Pagaen’ ngak Somol
Mich ningad pagaen’daed ngak Got nap’an e ningyal’ nib fel’ nge kireb, arragon fa’ani t’uf boech e gafgow mada’ ko ningad guyed e pa’angin ni fan dad.
Pi walageg nib t’ufeg, gadad ba’adag—ba Rugba’adag—ningu runguyed ngak e welthin ninge pii’ e profet nib t’uf rodad, President Russell M. Nelson Irearay e mo’olung nib ma’ang’ang, machane i’ir fa bin la’agruw e yay fare m’ar ko COVID-19 ni ke thilyeg e rogon ko mukungaed. Kad dabrad e m’ar ney nib gel ni woed ngad ba’adag ni ngad gochothiy e pi udakaen e lolugdad. Nge riyul’, boch i walageg ni kar rin’ed nibey ngongol. Wenig mu nanged gamed be meybilgaed ni fan e gidii’ nibe gafgoe bachane e m’ar ney, nge ni fan demtrug e bee’ kar malog e bee’ nib t’uf roraed. Gadad gubin be lemnag biney ke buch nib n’ew napan.
Uw numpgin ningad pagaen’daed ko fatin gafgow nira yib ngodaed? Mang ningad rrin’ed ko pi sikeng nib almarin rodad nap’an ngad pagaen’daed ngad soengaed, ma ayuw me yib nib sasagal’? Mang fan e sasagal’ nap’an ba rib to’orngin e tomal rodad?
Nap’an gube fith pi duwer ney, rayog ningad, fa’an gadadba gay rogon, ningad runga’aged reb e lam nibe yib ko e kalbus, nib lumor nap’an reb e winter nib almarin ni kan yoloey u chepin.
“O Got, kam maen ningan?” Gadadba rungag’ed ko fapi singil ko Liberty Jail “Bu’uw farengi maad nibe upnguy e tafen e miith rom? U nump’ngin ningam soen e pa’am?”1 Arragon, O Somoel, u nump’ngin … ?
Ere, dad somm;on e gidii’ ma dad bin tomur e gidii’ ningad fithed pi duwer ney nap’an bay yib e gafgow ngodaed fa bay kirebaen’daed u gum’racha’daed. Dabgu non marunga’agen e m’ar fa kalbus machane marung’amed, tabinaew romed, nge yoror romed nibe gagfowgaed ko pi sikeng ney. Gube non marunga’agen a laniyaen’raed i gidii’ ni ba’adag ningar mabgolgaed machane daworiy’ fa gidii’ kar mabgolgaed machane yadba’adag a magbol ku tharmiy. Gube non marunga’gen e gidii’ nibe gafgow ko ya’an kan gafgow ko e m’ar—sana dabiyoeg ningan fel’ rogon—sana yaedba gafgowgaed ko m’ar ko genetic ni dariy’ e falay riy’. Gube non marunga’gen e gafgow ko thamtham nge laniyaen’ nga sikeng nibe gaa’ tomalngin ngak fapi ya’el nibe gafgowgaed riy’, nge ko gum’racha’raed e gidii’ nib t’uf ngoraed nibe ungaed e gafgow roraed. Gube non marunga’agen e gidii’ nib gafgow ko salpiy, ninge yoeg Somoel ni dabiyoeg ninge pagitilin marunga’red, ma Gube non ngomed ni gimed ba soengaed ko sulweg e bitir romed, dariy’ fan e yangren, ni kar milekaggaed ko reb e kanawo’ romed ni kam meybilgaed ninge folgaed.
Arragon, Gube yoeg re babyor ney dani non marunga’gen fapin’en ko nam, politics, fa magawen e gidii’ nibe yib ngodad daba’. Chitamangdaed nu Tharmiy ba’adagdaed ningad fel’rogon pi magawon ko public woed rogon ningad fel’rogon e magawon rodad, machane bay boech e ningyal’ nap’an e yafas rodad pi ngongoliy rodad ko tin ya’al, nge meybil rodad dani yoeg e gelnog, fa’an i’ir e magawon ko fayleng fa magawon rodad. Ere nap’an ngad muruwelgaed ngad soengaed uta’abang ni fan e fulweg ko meybil rodad, Gube pii’ re micheg ko apostle rog ningan runga’g e lamdaed ngang fulweged, machane sana dani yib wi’in fa u rogon ni gadaba’adag. Machane ngan fulweged ni gubin yal’ nap’an ma urrogon ni ba’adag e glabthnir nib gaa’ luwaen’ mab t’ufeg nib gaa’ ninge fulweg. Pi walageg ni t’uf ngog, wenig ngomed ningam nanged Ir ni darma mol f a tofan2 ba runguy ko e falflaen’daed nge tay fandaed nga lang e bitir Rok nib gaa’ puluwaen ko reb e bee’ nu tharmiy rayog ninge rrin’. I’ir e t’ufeg nib machaelboeg, nib gaa’ ma’ang’ang, nge fithingan ni en Chitamangiy nib Murnguy.
“Ere, fa’an ba riyul’,” gara yoeg, “e t’ufeg Rok nge murnguy ninge tha’ab e Red Sea rodaed ningad dared nga but’ man chuwegdaed ko tin mom’aw rodad nga dakaen e but’ nib malik. Thingar ninge pii’ e archa’ nu 21st-century dai ningar baed mar kayed e chachngeg nu 21st-century rodad?
Re fulweg ko pi duwer ney ni “Arragon, Got rayog ninge pii’ e m’ang’ang chiney, machane ngad filed e ningyal’ ko milekag rodaed u fayleng Ninge powiy’ yiko Rok.” Ke tay fan gubin e tin nike micheg ngodad. Ko urngin e pou’moon nib m’ar nibe soen u Fare Raen ko Bethesda,3 reb nibe milekag u wuru’ e binaw ko 40 e duw nibe soen ninga un fare binaw kan micheg.4 Ko urngi ne Nephi fa Lehi kan matangiy ko e nifiy udakaen e mich rorow,5 bay reb e Abinadi ke yim’ ko nifiy.6 Mu pugurran ta’ab e Elijah ni ke pinning e nifiy ko tharmiy nga but’ ninge pii’ e m’ag ngak fapi priest ko Baal.7 ni’ir ta’ab e Elijah ni ke gafgow ko chingyal’ nap’an dabki aw a n’ew ko bo’or e duw, nge ko chingyal’, ni kan pii’ e ga’an ngak pi archa’ nib raven.8 U ta’abrogon, aram dabiyoeg ninge mang e “Abich nib Faflaen’.”
Ere? Ere bay yib fan e mich ningad pagaen’daed ngak Got nap’an e ningyal’ nib fel’ nge kireb, arragon fa’ani t’uf boech e gafgow mada’ ko ningad guyed e pa’angin ni fan dad.9 I’ir mom’aw ulane fayleng rodad ni bay bo’or e gidii’ ba lemniged fa bin thabi fel’ e ban’en u yafas ningan chuweg ko gafgow, ni dariy’ bee’ thingari gafgow ko ban’en.10 Machane re lem ney darma fol e “matheg ga’angin Kristus.”11
Ngu pinning e siro’ ngak Elder Neal A. Maxwel ngu thilyeg reb e ban’en ke yoeg, Gube yoeg e “yafas rok bee’ … dabiyoeg ninge sug ko mich nge chuweg ko tamra’.” Dani fel’ ningan “maen ni dariy’ fan ko yafas,” nap’an ngad u’numed e lemonade, “Somoel mu pii’ fatin thabi fel’ rog ngom, machane damu pii’ e kirebaen’, fa tamra’, fa miith, fa to’ogor. Wenig ngom damu pii’ reb e bee’ ninge tugthin ngog fa to’ogor ngog, ma damu, damu pii’ laniyaen’ug ni kam chuweg Ngog fa gidii’ ni guba’adag. Arragon, Somoel, mu ning chilyen ningam matangiyeg ni dagu nang fa tin ni ke gay e tin manemus Ngom. Nge tomur, nap’an e tin mom’aw ko reb e bee’ ke m’ay, wenig ngom ningam pinninged ngu paer Rom, ningu oeg fatin ta’abrogon rodad Nap’an ngu paer nga maguleng ko tiliw rok Kristus.”12
Pi walageg nib t’uf rog, Christianity ma gay e gol, machane dakiyoeg e gol ko tofan. Re kanawo’ ko thothup nge falflaen’ chiney nge bay yib ni palog ma boech e ningyal’ ba fel e malong ngadkaen. Irba t’uf e boech e ningyal’ nge laniyaen’ nib gel ningan milekag nga dakaen. Machane, u tomur, e taw’ath riy’ nib thabi gaa’. Fatin riyul’ ney kan weliy’ nib fel’ rogon u lane bin 32nd guruy ku Alma ulan fare Babyor Ku Mormon. Ulangin reb e priest nib tolang ba weliy’ ni fa’an ngan upnguy e thin rok Got u u gum’racha’ woed rogon e awoch, fa’an ngad pii’ e raen, pil e pann, duruwiy’, ngad pinning ngak, ninge yoeg u boron e wompngin “ni’ir e th’abi fel’ , … ni’ir e th’abi athibthib u fithik’ gubin e athibthib,” e kay’ed nira fas e bilig nge balal ko manemus.13
Bo’or mafil ngan weliy’ nap’an re guruy ney nib ma’ang’ang, machan bin kenginn ufithikraed ni’ir e fanethin ko fare awoch nem ningan duwuriy ngan soen ninge gaa’nag, “sap nga m’on u ba oewchef nib mich ko fare wa’amngin ni bay riy.”14 E pilig rodad, ke yoeg Alma, ba yib “dab ki n’uw nap’an.”15 Nib fel’ ninge ning e welthin rok ninge yoeg delip e yay e pinning ko pagaen’ nge gumaen’ ninge ayuweg fapi thin ku Got u gum’racha’daed, “soen” udakaen e “gafgow ko gumaen’, woed ni ke yoeg, “ninge yoeg fare gakiy’ e wompngin ngom.”16
COVID fa malad u downgin, balyangaen’ fa kirebaen’, magowen ko salpiy fa ko sikeng ko tabinaew. Wi’in ninge chuweg fapi sikeng ney? Re fulweg ni “dab ki n’uw nap’an.”17 Ma fa’an ni’ir chingyal’ fa n’ew nap’an dariy’ bee’ ma nang, machane udkaen e murnguy rok Got, fapi taw’ath ra yib ngak e gidii’ nib koeled ngak fare gospel ku Yesus Kristus. Re duwer nem kan fulweg ulane milay’ ma nga dakaen e burey u Jerusalem u kakrom.
Nap’an ngad runga’ged e profet nib t’uf rodad nap’an e mo’olung ney, ngad pugurrangaed, ni Russell Nelson ke ngongoliy pin’ney u yafas rok, ni gidii’ nibe soen“yad be toer ngak SOMOL ni nge ayuwegrad e bay ra pir’eged nike yib gelngirad bayay. Bay ra changeggad ngalang ni bod e arche’ ni eagle; yad ra mil, ma dab ra magaergad ma yad ra yan; … ma dabi m’ay gelngirad.”18 Gube meyil ni “dab ki n’uw nap’an”—papay fa tabuch—pi taw’ath ney ra yib ngak urngin e gidii’ nibe gayed e ayuw ko gafgow roraed. Gube pii’ e m’ag marungag’en e t’ufeg Got nge marunga’gen e Sulyarmen e Gospel nib ma’ang’ang Rok, ni’ir e fulweg ko urngin e magowen rodad. U dakean fithngan Somoel Yesus Kristus nib thothup, amen.