Gapas, Dam Mithmith
Fare Somoel ke fil ngodad rogon ni ngad thamiyed fare gapas nge mocho’ ndariy fan nibe yib e nifeng nib gel ni be yibi aw e n’ew ngodad ma be talag e tin ni gadad be athapeg.
Napan ni kab bitir pi fakmow, e chongin e tabinaew romad ko ba nu’un u charen e luul’ mag mad par u rom ko bochi rran. Reb e rran riy ko missi’ me fek boech pi fakmow fare life jacket ngar ron’ed nga daken rad u m’on nra tim’og gad ngalan fare luul’. Bin nib bitir i fakmow ni ppin e ke par nib sutuntun, ma be yaliy ya’an pi walagen. Ere athamgil nib gel, me ning pi’ithngun me og ngalan fare luul’. Me sul ngalang me tolul nib laman rus, “Ayuweg neg! “Ayuweg neg!
Ere, dariy e riya’ nibe yib ngak; fare life jacket rok e be ayuweg, ni babi pes ngalang nib fal’ rogon. Rayag ni nggu koled min gerngiy ngalang nga daken e gin ni gamad be par riy. Machane rogon nibe sap ngay, e btu’uf e ayuw rok. Sana gerbeb ko fare luul fa bachan ni kab be’ech ko biney ni ke rrin’. Demuturug rogon, me gerngiy ir ngalang ko gin ni gamad bay riy, mag mad bichiy bangi mad nga daken mag mad yoeg ngak ni kari chag nag.
Demuturug ko kad pilibthir dad fa kab fal’yangren dad, oren ni gadad, ko ngiyal’ nike tu’uf, ma gadad ma yoeg ere bugithin ney mu “Ayuweg neg! “Ayuweg neg! fa “Wenig, fulweg e meybil rog!”
Ku woed e n’en ni buch ko ngiyal’ nibe michib Yesus ngak fapi gachalpen ko napan i moy u fayleng. U Mark ma kad be’igned ni “miki tabab ko machib u to’oben e lipath: ma girdi’ ni mu’ulung ngak ni kar cholngobiyed e ri yad pire’.”1 Rib pire’ e gidii’ ni yibi ulung ngak Yesus “ma aram me af nga daken bbowoch”2 me non ngorad nibay u p’ebuk’ e bowoch. Me non nib bo’or ban’en ni i machibnag ngorad u fithik’ e fanathin u daken e binaw u dap’e ran.
“Chirofen … nem nike yan i [gonowrug],” Me ga’ar Yesus ngak pi gachalpen, “Mmarow ngdarod nga ba’nem e lipath.” Me ere ra paged fapi girdi’ ni aram urngin,”3 Mi yad chuw u rom u to’oben e lipath nu Galilee. Me pir’eg Yesus biyang u lan farngi boch, me thig riy nga but’ me mol. Ma de n’uw napan “me yib e nifeng nrib gel ngorad, ma be t’ar e n’ew ngalan e bowoch, nge [chugur] i sug e ran u lan e bowoch.”4 ko rran.
Oren pi gachalpen Kristus e yad ba salap ko fita’ ma yad manang rogon e fanow ko yiko’ ko ngiyal’ ni yibay u boch. Irraram fapi gidii ’nike pagan’ ngorad—arrogon, fapi gachalpen—nib tu’uf Rok. Kar paged e murwel rorad, tin ni yad ba’adag, nge tabinaew rorad ni ngar laked Yesus. Mich rorad Ngak e rib magagiyel ni bachan ni yad bay u lan fare boch. Ma fare boch rorad e bay nibe chuchugur ninge litheg e day.
Dabda nanged ko uw num’ing napan nra ayuweged fare boch ndabi taflang, machane ra puged Yesus nibay buchi mutua u laman rad, mi yad ga’ar:
“Tamchib, mog, dariyfan u wun’um ni gadad ra yim’?5
“Somol, mu guy rogon ngad fosgad: ya ere ngad m’ad.”6
Kar pininged fithingan ni fare “Tamchib,” ya irraram Facha’. Ma bay ni pining ni Yesus Kristus, ni fare Tir ni fak Got, ni fare Chitamangiy nu tharmiy ngu fayleng, ni Fachaʼ ni sunmiy gubin banʼen aram ko sommʼon.”7
Ko gin ni i moy riy u lan fare bowoch, me suwon Yesus ngalang me ga’ar ngak e n’ew, “Mu gapas, mag mocha’. Me [mocha’ e] nifeng, me aw e cho’.”8 Fare Tamichib ni’ir fare sensey, ni’ir Yesus ni fil ngak pi gachalpen ba l’agruwi duwer nib sug ko tu’ufeg. Me fith:
“Mang ni kam rusgad?”9
“Bu uw e michan’ romed?”10
Biney e ma buch u fayleng, ni lumel, ni gadad be pir’eg ni gadad bay u fithik e sikeng, magawon, fa gafgow ni gadad be yor nag, “Tamchib, mog dariyfan u wun’um ni gadad ra yim’? Mu guy rogon ngad fosgad.” Kumus ngak Joseph Smith me wenig u lan fare kalbus, “O Got, gabu’uw? Ma bu’ur farngi chig nra mithag tigil’im nib mith?”11
Riyul’, Somoel e manang e tin nrayag rodad, ya ke fil ngodad rogon ni ngad thamiyed fare gapas nge mocho’ ndariy fan nibe yib e nifeng nib gel ni be yibi aw e n’ew ngodad ma be talag e tin ni gadad be athapeg.
Ngak e pi’en nib pow e mich rorad, ni woed e mich ko bitir, fa mich demuturug gelngin fani achig12 Yesus e pong, nibe ga’ar “Mired ngog.”13 ”Mu michaen u fithingag.”14 “Mu filed wo’eg, mag med tel med ko thin rog.”15 Ke yoeg nib munguy, “Kalngaenʼ [min] tawfe nag u fithingag,”16 “nge bigimed me t’uf bigimed rok; rogon ni um pired ni gimed ba t’uf rog,”17 ni “gubin e ngiyalʼ ma gubay u wunʼmed.”18 Ke yoeg Yesus: “Pinn’en Kug non ngomed, ningam pir’yeg e gapas ufithikeg.” Bayi gafgow nagmed e fayleng: machane dab mu rusgad; Ya kug gel ko fayleng.”19
Gube tafney nag ya’an fapi gachalpen Yesus u lan fare boch nibe yibi aw e n’ew ngay, ma yad be rrin’ e tin nib tu’uf, ni yad be yaliy ya’an fapi n’ew nibe yibi ’aw nga daken p’ebuk’ e bowoch ma yad be pu’og e rran riy nga wuru’. Gube guy ya’an rad ni yad be gay rogon ni ngar maman gad u lan fachi bowoch nib achichig. Tafney rorad ko ngiyal’ nem e rogon ni ngar fos gad, ma wenig rorad ni ngan ayuweg rad ab polo’.
Ku dani thil e biney ko pi rran rodad e daba’. Tin nibe buch u daken e fayleng nge daken e nam, lane binaew rodad, nge gathon e tabinaew rodad e be yib e momaw’ ngay ni dan guyed nra buch. Ngiyal’ ko gafgow ma bay ni mich rodad era yan i mada’ ko gelngin nrayag rodad ni ngad nangfaned. Bo’or e rus e rayag ni nge balyang nag e tafiney rodad, ni ngad pagtilined e tin nib mangil rok Got, me pagdad ni dabiyag ni ngad sap gad nga mm’on ko tin nib ga’fan. Bachane tiney nibe buch u lan fare pi’ i kanawo’ ni gadad be milekag riy ni fare mich rodad e rayag ni ngan sikeng nag min gel nag.
Demuturug ko n’en nibe buch rodad, rayag ni ngad athamgil gad nge gel niged e mich rodad ngak Yesus Kristus. Ra gel nag napan nran tay u wun’uy ni gadad fapi bitir rok Got ma gadad btu’uf Rok. Mich rodad era gel napan ni gadad be gay rogon fapi thin rok Got nib mu’un e athap ngay nge rogon ni yibe athamgiliy, ni gadad be gay rogon ni ngad leaked wo’en e machib rok Kristus. Ra gel e mich rodad ko ngiyal’ ni kad mel’egned ni nge michuwan’dad ma dabi marwar e tafney rodad, n’agfan ko bin ba’ariy ni ngan og tharan bee’, min kalangan’uy ma dabin togopluw. Ma ran bi’ech nag fare mich rodad mag dad taga’ ko fare murnguy rokʼ fare Messiah nib Thothup.20
“Mich e gathi ba llowaen’ nib polo’,” ke yoeg Elder Neal A. Maxwell, “ya ba pagan’ ngak Got nib ga’, ni’ir ab polo’ e llowaen’ rok!”21 Kumus ko ngiyal’ nib gel e momaw’ riy, fare mich ngak Somoel ni Yesus Kristus e rib tu’uf ni nge ul’ul me par nib gel. Rayag ni nge ayuweg dad ko tin nibe yib ngodad ni dani ga’fan. Rayag ni nge pii’ e athamgil ngodad ngan ul’ul’ u dakaen fare pi’ i kanawo’en e motochiyel. Mich e ma chuweg e tin nibe kirban’uy ngay me ayuweg dad ko tin nibay nga mm’on banan. Ma thogthog nag ngodad ko tin ni nge ayuweg ney riy u napan ni gadad be meybil ngak e Chitamangiy u daken fithingan Fak. Ma ngiyal’ ni woed ni fapi meybil e danur fulweg taban, ma mich rodad ngak Yesus Kristus nib ul’ul’ e bayi yib e guman’ ngay, sobut’an, min nog e pi thin ney ni ba’aray rogon “ Rin’ e tin nib m’agan’um ngay.”22
Ke fil President Russell M. Nelson:
“Dani tu’uf ni ngad paged e tin ni gadad be rus nag nge yon’ luwan e mich rodad. Rayag ni ngad gel gad ko tin ni gadad be rus nag ni yibe gel nag fare mich.
“Mu tabab ngak pi fakam ni somm’on. … Pag rad ngar thamiyed fare mich rom, nib mu’un e ngiyal’ ngay nibe yib e lumel ngom. Mag pag fare mich rom ni nge par nib sap ngak e Chitamangiy nu Tharmiy nbi sug ko tu’ufeg nge Fak nib Tu’uf Rok’, ni Yesus Kristus. … Mu fil ngak buuliyol nge pagal ni yow e bitir rok Got, ni kan ngongliy row ni woed ya’an, nibay fan nge fal’ngin. Gubin ma kan gargelnag ni bay fan nge tin ni nge gel riy.”23
Kug motoyil ngak l’agruw i bitir ni aningeg e duw rorow ni kar weliyew mornga’agen e mich rorow ngak Yesus Kristus ni kar fulweg new taban e biney e duwer “Uw rogon ni ma ayuweg nem Yesus Kristus?” Fare bin somm’on e bitir e ga’ar, “Gu manang ni Yesus e gu btu’uf rok ya ke yim’ ni fan ngog. Ma kab tu’uf e gidii’ rok nike ilaal.” Ma bin migid e bitir e ga’ar, “Ma ayuweg neg ko ngiyal’ ni kug kirbaen’ fa pu’wadai. Ma kama ayuweg neg ko ngiyal’ ni gube yan ni yan nga ar.”
Ke Yoeg Yesus, “Ere, enra kalngaenʼ me yib ngog ni boed beeʼ nib bitir, e ireram e chaʼ ni gura fek, ya piʼin aram rogon e taferaed gilʼilungun Got.”24
“Ya Got e rib t’uf e girdi’ nu fayleng rok, ma aram me pi’ fak ni kari maagirag rok nge yib, ni fan e nge urngin e pi’in ni michan’ rad ngak e aram e dab kurm’ad, ya keyag e yafos ndariy n’umngin nap’an ngorad.”25
De n’uw napan, me micheg President Nelson “ra achig e murus ma aram fare mich nibe ul’ul nibe ga’ i yan” ko napan ni gadadra “tabab nriyul’ ni ngan rung’ag, min motoyil, min taliy ko fapi thin rok fare Tathapeg.”26
Pi walageg, tin nibe buch e chiney e gathi irraray e tin nra buch nitomur rodad. Gadad e chongin Fare Galasia ku Yesus Kristus ni fan ko gidii’en Got ko Tin Tomur e Rran, kad feked nga daken dad fithingan Yesus Kristus u dakaen e micheg. Bay e mich rodad ko fare bayul rok nibay gelngin nge athap ko fare micheg ni tay. Bay fan ni ngad falfalaen’ gad, ya Somol nge fare Tathapeg rodad e yow manang e tin ni gadad be magawon riy, nge tin ni gadad ba’adag, nge tin ni be kirban’dad ngay. Ku woed ko napan ni’ i moy Yesus ko fapi gachalpen, ni kabe un ngodad u lane bowoch rodad! Ke pii’ e yafos rok ni fan ngom nge gag ni dabda gafgow gow. Thingari pagan’ dad Ngak, min fol ko fapi motochiyel Rok, u fithik e mich min motoyil ngak ni nge ga’ar, “Mu gapas, mag mocha’.”27 U dakean fithingan i Yesus Kristus nib thothup, amen.