Weliy Morngaʼagen Kristus
Napan nibe saga’al e fayleng nibe weliy mornga’agen Yesus Kristus, ngaed weliyed mornga’agen ni nge yo’or yay.
Guge btu’uf rog, o pi ta fagar rog nge pi gidii’ nib michuwean’. Gu ba’adag gelngin e mich nge athamgil ni gamaed be tay ko ra in pul ni ba’aray nike thumur, nike yib e bin ba’aray e m’ar nibe gathay e yafos rodaed nge ku boech e gidii nge ta fagar nib tu’uf rodaed.
Napan e ngiyal’ ney nike marwar e gubin, ma kug thamiy ni rib michuwan’ug ko ba llowaen’ nriyul’ ni Yesus e ir Kristus. Kam thamiy e biney? Gadaed gubin ma bay e tin nibe tomal nagdaed, ma gubin ngiyal’ ma bay nib m’on rodaed, me yoeg u fithik e sobut’aen, “I gag e kanawo’, me gag e tin riyul’, me gag e yafos.” Napan ni ngad tal’ e sabathin rodad ngak e gidii’, dabda tal’ e sabathin ko tin nib thothup ngak Ir nima, pithing l’agruw raba’ i pa’, ba’adagdad ngad, “Moy, yib ngog.”2
Woed e tu’uf nib tomilang rama’en u lane lang, Yesus Kristus e ma gal’ kanawo’endaed. Yib nga fayleng nib munguy mab sobut’ e par rok. Yafos Rok e rib polo’. Yibliy e m’ar me fosag e yam’. Ma ir e ta fagar ko gidii’ nikan pagtilin mornga’agen. Ke fil ngodaed ni ngan rrin’ e tin nib mangil, min fol, min tu’ufeg gubin e gidii’. Ke yim’ u dakean fare kuruth, ma dalip e rran nga tomuren min fosag, ni ngayag ni pi gidii’ nib tu’uf rodaed nge gadaed e ngaed fos gaed biyay. Ko fare tu’ufeg nge fare murnguy rok, ke fek nga dakean fapi denen nge gafgow rodaed, ni ngayag ni ngan n’agfan min thapeg e gapas ko ngiyal’ nbay e yiko’ u lane yafos rodaed. Rib tu’uf rodaed. Gadaed be tayfan. Gadaed be lek kanawo’en. I’ir fare yuluuy ko fare yafos rodaed.
Motoyil ngay, dariy fan ni be ga’ i yaen gelngin e tin nib thothup nibe buchbuch rodaed, ya bo’or e gidii’ u fayleng ni de nang mornga’agen Yesus Kristus, ma, ku yang u fayleng e ke n’uw napan ni kar pininged fithingan nike bukun e duw, mich ngak Yesus Kristus e be war i yaen. Fare chongin ko galasia u Europe ngay e ke gamam bukun e duw ngay nike buch’uw e gidii’ riy nib michuwean’ ko reb e tiliw.3 Kirbaen’uy ngay, u roy u Mariken ma kube buchu’uw e mich riy. Kan fil ni ra 10 i duw ney nike thumur u roy u Mariken ma 30 million e gidii’ e ke palog nag ir ko mich ngak Yesus Kristus.4 Garam sap u dakean ga’ngin yang u fayleng, kan fil ni napan ni kara gaman reb e ragag e duw nga m’on ma gonpa’an l’agruw nge boech e gidii’ e ra digey e mich ku Kristus ko tin ba’aray e gidii’ nra un ngay.5
Gadaed, arrogon, e bay mat’wondaed ni ngaed mel’egned, machane ke ga’ar e Chitamangdaed nibay u Tharmiy, “Ireray Fakag nrib t’uf rog: ere mu telmed ngak.”6 Michuwan’ug ngay nra yib e rofen nem ni gubin bugun ni ey mara garbug nga but’ nge gubin mit e thin mara yoeg ni Yesus e ir fare Kristus.7
Uw rogon ni ngaed ayuwegned e fayleng rodaed nibe thil? Ni boech e be pag e mich, ma boech e be gay e tin riyul’. Kad feked fithingan fare Tathapeg nga dakeandaed. Mang e kabay nrayag ni ngaed rin’ed?
President Russell M. Nelson
Bang ko fulweg rodaed e woed rogon ni skul nag Somoel i President Russell M. Nelson ko fapi pul u m’on ni ngan pining ni nge mang President ko Galasia. Ta’areb e duw u m’on ninge pining President Nelson ni nge mang President me non, ni piningraed ni ngar filed mornga’agen fare 2,200 fithingan Yesus Kristus nbay u lane Topical Guide.7
Dalip e pul nga tomuren, ko general conference ko April, me non ni mornga’agen rogon, nib mu’un fapi duw ngay ko rogon e fanow rok, ni ran’ey ninge fil mornga’gaen Yesus Kristus e rib ga’fan ngak. Sister Wendy Nelson, e fith ngak ko mang e ke fil riy. Me fulweg, “I gag reb e mo’on ni kug thil!” Reb e mo’on nib thil? Ko duw rom ni 93, ma gur e reb e mo’on nikam thil? (President Nelson ke weliy)
“Napan ni gadaedra tay e ngiyal’ ni ngaed filed mornga’agen fare Tathapeg nge fare gafgow ni tay, ma gadaedra chuchugur … Ngak. …
“… Ma tafney rodaed e [ra sul] ko fare Tathapeg nge fare gospel Rok.”8
Fare Tathapeg e ga’ar, “Mu ninged ngog e tin nbay u lane tafney romed.”9
Ko biney e fayleng nib sug ko murwel, magfaan’uy, nge tin nib be’ech, ngaed ted gum’ircha’daed, tafney rodaed, nge leam rodaed nibay Ngak ni’ir e fare athap nge bayul rodaed.
Fa’anra fil biyay mornga’agen fare Tathapag e ke ayuweg President Nelson, damur lemnag ni kra ayuwegdaed?
Weliy mornga’agen fare Galasia, President Nelson e fil, “Fa’an gadaedra … ni ngayag ngodaed fare Bayul rok Yesus Kristus—ni nge be’ech me lukuydaed, ni nge gel me pi’ gelngindaed, ma gadaed thapeg e yafos ni manemus—ma thingarda da filed mornga’agen fare gelngin nibay.”10 Ke fil ngodaed ni fa’an nran noeg fithingan fare Galasia nib fel’ rogon, ndariy fan ni biney e woed banan nib achig, ya dani achig, ma ra ayuweg e tin nga m’on ko gubul nge langlath.
E Mich ni fan e Taermedliy Rom
Gube micheg ngom ni fa’an gadaedra fal’ag rogondaed, ni woed rogon nike yoeg President Nelson, ma krayag nran thilyegdaed, ni yibe tafneynag fare Tathapeg ni bo’or yay, yibe weliy mornga’gan ni bo’or yay. Napan ni gadaedra nang boech mornga’agen, ma rogon e thin rodaed era mom, ko ngiyal’ ni gadaed be non ngak reb i fakdaed fa reb e ta fagar rodaed. Gidii’ nibe motoyilgaed damu thamiy e cham fa pii’ keru ngad filed ngomed.
Gadaed gubin ma gadaed be weliy mornga’agen Yesus Kristus, machane rayag ni ngaed cheg niged i gadaed. Fa’anra fare fayleng e be saga’al i yean i weliy mornga’agen, mini’ e nge weliy mornga’agen nib bo’or? Gadaed! Nib mu’un boech e gidii’ ngay ni gidii’en Kristus!
Non marunga’agen Kristus u Tabinaew Rodad
Bay ya’an fare Tathapeg u lane tabinaew rodaed? Gadaed ma weliy ngak pi fakdaed fapi fanathin ni mornga’agen Yesus? “Fapi chep ni mornga’agen Yesus e woed e nifeng nibe thoey udakaen e ’achiffin ko mich nibay ulan gum’ircha’en pi fakdaed.”11 Napan nra fithem pi fakam fapi duwer, mu tafneynag fapi michib rok fare Tathapeg. Woed ni, ke fith e bitir rom, “Pappa’, mangfan ni gadaed ma meybil?” Sana garam fulweg ni, “Rib mangil e binir e duwer. Ka gamanang ko napan ni meybil Yesus? Weliyew mornga’agen ko mangfan ni gadaed ma meybil nge rogon ni yima meybil.”
“Gamaed be weliy morngaʼagen Kristus, gamaed be falfalaenʼ rokʼ Kristus, … ni nge yog ni nang pifakmaed e re ginnʼen ni ngar sap niged e manʼaegfan ko pi denen roraed ngay.”12
Non marunga’agen Kristus u Galasia
Biney e thin nib thothup e uneg ngay ni thingarda “machib ni morngaʼagen Kristus,.”13 Napan e misa rodaed, tafney niged fare Tathapeg ni’ir Yesus Kristus nge fare tawa’ath rok ni irraram fare bayul ni yibi gafgow riy. Biney e be yupfan ni krayag ni ngaed weliyed ngak e gidii’ ko tin nibe buchbuch u lane yafos rodaed. Ma tin ni gadaed be weliy ni mornga’agen e tabinaew fa misa fa temple fa yaen ko mission, ma nge par ni tin ni gadaed be tayfan e thingari sap ngak e Somoel Yesus Kristus.
Guyey e duw kafram, President Dallin H. Oaks e weliy ba babyor ni thapeg “rok ba mo’on nike yoeg nike un ko mo’olung ko [sacrament] me motoyil ko ragag nge medlip e mich ko gidii’ ma dariy reb e pi gidii’ ney ni yoeg fare bugithin ni fare Tathapeg.”15 Me ga’ar President Oaks, “Sana biney e dani riyul’ [machane] kug weliy e biney e thin ni bachan e be pug oren ngodaed ni gubin.”14 Ke piningdaed ni ngan weliy mornga’agen Yesus Kristus ulan fapi thin nge fapi michib rodad. Ku sap ma ku guy nibe gel i yaen e sap rodaed ngak Kristus ko fapi mo’olung ko Galasia rodaed. Ngaed athamgilgaed ko biney.
Non marunga’agen Kristus nga Reb
Gidii’ nibay u charendaed, da pufpufgaed ngodaed, ma gadaed weliy mornga’agen Kristus. President Nelson e ga’ar, “Pi gidii’en Yesus Kristus nib riyul’ e dar rus ni ngar rrin’ed e tin nib mat’aw, mi yaed weliy, mi yaed par nib thil rogon e par roraed ko pi gidii’ nu fayleng.”15
Boech i ngiyal’ ma gadaed ma lemnag ni fa’anra ngam sabathin gow bee’ ma btu’uf ni ngam pining ni nge yib nga galasia fa nge mada’nag fapi missionaries. Mpag ngak Somoel ni nge pow’iyraed ni fa’anra yaed ba’adag, ma napan ni gadaed be tafneynag rogon e murwel rodaed ni ngaed weliyed mornga’agen, gubin ngiyal’ mag tafney nag mag weliy mornga’agen e mich rodaed. Elder Dieter F. Uchtdorf e fil ngodaed ni napan nra fith bee’ mornga’agen e tin ni kad rrin’ed ko biyarnis nge madon, magdaed yoeg ni gadaed ba’adag laman fapi bitir ko Primary ni kar yon’ed e tang ko “I’m trying to be like Jesus.”15 Daged e mich rodaed ngak Kristus. Re ke weliy bee’ mornga’agen e tin nibe kireb u lane yafos rok, rayag ni ngaed ga’ar gaed, “John, Mary, ga manang ni michuwaen’ug Yesus Kristus. Gube tafneynag banan nike yoeg ni sana rayag ni nge ayuwegnem.”
Rayag ni ngam weliy ko social media e tin nibe pagaen’um riy ngak Kristus. Oren e gidii’ era tayfan e mich romed, machane fa’anra bay bee’ ndar tayfan fare Tathapeg, mu athamgil ko n’en ni micheg: “Ngam felan’gad, ko ngiyal’ nra yog e girdi’ e thin nib tagan ngomed … ni bochan e gimed girdi’eg. … ba ga’ ni fan ngomed ni kan tay u tharmiy.”17 Ya btu’uf rodaed ni gadaed pi gidii’en ko ne’n nibe “adag“ e gidii’ nibe lakem ko social media. Michibnag Peter, “Mu fal’eged rogomed ni gubin ngiyal’ ni ngam pi’ed e fulweg [ko] n’en nra fith be’ ngomed.”17 Weliyed mornga’agen Kristus.
Fare Babyor ku Mormon e be alamrin nikan micheg rok Yesus Kristus. Ya gubin fapi payg riy ma be micheg fare Tathapeg nge fare michib Rok ni tay nib thothup.19 Mornga’agen fare Bayul Rok nge murnguy rok e bay ulan fapi payg. Ma muruwel’ uta’abong ko fa bin Be’ech e M’ag, nge fare Babyor ku Mormon e rayag ni nge ayuwegdaed ngaed nang faned fan ni yib fare Tathapeg ngabi ayuwegdaed nge rogon nrayag ni ngaed suled Ngak.
Boech pi gidii’en Kristus e, boech i ngiyal’, mab marwar u waen’raed e mich rodaed ma yaed be rus ko tin ni gadaed be tafneynag. Ngaed uned ngoraed ngaed weliyed mornga’agen e mich rodaed ko Yesus Kristus ulan fare bin Be’ech e M’ag ni gadaed gubin ma gadaed b’adag. Ya boech e rran nga m’on, pi gidii’ nib michuwaen’ Yesus Kristus e ra tu’uf ni ngar ayuwegedyaed.20
Napan nibe saga’al e fayleng nibe weliy mornga’agen Yesus Kristus, ngaed weliyed mornga’agen ni nge yo’or yay. Ma napan nra m’ug ni gadaed e pi gidii’en nib riyul’, ma gidii’ nbay u charendaed era motoyil. Napan ni gadaedra fo’odnag fapi tomilang Rok, ma rama’en e tomilang Rok ere mat nge dakean fapi gidii’ ni yaedra bing gum’ircha’enraed. Ga’ar Yesus, “Ku … gub nga fayleng [ni] gag e tamilang.”21
Gaa’nag e Laniyaen’daed e Welthin rodad ngak Kristus
Dariy banan ma karang e falfalaen’ ngog ni nggu weliy mornga’agen Kristus fa fare wub rok ni bayi sul. Dabda nanged ko wi’in era yib, ma rofen nrayib e ra falfalaen’ug ngay! Ya ra yib u lane tharmiy u dakean e maguleng nib mu’un fapi angel Rok ngay nib thothup. Gathi kemus in e angel rok nra yib ya gubin fapi angel Rok nib thothup. Dagur weliy mornga’agen fare machaw ni tay Raphael nibay ya’an ko babyor ko Valentine. Ya tiney e fapi angel ni kakrom, fapi angel ni yib i m’ag l’ugun fapi layon,22 bing e pi garog ko kalbus,23 fapi angel ni yib ni ngar rogned e thin ni bfel’ nbay ni gargelnag Kristus,24 yib fapi angel nu tharmiy ni ra ayuwegned u Gethsemane,25 ni nge micheg fapi angel nra Sul nge Tharmiy,26 me bing wo’en fare sulyarmen ko fare gospel.27
Rangam lemnag ni ngam suloed ngak, demuturug ko u roy u fayleng fa barba’ fare veil.28 Iraram e micheg Rok ngak e gidii’ nib mat’aw. Banan nra buch ni ra suguy lan gum’ircha’daed ni manemus.
Gadad me falfalaen’ nifan e profet rodaed e dabay’, President Russell M. Nelson, nike ayuwegdaed ko tin ni gadaed ba’adag ni ngaed weliyed mornga’agen fare Tathapag nge fare murwel rok nib thothup. I gag e michuwaen’ug ni fare Somoel e be ayuweg ma be pi’ ngak fare tawa’ath ko yi’iy nibe pow’iy. President Nelson, dabkiyag ni nggu son gaed ni nggu motoyilgaed ko mulwol rom.
Pi fagar rog nib t’uf rog u langab e fayleng, thingard noned marunga’agen Kristus, ma ba’adag fare micheg ni ra yib rok fare Tathapeg, “En nra … weliy u fithik’ e girdi’ ni ir reb i girdi’eg, e aram rogon e n’en ni gu ra rin’ ngak … u p’eowchen e Chitamag [nibay] u tharmiy.”29 Gu manang ni Ir fare Fak Got. U dakean fithngan Yesus Kristus, amen.