Omekngeltengat el ngara Ngklel
A moktek er a ngeiul a klebaderei a mo meskid a techall el mo omekngeltengat er a rechedal a Rubak, el oureor loba Ngklel.
Rodam er ngak, el mesiungel a Dios el ngara klebaderei, ng chetengakl el me er ngak el mo mengedecheduch lekor kemiu er chelechal kesus. Ng dmolech el omengull me a omereng el saul lekor kemiu. Sel kungedecheduch er kemiu ek renges a mesisiich el klaumera er kemiu, ea kumera el kmo ng merael el mo klou a klisichel a klebaderei er tial beluulechad, lobengkel a lmuut el mesisiich el chelechad ma reblak a rengrir loba klebaderei.
Aikal sesei el temek lobengkemiu er tiak kesus, e ak mo mengedecheduch el mo er tirkel tir a sorir el meraelel moungil er a omesiungiu er a klebaderei. Kemiu a medengelii a ngercheliu el kiriu el melisiich er a okedongiu el mo mesiou.1 Engdi kom locha omededenger el kmo tial okedong ngera belkul mer kau.
Ak mo omuchel er nigkel kot el beches el deacon le tir tirkel blechoel locha diak lungil medengelii a belkul a melisiich er a omesiungir el loba klebaderei er tir. A rebeches el mloterekokl el re elder a locha dirrek el sorir el orrenges. E a bishop el dirk sesei el sandei losiou a dirrek el locha soal lorrenges.
Ng osisechakl el merngak el mo omes a ikel klebesei el ngak a mle deacon. A kuureng el kmo ulekum eng mla er ngii a chad el silbedak er a ikal bo kumasech er chelechang. Leng mle sebechel ngosukak er a ikel rokui el urrerek er a klebaderei el me lmuut er chelechang—ngii me aikel ngak a mla ngmai er chelechal teem.
Ak mlo moterekokl el deacon er a kekerel ikelesia meng dimle tal ngak a deacon ea obekuk er a Ted a di mle imo el sensei. Kemam a di mle chimol telungalek el ngar tial ikelesia. Tial rokir el ikelesia a mle oumisang er a blimam. A oungerachel er a klebaderei el obekuk me a ngak a mla er eungel a mle beches el chedal a ikelesia e kmal dirk ngiluu tial klebaderei. A kuluumerang el chimol ngerchelek er a klebaderei a merous chedaol belsoil er a chelsel a blil a blengur er a blimam.
Sera telungalek er ngak lolukl el mora Utah, e ak mla er a klou el ikelesia lobengterir a rebetok el deacon. Sel kot el miting er a chedaol belsoil e risei, e ak ulemes er a re deacon—el ta bekesir, sel lorous—a chedaol belsoil el uai a le ngilai osisechakl el kirel.
Sel ongeru el Sandei e ak di mlemereched el mora ikelesia el di mo ngak el tang e diak a chad el sebechel mesekak. Ak dobedekii le ng sel mle Yalecrest Ward er a Salt Lake City, el mla er ngii a dechor er a chutem el bleob el chaus. Ak mlo rullel tial bleob el chaus e meluluuch el kirel a ngesou el mo meduch el diak mecheuid sel knguu a basio er ngak er a omerusel a chedaol belsoil. Tial nglunguuch a mlorenges.
Engdi chelechang e ak mla mo medengelii a ungil teletael er a mo meluluuch e mo omdasu sel dolasem el mukeroul er a chelsel tial omesiou er kid er a klebaderei. Ng mla mo bleketakl a klemedengei er ngak el kmo ngera uchul me te omsa chad a klebaderei. A moktek er a ngeiul a klebaderei a mo meskid a techall el mo omekngeltengat er a rechedal a Rubak, el meruul loba Ngklel.2
Tia mlo betok el rak ruriul er a le dikeak deacon e ak mo a medengei el kmo ngera kmal belkul. Okesiiul tiang, sera kngarbab el baderei, e a kuleba chedaol belsoil el mo er a blirir a remechuodel. Ak mlongit el mo merous a chedaol belsoil. Ng dimlak kumdasu er a mo teletelel me a lechub eng chatter sel kurous a chedaol beslsoil, Ak bai ulemes a mederir a rebek el mechuodel el chad. Ak milsterir a rebetok er tir el llemangel. A ta er a redil a ulerkedii a chimal a bilek, ulemes el bedul bab, e millekoi el klou a ngerel, “A chedil, ke meral mesual, ke meral mesaul.”
A Rubak a mle omekngeltengat er a urerek el milkedmokl el oba Ngkel. Seikid el sils e ak miluluuch er a chouai tia el ongasireng mel borngii e bai dimlak kululuuch el kirek el moungil rulii sel ngerchelek. Ak miluluuch el kmo a rechad bo lomelchesiu er a beltikelreng er a Rubak lokiu a ungil omesiou. Ak mla subii el kmo tiaikid sel mekengii a omesiou me a klengeltengak el mora rebebil el ngara Ngklel.
Ak rirengesii a dirk dilubech el tekoi el ngii a mekletkak er a chouai tia el beltikelreng. Sera bol metrob a ongdibel er a Ikelesia leng COVID-19 el secher a uchul, ea mesiou el odam a kilengei er a oderuchel el mla er a elder quorum president er ngii el mo omekngeltengat e merous a chedaol belsoil el mora odos el ngii a oldingel er ngii. Sera lomekedong er ngikal redil el mo oba chedaol belsoil el mong, eng kilengei eng di dimlak el sal soal, leng mle chetil a bo luchul e bo el tobed er a blil er a taem el kmal mle kengaol e dirrek el mle oumerang el kmo a rokui el tekoi a mereched el le muut el mora smechel.
Sera le bera blil ngkal redil er a tutau er a Sandei, eng mla rengii ongtil. Ng sebecherir el mora bita el blai e loruul er a chedaol belsoil lobengkel a 87 a rekil el tonari er ngii? Ngiluu a kengei er a bishop, e mlong.
Ng mle betok, el betok el sandei, el kerekikl el chacheroid e oltirakl a aikel bek el telengtengil e te selbechakl, e tirka el sesei el Santo a mle kldibel sel Sandei el melai er a chedaol belsoil. Ng di mle mekesai el blached el blauang me a ralm el ngara kob—eng di betok el iuosech a tilobed el kirel a klungiolel a rengul a Dios.
Meng mlo er sel taem e ngikal odam el mle oldingel, ma telungalk er ngii, me ngikal odos luldingel er ngii a mocha sebecher el lemuut el mora ongdibel er a ikelesia. Engdi ngikel 87 a rekil el melakl el dil, el tonari, el kmal mle kerekikl el kirel, a mlo kirel di ngara blil. Ngikel odam luleldingel—a medengei el ngerchelel a di kirel loldingel er ngikel tonari er ngii e diak lomes er ngikal uodel el mechas eng—di melmuut er chelechal sils eng direk omais el mora blil ra bek el Sandei, el beldoel ra chedaol llechukl ma telkib ra blauang er chimal, me bo lolai ra chedaol el Belsilel a Rubak.
A omesiungel sel klebaderei el lobang eldi uai ngak er sel sils ngara blirir a re mechuodel a okiu a tmolech el beltik el reng. Ea ongingil, ngikal lodam loldingel a uleker ra bishop ma le direke ngarngii a lmuut el bebil el ngar tial ikelesia el sebechel lebo loldingel er tir. Sel ongtil soal menglou ra omesiungel a kle baderei er ngii a mla mukeroul sel losiou lokiu a ngklel a Rubak ra chelsel a teletael el kmal bleketakl el mora Rubak. Ng diak kudengei el kmo ngikal odam loldingel ng miluluuch el uai ngak el kirir tirkel losiou er tir el mo medengelii a beltkil a rengul a Rubak, ngdi tial lomesiungel lokiu a ngklel a Rubak a ngarngii a ungil lolechotel.
Ngosisiu lungil olechotel a mei sel kululuuch el kirel ruchei er a bo kulekoi a klengeltengat er a klebaderei el mo ra chad el ngii a smecher malechub eng ousbech a ngesou. Ng mle tal dubech er a ospitar el ta el mla mo seselk a rengul toktang—a dilu er ngak —lorrimel er ngak—me kurchedak el mo cheroid me bol sebechir el meruul a urerir, e bai diak lebechikak me kbsa klengeltengat er a klebaderei. A kiliei, e milsa klengeltengat. Ngkaikid el kekerei el ngalek el redil el kulmekngeltengat er ngii, el toktang a ulemdasou el kmo ng di mo er a kodall, a silobel. Ak mereng a saul er chelecahang el seikid el sils, eng dimlak di kultuil er a soak e bai ulemelchesiu el Rubak a mle soal a kbsa kelngeltengat ngika el ngalek el redil. E ngak a mle medengei el kmo ngera el klengeltengat: a kulmekngeltengat er ngii el mo ungil. Meng mlo uaisei.
Ng dubech el betok sel kumekngeltengat ra chad el eru er a kodall, el meliuekl er a bet a re bebil er ngii, loureng er a klengeltengat er a omekungil. Molmuut er a di el kedeb a temek, me ngak a di meluluuch el mo medengei el kmo ngera el klengeltengat a soal a Rubak ak relii el ngara Ngklel. Me a kuker el momedengei el kmo Ngii ngera soal a kumekngeltengat el mor ngikal chad el diak lokiu a soak ma lechub eng soal ngkel dechor el kmeed er ngii. A klaudengei er ngak alsekum e sel klengeltengat a diak el sel loureng er ngii a rebebil el kirir a rebetik er a rengrir, e a Chedaol Reng a remutech a rengrir me te mo kongei e mo kellechakl a rengrir e bai diak el metirm a rengrir.
Tial osisiu el omekellomes a mei sel lolsengerenger e loluluuch a re patriach el meluluuch el kirel a ulekreael el mo omeklengtengat lolab aikel Rubak a soal a le bora ngkeikid el chad. A lmuut el tang, ak mla remenges a klengeltengat el mla medung el chosir a renguk e chosir a rengul ngkel chad el melai er tial klengeltengat. Ng bleketakl, el klengeltengat a mla er a Rubak—ngii el erung el uleklatk me a dirrek el yaksok a le ngilai lokiu a Ngklel. A klengerenger me a nglunguchel a patriarch a lengilai a omeksulel el mlara Rubak.
Se er ak bishop, e ak silubii el mo omuchel el mengedecheduch er a chad el kirel a kldung er ngii el mo meluluuch el mora Rubak me bo kumelchesiu aikel Ngii a soal el kirel ng kal chad, me ak ngmai a llomes el Ngii a mo meskak meng diak el medekedek er a kuk di uldesuek. Tiang a meringel alsekum ea Rubak, loba beltikelreng, a soal lomekngeltengat er a chad e kirel lomeklemalt er ngii. Ng kirel blak a rengud el mo omiich a soal a Rubak me a ikel soam me a ikel soal a tara chad.
A kuumerang el kmo ngsebeched el mesisiich er a omesiunged er a klebaderei er a klengar er kid el rokir me a dirrek el locha engelakl er sei. Tiang a di mo ultuil er a blakelreng el melasem el mo medengelii a soal a Rubak me a blakelreng el mo orrenges er a Ngerel mel bol sebeched el moungil medenge soal el kirel ngkel chad el ngii a dosiou er ngii el mora Rubak. Tial omelisiich a mei lokiu a mekekere el bakes. Ng locha mo meoud el mei, eng di ng mei. A Rubak a yaskok er tial tekoi el merkid:
Me ngike el ngii a blak a rengul el mo ngmai a ikal eru el klebaderei el blak kulekoi, e melisiich er a ngerchelir, a mo mechedaol lokiu a Chedaol Reng el mo omekbeches a bedengir.
Te mo ngelekel a Moses me a Aaron e ngelekel a Abraham, me a ikelesia me a rengeded, e ngelitel er a Dios.
“Me tirkel rokui el nguu a klebaderei a ngoikak, ng dilu a Rubak.”3
Tiang ak sioning er ngii el kmo a klebaderei a mloluut el mora Profet Joseph Smith. A re mesiungel a Rubak el mlara babeluades a mle duum el me olluut er a klebaderei el kirel a klou el tekoi el ngii a mla mocholt e blengkangk er a medad. A Israel a mo mechudel. A rechedal a Rubak a mo kldmokl el kirel sel klebokel el Ungerul Lemei. A Oluut a mo melemolem. A Rubak a mo ocholt a lmuut el betok el Soal el mora profet er Ngii me a Remesiungel.
Ke locha omelchesiu el kora kekerei sel dongaisisiu el morsel klou el omengudel er Rubak a mo meruul er ngii. Alsekum komelchesiu el uaisei, e ak olengit er kau el mo oker el ngara nglunguuch el kirel a osengel a Rubak er kau. Ngii a ungil medengelkau, Ngii a uldersii a klebaderei lekor kau, e kau el mermang e melisiich er tial klebaderei a klou a belkul el mo er Ngii e le Ngii el betik a rengul er kau e oumerang er kau el mo omekngeltengat er a rechad loba Ngklel.
A kumekngeltengat er kemiu er chelechang el mo melchesuar a beltkil a rengul me a klaumerang er Ngii, el ngara ngklel a Rubak el Jesus Kristo, amen.