A Dios el teloi er Kid
A Dios a ngara delongeled-e meral uldimukl er a klengar kid e oureor el mengetikaik er a Rengelekel.
Aikel rokui el telecheroll, e a Dios a mla mengedecheduch lokiu a remesiungel, el re profet.1 Chelechal tutau ng mlor ngii a techeled el rongesii a profet er a Dios el mengedecheduch er a beluulechad er rokir. Betik a rengmam er kau, President Nelson, e Ak melisiich er rokui el chad el ngara dil ker el mo mesuub e omtab a tekingem.
Uchei ra le bol teruich ma eru rekik, ea telungalek er kemam a mlorimel el erul taem el kimchiis er a delengcheklam e kuk lmuut lomuchel er a taem er a uldikel, dakt, me a rrauelreng e le a mekemad me a klautok er a remenguteling ra beluu a uchul. Ak mle medakt, eng di locha meral mle klou el dakt el mora rebetik ra renguk el delak me a demak.
A delak me a demak a uluchais a di kesai er tial berraod el mer kemam el teua el ngelkir. Tir a obang sel orrimel me a ringel er kot el sebecherir. Sel dakt a locha meral mle oberaod, el chiloit a temir el medakt meng dikea urungulir.
Tiaikid el taem er a klengitelreng ruruil er a Ongerul Mekemad a milecherei ultil er a beluulechad. Ng mlo medechel a ultil er ngak.
Sel taem, di mle ngak el tang me ak meral mle sabisi, e ak blechoel lomdasu, “Ng kol ngarngii a medechel el urunguled er tial beluulechad?”
ReAnghel el teloi er Kid
Sera kumdasu er tial ker, e Ak ulumdasu er a rengeasek el misionari er kid el chad er a Merikel el mle mesiou el teloi er kemam er a ikeikid el rak. Te chiloit a mededaes e selbechakl el delengcheklir el ngara bita el beluu e melukl el mera Germany—belurir a dirke mle cherreuir—el lomesterir a chedaol urungulel a reched ra belumam. Te mlei el dimlak el be loltelechakl, olisechakl, malechub e lomekrur. Ng mlara rengrir el chemoit a klengar er tir el diak a uldesuir el kirel a sengk er a beluulechad, ng bai kmal di mle sorir el me olngeseu er a rebebil el mo nguu a deurreng me a budech el tir a mla chormii.
Sel denguu er ngak, e tirka el ngeasek el buik ma chekebil a cherrungel. Ak medengei el kmo ngarngii a chelitecheterir, eng di denguu er ngak eng diak louaisei. Ak di mo blechoel el omdasu er tir el ngarbab er tial klengar—reanghel er a llomes me a klebkall, mesiou loba klechubechub, ungil, me a klemerang.
Sera belulechad lorresors er a rechad el diomdasu el kirir, mekngit el reng, me a dakt, ea okesiul me a osisecheklir tirka el ngeasek el chad eng mlo mui a urungulek. A klumech er a ebangekelio el ble louchais a uliubek a balatiks, reksi, omatek a mekngit, mondai, me a moktek ra tang. Ng milskemam a chedaol nger el mora meklou a ultutelel kermam er seikid el meringel el taem.
A klumech a kmo a Dios a ngar e omekerreu el kiram, er tial taem er a uldikel, rrauelreng, diak el belduut el beluu. E Ngii a meral dilum er chelechal sils er kid el mlo olutii a klemerang me a lomes -ebangkelio er Ngii me a Ikelesia er Ngii. E Ngii a mla lmuut el mo mengedecheduch er a reprofet er ngii; e a Dios e mle teloi er kid—e ngii a meral uldimukl er a klengar er kid e oureor el mengetikaik er a Rengelekel.
Ng mechas a rengud ra ikel sebeched el mesuub sel bodungil lomes er a uldesuel a Demad er a Babeluades er a osobelir a rechad me a diak a ulebengelel klengar, uldasu er a deurreng, el kirel a Rengelekel. Sel domelchesiu el diak a ultuteled, cheloit, e diak a lotkid, e ke de mo medengei e mesisiich a rengud el kmo a Dios a dirkak lobes er kid-e merang, Ngii a mo mesterir a rokui el ngelekel a ikel diak el sebechel el mdasu: e mo nguu a “dikesed er a Dios, el dmak a dikesed lobengkel a Jesus Kristo.”2
Tiang ngera belkul?
Me kid a mo kiei el mo cherechar, nguu a mui el deureng,3e loba techall el mo “oudiukes a ngarbab el kingall, klebkall, beluu, me a klisiich.”4
Ng meriou a rengud sel bo dodengei el kmo tial klebokel e ngarbab el mo osioled a meral mo dubech—leng diak el kid el chad a uchul ng bai uchul le ngii el Dios.
Sel dodengelii tiang, eng mekera e sebeched lou mekikngitelreng malechub e kede melemolem el medeldirk a rengud? Kede mekera e diomes er riou sel el King ra re king loleker er kid el merael mo soiseb er sel diak el sebeched el medesuii el ngarmedad el sils er a chedaol deureng?5
Olsobel el teloi er Kid
E leng uchul sel cherrungel el beltkil a rengul a Dios el merkid mesel cherechar el tengetengel a Jesus Kristo, ea kengtid—el meklou me a mekekerei—a sebechel mengubet e diak el luut el mo melebedebek.6 Ng sebeched el dechor er medal el mechellins, klikiid, e chedaol.
A renguk a mo olsesiseb er a omereng el saul el mo ra Demak er a Babeluades. Ak medengei el kmo Ngii a dimlak lolbeakl er a Rengelekel el mo mesesibas er tial klengar el lak a urungulir el kirel a medidiich el diak a ulebengelel sils er tir. Ngii a mla meskid a osisechakl el ngii ochotii a roled el lmuut el mo er Ngii. E sel kot el ngara belngel aikal rokui a Betik ra Rengul el Ngelekel Sechal, Jesus Kristo,7me aikel Ngii a le riruul el kired.
A diak el ngemed el Tngakireng er a Osobel a ngodechii a teteled a domes a telmelled me a chelitechetud. Ng bai diak dolemomel el lomdasu aikang me domelchesiu el diak el sebechel mengubet, e kid a mo sebeched el mesuub er tir e mo ungil a rengud.8 Sel omekbeches el sengk er a ouchel reng a techall el mo mechei a kngtid e meltid el mo beches el chad.9
E le a uchul a Jesus Kristo, me a ikel rebeted a diak el ngii a olechoted. Ng bai omiich er kid.
El diuai a olbedabel er a omesubel a chad er a chelitakl, ng sebeched el mes aikel mlo cheleuid, chelitechetud, me a kngtid el ngii a techelled el moungil mesekid, smisichii a meral beltkil a rengud el mora rebebil, e omiich el moungil lokiu a ouchel reng.
Alsekum e kede meluluuch, a chelitechetud a diak el rulid el mo mekngit. Aikei a tebedechelel a ulukeroled.
Kid a dirke tolechoi sel domekesiu er kid el mora bleob el ngar loba klebkall me a kid a monguu a ngarbab el klebkall el dulebeob el kirel. Ng diak a di tal chad el merael bedul uchei lomuchel el melekesakou e mo merael el mo remurt e diak el blechoel moubuu, tebuul, e mo deuall a bedengel. Tiaikid a teletelel a kede mo meduch.
Alsekum meng blak a rengud el melasem er ngii, e blechoel el oltirakl a llechul a Dios, e tibir el mo ouchel, outekangel, e oltirakl a bla desuub, lou dersesei, e kede mo ngmai a llomes el mera rengud.10 Meng locha diak dungil medengelii sel ngii a sebeched el mo uaingii er chelechang, “Kede medengei, sel lemei a [Osobel],” e kede mesa llecheklel er kid, e “mesang el ngii a ngii.”11
Ng klebokel el yaksok!
Choi, a beluulechad a ngara uldikel. E uaisei, ngarngii a chelitechetud. Ngdi diak a belkul de charm, e le kid a sebeched el loumerang er a Dios, ng sebeched loumerang er a Ngelekel sechal, Jesus Kristo, e sebeched el nguu a sengk er a Reng el mo mengetikaik er a roled el bedul a klengar el mui er a deurreng me a chedaol el deurreng.12
Jesus el teloi er Kid
Ak blechoel el omdasu, a Jesus ng locha ngerang mo olsisechakl e meruul alsekum eng Ngii teloi er kid er chelechal sils?
Uriul er a Okiis ra Kodall, ea Jesus Kristo a chirrengelii a telbilel el mo oldingel er a “bebil ra sib.”13
A Babier er a Mormon: Tiang a Dirrek El Ouchais El Kirel a Jesus Kristo a mesaod er sera bol dum er a rechad er a beluu er Merikel. Ke dobang tial mekreos el klalou el sioning er a urerel Osobel.
A rechad er a Babier er a Mormon a kiliei er a kuk bita el beluulechad—a reksi er tir, siukang, teletael ra kabelment a mle klou el kakerous ngii me a rechad el Jesus a mle olisechakl er tir er sera le temel el Osisechklel. E Ngii a ulsisechakl er tir a betok el osisiu el tekoi e Ngii a ulisechakl er a Chedaol Beluu.
Ngera meng miruul el uaisei?
A Osobel a blechoel lolisechakl a diak el ngemed el klemerang. Aikang a sebechel mora rechad er a kakerous a rekrir me a ngi di el teletael el ngarngii.
A Klemechel e mle klumech er dirk klumech el kirel a oureng—el ngii a tekingel a Dios el Demad er a Babeluades el dirkak el chititerir a Rengelekel.
Le Dios a ngara delongeled!
Eru dart el rak ra mla memong, e a Osobel a liluut el mera Beluulechad. Lobengkel a Dios el Chedam, el mlo tmoich er a teruich ma eua rekil el Joseph Smith e ulemuchel er a Olutel a ebangkelio er a Ikelesia er a Jesus Kristo. Ulemuchel er sel sils el mong, ea babeluades a ulebok, ea odurch el mlara babeluades a miltengel el mlara rengedel a diak a ulebengelel klebkall. Llomes me a klemedengei a mlochubel el mei el mlara kot el ngarbab el kingall.
A Rubak el Jesus Kristo a mocha ketengel lmuut el mengedecheduch el mora beluulechad.
Ngii ngerang dilung?
Ng klengeltengat, le betok er a tekingel a mlo llechukl er a chelsel a Doctrine and Covenants—el medechel mora ngiidi el chad er a beluulechad el ngii a soal mo menguiu e mesuub er ngii. Ng meral mekreos aikal tekoi el merkid er chelechal sils!
E diak el kired el mechas a rengud el mesa Osobel el lmuut el olsisechakl aikal chaiderengul a klumech er a ebangkelio er Ngii: “Bo le betik a rengum er a Rubak el Dios er kau loba rengum el rokir, me a rokui el molab, uldusuem, me a klisichem; el ngara ngklel a Jesus Kristo e ke mesiou er ngii.”14 Ng omekkellomes er kid el mo osiik er a Dios 15e kiei el oltirakl a osisecheklel el Ngii a mla ocholt el mora re mesiungel, el re profet.16
Ng olisechakl er kid el mo ou kaubeltikelreng17e mo “mui er a bliochel el beltik el reng el mora rokui el chad.”18
Ngii olengit er kid el mo chimal, el mong e mo meruul a ungil.19 “Mei e lak doubeltikelreng el ngara omelekoi … e bai ngara omeruul me a klemerang.”20
E Ngii a melsemai er kid el mo omtab aikel Lechul: el mo oubeltik el reng, mo omerk, e mo omengemdaoul er kid el rokui el mo er a ebangkelio er Ngii me Ikelesia er Ngii.21
Ngii oldurch er kid el mo omekedechor chedaol el templo e mo soiseb e mesiou er a chesel.22
Ngii a olsisechakl er kid el mo oltirakl er Ngii-el ngii a rengud a diak bol lolasem el kirel a klisiich, klemeteet, kengei, me a deruchal. Ngii a olisechakl er kid el mo “mechei a tekingel a beluulechad, e osiik a tekoi el ngii a lmuut el lungil.”23
Ngii a orrimel er kid el mo osiik a duil a reng, llomes, budech, deureng,24me a yaksok er a di ngar me a diak a ulebengelel klengar.25
Ka medenguu tiang el muut el mong. Ulekum ea Jesus a mei er a ward, branch er kau, malechub eng blim er chelechal sils. Tiang locha mo uangerang?
Ngii a mo sebechel mesa chelsel a rengum. A teletelel a ikrel a chad a di mo diak a ultutelel. Ng mo medengelkau el sel meral kau. Ngii a momedengelii aikel soam el ngara chelsel a rengum.
A medemedemek me a roba ngariou el reng a bol longider er tir.
A resmecher a bo lomekungil er tir.
A roumededenger a bo lolsiseb er tir a klaumerang me a blekeu el mo oumerang.
Ng mo olisechakl er kid el mo omok a rengud el mora Dios e odersid el mora rebebil.
Ng mo mtebengii a odengesii a melemalt, ngariou el reng, kedung, blakelreng, blekokouii, me a dmolech el beltikelreng.
Sel tal desa medal eng dikea deluut el mo uaikid. Kid a dimerko el mengodech. E mengodech lokiu a dmolech el ultebenged el kmo, ngmerang, a Rubak a meral tekoi er kid.
Me Kede Mekerang?26
A kumes el bedul sel ngara mo el taem loba blekokouii el mo ngkel ngeasek el ngak er a ikel rak el kurael el me-klou. Omko eng sebechek el mo er sel taem, e ak mo mengelaod er ngii e melekoi er ngii meng melemolem el osiik. E mo oleker er ngii el mo olengit er a Jesus Kristo el mora klengar er ngii, e le a Dios a teloi er kid!
Mo er kau, el odam me a rodos er ngak, me a resechelik, ma rokui el osiik a nger, klemerang, me a deurreng, Ak dirrek el meskemiu a osisiu el llach: molemolem el osiik lobengkel a klaumerang me a klouelreng.27
Molengit, e kau a mo ngmai. Molengod, me lobok el le ko er kau.28 Moumerang er a Dios.29
Bek el sils er a klengar er kid eng klou el ngercheled e klengeltengat el merkid el mo kebetech kid ma Dios.
Sel dechoit a kldidai el reng e de bora Kingellel loba chelam e ngariou el reng,30Ngii a mo kmeed er kid.31
Sel dosiik el mo oltirakl er a Jesus Kristo e merael er a rael er a oltirakl, ngara bades el mora bades, eng mei sel sils el kid a mo soiseb er a diak el sebeched el medesuii el sengk er a melai er a cherrengelel a deureng.
Ungil sebechelik, a Delmiu er a Babeluades a betik a rengul er kemiu loba cherrungel el beltikelreng. Ngii a mla ochotii a beltkil a rengul lokiu a betok el teletael, engdi sel ngarbab sera lodersii a Dita el Ngelekel Sechal el tenget e sengk el mora Rengelekel el mo rulii a oluted el mora rdemad me a rdelad el ngara babeluales el mo tmaut.
Ak sioning el Demad er a Babeluades a ngar, e a Jesus Kristo a omekrael er a Ikelesia er Ngii, e a President Russell M. Nelson a Profet er Ngii.
So kudersii el lekor kau a beltkil a renguk me a klengeltengat er tial deurreng er tial temel a Pasquana. Bok a rengmiu el mora Osobeled e Olsobel, e ngdiak el iior er a teletael el omngarngii, ringel, ongarm, cheleuid; kau a sebechem el medengei el kmo Ngii a ngar, e Ngii a betik a rengul er kau, e Ngii a uchul, e kau a diak a tang me di bol kau el tang.
Dios el tekoi er kid.
Okiu tiang e Ak sioning el oba chedaol el ngklel a Jesus Kristo, amen.