Olngasechereng ra Chebirukel el Teletael
A Jesus Kristo a medengelii a chebirukel el teletael e ngarngii a klisichel el mo sumecheklii.
Se er a 1994, ea klou el omekodall a mla er ngii er sel beluu el ngara ongos er a Africa el Rwanda el uchul a klou el klautok el meketekt el ngarngii er a delongelel a kebliil. Ng bekord el betok er a tedobech el million el rechad a mlad.1 Ng ungil, e tirkal Rwandan el betok er tir a mla mo ta rengrir,2 eng di a ikal teletael a melemolem el ngarngii.
Ng teruich el rak er a mla memong, er a blo kuldingel er a Rwanda, ea bechik me a ngak a milngedecheduch er a ta ra chad el ngara sel Kigali airport. Ng mle mekngit a rengul ouchais el kirel a chebirukel el teletael er a kodall e mekngit a rengul e uleker, “A lsekum meng ngarngii a Dios, e Ngii ngerang dimlak el rullii a kmu ngerang el kirel?” Ngkal chad—me a betok er kid—el ngara ringel me a chebirukel el teletael a uoi desang el diak el longaisisiu er a bekokuii, e betik a rengul Chedam er a Babeluades. Eng di Ngii a merang, Ngii a bekokuii, e Ngii a betik a rengul er a bek el Rengelekel. A klekakerous er a ikal teblong el uldasu a kuk mechuodel er a rechad e diak el sebechel mesaod el obang a kekedeb el omsodel malechub ngara bumper sticker.
A domuchel el meruul er ngii mel bleketakl, e domes a ikel klekakerous el bedengel a chebirukel el teletael. Ka momdasu er a telungalek el ta me a tang el ngalek a ngmai a ududir er a tal sandei sel loruul a ureor er a blai. A ta er a rengelekir el sechal, el Johanes, a milcherar a kiande; ea ta er a rengelekir el redil, el Anna, a milengudel a ududel. Cherengel a taem, ea Anna milcherar a rat er ngii. A Johaness a ulmedasu el kmo tiang a kmal chebirukel el teletael el Anna mlo er ngii a rat er ngii e ngii a dimlak. Eng di sel luliilt er ngii a Johaness a rirellii tia el diak el tabesul teletael, ng dimlak el teletelir a rechad er a blil. Sel telbilel a Anna el diak el bo longa a kiande a dimlak el uchul a chebirukel el teletael el mo er a Johanes, eleng ng mla er ngii a osisiu el techellel el di uai a ochedal.
A telbiled a di osisiu el mo er ngii a kemanget el teletael el ngosukid a lechub eng teletael el diak el ngosukid. E sel Rubak a ulecholt, Alsekum a chad ngmai a lmuut el betok el klemedengei me a llomes er a chelsel tial klengar el okiu a duch el reng me a blak el reng er a bai kuk rebebil, e ngii kmal mo chemau a teletael el ngosukii er sel beluulechad el mei.3 Sel rebebil a ngmai a klungiaol eleng sel dechal a rengrir el melilt er a ungil, eng diak el sebeched el melekoi el kmo ng chebirukel el tekoi a merkid ele osisiu el techall a mlerkid.
A ta er a okesiul a chebirukel el teletael a dilubech el mo er a bechik er a, Ruth, se er a le kekerei el ngalek. A ta er a klebesei, a Ruth a mlo medengei el kmo a delal a obang a merengel er a, Merla, el mo omechar a beches el oercherel. A Ruth a uluumondai, “Chedil, tiang a chebirukel el teletael! A Merla a ngilai ikel beches el oeacher.”
A delal a Ruth a uleker, “Ruth, a oecherem ngsebechel a ochim?”
A Ruth ulenger, “Ng, choi.”
A delal a Ruth a dulang, “A oecherel a Merla a mla mo mekekerei er a ochil.”
A Ruth a kilengei el kmo a bek el ngalek er a chelsel a telungalek a kirir ngarngii a oecherir el sebechel a ocherir. Me a leuaisei ea Ruth a mle soal a beches el oeacher, e sel uldesuel el kmo chebirukel el teletael a mla er ngii a mlo diak eleng milsa sel teletael el okiu a osengel a delal.
A bebil er a chebirukel el teletael a diak el sebechel el soadel; a diak el sebechel soadel el chebirukel el teletael a olngasechereng. Chebirukel el teletael a mo er ngii sel omkiei el obang a bedengel a tech el diak el cherrungel, telemall, a lechub eng smerch. Tial klengar a ngarngii a chebirukel el teletael er ngii. A rebebil er a rechad a mechell el ungil beserir; ea rebebil a diak. A rebebil a ngarngii a oubeltikerreng el chedam me a chedil; ea rebebil a diak. A rebebil a kiei el mo melai a betok el rak; ea rebebil a mekesai. E melemolem e melemolem e melemolem. A dersta el chad a mo rullii a cheleuid el teletael sel sekum e te melasem el meruul a ungil. A rebebil a melilt el diak el olngeasek a chebirukel el teletael sel sebecherir. E sel ringellel, a dersta el chad a ousbech er sel klisichir el melilt el mla er a Dios el mo melemall er a rebebil el ngii a kmal diak el kirir.
A rechad a mo chemau a betok el bedengel a chebirukel el teletael, el rulii a klou el berius el sebechel mekodeterir a rechad malechub eng tomall a ikel ngara bkul a daob. El uai tial okesiu, a COVID-19 el bekuiuiuul el rakt a tomelterir tirkel tir ngarngii a betok e, diak a teletael ngosuterir. Ng mekngit a renguk el kirir tirkel chemau er tial chebirukel el teletael, eng di ng soak el ouchais el obang a rokui el ringellel a renguk el kmo a Jesus Kristo a medengelii a chebirukel el teletael e ngarngii a klisichel el mo ochotii a kerul. Ng diak a ngodech el mengaisisiu er sel chebirukel el tekoi el Ngii a mlo chemau er ngii. Ng dimlak el ungil besul el kmo Ngii a mlo chemau a rokui el ringel me a telmellel a klechad. Ng dimlak el ungil besul el kmo Ngii a mlo chemau a ringel el kirel a kengtik me a chelitechetuk me a kemiu el dirrek. Eng di Ngii a mililt el mo meruul er ngii eleng Beltkil a Rengul el merkid me a Chedam er a Babeluades. Ngii a mui el medengei a ikel kid a chemau.4
A llechukl er a Chedaol llechukl a kmo a re Israelites er a ngaramong a mle oumondai el kmo a Dios a dimlak el ungil a teletelel el mo er tir. Meng onger, a Jehovah a uleker, “A chedil ng sebechel lobes er a tmut el ngelekel, meng diak el chubur a ngelekel ra diil?” Meng locha uaisei e a ungil chedil a mo obes er a tolechoi el ngelekel, ea Jehovah a uluuchais el kmo a Beltkil a Rengul a diak el mesim. Ngii a milekoi: “Choi, te mo obes, ngdi Ngak a kmal diak kubes er kau. … Maleuaisei, ak mla luchesii a ngklem er a cherouel a chimak; ng kmal diak el sebechek el obes er kau.”5 Ele Jesus Kristo a uluutekangel er sel diak a ulebengelel melngakireng el tenget, Ngii a kmal ungil medengei a ikel domelchesuar.6 Ngii a blechoel medengelkid me a ikel doruul.
Chelsel tial klengar, eng sebeched el “olekeed er kid” el mo er a Osobel e mo nguu a klechubchub, omekungil, me a ngesou.7 E sel sekum e kid a ngara meringel el ringel, a Dios a sebechel omekngeltengat er kid el okiu a beot, e osisiu, e klou a belkul teletael. Sel dosuub el mo medengei a ikal klengeltengat, ea klaumerang er kid er a Rubak a mo klou. Chelsel sel diak a ulebengelel klengar, ea Chedam er a Babeluades me a Jesus Kristo a mo sumechokl a rokui el chebirukel el teletael. Kid a soad el mo medengei el kmo ng mekerang e oingerang. Ng mekerange Te mo meruul er sei? Ng oingerange Te mo meruul er ngii? Sel klemedengei er ngak, Tir a dirrekak el ouchais el kmo ngmekerang malechub ng oingerang.8 Sel bai kudengelii a kmo Tir a mo.
Chelsel a chebirukel omeruul, ea chimo el ngercheled a mo oumerang el kmo “a rokui el chebirukel el teletael el kirel a klengar a sebechel mo mesmechokl el mo ngara llemalt el okiu a Tngakireng er a Jesus Kristo.”9 A Jesus Kristo a mlo mesisiich er a beluulechad e “ngilai” a rokui el chebirukel el teletael. Ele Ngii a uchul, eng sebeched el mo er ngii a budech er a chelsel a beluulechad e mo ungil a rengud.10 Alsekum me kede Mecherei, a Jesus Kristo a mo omekngeltengat a chebirukel el teletael meng mo klungioled.11 Ngii a diak di bo longelaod er kid e loluut a ikel mla remiid;12Ngii a mo ousbech a ikal chebirukel el teletael el kirel a klungioled. Me sel bo er ngii a ng mekerange oingerang, eng kired el mo medengei e kongei, el uai a Alma, el kmo ng “diak a belkul; le Dios a medengei a ikang er rokui el tekoi; ngungia besul er ngak el kmo medengei el kmo nguaisei.”13
Ng sebeched el oreked a kerid el kirel a ng mekerange oingerangme bo uriul e bai blak a rengud el omekeroul a klaumerang el ngara Jesus Kristo, el Ngii a ngarngii a klisichel el mo meruul a rokui tekoi el mo ngara llemalt e semeriar el mo meruul el mo uaisei.14 Me sel dorim er kid el mo medengei el kirel a ng mekerangmalechub oingeranga diak a ngeral relii, e bai , di omes er a di kmeed.15
Me sel domekeroul a klaumerang er kid er a Jesus Kristo, eng kired el melasem el mo uai Ngii. Sel kid a mo er a rebebil el obang a klechubchub e melasem olngeasek a chebirukel el teletael er sel debetik er ngii;16 eng sebeched el melasem el mo omekllemalt aikel teletael el ngara delongeled. Ng uaisei, a Osobel a ulmekrael el kmo kid a kired el meruul a ungil teletael, e meruul a betok el tekoi el di [kid] el ngara rengud, me bo le ngarngii a llemalt.17
A ta er a chad el mle blak a rengul el oureor me bo lak a chebirukel el teletael a chad er a llach el Bryan Stevenson. Sel urerel el ngara beluu er a Merikel a kmal di mesebechakl er tirkel dimlak el rullii a telemall, tomer a meringel el kelebsengel, e mengeluolu a llemeltir a rechad. Sesei el rak ra mla me mong, a Mr. Stevenson a milngesebechakl er a chad blel mecheuid e otelecheklii el kirel a kodall meng mlo kirel el mo mad. A Mr. Stevenson a ulengit er a rechedal a ikelesia er ngikal chad mel ngosukii, el ngikal chad a dimlak lomais el mo er a ikelesia e mle mekngit a chisel er a bouai eleng mle ngara delboes el tekoi.
Me sel soal a rechad er a ikelesia a bolodengelii sel kmal klou a ututelel, ea Mr. Stevenson a milngedecheduch er tir el kirel ngkel redil el mlo telechakl el kirel a delboes mete ngiluu el mo er a Jesus. Tirkel lultutakl er ngii a mle sorir el ometech er ngii el mo er a kodellel, eng di Jesus a dilung, “Ngikel diak a kengtil … , er a kemiu le kot el ometech.”18 Tirkal lultutakl er ngikal redil a mlo stob. A Jesus a dimlak el kelebsengii ngikal redil ng bai dilu er ngii melak el luut el mo er klengit.19
A uriul er a louchais er tial cheldecheduch, ea Mr. Stevenson a ulmes el kmo a kelsimang, sebekreng, me a kelsib el reng a mla rulterir a re Kristiano mete mesaod er a rechad ma chelitecheterir. E ngii a dulang, “Ng diak el sebeched el di omes er ngii el dubech,” ng bai mle omekduch a rengrir tirkal rechad er a ikelesia me “longesebechakl er a rechad el bouai a diak el ungil mo er tir.”20 Rodam me a rodos, a lak kom mekngit el mora rechad a kot el bakes el kirel a mo ungil er a rechad el obang a klechubchub. Ea Ongerung el bakes sel molasem el mesebechakl er a rebebil el rechad a diak el ungil a teletelir el mo er tir.
Sel dousbech a teletael ngosukid me a teletael el diak el ngosukid a tebedechel a skeng er a klengar. Kid a mo mukerkeriil el diak lokiu a omelkinged ng bai teleteled el mo er tirkel metarchbeserir e diak a teletael ngosuterir.21 Sel de Uriul-klebesei el Santo, e kede osiik el mo oltirakl er a okesiul a Osobel, el mo meruul a ungil.22 Kede olecholt er a beltkil a rengud el mo er a retonari er kid el oureor el mo mengedmokl a klaumerang er a rokui el rengelekel a Chedam er a Babeluades.
Ng kmal ungil sel dmolech a uldesued el kirel a ikel teletael el ngosukid me a teletael el diak el ngosukid, a llechul a ungil. Sel Johanes a bo lodengei el kmo ngera uchul ma Anna ngiluu a rat a mlo chemolt. Sel Ruth a lesang el kmo a Merla ousbech a oearech el okiu a osengel a delal a uai blo lomekllomes. Omelasem el omes a tekoi el obang a diak a ulebengelel el moktek a sebechel mo bleketakl. Sel bo de uai a Osobel, e kede mo ngarngii a klemedengei, mellemalt el reng, me a bliochel el beltik el reng.
Ak lmuut el mo er sel ker el dilu ngkel chad el mla omerael el ngara Kigali el mle mekngit a rengul ouchais el kirel a chebirukel el teletael er a kodall ra Rwanda e uleker, “Alsekum meng ngarngii a Dios, e Ngii ngerang dimlak el rullii a kmu ngerang el kirel?”
Meng diak dongesadel a ringel eleng uchul tial kodall, e kongei el diak el sebecham lomtab er tial ringel, ea ki ulenger el kmo a Jesus Kristo a ngarngii a bla rellii el kirel a olngasechereng ra chebirukel el teletael.23 Aki silaod a betok el omesubel a ebangkelio el kirel a Jesus Kristo me a Oltel a Ikelesia er Ngii.24
Ea uriul, e ngika chad a oker, el ngarngii a iuosech er a medal, “Ke meral melekoi el ngarngii a sebechek el rullii el mo er a mla mad el demak me a delak ma okdemelek?”
A ki dilung, “Adang, Ochoi!” Aki uluuchais el kmo a rokui el ngii a chebirukel el teletael er a klengar a sebechel mo ngara llemalt lokiu a Tngakireng er a Jesus Kristo e okiu a Klisichel ea telungalek a sebechir el dmak el mo cherechar.
Sel mchau a chebirukel el teletael, eng sebeched el mo cheroid er a Dios malechub eng sebeched el mo kmeed er Ngii el mo ngmai a ngesou me a odbechel. Uai tial okesiu, sel kemanget el mekemad er a delongelir a re Nephites me a re Lamanites a mle kakerous a rellii el mo er a rechad. A Mormon a ulmes el kmo ng mle betok a mlo medecherecher a rengrir ea rebebil a mlo medemedemek eleng uchul a ringelir, meng mlo ngariou a rengrir er a uchei er a Dios.25
Lak ko bechei a chebirukel el teletael mel dochercherau a lechub el tomellii a klaumerang er kemiu er a Dios. Ng bai, molengit a ngesou er a Dios. Momdois a omereng saul me a ultilem el mo er a Osobel. Bai lak bo el mekngit a rengum, e becherei me el Ngii a ngosukau el mo ungil.26 Mkengei er Ngii mel ngosukau el outekangel, e bechei a ringelem bol ngara deureng er a Kristo.27 E bo mobengkel el ngarsel Urerel “el mo omekungil a chelam er reng,”28 e melasm el mo olngeasek a chebirukel el teletael, e mo mengesebechakl er a rebebilr.29
A kuuchais el kmo a Osobel a ngar. Ng medengei a chebirukel el teletael. A llechukl el ngara chelsel a cherouel a Chimal a melemolem el omeklatk er Ngii el kiriu me a ikel omoruul. Ngii a mo oldingel er kemiu er a chelsel a rokui el ringeliu. Mo er tirkel el mei er Ngii, a korona er a klebokel a mo mutechei a klemengeung; a deurreng me a ungilreng a mo mutechei a chelebuul me a klengiterreng; omereng el saul me a omilil a mo mutechei a telirm el reng me a merat el reng.30 A klaumerang er kemiu er a Chedam er a Babeluades me a Jesus Kristo a mo klou el diak el sebechem el metebengii. Rokui el chebirukel el teletael—tokubets olngasechereng ra chebirukel el teletael—a mo modars el kirel a klungiolem. Aika kdung el ngara ngklel a Jesus Kristo, amen.