Gelingiy nibe Athamgil
Kemus ni mich nge thin rok Got ni ra suguy e ya’el rodaed e rib ga’fan ni nge ayuweg daed—me yag ni ngad thapeged gelngin.
Napan ni gube yaliy e pin’en nike machib nag e profet rodaed i, President Russell M. Nelson, mug pir’eg ba thin ni baga’ nima yoeg ko bukun e numon. Re thin ney e gelngiy
Lane bin somm’on e general conference ko tomuren nikan mel’eg ninge mang e Apostle, me weliy President Nelson mornga’agen e gelngiy. Ke yaen bukun e duw nike weliy mornga’agen e gelngiy. Napan nikad ted President Nelson ni profet rodaed, ma ke fil mornga’agen gelngiy nib ga’fan—baga’, ni gelngin Got—nge rogon ni rayog ni ngad thapeged. Ke fil mornga’agen rogon ni rayog ni ngad thapeged gelngin Got napan ni gadad be pigpig ngak e gidii’,2 nge rogon ni kalngan’uy e ma yib nag glengin Yesus Kristus nge fare Bayul Rok nga lane yafos rodad,3 nge rogon ni fare gelngin—gelngin nge mat’won Got—nima fal’eg wa’athan gubin e pi’in nima ngongliy e pi m’ag Ngak me fol riy.4 Ke micheg President Nelson ni gelngin Got e ma yib ngak e pi’in nikan endow nag u lane temple ni yaed be fol ko pi m’ag roared.5
Gu ba’adag e thin rok President Nelson u lane general conference ko April 2020. Ke yoeg ngodaed ni ngan “fil mag meybil ningam fil boech nib bo’or mornga’agen fare gelngin nge llowean’ nikan endow nigem ngay—fa bayni endow nigem ngay.”6
Ku rrin’ e biney, ku fil ma ku meybil mornga’agen boech ban’en nib ga’fan ko gelngin nge llowaen’ nikan endow nigeg ngay—fa bayni endow nigeg ngay.
Gelngin Got ni ngad nanged fan ko ri mang e ngarin rrin’ nga lane yafos rodaed e dani moem, machane ku pir’eg ni rayog ni ngan fil mornga’agen u laniyan’ daed man meybil ni fare Kan ni Thothup ra tamilangaen’ daed.7 Elder Richard G. Scott e ke weliy ko mang gelngin Got nib tamilang: “gelngiy ni ngad rrin’ed e pin’en ni dabyog ni ngad rrin’ed ni go’ gadaed.8
Gumircha’en daed nge ya’el rodaed ni gadaed be suguy ko thin rok Got nge mich rodaed ngak Yesus Kristus nib gel e rib ga’fan ni ngad thapeged gelngin Got ni nge ayuweg dad ko ngiyal’ ney nib momaw’. Ra darini ba’ e thin rok Got nge mich ngak Yesus Kristus nga lan gumircha’en daed, ma mich rodaed e ra mo’owaer, ma ra chuw fare gelngin Got ni ba’adag ni nge pi’ ngodaed. Mich nib waer e dani fal’. Kemus ni mich nge thin rok Got ni ra suguy e ya’el rodaed e rib ga’fan ni nge ayuweg daed—me yag ni ngad thapeged gelngin.
Sister Johnson nge gag e napan ni gomow be chugliy fak mow, ma gomow ma pi’ e athamgil ngoraed ni ngar filed rogon i chubeg mam’en e musik. Machane gamow ma pag raed ni ngar feked e clas ko musik fa’anra kar chubeged mam’en e musik roraed ni go’giyad ni gubin e rran. Reb e Sabado, ma bpin ni fak mow Jalynn e kari falfalen’ ni nge un ko tafagar rok, machane dawori chubeg e piano. Manang nike duwgliy ni nge chubeg ni 30 e ment, me dugliy ni nge taym nag ir ya dabun ni nge chubeg nge pag e ngiyal’ nike leam nag.
Napan ni yaen u to’ben e microwave nibe sar ko fare piano, me tal nge du’unuf boech fare microwave. Machane dani fal’eg e taym, ya ke tay fare microwave nib on ni 30 e ment n’umngin napan ni nge chel. Napan ni yan 20 e ment nibe chubeg fare piano, me sul nga ta’ang ni nge guy ko in e taym ni ku bay me guy nibe wagay e nifiy ko fare microwave.
Me arame mil nga tubgul ko gin ni gube farwol riy, nibe tulul nike yik e na’un. Mug mil nib pap’ay nga lane na’un, ma riyul’, ni kuguy fare microwave nibe wagar e nifiy riy.
Muguy rogon ni dabi yik e na’un romaed nga but, mug waen nag pa’ag nga barba’ fare microwave, nggu bo’oy e seng riy, mug tengi’ fare microwave ngalang ni gube koel e seng riy nge chuw u dakean e counter. Mug lemnag nggu thapeg e rran nge na’un romad, ma ere kug yin’ fare microwave kan wager ko nifiy u fithik e nifeng ko seng riy’ ni ngan palog boech ko dowef rog, mug taw ko yoror romad, mug yin’ fare microwave u wuru’ e na’un. Aram ma rayog ngug tal’eg e nifiy ko raen.
Mang ke buch? Bangi microwave ma t’uf e ban’en ni nge fek fare energy, nge fini dakuriy ban’en u langin, fare microwave ma ga’ nag ko energy, mra gawal nag, min yik ko nifiy, nibe gathay nag.9 Fare microwave romaed e ribe wagay e nifiy riy nibe yik ya dariy ban’en u langgin.
Boed, e pi’in ni bay e mich rok nge thin rok Got u lan gumircha’en raed nibe yag ni nge gel ko kireb ni ra pi’ e mo’oniyan’ ni nge kireb nag daed.10 Fa’anra danga’, ma mich rodaed, athap rodaed, nge lanyan’ daed e dabi gel, ni boed fare microwave ni dariy ban’en u langgin, ni kad gafgow gaed.
Ku nang ni ra bay e thin rok Got u lane ya’el rog, ni kubay e mich rog riy ngak Somoel ni Yesus Kristus nge Bayul Rok, ma rayog ni nggu thapeg gelngin Got ni nggu gel ko mo’oniyan’ nge pin’en ni ra pag ngog. Napan ni gadaed ra yaen u fithik e gafgow, ma rayog ni ngad pagan’ gaed ko thin nike micheg Somoel nike yoeg Paul: “Ya Kan Nthothup nike pi’ Got ngodad e dar ma ngongliydad ni ngad rusgad; machane Kan Nthothup rok e ma pi’ gelngidad, mma fal’egdad nge t’uf Got rodad nge girdi’, mma pi’ gelngidad nge yag nda t’ared lanin’dad.“611
Gadaed manang ni fare Tathapeg e napan ni kab bitir ma ke “ilal fare tir nge gel; ma rib gonop, ma ke par Got ni be ayuweg.“12 Gadaed manang ni napan nibe pilal’ iyan me, “ilal Jesus nge ga’, me ga’ e gonop rok, ma bfel’ u wan’ Got nge girdi’.“13 Ma gadaed manang ni napan nike taw ko ngiyal’ ni nge pigpig, ma pi’in nike punga’ag e kar “gin gad ngarogon e machib ni tay: ya thin rok e bay gelngin.“14
Napan nibe fal’eg rogon, me pilal’ fare Tathapeg nib gel me yag ni dabi fol ko lumel rok mo’oniyaen’.15 Napan ni gadaed ra fol ko kanawo’ rok fare Tathapeg min fil mornga’agen e thin rok Got ma ni gel nag e mich rodaed, ma ku rayog ni ngad thapeged gelngin Got ni ngad gel gaed ko pi lumel.
Ngiyal’ ney e ke momaw’ ni ngan yaen nga temple, ku weliy mornga’agen ni ngan ul’ul’ i fil boech mornga’agen gelngin Got nima yib ngodaed napan ni gadaed be ngonliy e pi m’ag u lane temple man cha’ariy. Rogon nikan micheg u lane meybil u Kirtland Temple, e gadaed be chuw u lane temple ni kad sug gaed ko gelngin Got.16 Dabi mus gelngin Got ni ngan pi’ ngak e pi’in nike ngongliy e pi m’ag u lane temple ma kar fol gaed riy ma ku daworun siyeg e binem e gelngiy napan e m’ar. Gelngin e kemus nima chuw u lane yafos rodaed fa’anra dani yog ni ngad fol gaed ko m’ag rodaed ma dar ni pired ko rogon ni rayog ni ngad thapeged gelngin.
Napan gomow e bpin rog kug pigpig gow ko mission ni u Thailand, Laos, nge yu Myanmar, ma gomow guy gelngin Got nima yib ko pi’in nima ngongliy e pi m’ag nib thothup u lane temple ma yaed be fol riy. Salipy ko Temple Patron e ke yag nag ko bukun e Gidii’ nima Fol ku Got u lane e pi dalip i naam ney ni ngan yan nga temple ko tomuren ni kar athamgil gaed ni kar fal’eged rogon raed. Ku gu manang ni ku guy raliw’ e gidii’ u Laos u lane airport u Bangkok, Thailand, ni ngan ayuweg raed ngar thap gaed ko reb e airport u Bangkok ni ngar raned u sukuki nga Hong Kong. Pi gidii’ ney e kar falfalen’ gaed ni rib gel ni ngar raned ko na’un rok Somoel.
Napan ni gu mada’ nigew e pi gidii’ ney ni kar suled, ma ke magagyal ni kar nanged boech fare gospel nge gelngiy ni kar thapeged e endowment roraed u lane temple ma kar ngongliyed e pi m’ag ngak Got. Pi gidii’ ney e kar suled ko temple ni kar “sug gaed ko gelngin.“17 Biney e gelngiy ni ngar rrin’ed e tin ni dabyog ni ngar rrin’ed ni go’ yaed e ke pi’ gelngin raed ni ngad athamgil gaed u fithik e gafgow nima tay e gidii’ u lane Galasia ko naam roraed ma ngar ranoed ni yaed be yoeg e “tin nib riyul’, ni rib sug ko falfalen’,“18 napan ni yaed be ul’ul’ i toey gil’ilungun Somoel u Laos.
Ngiyal’ nem e dani yag ni nggu unew nga temple, gadaed be pagan’ ko pi m’ag ni kad ngongliyed u lane temple ni ngad, pired ko bin mangil e kanawo’ nib tamilang? Fa’anra yira fol, ko pi m’ag ney, me pi’ e sap ngodaed ko rogon e tin ni bay nga m’on nib tamilang rogon ni ngeyag ni ngad thapeg gubin e pin’en nike micheg nag Somoel ni bachane mich’mich’ rodaed.
Gube pining med ni ngam gayed gelngin Got ni ba adag ni nge pi’ ngom. Gube micheg ni napan ni gadaed ra gay e biney e gelngiy, ma gadaed ra tawa’ath ni ngad nang fan e tu’ufeg nibay rok e Chitamangdaed nu Tharmiy ngodaed.
Gube micheg ni bachane ni godow ba tu’uf rok e Chitamangiy nu Tharmiy, ma ke pi’ Faak nib Tu’uf Rok, i Yesus Kristus, ni nge mang e Tathapeg nge Tabiyul rodaed. Gube micheg mornga’agen Yesus Kristus nibay gelngin,19 ma gube rrin’e biney u dakean fithngan Yesus Kristus, amen.