Sikeng Nag, Dag Rogon, Min Pachag
Bin tha’abi ga’ e tawa’ath nrayib u napan ni kad daged nib gel e mich rodaed ko fapi m’ag u napan e ngayal’ nib gel e gafgow era thilyegdaed.
Pi walageg, gub falfalaen’ ngay ni nggu non ngomed e daba’. Athap rog e nggu pi’ e athamgil ko ngayal’ nibe gel e gafgow ma dan nang ko mang e bayi buch. Boech i gimed, irraray ere ngayal’ ney. Ma fa’anra danga’, ma re ngayal’ ney e bayi yib.
Biney e gathi ya’an e gafgow. Biney nibe buch e rib riyul’—ma nge falfalaen’uy ngay—ni bachan fare tonom rok Got ni Sunmiy ko re donop ney. Nifan e biney e nge pi’ ngak Pi fak rogon ni ngar daged rogon ma yaed ba’adag ni ngar mel’egned e tin nib mat’aw ko ngayal’ nib gel e momaw’. Ma fa’an nran rrin’, ma ra thil rogon e par roraed mi yaed woed Ir. Manang ni biney era tu’uf fare mich riy Ngak ni ndariy bi’id ma rurur.
Tin nibay nib ga’ ni gu manang e baga’ nike yib ko gathon e tibinaew rog. Napan meruk e duw rog, me pining e chitiningin mow nib gonop walageg nib pagal ni nggu ayuwegnew nggu puged e paan ko milaey’ nibay u tabugul ko nu’un romaed. Biney e woed ni ba murwel nib mom e chiney, machane gamaed ma par u New Jersey. Gubin ngayal’ ma ma aw e n’uw. Ma butt’ riy e baga’ ni klay. Paan e ma tugul nib papay ko wuldug.
Ku gu manang gelngin e chachalban rog napan ni m’ath reb fapi paan ulan pa’ag, ma kengin e kabay nga fithik e rungdu’. Chitiningig nge walalag ni pagal e yow mm’on rog ko pug pan. Ma gelngin ni gura gel nigeg ni nggu papay, ma fin arram e saga’al ni gube tay.
“Kaygi gel e momaw’ ko ran’ey!” Mug yoer.
Ma woed ni ga’ar e nge runguyeg, me minmin e chitiningig me ga’ar, “Oh, Hal, riyul’ bagel e momaw’ riy. Ya arram rogon. Ya yafos e woed e sikeng.”
Ko ngayal’ nem, kug nang ni thin rok e rib riyul’ ma ra ul’ul’ nge par nib riyul’ u lane yafos rog nga mm’on.
Bachan e thin rok e Chitiningig ma kari tomilang u wun’ug boech e duw nga tomur u napan ni gu be’eg mornga’agen e Chitamangdaed nibay u Tharmiy nge Fak nib Migrag Rok ni yow be non ni fan nikar sunmiyew ere donop ney mi yow pi’ ko bitir nib thothup e biney e yafos nibay u fayleng.
“Ma yow ra sikeng nag daed mar guyew fa’an ngad rin’ed urngin e tin ni ra fith en Somoel ni Got rodaed nira motochiyel nag ngodaed;
“Ma cha’enra ayuweg ir ko bin somm’on i gilil’ungin e bay kun pi’ reb ngak; ma pi cha’enra dabra ayuweged raed e dabni pi’ gilil’ungunread ni woed e tin ni somm’on e gidii’ nra ayuwegned gilil’ungunraed; ma pi’inra ayuweged e bin l’agruw i gilil’unginraed e bay kun uneg reb e fla’ab ni fan ngoraed ni manemus.”1
I gur nge gag e kad mel’egnew ni rran sikeng nag dow min dag rogon ni gadow ra mel’eg ni ngan fol ko motochiyel rok Got ko ngayal’ ni kad chuwgow u gilil’ungun e Chitamangdaed nibay u Tharmiy.
Dariy fan ni arram rogon nike piningdaed e Chitamangdaed nibay u Tharmiy ni ngaed rrin’ed e biney, Lucifer e pining dalip guruy fapi angel nib thothup ni ngar uned ngak mi yaed dubuy fare tonom rok e Chitamangdaed nifan ni ngeyag ngodaed e yafos u fayleng nge falfalaen’. Ma fapi togopluw rok Mo’oniyaen’, e ni chuwegread. Chiney e bay nibe gay rogon ni nge palog nag urngin e gidii’ nrayag ngak rok Got ko ngayal’ ney u fayleng.
Gadaed e pi’in ni kad fanayed fare tonom e kad rrin’ed e biney ni bachan e mich rodaed ngak Yesus Kristus, ni’ir e pi’ ir ni nge mang e Tathapeg nge Tabiyul rodaed. Sana mich u wun’daed ngay ni demutrug ko mang mo’owar nibay rodaed demutrug e ngongol ku mo’oniyaen nibe yib ngodaed, ya gelngin e tin nib mangil ab gel gelngin nibay ko gubin.
Chitamangdaed nibay u Tharmiy nge Yesus Kristus a yow manangem ma gab tu’uf rorow. Yow ba’adag ni garam sul Ngorow mag boed Row. Mo’onog rom e mo’onog rorow. Kam thamiy ni ke micheg fare tu’ufeg ko fare Kan ni Thothup napan ni kam be’eg fa kam rung’ag e pi thin ney: “Arrogon, irraray e murwel rog nge riir rog—ni nggu thapeg fare yafos ni manemus ngak gubin e gidii’ u fayleng.”2
Got e bay gelngin ni nge mom nag kanawo’endaed. Ke pi’ ngak fapi bitir nu Isreal fare mana ni nge mang gaan roraed ko ngayal’ ni yaed be milekag ko farangi naam ni kan michegnag ngoraed. Ngayal’ ni’i moy Somoel u fayleng me gol nag e m’ar, me fosag nag e yam’, ma gapas nag e yifang. Tomuren nike Foskoyam’, Me bing “fare kalbus ngak e pi’in nike kalbus.”3
Woed fare Profet Joseph Smith, reb fapi profet Rok ni th’abi gel, ni’i gafgow u lane kalbus me fil ba mulwol ni gadaed gubin ma baga’ fan ngodaed ko ngayal’ ni yibe sikeng nag e mich rodaed: “Ma fa’anra kan noen’ ngalan e low, fa kan pi’ ngalan pa’ e gidii’en e li’ gidii’, me buch ni yim’; ma fa’anra kan noen’ ngalan e mak’ef nib to’ar; fa fa’anra gubin e tin tagan ma ke aw ngak’; fa’anra nifeng ni gel e ke magawon nag; fa’anra tharmiy e ke ulnguy gubin e tagan, ma gubin ban’en ma ke peth nga ta’abang ko kanawo’ nga lang, nge gubin ban’en, fa’anra mab langan e enfiyarno ngak’, ma thingari nang ni gubin e pin’ey nike buch rok’, e bay fan ngak’.”4
Ma bay ni gabe lemnag ko mangfan ni Got e be’ ni gubin ma rayag rok machane be gel nag e sikeng rodaed u roy u fayleng. Biney e bachan ni manang nib tu’uf ni ngaed be’echgaed ko pi denen rodaed ma fin aram e rayag ni ngaed suled biyay ngaed pired Rok ko tabinaew rodaed ni manemus. Ngayag ni ngan rrin’ e biney, Chitamangdaed nibay u Tharmiy e ke pi’ ngodaed ba Tathapeg nge gelngin ni ngaed mel’egned ni fan ngodaed u fithik e mich ni ngan fol ko pi motochiyel Rok min kalngaen’ min yib Ngak.
Tonom rok e Chitamangadaed ko falfalaen’ e arram e bin th’abi ga’ ko rogon ni ngan boed Fak ni rib tu’uf rok, Yesus Kristus. Ko gubin banan, wo’en fare Tathapeg e irraram e bin th’abi mangil e kanawo’ ni ngaed laked. Dani dag nib tu’uf ni nge dag ko mang e be Rrin’. Ke gafgow ni fan ngak gubin pi fak e Chitamangdaed nibay u Tharmiy, ni yibi pi’ pilwon e denen rodaed. Ke thamiy e gafgow ko gubin e gidii’ nike yib nga fayleng nge tin ni ka bayi yib.
Napan ni garam tafney nag gelngin e amith nrayag ni nge yib ngom, mu tafnayem Rok. Ke gafgow ko n’en ni kam gafgow riy ya nge yag ni nge nang rogon ni nge ayuwegnem. Bay ndabi chuweg e tin nibe tomal nigem, machane ra pi’ gelngim, me gol nigem, me pi’ e athap ngom. Ir e manang kanawo’en. Ke n’um e ran ulan fare kap nib mo’oy. Ke athamgil nag e gafgow ni fan ngodaed ni gubin.
Be ayuwegnem ma be gol nigem fare Tathapeg nib sug ko tu’ufeg, ni’ir e manang rogon ni nge ayuwegnem ko pi sikeng ni be yib ngom. Ke fil Alma:
“Ma bay iyaen, ni be gafgow ko pi amith nge kirbaenʼ nge pi lumel ni gubin mit; ma biney e aray rogon ni fan ko fare thin ni gomanga muguʼul ni yoeg nra fek nga dakean e pi amith nge pi mʼar ko gidiiʼ rokʼ.
“Ma yamʼ e ire rafek nga dakean, ni nge yog ni thang e pi wolan e yamʼ niʼir e be mʼag e gidiiʼ rokʼ; ma rafek nga dakean e pi moʼowaer ko gidiiʼ rokʼ, ni nge yog ni sug lan ngorngoren ko murnguy, u rogon e dagur, ni nge yog ni nang ko dagur u rogon ni nge ayuweg e gidiiʼ rokʼ u rogon e pi moʼowaer roraed.”5
Demutrug rogon ma bay ni nge ayuwegnem ma ke piningem ni gubin ngayal’ ni nge par u wun’um mag yib Ngak. Ke pi’ e athamgil ngodaed:
“Mired ngog, ni gimed gubin e pi’in ke aw parowmed i fek e n’en nib tomal ni gimed be fek, mu gu’ pi’ e toffan ngomed.
“Mfeked e mat’ rog ngam teg nga pomed, mi gimed folwok rog; ya gub munguy ma gub sobut’aen’: mi gimed pir’eg e toffan.”6
Rogon ni ngaed bad Ngak e rogon ni ngad filed fapi thin Rok, min gay rogon e mich ko kalngaen’, min mel’eg ni ngan tawfe min thapeg fare Kan ni Thothup rok be’ nima pigpig nibay gelngin, ma arram ni ngam ayuweg fapi m’ag rom nibay u thilinmew Got. Ke pi’ fare Kan ni Thothup ni ngam mang l’agruw gow, ninge ayuwegnem, me powi’iyem.
Napan ni garam par ni gab be’ech nifan fare tawa’ath ko fare Kan ni Thothup, fare Somoel e rayag ni nge ayuwegnem ko tin nib gapas ndemutrug ko rayag ni ngam guy kanawo’en fa dangay. I gag rog, baga’ ni gubin ngayal’ me be dag ngog ko bin ngan e kanawo’ e nggu waen riy. Ma fin boech i ngayal’ riy me dag ngog e tin nibay nga mm’on, machane arram rogon e pi n’en nibe powi’iy nigeg e irram e tin ni gube mel’eg ni nggu rrin’ ulan e yafos rog.
Fare Somoel e weliy ni ga’ar:
“Dabyag ni ngam guy nga owchem, e tin nibay nga mm’on, tin nike ngongliy Got ni bayi buch, nge tin ni bayi yib ni fla’ab riy … gafgow nib gel.
“Ya tomren e gafgow e tawa’ath ni bayi yib riy.”7
Bin tha’abi ga’ e tawa’ath nrayib u napan ni kad daged nib gel e mich rodaed ko fapi m’ag u napan e ngayal’ nib gel e gafgow era thilyegdaed. Napan e gadaedra mel’eg ni ngaed fol gaed ko fapi m’ag rodaed, fare gelngin Yesus Kristus nge pi tawa’ath ko Bayul Rok e rayag ni nge ayuwegdaed. Gum’ircha’endaed era munguy me sug ko tu’ufeg, n’agfan, min pining e gidii’ ni nge yib ngak fare Tathapeg. Ma michaen’ rodaed ngak Somoel era ga’. Ma murus rodaed era achig.
Chiney, arrogon ni bay e tawa’ath nima yib ko gafgow, gathi gadaed e ngad sap niged e gafgow. Ufithik e yafos ney, gadaed gubin ra feked bo’or rogon ni ngad gelnagdad, ma ran sikeng nag nib alamrin ni ngayag ni nge woed fare Tathapeg nge Chitamangdaed nibay u Tharmiy.
Ma kagdaed, be gay rogon ni ngaed guyed e tin nibe gafgow be’ riy min ayuweg. Biney e rayag nib momaw’ ni ngan rrin’ u napan ni ki yibe sikeng nagdaed riy. Machane gadaedra pere’eg ni napan ni gadaedra ayuweg nge ba’ud be’, dariy fan ni fa’anra ba’achig e ayuw, ma ran pi’ gelngindaed ma gadaed ra thamiy e tomilang u fithik e lumor.
Ko biney, fare Somoel e ir e Kanawo’endaed. U dakean fare kuruth u Golgotha, ni arram gelngin e gafgow nike tay nibe chuchgur ni nge yim’ ni kari mus ni’ir fare Fak Got nib Tu’uf Rok, me sap ngak fapi gidii’ ni yaedbe gafgow nag me ga’ar ngak e Chitamangin, “Mu n’ag fan u wun’um e n’en ni yad be rin’.”8 Napan nibe gafgow ni fan ngak gubin e gidii’ nra fos, ma sap, u dakean fare kuruth, ngak John nge chitiningin ni kari kirbaen’ me michib ngak nge tin nibe gafgow riy.
“Me guy Jesus e chitiningin nge fa en ni gachalpen nib t’uf rok ni yow ba sak’iy rom, ma aram me ga’ar Jesus ngak e chitiningin , ppin be’er fakam!
“Me ga’ar ngak fa en ni gachalpen, be’er e chitinam! Ma aram e re ngiyal’ i n’em ni fek fa en ni gachalpen Jesus fare pin nga tafen nge un ko par u tabinaw rok.”9
N’en ni rrin’ ko re rran nem e ba thothup, ni og nag e yafos rok ni fan ngodaed ni gubin, ni gathi kemus ni pi’ ir ni nge ayuwegdaed ko biney e yafos ma ku bin e yafos ni manechubog.
Kug guy e gidii’ nike gel ni bachan gelngin e mich rok u napan e ngayal’ ko gafgow. Bay nibe buch u lane Galasia e daba’. Ni be garbug e gidii’ riy nga butt’ ni bachan fare togopluw. U fithik e michaen’ nge athamgil roraed, ma arram ni yaed be boed fare Tathapeg nge Chitamangdaed nibay u Tharmiy.
Kug fil reb e llowean’ ko chitiningig. Napan ni kab buliyol, bay mit e m’ar rok ni woed e chochol ni chugur ni yim’ riy. Ta’aboech riy me yib mit e m’ar ngak ko amith ko man’aey nga pe’eyon. Chitamangin e yim’ ni kab fal’yangren, ere chitiningig nge walalgen ni pumo’on e yow e ra ayuwegnew chitiningin row.
U n’umngin napan e yafos rok, ma thamiy e gafgow ko m’ar. Napan ragag e duw ko yafos rok, bo’or e taflay ni un ngay. Machane arram gelngin e tin nibe buch rok, ke par nibe dag rogon fare michaen’ rok ngak Somoel, ni dariy fan ni arram ni ke aw nga butt’. Kari mus ni ta’arab ba sasing nibay ko rungrung ko singil rok ni ya’an fare Tathapeg. Bin tomur e thin ni ke yog ngog e biney: “Hal, gaba thapeg e m’ar nib achigchig. Thingari ayuweg nigem.”
Ko magawon rok cha’en ni noen ni tomur e Elder Spencer W. Kimball. Tomren ni weliy mornga’agen e pi n’en ni ke gafgow riy nge gelngin e michean’ rok, me yoeg e biney: “Boech i gimed e sana be tafney nag ko mangfan ni Mildred e nge gafgow ni arrogon gelngin ni arram n’umngin napan. Bay goeg fan ngom. Bachan e biney ya Somoel e ba’adag ni nge pachag buchu’uw ya’an.”
Gube pining e magar ko mich rok gidii’en e Galasia rok Yesus Kristus ni yaed be athamgil nibay fare mich roread nib gel ma ki yaed be ayuweg e gidii’ ni ku woed rogon fare Somoel ni be pachag buchu’uw ya’an raed. Ku gube pining e magar ngak e togta nge tiyugang’ u dakean e fayleng ni yaed be pigpig ngak e gidii’ u napan ni yaed nge tabinaew roraed ni ki yaed be gafgow ni yibe pachag raed.
Gube micheg ni gadaed gubin ma fak e Chitamangdaed nibay u Tharmiy, ni gadaed be tu’uf rok. Gube thamiy e tu’uf rok President Russell M. Nelson ngodaed ni gubin. I’ir e fare profet rok Somoel u lane fayleng e daba’. Gube micheg u dakean fithngan fare Somoel nib Thothup Yesus Kristus, amen.