Oba Kltalreng
Mesel bo momerk er kau loba blekokouii, ulekerreu, me a klechubechub, e ak yaksok er kau el mo ngosuterir a rechad e omekungil a reng.
Uchelel a omesodel
Tiang diak el sal mechas a rengud el tekoi el betik er a omesuub ra science a le bebil eng mukrael lokiu a kmal beot el tekoi el ua rodech sel ruebet er a kerrekar?
Chelechal sils, mei e kuchais sel mlo chemolt leng dilubech luchul sel tebechedel a usangi.
Sera 1970, e a rosiik a mle kudmokl a omesubir el mo omes er sel mo olechotel a blekerdelel omengang a bol rrelii er a chaidireng. Ng betok er a euid el klebesei, e tulmekang a bebil er a usangi er a betok el laok e mesuub a rretel a resechir, rretel a chaidireng, me a mekngit el laok.
El uaikel di bla lodengei, el betok er aikal usangi a ulecholt a chachisois el laok el mlo medechel er a chelsel a ngerdir. Ng diak el dil tiang el merkong! A rosiik a mla metik er a kmong ngeral el diak dungil medengelii. Ngokiu a rokui el usangi a ulecholt a chachisois el laok el mlo medechel, a tara delbechelel a usangi a mechas a rengud leng mle okolem el basent el mekesai a lekir er a rebebil. Ng mlo chemolt el uai a lulemes er a eru el bedengel a delbechelir a usangi.
Sel denguu er a re scientist, e a kekka el uaitang a sebechel mo uchul eng mo diak a cheliuir. Tiang mekera e sebechel uaisei? Tirka el usangi a ta ulechellir el mlara New Zealand, el mlara osisiu el cheroll. Dersta er tir a ngilai a osisiu el disel a osisiu el kall.
Tiang locha ngera belkul?
A ika el kekka ng tilmelii tial omesuub? Tiang mla rengii a telemall er a llecheklel el omesuub?
Tirka el scientist a meringel loureor el mesuub er tial dimlak lolechesuar er ngii el tilobed el cherrengelel umesuub!
Te mocha, omes er tirka el chad ra ureor. Tiang kol sebechel aikel luruul a chad ra ureor el mo ngodechii a kekka er a omesuub? Sera lomes el kirel tiang, e te mlo metik er ngii el kmo a bek el usangi lolab a mekesai el laok e mle ngara ulekereuil a di imol chad ra ureor. Ngika ulmekang tirkal usangi er ngii lolab a osisiu el kall el di uai a rebek el chad. Engdi, a tara scientist a uluchais, “ngkal redil a kmal tokubets el ungil a rengul chad e kmal omekerreu.” Sel lomekang er tirkal usangi,“eng mengedecheduch er tir, omechull, e melaiu er tir. … Ng dial el sebechel el diak loruul el uaisei. Tia ku kmal di teletelel’”1
Ng betok a luruul el dimlak di lomesterir a kelir a re usangi. Ng milsterir a beltikelreng!
Sel de kot el omes, eng uai a lak el kirel luchul el klou a lengedechii, eng di a re ngara chelechad ra rosiik a diak lesa ngii di el rolel.
Me te liluut el omelekl er a omesuub—tiaikid el taem e te kmal mlo kerekikl er a bek el teletelel. Sera bocha loltobed er a ulebongel el kekka, eng di mle osisiu a dilubech! A re usangi el mlar cheuchel a ungil lomekerreu el chad ra siik a mle telkib el ngarbab lungil a bedengir.
A re scientist a mlo luchesii e merkii a cholechotel tial omesuub lokiu a tara ngarbab el babier. Science2
Bebil rak ruriul e tial kekka er tial omesuub a dirk mesisiich er tial chelechad er a tekingel a ukeruul. Aikal sesel rak ea, Dr. Kelli Harding a lilechesii a buk el dai er ngii a The Rabbit Effect el longkiklii tial omesuub. Sel mocha ulebongel el milluches: “Mnguu a usangi el mekngit a bedengel. Mongedecheduch el mo er ngii. Morkedii. Mo msa beltikelreng. … A deleuill a ngarngii a rrelii. … Maleuaisei,” eng mlo merkui er ngii, “a ngodechii a ulekerreuil a bedengel lokiu a ugil teletael a ultuil er a omerelled el mora tang, teletelel a klengar er kid, me a ikel uldesued el kirel a belkud a rechad.”3
Sel denguu er a omesuubir a rechad, ea did el omech a science me a klemerang er a ebangkelio sel bebil eng ual mekesai e meteu a delongelel. Engdi sel de Kristiano, loltirakl er a Jesus Kristo, el Uruil-klebesei el Santo-e a olechotel tial omesuubir a rescientist a uai a dodengelii e ra bai le mechas a rengrud er ngii. Denguu er ngak, tiang a loiang a tara renga er a chutemel a bekokeuii el uaia a llechul, osisechklel a ebangkelio er a omekungil, chedaol el tekoi el reng, e , di ual cholt, dirkek el tech.
Uldak el Reng
Ser a loker, “Mastang, el ngii a ungil el llach?” a Osboel a dilu el kmo “bo mo beltik el reng er a Rubak el Dios loba rokui el rengum,” oltirakl er a, “Moubeltik el reng er a tonari er kau.”4 A nger er a Osobel a smisichii a chedaol ngercheled. A re profets er a chuodel taem a mellach el kmo “ng diak el kirel ngarngii a klautok er a ta ma a tang, [ke] de bai omes el bedul uchei … , loba [rengud] el mo oldak a reng e kaubeltikelreng.”5 Eng lmuut losisecheklid el kmo “a klisiich me a lechub a ongetikaik … a kirel di mekedmokl … lokiu a delmedemek me a klengariou el reng, … lokiu a blekokouii, … e diak el blulak.”6
Akumerang el kmo tial osisechakl a mora rokui el Uriul-klebesei el Santo: remeklou, ngeasek, me a rengalek.
Ka momdasu er tiang, e bo kungedecheduch el melemalt el mo er kau el ngalek er a Primary el telkib.
Kemiu a mla moungil medengelii el kmo a bekokouii a kot el klou a belkul. A bades ra chelitakl er a Primary, “I’m Trying to Be like Jesus,” olisechakl:
Bom kaubeltikelreng el di uai a Jesus el betik a rengul er kemiu.
Molasem el ochotii a blekokouii er a rokui el tekoi el moruul.
Bo medemedemek e mungil er a omeruul me a uldasu,
E le a ikaikid el tekoi a ble lolisechakl a Jesus.7
Meng uaisei, kau a dirrek el bebil er a taem eng mo meringel er kau. Tia kid a cheldecheduch el locha sebechel ngosukau tia mesaod el kirel a buik er a Primary el ngkel a Minchan Kim el ngara South Korea. A rechad ra blil a mlo chedal a Ikelesia er a kmeed el elolem el rak ra mla memong.
“A tara sils er ak ngara skuul, e a bebil er a ki mdak el klass a mle omekakou er a tara ngalek er a skuul lomekedong er ngii a mekngit el tekoi. Tia kora mle omosiroi, meng mle sesel sandei el kteloi er tir.
“Sesel sandeu ruriul, eng kal buil a uluchais er ngak el kmo ng di mle outingaol a leko ngdi mlak el lomekerreu el kirel, eng di ngii a kmal mlo mekngit a rengul er a ikal tekingam, meng lilangel sel bek el klebesei. Ak kileed e ak lemangel er a louchais er ngak. Ak mlo ouchel a renguk e mle soak el mo olngeseu er ngii. Sera bol kukuk e ak mlong e mengaichiklang er ngii e ullengit a klausubes, me ak melekoi, ‘Ak meral mlo mekgit el mle omekakou er kau.’ Ngulengasech a medal er ngak, e mlo mad el llangel.
“Engdi tirka el bebil er a rengalek a millemolem el omekakou er ngii. Mak mo dobedebekii ak silubii er a klass er a Primary: molilt er a melemalt. Me Ak ullengit er a kimdak el klass me bol stob. Betok er tir a mle melilt el diak lolodech, a blekerdelir e mle kesib a rengrir er ngak Engdi a tara buik e dilu mousubes, me kemam el tedei a kmal mlo ungil sechelei.
“Me a dirk omekakou er ngi a di mekesau, ng di ngungil a rengul leng ngii el chobengkemam.
“Ak melilt er a melemalt sel kulengeseu er a sechelei el ousbech a ngesou.”8
Tiang diak el sal lungil lokesiu el merkau el melasem el mo uai a Jesus?
Elechang, e tia mora rengeasek el buik ma redil, sel morael mo meklou, e a ulekakou el mora rebebil a sebechel kisbekl e kmal mo kengaol. Dakt, ngar klengit el reng, mal lmuut el mekngit a blechoel el obengkel a chad el lomecheracheb. “A omecheracheb a diak el beches el tekoi, a social media me a beches el klekedall a mla nguu a omrecheracheb el mora kuk tara beches el teletael. El blechoel el mekudem, e di ngarngii lorrouk-omcheracheb lokiu a melidiul.”9
Ng bleketakl, el cherarou a ousbech er tiang el mo melemall er a telecheroll er kemii. Ng diak a basio er tiang er a chelsel a cyberspace, beluam, skuul, chelechad, me a klass er kau. A kulengit me bo morull a rokui el sebechemiu el kudmokl aikal basio el mo mui er a blekokouii e selbechakl. Alsekum ek meral omtab me lechub e kom tebedechelel er a chelsel aikal rokui, Ak medengei el kmo ng diak a ungil tekoi el kirel aikel mla mo merek el bileskid a Elder Dieter F. Uchtdorf:
“Sel bok kirel a ouketui, telulechoid, okemetii, mengoit, orreked a klengit el reng, mecha lechub eng reng el mo meruul a mekngit, kulengit memruul aikang:
“Motorebengii!”10
Ke rirengesii sei? Mterbengii! Mesel bo momerk er kau loba blekokouii, ulekerreu, me a klechubechub ngii mesel loak a melidiul, e ak yaksok er kau el mo ngosuterir a rechad e omekungil a reng.
Ak mla mengedecheduch el mora rengalek er a Primary me a rengeasek, me chelecha e a cheldechedechak a mora remeklou el chad er a Ikelesia. Ng kot el ngercheled el mo muchelii a teletael e mo okesiu er a blekokouii, uldimukl, me a ungil blekeradel—e mo melemolem el molisechakl a blekeradelel a Kristo el mora merael mei el telecheroll el kmo ngera ke de dmung e mekera dorull. Ng kmal klou a ultutelel a domes a olangch er a beluu el ngii a merael bedul omeliakl er a chelsel a balatiks, deruchall er a buai, me a kmeed el rokui loruul a rechad el meleakl.
A President M. Russell Ballard a dirrek el mla olisechakl el kmo a Uriul-klebesei el Santo a diak el dil bekokouii el mo er a derta er tir te dirrek el mo kirir el uaisei el mora rokui el chad el iliuekl er kid. Ng ulemes: “Ak blechoel rongesterir a rechedad el melemall a rengrir a rechad ra ngodech el klechelid e olechib a mederir e mechititerir. Tiang a dubech er a beluu el oumesind er ngii a betok a rechedal a ikelesia er ngii. Ak mla rongesterir a mekngit a uldesuir lobekel el melekoi er a rengelekir meng diak loilil lobengkel a a ngalek el ngii a tonari e le a rechad er a blirir a diak el chedal a Ikelesia. Tial bedengel a blekeradel a diak loltirakl a osisecheklel a Rubak el Jesus Kristo. Ng diak el sebechek el mo medengei el kmo ngera uchul metirkal chedal a Ikelesia a mechei choua ika el tekoi meng mo er ngii. … Ng dirkak a tang me lak krengesii a tekoi el kirir a rechedal a Ikelesia el loldubech er tir moubeltik el reng, bekokouii, oba kllouelreng, e ungil el mo er a resechelid me a re tonari el tir a ngodech a klechelid er tir.”11
A Rubak a mengerchir er kid el mo olisechakl el kmo a oldak a ungil kirel a ketalreng e a omengeroid a mouchul a te mo obii.
Sel de oltirakl er a Jesus Kristo, eng mechas a rengud el remenges el rengelekel a Dios a le mekngit er tir e le tir el chad er a tara beluu. Ke doumekikngit el reng lorrenges er a mlorngii el odechelakl el mora rechad el tir a Chedelekelk, Asian, Latino, malechub e ngii di el bedengel a chelechad. A ultelechakl, klautok el kirel a chad ra tara beluu, malechub a klaodechelakl a diak el kirel ngarngii a basio er ngii er a hang, beluu, me a kerensel a Ikelesia.
Mei me a derta er kid, el diak el iior er a rekid, dolasem el mor sel kot el lungil teleteled.
Mou beltikereng er a Rechereuem
Mesel molasem el odersau lokiu a beltikelreng, omengull, me a blekokouii, eng dirrek el sebechem el metemall malechub eng mo ngarngii a mekngit el kirem lokiu a lolilt a rebebil. Me ngera ng sebeched el rullii kung? Kid oltirakl er a uleklatk er a Rubak el mo “moubeltik el reng er a cherreuem… e moluluuch el mor tirkel omteluub er kau.”12
Kid a meruul a rokui el sebeched el mo mesisiich er a cherarou el ngii a mei er a roled. Kid a melasem el outekangel el mor medad, e bek al taem el doluluuch me a chimal a Rubak bol ngedechii a teletael el de ngar a chelsel. Kede mereng a sulir tirkel Ngii a mla ngoititerir el mera roled el mo olengeseu er kid.
Ng rutechii a renguk a okesiul tiang el ngara reksi er uchelel a Ikelesia. Sera winter er a 1838-1839, e a Joseph Smith me a rebebil er a oungerachel er a Ikelesia a mlo mechesimer er a Liberty Jail er sera re Uriul-klebesei el Santo a le morimel el mellukl er a delengcheklir el ngara beluu er a Missouri. A re Santo a mle chebuul, diak a resechelirir, e mengard er a kelekolt e diak a ngera er tir. A rechad er a Quincy, Illinois, a milsa chelebulir me te mlo oderseterir loba klechubechub me a klsechelei.
Wandle Mace, el kiei er a Quincy, e ngmlo uriul eng melebedebek er sera le kot el mesterir a re Santo er bita er a Mississippi River el kiei a teleketek el tento: “A rebebil a ulemerk a mamed el merrob a a eolt, … a rengalek a mle ouderiu er a kerrasem el iliuekl er a ngau el eolt a millokou er ngii el mong e mei meng diak a kmal ngeral relii. Tirka el mechebuul el re Santo a mlengard er a ringel.”13
Sera lesa teletael el lengarngii er re Santo, a re mle kiei er a Quincy a mlo dmak e ngmai a ngesou, me a rebebil a mlo olengeseu lolengakt er tirkal beches el sechelirir el mo imuul er a omeuachel. Mace a millemolem: “[Tir] a uldersi a kou; a merchant klaidesachel er a delongelir el tir a mo sebechel el mo ua seizi … lobengkel … babi, … sukal, … oiacher me a bail, rokui el chebuul el chad a kmal lousebech.”14 Ng di mle mereched , e a remlodik a mla mobetok er a rechad er a Quincy, el tir a milok a chesmerel a blirir e ousbech a mle mekesai el kloklier el kmal klou a le chiloit.15
Betok el Santo a di mlak e metemall sera meringel el kelekolt e leng sel klechubechub me a blekokouii er a rechad er a Quincy. Tirkal anghel er a beluulechad a milkais a rengrir me a blirir, e milsterir a olsobel el ulekerreu, ungil reng, me a—altang eng kot el klou a belkul—chim er klesechelei el mora mengard er a ongarm el re Santo. Meng mle kekedeb el taem el kiei er a Quincy, a re Santo dimlak a tang me lobes a dmolech lomereng el saul el mora betik ra rengrir el tonari, me a Quincy a mlo merael chisel el “beluu el lolengeseu.”16
Me sel sekum me a berraod a mei er kid lokiu, meringel, mekngit, el omeruul ra reng el kmal mekngit, eng sebeched el melilt el mo oureng el ngara Kristo. Tial urunguled a ngar sel Ongit e yaksok el kmo “bo lungil a rengmiu, e le ak mo omerkael er kemiu”17 me Ngii a mo chemedaol a berreded el mo klungioled.18
Ungil Mengkar a Sib
Mei e de torebengii sel dulemuchel er ngi: chubechub er a chad lomekerreu er a smecher, di mle ngii el odersii er a bekokeuii loba melisiich el reng, e diak el omtab er a otebedel-omekungil er a rengul a charm el ngii a omekerou el kirel. E le ngerang? Ngera uchul le tia ikid a meral teletelel!
Me sel domes lokiu osengel a ebangkelio, e kede mesekid el dirrek el ngar eungel a ulekerreuil a chubechub lomekerreu, el Ngii a odersii loba blekokouii me a ulekereuil a reng. A Ungil Mengkerngel a Sib a medengelii a ngklel a derta er kid “e ngarngii a soal er kid.”19 A Rubak el Jesus Kristo di mle Ngii el kmu el kmo: “Ngak a ungil el mengkerngel a sib, e medengelii a sib er ngak. … Me Ak [nguu] a klengar er ngak el kirel tirkal sib.”20
Ngar tial chedaol el sandei er a Baskua, Ak metik er a ngarngii el budech el medengei el kmo “a Rubak a mengkerngek”21 ea derta er kid a lodengelii e ngar eungel a ungil ulekerreuil. Sel de chebengelii a eolt me a seseleolt, secher me a telemall, e a Rubak—el Mengkernged—a mo omekerreu er kid loba beltikel reng me a blekokeuii. Ngii a mo omekungil a rengud e mekbeches a bedenged.
A ikang a kouchais—me a Jesus Kristo a Osobeled e Olsobel—el ngara ngklel a Jesus Kristo, amen.