl aikel soal a uldesuel. Me a, chedaol ocholt a smodii, el kmo me a chad bol ngerchelel a kngtil er sel taem er a kerkeriil ruriul(Doctrine and Covenants 101:78). A leuaisei, e a Rubak a mla chotii el kmo, ng diak el melemalt el teletael el tara chad a mo sibil a tang (Doctrine and Covenants 101:79 Tia bleketakl el kmo a ousibai er a tara chad a mekngit. Ea doltirakl er a osisiu el osisechakl, eng mekngit er a rechad er a beluu a lak a ngerir el melilt er a re mo mengeteklel a beluu a lechub omeruul llach.
II.
A klaumera er kid el kmo a Uchetemel a llach er a Beluu er a Merikel a mle chedaol ulekrael a diak el belkul a kmo a bek el tekoi a mlei el mla er a chedaol ocholt, el uaia iidisir a rechad lomtechei a bek el beluu a lechub a rekrir tirkal chad.2 A Uchetemel a llach a dimlak “di lmelluches er a cherrengelel el merekong,” ng millekoi a President J. Reuben Clark. “A domes er ngii,” ng millekoi, “kede oumerang el kmo ng kirel mukeroul e mekedmokl el kirel a ngeldechel me a teletelel a beluuelchad.”3 Okesiul tiang, a ulekrael ngeldechel a mlo torbengii a klsibai er a rechad e milsterir a lemeltir a redil el sengkyo. Ma leuaisei, ng diak desa ulekrael lokesiul er a chelsel a rua Supreme Court el melodech er ngii.
Ak oumerang sel Uchetemel a llach er a Beluu er a Merikel a ngarngii a bekord el eim el chedaol ulekrael el olisechakl.4
A kot a osisechakl el kmo a uchul a klisichel a kabelment a rechad. Sera taem el klisiich e lulemdasu a rechad el kmo ng mei lokiu a chedaol lemeltir a re king a lechub a klisiiich er a klsoldau, a mlengodech ruriul el mesterir a rechad a iilmokl er a klisiich. A resemmong er a llomes el chad a uleldubech er ngii el tekoi, eng di a Uchetemel a llach er a Beluu er a Merikel a mle kot le mo oltaut er ngii. A llemalt er a klisiich er a rechad a diakel belkul a kmo a rmekngit el chad a lechub a chelechad er a rechad a sebechir el soiseb e omekdakd a lechub e te orrimel loltaut a teletael er a kabelment. A Uchetemel a llach a kildmeklii a mimokl el uchetemel a llach, el rechad a sebechir lousbech a klisichir lokiu a rtelutk lomtechei er tir.
A ongeru el chedaol tekoi a sel bingel a klisiich er a delongelel a klou el amt me a mekekerei el beluu. Chelsel tial teletael er a klou el amt el dengarngii, e a ikal tekoi a bebil er a taem eng mla mengodech lokiu a ulekrael lomeldechel, el uaikel merrob a teletael er a klsibai me a lemeltir a redil el sengkyo, el kdilu ruchei. A klou a ultutelel a kmo, a Uchetemel a llach er a Beluu er a Merikel a tomer er a klou el amt meng diak el ngai a mui el klisiich, e ngmai a bebil er a klisichel a amt el “msa ikel mekekerei el beluu, a lechub a rechad.”5
A tara ulekrael osisechakl a bingel a klisiich. Dart el rak ruchei er a 1787 Constitutional Convention, e a English Parliament a milchelii a klekakeakl er a klisichel a melib a llach me a oltaut a llach er a lengai a bebil er a klisiich er a king. A mle moktek er sel American convention a mo iimakla ngerachel er a meruul a llach, oltaut a llach, me a omiich a llach me a ikal kldei lingukl a sebechel lomes a urerel a ta me a tang.
A ongeua llach a kmal klou a belkul el kirel a llemeltir a dersta el chad e ngosengesii a klisischel a kabelment er sel Bill of Rights, el mlengai lokui a amendment er a edei el rak ruriul er a bo loureor tial Uchetemel a llach. A Llach el kirel a Iilmokl a diak el beches el tekoi. Taikid, eng mlo taut aikel llach el mle kot lomuchel er a beluu er a England, lulemuchel er sel Magna Carta. A remilluches er tial Uchetemel a llach a mle medengei aikang le bebil er a telbiil er a chelsel a mle osisiu.
A le mlak a Bill of Rights, e a beluu er a Merikel a mlo diak el sebechel beluu er a Olutel a ebangkelio, lulemuchel er a tela el rak ruriul. Ng mlarngii a chedaol ulekrael er sel mle kot el tekoi el kirel a kmo ng diak a skeng a tekoi er a klechelid el kirel a obis buai,6eng di sel iilmokl er a klechelid el mla er a Kot el Amendment a mle klou a belkul. Kede dirrek el mesa chedaol ulekrael er se Kot el Amendment el kirel a mimokl lomelekoi me a bebil er a tekoi el ngara chelsel tial ngeldechel, el uaia ultutakl el kirir a remelemall a llach el chad.
A ongeim e ulebongel, e ak mesa chedaol ulekrael er a klou el moktek er tial rokir el Uchetemel a llach. Kede mo mechedereder lokiu a llach e diak el dersta el chad, ea otirekled a mo er a Uchetemel a llach me a osisecheklel me a teleletel, e diak el bo er a ngidi elchad el ngarngii a deruchelel. Chelsel tial teletael, a rokui el chad a di osisiu er a llach. Aika el llach a merrob a klisiich er a dereder el ngii a mla tomall a bebil er a mimokl el beluu. Ng dirrek el belkul a kmo ng diak a tara ikal kldei blai er a kabelment el mo mengederer er a tang a lechub e lorrob er a rebebil er a lemeltir loltirakl er a uchetemel a llach el merritel er a ta me a tang.
III.
Meng diak el iior el kmo a chedaol ulekrael olischakl er a Uchetemel a llach er a Beluu er a Merikel, ngdi el sekum eng meruul lokiu a diak el mellemalt el rechad ea ikel urerir a diak el sebechel mo tmaut. A meklou a belkul tekoi er a llach, el uaia llach el kirel a deleuill er a telungalek, a mla mengubet er aikel mekekerei el beluu lokiu a klou el amt. A Kot el Amendment el kirel a mimokl lomelekoi a lebebil er a taem eng mechitechut er a kuk bebil er a diak le meklou a belkul tekoi. A llach el kirel a bingel a klisiich a dimla mondai lokiu a teletael er a tara ingeklel a amt el ngii oltaut a klisiich el kuk ngerchelel a tara ingukl er a amt.
E ngarngii a lmuut el bebil er a ulekdakd el melemall a llach er a chelsel a Uchetemel a llach er a Beluu er a Merikel. A teletelel a Uchetemel a llach a ngomedang er tirkel blak a rengrir melodech a teletael er a beluu er chelechang, e diak loltirakl er a mimokl el kabelment. A klisichel a Uchetemel a llach a mengedechang er a rekohosia a lechub e te ngarbab el chad el diak loltirakl a llach er a chelsel. A klisichel a Uchetemel a llach a kekeringang er tirkel lomdasu el kmo ng kuk di skeng el medechel a lechub eng kerbai, ng diak el ikel klisichel luchul a ngerachel e kekeringii a klisichel a amt.
IV.
A klaumera er kid er a chedaol ulekrael a mesterir a Ruriul-klebesei el Santo a tokubets el ngerachel el mengeluolu e mesebechakl er a Uchetemel a llach er a Beluu er a Merikel me a osisechakl me a llach er a ikel basio el de kiei er ngii. Ng kired el mo ultuil er a Rubak e mo ultuil er a klaumerang el kirel tial beluu er a tara klebesei.
Ngera dirrek el mellemalt el Uriul-klebesei el Santo a mo meruul? Ng kried el mo meluluuch me a Rubak bo lomekrael e lomekngeltengat a rokui el beluu me a remerredel. Tia tebechedel a tebechelel a klauemra er kid. El mo olngesenges er a remerredel me a roungerachel7a diak a ngera el temelii er a llechul a dertsa el chad. Ng belkul a kmo kede mo ungil chad er a beluu e ngara budech, loltirakl aikel ngara uchetemel a llechud me a llach el doltirakl. Ea klou a belkul tekoi a kmo, ng kired el mo kiei el ngara selbechakl me a kltalreng.
Ngarngii a bebil er a ngerachel el telengtengil a urrekodel lulekrael el Uchetemel a llach. Ng kired el mesuub e oldubech a ulekrael el osisecheklel a Uchetemel a llach. Ng kired el osiik e oldubech er tirkel mellomes e ungil chad el tir a mo oldubech aika el olisechakl sel ngara tekoi el buai.8 Ng kirel el mo ngarngii a klemedengei er kid el chad er a beluu me ungil blekerdeled bol meues er a rechad.
A Beluu er a Merikel er chelechang me a bebil er a mimokl beluu, e a klisiich er a balatiks a ultuil er tirkel remurt el mo er a obis (el kid oldubech er ngii), lokiu a sengkyo, me a ngesou er a udoud, me a omesiou er a chelechad er a balatiks, me a melemomel el cheldecheduch er a rengarbab el chad, chelechad, me a rekohosia. A uchul a ungil urerel, ea democracy el beluu ousbech el rokui, eng di a chimol chad er a beluu a diak a belkul bo loruul rokui.
Ng kmal betok a mondai er a balatiks, e diak a chelechad, teletael, a lechub el chad el sebechel otaut a sorir a rekakerous el chad. A dersta el chad er a buai a tibir el kmo ngera el tekoi sel kot el klou a ultutelel el mo er ngii er a ngidil taem. A leuaisei e a rechedal a ikelesia a kirir mo osiik a ulekrael el kirel a sengkyo er tir e mo omes aikel bebil er a ngesou lultuil er a ikel meklou a belkul tekoi el kirir. Tial teletael a diak el beot. Ng locha mo kirel ngodechii a chelechad loldubech er ngii a lechub eng kohosia, er a bek el temel a sengkyo.
A mimokl el teletael a le bebil er a taem eng mo kirir a re sengkyo el mo oldubech er a re kohosia a lechub eng chelechad ra balatiks a lechub eng llach el bebil er a tekoi lengarngii a diak lekengei.9 Tiang a tara uchul e kede olisechakl er a rechedal a ikelesia meng diak lorritel er a tara chad el kirel a tekoi er a balatiks. Ng diak el kired el mo melekoi el kmo a mesisiich el Uriul-klebesei el Santo a diak el kirel ngara kmo ngera el chelechad a lechub eng diak kirel sengkyo er a kmo ng techa el chad el ngii oldubech er ngii. Kede olisechakl a meral osisechakl e mechiteterir a rechedal a ikelesia me te melilt el kmo ng mekera bo loltaut aika llach er a tekoi el bo lechelebangel. Kede dirrek el mengelechel, e melekoi er a roungerachel er a ikelesia el mo mengelechel, me a omelilt er a rechad er a balatiks me a obis lak tebechedel osisechakl a lechub oldubech er a chelsel a mitilenged er a Ikelesia.
A Ikelesia er a Jesus Kristo er a Uriul-klebesei el Santo a, uaisei, a oltaut e kongei a lechub e ngomtok aikel llach el metib el ngii a omtok er a iilmokl er a tekoi er a klechelid a lechub eng cheldellel a Ikelesia.
A kuuchais el kirel a chedaol ulekrael el Uchetemel a llach er a Beluu er a Merikel e meluluuch me deletkii Ngike el Chedaol Chad el milngedmokl er ngii e melemolem lurrekodel e omecheliu aika el meklou a belkul llach er a chelsel. El ngara a ngklel a Jesus Kristo, amen.