E tīa’i i te Mesia
Tē hina’aro nei mātou e tauturu i te feiā ato’a e mana’o ’ōtahi tō rātou ’aore rā e mana’o nei ’aita tō rātou e tā’amura’a. E fa’ati’a mai iā’u ’ia fa’ahiti ta’a ’ē atu i te feiā ’ōtahi.
E te mau taea’e ’e te mau tuahine, i teie pu’e tau Pāsa e tūtonu tātou i ni’a i te ti’afa’ahoura’a hanahana o tō tātou Fatu ’e Fa’aora, ’o Iesu Mesia. Tē ha’amana’o nei tātou i tāna anira’a here « e haere mai ’outou iā’u nei, e te feiā ato’a i ha’a rahi, ’e tei teiaha i te hōpoi’a, ’e nā’u ’outou e fa’aora.
« ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou vārua.
« Tē marū nei ho’i tā’u zugo ’e tē māmā nei tā’u hōpoi’a ».1
Te anira’a a te Fa’aora ’ia haere mai iāna ra, e anira’a ïa i te mau ta’ata ato’a ’eiaha ’ia haere noa iāna ra, ’ia riro ato’a rā ’ei melo nō tāna ’Ēkālesia.
I roto i te ’īrava nā mua atu i teie anira’a here, tē ha’api’i nei Iesu e nāhea te reira e tupu ai nā roto i te pe’era’a iāna. ’Ua parau ’oia, « ’aore roa te hō’ē i ’ite i te Tamaiti, maori rā ’о te Metua ; ’aore ho’i te hō’ē i ’ite i te Metua, maori гā ’о te Tamaiti ; ’e tā te Tamaiti i hina’aro i te fa’a’ite atu ».2
Tē hina’aro nei Iesu ’ia ’ite tātou e Metua here i te ao ra te Atua.
Te ’itera’a ē, tē herehia nei tātou nā tō tātou Metua i te ao ra, e tauturu te reira ia tātou ’ia ’ite ’o vai tātou ’e ’ia ’ite ē, tei roto tātou i tōna ’utuāfare rahi mure ’ore.
’Aita i maoro a’e nei tē parau ra te fare ma’i Mayo : « E mea faufa’a roa te ’itera’a i te hō’ē tā’amura’a i te hō’ē mea… Fātata te mau tuha’a ato’a o tō tātou orara’a ’ua fa’anahohia ïa ’ati a’e i te tā’amura’a i te hō’ē mea ». Tē parau fa’ahou ra teie fa’a’itera’a parau, « e’ita tā tātou e nehenehe e fa’ata’a ’ē i te faufa’a o te mana’o tā’amura’a i tō tātou ea pae tino ’e pae ferurira’a ».3—’e, e parau ato’a vau, tō tātou ea pae vārua.
I te ahiahi hou tōna māuiuira’a i Getesemane ’e te pohera’a i ni’a i te sātauro, ’ua putuputu te Fa’aora ’e tāna mau pipi nō te tāmā’ara’a hope’a. Nā ’ō atu ra ’oia ia rātou, « e pohe tō ’outou i teie nei ao : E fa’aitoito rā, ’ua riro te rē o teie nei ao iā’u ».4 Hou te topara’a mahana i te mahana i muri a’e, ’ua māuiui Iesu Mesia ’e ’ua « pohe [i ni’a i te sātauro] i tā tātou nei hara ».5
Tē uiui nei tō’u mana’o, e aha rā ïa te fāito mo’emo’e o te mau vahine ’e te mau tāne ha’apa’o tei pe’e iāna i Ierusalema ’a topa ai te mahana ’e ’a hā’ati ai te pōiri ’e te mata’u ia rātou.6
Mai teie mau pipi i tahito ra fātata e 2 000 matahiti i teienei, e rave rahi o ’outou tē fāri’i ato’a nei i te mo’emo’e i terā ’e terā taime. ’Ua fāri’i au i teie mo’emo’e mai te taime ’a pohe ai tā’u vahine tao’a rahi, ’o Barbara, hau i te piti matahiti ’e te ’āfa i teienei. ’Ua ’ite au e aha mau ’ia fa’a’atihia e te mau melo o tō’u ’utuāfare, te mau hoa, ’e te mau hoa ’ohipa, tē ’ite noa nei rā vau te ’ōtahira’a—nō te mea ’aita te here o tō’u ora i pīha’i iho iā’u i’ō nei.
’Ua fa’arahi roa atu te ma’i pe’e COVID-19 i teie mana’o mo’emo’e ’e te vai-’ōtahi-noa-ra’a nō te mau ta’ata e rave rahi. Noa atu te mau tāmatara’a tā tātou e fārerei nei i roto i te orara’a, mai taua po’ipo’i Pāsa mātāmua ra, e ara mai i roto i te hō’ē orara’a ’āpī i roto i te Mesia ma te mau rāve’a ’āpī ’e te fa’ahiahia ’e te mau tupura’a ’āpī mai te mea e fāriu tātou i ni’a i te Fatu nō te tīa’ira’a ’e te tā’amura’a i te hō’ē mea.
Tē ’ite nei au i te māuiui o te feiā ’aita e vai ra te tā’amura’a i te hō’ē mea. ’Ia māta’ita’i au i te mau parau ’āpī nā te ao nei, tē ’ite nei au e rave rahi ta’ata tē ora nei i roto i teie ’ōtahira’a. Tē mana’o nei au ē, nō te rahira’a, nō te mea ’aita paha rātou i ’ite ē, ’ua herehia rātou e tō tātou Metua i te ao ra ’e tei roto tātou pā’āto’a i tōna ’utuāfare mure ’ore. E ’ohipa māhanahana ’e te pāpū ’ia ti’aturi ē, tē here nei te Atua ia tātou ’e e mau tamari’i tātou nāna.
Nō te mea e mau tamari’i vārua tātou nā te Atua, e ti’ara’a, e huru, e nātura, ’e e pūai hanahana tō tātou tāta’itahi. ’Ua riro tātou tāta’itahi « ’ei tamaiti ’e ’ei tamāhine vārua herehia nā metua i te ra’i ra ».7 Teie tō tātou ihota’ata ! Terā ïa tō tātou huru mau !
E ha’apūaihia tō tātou ihota’ata pae vārua ’ia māramarama ana’e tātou i tō tātou mau ihota’ata tāhuti rau, tae noa atu i te faufa’a ’āi’a i te pae ’ōpū fēti’i, te pae ta’ere ’aore rā i te pae nūna’a.
E nehenehe teie mana’o nō te ihota’ata, nō te here ’e nō te tā’amura’a pae vārua e fa’auru mai i te tīa’ira’a ’e te here ia Iesu Mesia.
’Aita vau e parau nei nō te tīa’ira’a i roto i te Mesia mai te hō’ē moemoeā noa. Tē parau nei au i te tīa’ira’a mai te hō’ē fafaura’a e tupu iho ā. E mea faufa’a mau teie huru tīa’ira’a nō te upo’oti’a i ni’a i te ’ati, nō te ha’amaita’i i te itoito ’e te pūai pae vārua, ’e te ’itera’a ē, ’ua herehia tātou e tō tātou Metua i te ao ra ’e e mau tamari’i tātou nāna i roto i tōna ’utuāfare.
’Ia vai ana’e tō tātou tīa’ira’a i roto i te Mesia, e ’ite tātou ē, ’ia tītau-ana’e-hia tātou ’ia rave ’e ’ia ha’apa’o i te mau fafaura’a mo’a, e nehenehe tō tātou mau hina’aro ’e te mau moemoeā herehia e fa’atupuhia nā roto iāna.
’Ua paraparau ’āmui te pupu Tino ’Ahuru ma Piti ’āpōsetolo i roto i te vārua pure ’e te hina’aro pāpū ’ia māramarama e nāhea ’ia tauturu i te feiā ato’a e vai nei i roto i te mo’emo’e ’aore rā, tē mana’o nei ’aita tō rātou e tā’amura’a. Tē hina’aro nei mātou e tauturu i te feiā ato’a e mana’o nei mai te reira. E fa’ati’a mai iā’u ’ia fa’ahiti ta’a ’ē atu i te feiā ’ōtahi.
E te mau taea’e ’e te mau tuahine, hau atu i te ’āfara’a te feiā pa’ari i roto i te ’Ēkālesia i teie mahana e mau ’ivi, ’ua ta’a i te hoa fa’aipoipo, ’aore rā ’aita roa atu i fa’aipoipohia. Tē vai ra ’o tē uiui nei nō ni’a i tā rātou mau rāve’a ’e tō rātou ti’ara’a i roto i te fa’anahora’a a te Atua ’e i roto i te ’Ēkālesia. E ti’a ia tātou ’ia ta’a maita’i ē, te ora mure ’ore e ’ere ïa i te parau noa nō te ti’ara’a ta’ata fa’aipoipo i teienei, e parau rā nō te ti’ara’a pipi ’e ’ia « itoito i te fa’a’ite-pāpū-ra’a nō lesu ».8 Te tīa’ira’a a te feiā ’ōtahi ato’a, e hō’ē ā ïa ’e tā te mau melo ato’a o te ’Ēkālesia a te Fatu tei fa’aho’i-fa’ahou-hia mai—e fāri’i i te aroha o te Mesia nā roto i « te ha’apa’ora’a i te mau ture ’e te mau ’ōro’a o te ’evanelia ».9
Tē parau nei au ē, tē vai ra te tahi mau parau tumu faufa’a e ti’a ia tātou ’ia māramarama.
’A tahi, tē ha’apāpū nei te mau pāpa’ira’a mo’a ’e te mau peropheta nō te mau mahana hope’a nei ē, te feiā ato’a e ha’apa’o i te mau fafaura’a o te ’evanelia e roa’a ia rātou te fa’ateiteira’a. ’Ua ha’api’i mai te peresideni Russell M. Nelson : « I roto i te rāve’a ’e te taime a te Fatu iho, ’aore hō’ē ha’amaita’ira’a e pāto’ihia i tōna feiā mo’a ha’apa’o maita’i. E ha’avā ’e e ha’amaita’i te Fatu i te ta’ata tāta’itahi mai te au i te hina’aro ’e te ’ohipa mau ».10
Te piti, te taime ti’a ’e te huru o te mau ha’amaita’ira’a nō te fa’ateiteira’a e hōro’ahia ai, ’aita i heheu-pauroa-hia mai, e mea pāpū maita’i rā te reira.11 ’Ua fa’ata’a mai te peresideni Dallin H. Oaks ē, te tahi o te mau huru « o te tāhuti nei, e fa’ata’ahia ïa i roto i te mireniuma, ’oia te taime nō te fa’atupura’a i te mau mea ’aita i hope roa i tes fa’aotihia i roto i te fa’anahora’a rahi nō te ’oa’oa nō te mau tamari’i ti’amā ato’a a tō tātou Metua ».12
E ’ere rā te reira te aura’a ē, ’ua fa’ataimehia te mau ha’amaita’ira’a ato’a nō te mireniuma ; ’ua fāri’i-a’ena-hia te tahi pae ’e e tāmau noa te tahi atu i te fāri’ihia e tae roa atu i taua mahana ra.13
Te toru, te tīa’ira’a i te Fatu e tītauhia te hō’ē ha’apa’ora’a tāmau ’e te haerera’a i mua i te pae vārua iāna ra. Te tīa’ira’a i te Fatu e ’ere ïa te tīa’ira’a i tōna hora. ’Eiaha roa ’outou e mana’o ē tei roto ’outou i te hō’ē piha tīa’ira’a.
E rave tātou i te ’ohipa nō te tīa’ira’a i te Fatu. I te roara’a o te mau matahiti, ’ua ha’api’i mai au ē, e rahi atu tō tātou tīa’ira’a i te Mesia ’a tāvini ai tātou ia vetahi ’ē. ’Ia tāvini ana’e tātou mai tā Iesu i tāvini, e tupu iho ā tō tātou tīa’ira’a iāna.
Te tupura’a o te ta’ata iho ’o te nehenehe e rave i teienei ’a tīa’i noa ai i te Fatu ’e tāna mau parau fafau, ’o te hō’ē ïa tuha’a mo’a faufa’a rahi nō tāna fa’anahora’a nō tātou tāta’itahi. Te mau tītaura’a ’o tē nehenehe e rave i teienei nō te tauturu i te patu i te ’Ēkālesia i ni’a i te fenua nei ’e ’ia ha’aputuputu ia ’Īsera’ela ’o te reira tē hina’arohia. Te ti’ara’a ’ia ha’aipoipohia ’aita e tūati i te ’aravihi nō te tāvinira’a. E fa’ahanahana te Fatu i te feiā e tāvini ’e e tīa’i iāna ma te fa’a’oroma’i ’e te fa’aro’o.14
Te maha, e pupu te Atua i te ora mure ’ore i tāna mau tamari’i ato’a. Te feiā ato’a e fāri’i i te ō aroha a te Fa’aora nō te tātarahapa ’e ’ia ora i tāna mau fa’auera’a, e fāri’i ïa rātou i te ora mure ’ore noa atu ē, ’aita tō te reira mau huru ’e te maita’i roa i rae’ahia ia rātou i roto i te tāhuti nei. Te feiā e tātarahapa e ’ite ïa rātou i te ineine o te Fatu nō te fa’a’ore i te hapa mai tāna i ha’apāpū mai ē, « ’Ē, ’ua tātarahapa ana’e tō’u mau ta’ata, e fa’a’ore au i tā rātou mau hara iā’u ».15
I te pae hope’a, te ’aravihi, te mau hina’aro ’e te mau rāve’a a te hō’ē ta’ata i roto i te parau nō te ti’amāra’a ’e nō te mā’itira’a, tae noa atu i te ti’ara’a ’ia fāri’i i te mau ha’amaita’ira’a mure ’ore, ’o te Fatu ana’e ïa tē nehenehe e ha’avā i te reira mau uira’a.
Te pae, tō tātou ti’aturi i roto i teie mau ha’apāpūra’a ’ua niuhia ïa i roto i tō tātou fa’aro’o ia Iesu Mesia nā roto i tōna aroha nō te mau mea ato’a nō ni’a i te tāhuti nei e fa’atītī’aifarohia ai..16 E fa’ati’ahia te mau ha’amaita’ira’a ato’a tei fafauhia mai nā te ta’ata tei, nā roto i tāna tāra’ehara, « i pou mai i raro a’e i te mau mea ato’a ra »17 ’e tei « rē i te ao nei ».18 « ’Ua pārahi i raro i te rima ’atau o te Atua ’ia ani i te Metua i tōna mana au, e aroha mai ai ’oia i te mau tamari’i a te ta’ata nei… nō reira tē arai ra ’oia i te parau a te tamari’i a te ta’ata nei ».19 Te hope’a, « e fa’a’īhia te feiā mo’a i tōna ra hanahana, ’e e fāri’i ho’i i tō rātou ra ’āi’a »20 ’ei « feiā tufa’a tātou ’e te Mesia ».21
Tō tātou hina’aro ’oia ho’i ’ia tauturu teie mau parau tumu i te mau ta’ata ato’a ’ia fāri’i i te tīa’ira’a rahi i te Mesia ’e ’ia fāri’i i te mana’o tā’amuhia i te hō’ē mea.
’Eiaha roa ’ia mo’ehia ia ’outou ē, e tamari’i ’outou nā te Atua, tō tātou Metua mure ’ore, i teienei ē a muri atu. ’Ua here ’oia ia ’outou ’e tē hina’aro nei ’e tē tītau nei te ’Ēkālesia ia ’outou. ’Oia mau, tē tītau nei mātou ia ’outou ! Tē tītau nei mātou i tō ’outou mau reo, te mau tārēni, te mau ’ite, te maita’i, ’e te parauti’a.
E rave rahi matahiti tō tātou paraparaura’a nō ni’a i « te feiā ’āpī pa’ari ’ōtahi » « feiā pa’ari ’ōtahi », ’e « te feiā pa’ari ». E nehenehe teie mau fa’ahitira’a i’oa e riro ’ei mea maita’i i te pae fa’aterera’a i te tahi taime terā rā, ma te ’ōpua ’ore, e nehenehe e taui i te huru ’o tā tātou hi’ora’a ia vetahi ’ē.
Tē vai ra ānei te hō’ē rāve’a nō te ha’apae i teie peu ta’ata ’o tē nehenehe e fa’ata’a ’ē ia tātou i te tahi ’e te tahi ?
’Ua ani mai te peresideni Nelson ’ia fa’ariro ia tātou ’ei mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei. Nō tātou pā’āto’a ïa terā parau, e ’ere ānei ?
E mana tō te ’evanelia a Iesu Mesia nō te tāhō’ē ia tātou. I te fa’ahope’ara’a, ’ua ’aifāito noa tō tātou huru, hau atu i te ta’a ’ē. ’Ei mau melo nō te ’utuāfare o te Atua, e mau taea’e e mau tuahine mau tātou. ’Ua parau o Paulo, « ’e [nā te Atua] i hāmani i te ta’ata i te mau fenua ato’a nei i te toto o te ta’ata hō’ē ra, ’ei pārahi i te mau fenua ato’a nei ».22
’Ei ia ’outou nā e te mau peresideni titi, te mau ’episekōpo, ’e te mau fa’atere pupu autahu’ara’a ’e tuahine, tē ani nei au ia ’outou ’ia feruri i te mau melo ato’a o tā ’outou titi, pāroita, pupu autahu’ara’a ’aore rā, pupu ’ei melo ’o tē nehenehe e hōro’a ’e e tāvini i roto i te mau pi’ira’a ’e e ’āmui mai nā roto i te mau rāve’a e rave rahi.
E mau hōro’a ’e e mau tārēni tō te mau melo ato’a i roto i tā tātou mau pupu autahu’ara’a, te mau pupu, te mau pāroita, ’e te mau titi, tā te Atua i hōro’a mai, ’o tē nehenehe e tauturu i te patu i ni’a iho i tōna bāsileia i teienei.
E ani ana’e tātou i tō tātou mau melo ’ōtahi ’ia tāvini, ’ia fa’ateitei, ’e ’ia ha’api’i. ’A ha’apae i te mau parau ’e te mau mana’o tahito tei fa’atupu i roto ia rātou i te mau mana’o mo’emo’e ’e ’aita tō rātou e tā’amura’a i te hō’ē mea ’aore rā e’ita e nehenehe e tāvini.
Tē fa’a’ite nei au i tō’u ’itera’a pāpū i teie hope’a hepetoma Pāsa nō tō tātou Fa’aora o Iesu Mesia ’e te tīa’ira’a mure ’ore tāna e hōro’a mai nei iā’u ’e i te feiā ato’a e ti’aturi nei i tōna i’oa. ’E tē fa’a’ite nei au teie ’itera’a pāpū haeha’a nā roto i tōna i’oa mo’a, ’oia ho’i ’o Iesu Mesia, ’āmene.