Rebisop—Mengkerengir a Rengelekel a Rubak
A bisop a klou a ngerchelel el mesiou e mengkerengir e omekrael er chelechal telcheroll el kirel a Jesus Kristo.
Rodam er ngak er a priesthood, a tara kmal klebokel bades er a soad el chelitakl a kmo, “Shall the youth of Zion falter?”1 A kmal ngara chelsel a renguk el nger er tial ker a kmo “Ng diak!”
A olchotel a klemera er tial nger, e a kuuchais er chelechal sils el kmo a ngesou el mo er chelechal telcheroll er a chelsel a meringel taem me a ongetikaik a kmal iimis el klou el ngerachel el mo er a rechedam me a rechedil me a rebisop el mla er a Chedam er a Babeluades.2 Msall e kuchotii a klou el ultutelel a klebisop lokiu a teletael dilubech el mei er ngak.
Se er ak deacon, e a telungalek er ngak a millukl el mo er a beches el blimam er a kuk ngodech el ward. A kulemuchel er a high skuul, me ak dirrek el mla er a beches el skuul. Ng mlar ngii a klebokel chelechad er a rengeasek el sechal el deacon. Oumesingd er a rechad er a blirir a mle mesisiich el chedal a ikelesia. A delak a kmal mle mesisiich er a ikelesia; eng di a demak el kmal mle ungil er a bek el ngerang a dimlak el sal mesisiich er a ikelesia.
A ongeru el counselor er a klebisop,3el Brother Dean Eyre, a kmal mle blak a rengul loungerachel. Ak dirk mesuub a teletael er tial beches el ward, e a omilil er a rechedam me a rengelekir el sechal a mlo er ngii er a Bear Lake—el kmeed el okeua el mile (65 km) a cheridel. Ng dimlak kumdasou a mong alsekum a demak a diak el bong. Eng di a Brother Eyre a miskak a tokubets el siotai el mo obengkel mong. Ng kmal millekoi a ungil tekoi me a omengull er ngii el mo er a demak e milketeklii a klou el ultutelel a bok teloi er a rebebil er a rechedal a deacon. Sola me ak tilbir lobengkel a Brother Eyre el mong, e meral mle ungil lomilil.
A Brother Eyre a meral mle ungil lokesiul a blekerdelel a Kristo er a ngerchelel a klebisop lolngeseu er a rechedam me a rechedil el mengkar e melisiich er a rengeasek. Ng kmal ngilsukak er a uchelel tial beches el ward el kmlarngii e kmal mle ungil lokesiu el mei er ngak.
Sesei el buil ruchei er a kurael el mo er a mission er sera 1960, e a Brother Eyre a mlad er a kasinoma el mle okedei me a etui a rekil. Ng mlo ikrii a bechil me a reteim el ngelekir, el rekrir el rokui a ngariou er a teruich me a elolem. A remeklou el ngelekel sechal, er a Richard me a Chris Eyre, a mla subedak el kmo chelecha el dibus a demerir, e a rechedal a klebisop a mla olngeseu e oldingel er tir me a rochellir me a ruchederir loba beltikereng er a Kristo, el meral kuureng a saul kirel.
A roungalek a melemolem el klou a ngerchelir el kirel a telungalek er tir.4 A remerredel a chelechad a dirrek lodars a meklou a belkul ngesou me a ulekrael el mo er a rechedal a chelechad lolngeseu er tir er a ngerachel me a klisichel a Aaronic Priesthood el mo kot er a klengar tir.5
Chelechal sils e a moktek er ngak a melekoi el kirir a rebisop me a recounselor er tir, el sebeched lomekedong er tir el kmo “te mengkerengir a rengelekel a Rubak”—tokuni mengkerengel a merael mei el telcheroll.6 Ng mechas a rengud el Apostol Paulus a millekoi el kirel a Jesus Kristo el kmo “ng Mengkerengel e Bisop er a rengmiu.”7
A bisop a ngarngii a kleim el ngerchel sel loungerachel er a ward:
-
Ngii a bdelul a ngarbab el priest er a ward.8
-
Ngii a merreder er a Aaronic Priesthood.9
-
Ngii a chad er a kerkeriil.10
-
Ngii a oungerachel er a urerel osebelir a rechad, luldimukl omekerreu er a rengesool.11
-
E ngii oungerachel a rekord, tekoi er a udoud, me a usbechellel a ikelesia.12
Chelsel sel ngerchelel el bdelul a ngarbab el baderei, e a bisop a ngii a “mengeteklel a chedaol tekoi” er a ward.13 Ng kirel “mesisiich loltirakl er a Jesus Kristo.”14
Osisiu, “a bisop a oungerachel er a urerel osebelir a rechad er a ward.”15 A bisop a kirel mii a ngerachel er a bek el sils el kirel a urerel ebangkelio, omelisiich er a rebeches me a reluuetang el chedal a ikelesia, odingel, me a templo me a ureor er a reksi er a telungalek el mo er a roungerachel a chelechad er a elders me a Relief Society.16 A bisop a kudmeklii tial ureor lokiu aikel council er a ward me a rengeasek.
A bisop a klou a ngerchelel el mengkar e omekrael er a merael mei el telcheroll, luldimukl er a rengeasek el mesobil, el kirel a Jesus Kristo.17 A President Russell M. Nelson a mla smisichii a klou el belkul a ngerchelel a bsiop me a recounselor ngii. Ng mla olisechakl el kmo sel “kot el klou a belkul ngerchelir a mo omekerreu er a rengeasek el sechal me a redil er a ward er [tir].” 18 A rengara klebisop a olngeseu er a rechedam me a rechedil lomes e melisiich er a rengalek me a rengeasek er a ward. A bisop me a me a merredel er a Young Women er a ward a kirir el dmak loureor. Te melasm lolngeseu er a rengeasek el mo kiei loltirakl a llach el Kirel a Klisichir a Rengeasekel mo sebechir el mo ngmai chedaol ruoll, e meruul e oltirakl a chedaol telbiil.
Kom locha rrau a rengmiu el kmo, “Ngera uchul me a bisop a kirel chemoit a klou temel lobengterir a rengeasek?” A Rubak a mla toketekii a Ikelesia er Ngii el mo kudmokl a meklou a belkul tekoi. A leuaisei, e a teketekel a Ikelesia er Ngii a ngarngii a teletael el bisop olab a eru el ngerachel. Ngerchelel a teletael er a osisechakl er a rokir el ward, e dirrek el ngarngii a ngerchelel er a osisechakl er a chelechad er a priest.19
A rengeasek el sechal el tir a priest me a rengeasek el redil losisiu a rekrir a ngara sel kmal klou a ultutelel dauch er a klengar tir me a ulekerulir. Chelsel a kedeb el taem, e te melilt a loruul tekoi el ngii a kmal klou a relii er a kelngar tir. Tir oba okael er a kmo ng sebechir el mo er a templo, mo er a mision,20melasm el mo bechiil er a templo, e mengedmokl er tir el kirel a klechad er tir. A lolilt el meruul, sel tal bla lemekedmokl, a kmal klou a relii er a chedaol klengar me a klechad er tir rokir. Rebisop, bo modengei el kmo a kmal kedeb el taem el mobengkel a ngeasek el priest, a lechub a ngeasek el dil, me lechub a rengeasek el chad a sebechel ngosuterir el mo medengelii a klisiich el ngar ngii el kirir lokiu a Tngakireng er a Jesus Kristo. Ng sebechel mesterir a ngodech el ues el kmal klou a lengedechii er a klengar tir
A tara kmal lungil lokesiu el bla kisa er a bisop el ngii a ulechotii tiaikid el teletael el kirir a rengeasek a Bisop Moa Mahe. Ng mlokedong el mo kot el bsiop er a San Francisco Tongan Ward.21 Ng millukl er a beluu er a Vava‘u, Tonga el mei er a Merikel. A ward er Ngii a mla er a bita er a skozio, er a San Francisco, el kmeed er a urerel.22
Tial ward a kmal mle betok a rengasek er ngii, el betok er tir a mla er a telungalek el mla melukl el mei er a Beluu er a Merikel. A Bisop Mahe a dimlak di lolisechakl er tir e lemerekong ng dirrek el mle okesiu er a melemalt loltirakl er a Jesus Kristo el chad, e dirrek el ngilsuterir el kirel aikel sebechir el kudmokl er a klengar tir e ngilsuterir el kirel a mo er a templo, mission, skuul, me a ureor. Ng milesiou el kmeed leai el rak, e a urungulel me a rengul kirir a rengeasek a tilaut.
Kmeed loketiu el basent er a rengeasek el sechal er a chelechad er a Aaronic Priesthood a mlo er a mission. Teruich me a teim el ngeasek el sechal me a redil a mlo kot el chedal a telungalek er tir el mo er a daingak.23 Ng ulemais lomes er a merredel er a high skuul (diak el chedal a klechelid er kid), e te kmal mlo kausechelei e mle kaingeseu er a uldasou lolngeseu er a dersta el ngeasek el mo kudmokl a moktek er tir e mo selbechakl er a mondai. A merredel er a skuul a silbedak el kmo a Bisop Mahe a ulengeseu er ngii loureor lobengterir tirkal millukl el chad er a bek el bedengel a klechelid er a ikel mondai me a ringel le blarngii. Tirkal ngeasek a mle medengei el kmo a bisop a betik a rengul er tir.
Ng chelebuul, le Bisop Mahe a mlo smecher er a taem losiou el bisop. Ng kmal diak kubes er a meral mle ungil el kemeldillel. Ng meral mle meseked. A rechedal a chelitakl a mlarngii a betok er a okedei me a teim el ngeasek el chedal a ikelesia el mla ngara mission a lechub e te ngara daingak el tir a mle ngeasek er a taem losiu el bisop. A tara milngedecheduch el chad a ulechais er a dmolech lomereng el saul er a rengeasek me a remekiklou el chad er a ward. Ng mirreng a sulel a Bisop Mahe er a ues lengiluu el mesterir er a kedmeklir el kirel a klengar me a melemalt lomesiou. E sel kmal ngaruchei, e a Bisop Mahe a ngilsuterir el toketekii a klaumera er tir er a Rubak el Jesus Kristo el mo dodai er a klengar tir.
Chelecha, e rebisop, ngii di el ker el mngarngii, a le berrotel el cheldecheduch el moruul me a kuk di bebil er a deleuill, eng sebechiu lochotii osisiu el ues me a klaumerang er a Jesus Kristo. Ng sebechiu lochotii a mesisiich el siotai el mo melodech a blekeradel, e kudmekelterir el kirel a klengar, e ngosuterir el melemolem el ngara rolel a telbiil.
Osisiu, ng sebechiu el ngosuterir a rebebil er a rengeasek el tir a ngara chelsel a mondai lobengterir a rechad er a blirir er a tekoi el diak el sal meklou a ultutelel.24 Aikel taem el rengeasek a seluk er a chelsel a klou el mondai lobengterir a rechad er a blirir, e a chad el ngii a bdelul a chelechad er tir e onger a bek el teletelel a ikelesia el kirir a osisiu el chad el redemerir me a rederiri a mo er ngii el kirel a babier er a mo er a templo. Tia osisebii a bisop er a tokubets el deruchall el mellach er a rengeasek me a dirrek el rechad er a blirir sel sekum a ultok a rulterir el mo chacheroid. A rebisop a sebechir el ngosuterir el mes a teletael loba diak a ulebengelel ues e sumechokl a diak a kmal belkul mondai. Aki melatk el kmo a rebisop lak bo lomais loldingel a telungalek me bol sebechir el mui el chemoit a temir me a klisichir loldingel er a rengeasek me a telungalek er tir er a chelsel aikaikid el teletael.25
Ak medengelii a chimol bisop el mlo sebechel sumechelii a meringel mondai er a delongelel a ngalek el sechal me a rechad er a blil, el mlo uchul a kltalreng er a blai me a mui el blakereng el kirel ebangkelio. Ngkal bisop a ngilsuterir tirka loungalek el mo medengei el kmo a dolasm el mo oltirakl er a Jesus Kristo a ngii a lmuut el klou a belkul ng diak el teletael er a ureor er a blai el mekedmokl.
Sel mo uchul a klou el temel lobengterir a rengeasek, er a ikel lengarngii, luldimukl a tekoi er a skuul a lechub eng kuk di bebil er a omilil, e a rengara klebisop a mla mosisechakl el mo iimakl a temel a miting me a omellach lobengterir a rengeasek. Ng uaisei el rebisop a sebechir el mesaod a oberaod e orechudel el tekoi, eng di aki melatk el kmo, aikel kuk diak el sal lorechudel el tekoi el diak osodel a klikiid el klengar er a chad a sebechel modars el mo er a rechedal a chelechad er a re elders me a Relief Society—oumesingd tirkel ngara omerredel a lechub eng tirkel lodam me a odos loldingel er tir. A Chedaol Reng a mo mengetikaik er a roungerachel26 el mo melilt er a rechedal a ikelesia el mo oungerachel aikal tekoi er a omellach. Tirkel mo nguu tial ngerachel a sebechir ngmai chedaol ocholt. Tir, a dirrek el kirir, el melemolem lomart e diak losaod el mo er a rebebil.
A rebekudasou loungerachel dimla chuarm el kirel a merael mei el telcheroll. Tiaikid a sel tirkel chedal a klebisop a chemoit a klou el temir el ngara omesiou er a Ikelesia.
Chelecha bok du sesei el kirir a rengeasek me a rebisop er kid.
Betok er kemiu a rengeasek a diak el sal bleketakl osengiu er sel kmal kiriru e sebechiu el morngii. Eng di kom seluk er a chelsel sel kot el klou a ultutelel lomelilt el bo moruul er a klengar kemiu. A kulengit me mongedecheduch er a rechad er a blimiu me a bisop er kemiu el kirel aikel meklou a ultutelel tekoi el bo molilt. Mrelii a bisop el mo sechelim e counselor kau.
Aki medengei el kmo kom chelbangel a ringel me a ongetikaik er a ngii di el ker. Kede rokui el kired el mo ouchel a rengud er a bek el sils, el uaia osischeklel a President Nelson. Mongedecheduch er a bisop er kemiu el kirel a ngii di el ngerang el ngii a sebechel ngosukemiu el mo sumechokl a klengar kemiu lobengkel a Rubak el kirel a kedmekliu er a “klou lureor” el Ngii a mla kudmeklii el kiriru er chelechal taem.27 El uaia President Nelson el mla siotai er kemiu, e a kulengit me bom teloi er a rengeasek el soldau er a Rubak!28
Chelecha eng tekoi lekor kemiu a rebisop el kirel omerreder me a rechedal a Ikelesia. Aki kmal mereng a suliu. Obengkel aikel ngeldechel er a ika el mereko el rak, e kemiu e rebisop, a kulengit me bo modengei el kmo ng betik a rengmam e mereng a suliu. A omoruul el kirel a rengedel a Rubak a diak a tekoi el smodii. A Ikelesia a ngarngii a 30,900 el bisop me a remerredel a branch er a beluulechad el rokir.29 Aki chemat er kemiu.
A bebil er a tekoi me a chedaol ngerachel er a chelsel a melutk el kirel aikel kot el chedaol, e meklou a belkul tekoi. A ngerachel loba bishopa kot el ngarbab el dauch er a ikal tekoi. A omesiou el mo er a Rubak er tiaikid el ngerachel a tokubets el meang el tekoi. A okedong, oldubech, e olterekokl er a bisop a diak el kired lobes er ngii el teletael. A denguu er ngak, eng klebokel el mekekerei el tekoi lobengkel a betook e dmolech el domelchesiu el teletael. Ng kmal chetengakl el tekoi el diuaia tekoi er a chebechiil me a klechedam el diak a tekoi el sebechel mo smodii.30
Rebisop, aki oldubech er kemiu! Rebisop, ng betik a rengmam er kemiu! Kemiu a meral mengkerengir a rengelekel a Rubak. A Osobel a diak el chetemiu er a ikal chedaol el ngerachel. Aikang a kuuchais, er chelechal tenel a Basqua, el ngara ngklel a Jesus Kristo, amen.