Ia Fai le Amiotonu, Ia Naunau i le Alofa, ma Ia Feoai ma Lou Atua ma le Lotofaamaulalo
O le faia o le amiotonu o lona uiga o la galulue ma le mamalu. Tatou te galulue ma le mamalu faatasi ma le Atua e ala i le feoa’i ma le faamaulalo faatasi ma Ia. Tatou te galulue ma le mamalu faatasi ma isi e ala i le naunau i le alofa.
I le avea ai ma soo o Iesu Keriso, ma Au Paia o Aso e Gata Ai, tatou te taumafai malosi---ma uunaia e taumafai---e fai ia sili atu ma ia sili atu.1 Atonu e te taumafaufau, pei foi o a’u, “Pe o lava mea o o’u faia?” “O a nisi mea e tatau ona ou faia?” po o le “E mafai faapefea e a’u, o se tagata e le tonu, ona agavaa e ‘mau faatasi ma le Atua i se tulaga o le fiafia e le gata’?”2
Na fai e le perofeta o le Feagaiga Tuai o Mika le fesili e faapea: “Ou te alu atu ma ni a i luma o Ieova, ou te ifo atu ma ni a i le Atua maualuga?”3 Sa manatunatu ma le aamu Mika pe mata e lava ni taulaga e sili ona maoae e totogi ai agasala ma faapea ane, “E fiafia ea Ieova i afe o mamoe, ma manomano o … alia o tafe o suauu? Ou te tuuina atu ea la’u ulumatua e sui a’i le … agasala a lo’u agaga?”4
O le tali e leai. E le lava galuega lelei. E le tausailia le faaolataga.5 E oo lava i taulaga tetele o iloa e Mika e le mafai ona togiolaina ai le agasala aupito itiiti. Afai tatou te faalagolago ia i tatou lava, e faivavale so tatou faamoemoe e toe foi e mau i le afioaga o le Atua.6
A aunoa ma faamanuiaga e maua mai le Tama Faalelagi ma Iesu Keriso, e le mafai lava ona lava mea tatou te faia pe lava foi na o i tatou lava. Ae ui o lea, o le tala fiafia, e faapea, ona o Iesu Keriso ma e ala mai ia Iesu Keriso e mafai ona lava ai i tatou.7 O le a faaolaina tagata uma mai i le oti faaletino i le alofa tunoa o le Atua, e ala i le maliu ma le toetu o Iesu Keriso.8 Ma afai e liliu atu o tatou loto i le Atua, e maua le faaolataga mai le oti faaleagaga mo tagata uma e “ala i le Togiola a [Iesu] Keriso … e ala i le usiusitai i tulafono ma sauniga o le Talalelei.”9 E mafai ona togiolaina i tatou mai le agasala ia tutu atu ai ma le mama ma le atoatoa i luma o le Atua. E pei ona faamatala mai e Mika, “Ua faaali atu ia te oe e le [Atua], Sole, o le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feoai ma lou Atua ma le loto faamaulalo?”10
O le faatonuga a Mika e uiga i le liliu atu o o tatou loto i le Atua ma le agavaa mo le faaolataga ua i ai ni elemene fesootai se tolu. Ia fai le amiotonu o lona uiga ia galue ma le mamalu faatasi ma le Atua ma isi tagata. Tatou te galulue ma le mamalu faatasi ma le Atua e ala i le feoa’i ma le faamaulalo faatasi ma Ia. Tatou te galulue ma le mamalu faatasi ma isi e ala i le naunau i le alofa. Ia fai le amiotonu o lona uiga o se faaaogaaga tonu o poloaiga sili e lua, ia “e alofa atu i le Alii lou Atua ma lou loto atoa, ma lou agaga atoa, ma lou mafaufau atoa … [ma ia] alofa atu foi i le lua te tuaoi ia pei o oe lava ia te oe.”11
Ia fai le amiotonu ma feoai faatasi ma le Atua o le faafoi ma le loto i ai o tatou lima mai le amioletonu, savavali i Ana tulafono, ma tumau ma le faamaoni.12 O se tagata amiotonu e fulitua i le agasala ae liliu atu i le Atua, osia feagaiga ma Ia, ma e tausia na feagaiga. O se tagata amiotonu e filifili e tausia poloaiga a le Atua, salamo pe a sasi, ma taumafai pea.
O le taimi na asiasi atu ai le Keriso toetu ia sa Nifae, sa Ia faamatala atu faapea o le tulafono a Mose ua suia i se tulafono e maualuga atu. Sa ia faatonuina i latou e aua nei toe “osi atu … ni taulaga ma … taulaga mu” ae ofo atu “se taulaga o le loto momomo ma le agaga salamo.” Na Ia folafola atu foi, “Ma o soo se tasi e sau ia te a’u ma le loto momomo ma le agaga salamo, o ia lea o le a ou papatisoina i le afi ma le Agaga Paia.”13 Ina ua tatou maua ma faaaoga le meaalofa o le Agaga Paia ina ua maea le papatisoga, e mafai ona tatou olioli i le mafutaga faifai pea ma le Agaga Paia ma aoao mai ai mea uma e ao ona tatou faia,14 e aofia ai le ala e feoai faatasi ai ma le Atua ma le faamaulalo.
O le taulaga a Iesu Keriso mo agasala ma le faaotagata mai le oti faaleagaga e avanoa mo tagata uma o e maua se loto momomo ma se agaga salamo.15 O se loto momomo ma se agaga salamo e uunaia ai i tatou ia salamo ma le fiafia ma taumafai ia avea atili e pei o lo tatou Tama Faalelagi ma Iesu Keriso. A o tatou faia lena mea, tatou te maua le mana faamama, faamalolo, ma le faamalosiau o le Faaola. E le gata ina tatou faia le amiotonu ma feoai faatasi ma le Atua ma le faamaulalo; ae tatou te aoaoina ai foi ia fiafia i le alofa mutimutivale e faapei ona faia e le Tama Faalelagi ma Iesu Keriso.
E fiafia le Atua i le alofa mutimutivale ma e le fiafia i lona faaaogaina. I upu a Mika ia Ieova, “O ai ea se Atua e tusa ma oe, o le faamagalo agasala, … e toe alofa mai ia te i tatou,” ma o le a “lafo foi … agasala uma i mea loloto o le sami.”16 Ina ia naunau i le alofa e faapei ona faia e le Atua e le matuueseesea ma le faia ma le amiotonu o isi ae le faia faatautala.
O le taua o le le faia faatautala o isi o loo faamamafa mai i se tala puupuu malie e uiga ia Hileli le Toeaina, o se sikola Iutaia sa ola i le seneturi muamua a o lei afio mai Keriso. O se tasi o tagata a’oa’o a Hileli, sa matua le fiafia i le lavelave o le Tora---o tusi e lima a Mose ma o latou tulafono e 613 faatasi ai ma tusiga faarapi. Sa lu’iina e le tamaitiiti a’oa’o ia Hileli e faamalamalama atu le Tora e faaaoga ai na o le taimi sa mafai ai e Hileli ona tu i lona vae e tasi. Atonu e lei lelei tele se tu faapaleni o Hileli ae sa ia talia le lu’i. Na ia sii maia le Levitiko e faapea, “Aua e te taui ma sui, aua foi le faamoemoe lou ita i tagata o lou nuu, a e te alofa atu i le lua te tuaoi ia pei o oe lava ia te oe.”17 Ona faaiu mai lea e Hileli: “O mea e te inoino i ai, aua nei e faia i lou tuaoi. O le savali atoa lea o le Tora; o mea o totoe o ni manatu faaalia. Alu loa ma suesue.”18
O le faia ma le mamalu o isi e le aunoa o se vaega o le naunau alofa. Manatu i se talanoaga sa taia ai la’u faalogo i le fiasefulu o tausaga ua mavae i le matagaluega o faalavelave faafuasei o le Falemai o Johns Hopkins i Baltimore, Maryland, i le Iunaite Setete. O se gasegase, o Mr. Jackson, o se alii tauagafau, agamalie sa lauiloa i le aufaigaluega a le falemai. Sa tele ni taimi sa taofia ai i le falemai talu ai mo ni togafitiga o gasegase e afua i le ava malosi. O le taimi lea, sa toe foi atu ai Mr. Jackson i le falemai ona o auga e ono faailoa ane ai faapea ua afaina ona atepili ona o le inu-ava.
I le tulata i le faaiuga o lana sifi, sa faia ai le faaiuga a Dr. Cohen, o se fomai galue malosi ma le faaaloalogia, e tatau ona taofia Mr. Jackson i le falemai. Sa tofia e Dr. Cohen ia Dr. Jones, o le isi fomai e sosoo mai i le faasologa, e taofia Mr. Jackson i le falemai ma ia nafa o ia ma ona togafitiga.
Na ‘aoga Dr. Jones i se aoga faafomai iloga ma ua faatoa amata ana suesuega faalematua o faiva. O lenei aoaoga faigata na masani ona fesootai ma le le lava o le moe, lea atonu na mafua ai le tali le lelei a Dr. Jones. I le fetaia’i ai ma lana gasegase lona lima e taofia o le po, sa ia faitio leotele atu ai ia Dr. Cohen. Sa manatu o ia e le fetaui lona toe faaaluina o ni itula se tele e vaaia ai Mr. Jackson ona o auga ogaoga o lona ma’i o ia lava e tuua’ia.
Sa toetoe ina musumusu atu le tali mautu a Dr. Cohen. Na ia fai atu, “Dr. Jones, na avea oe ma fomai e tausia tagata ma galue ia faamalolo i latou. E te le’i fomai e faamasino i latou. Afai e te le malamalama i le eseesega, e leai sau feau e te aoao ai i lenei matagaluega.” I le mavae ai o lea faasa’oga, sa tausia ai ma le maelega e Dr. Jones ia Mr. Jackson i le taimi na taofia ai i le falemai.
Na maliu Mr. Jackson. Na taufai taua tele matata a Dr. Jones ma Dr. Cohen. Ae i se taimi taua tele i lana aoaoga faamasani, na manaomia ai e Dr. Jones ona toe faamanatu atu ia te ia ia fai le amiotonu, ia naunau i le alofa, ma ia tasia Mr. Jackson e aunoa ma le faamasinosino.19
I le tele o tausaga, sa faamanuiaina ai a’u mai lena faamanatu. O le naunau i le alofa o lona uiga tatou te le na ona naunau i le alofa e tuuina mai e le Atua ia i tatou; ae tatou te olioli foi ona e tuuina atu foi e le Atua lena lava alofa mo isi. Ma e tatou te mulimuli i Lana faataitaiga. “E tutusa tagata uma i le Atua,”20 ma e tatou te manaomia uma togafitiga faaleagaga e fesoasoani mai ai ma faamaloloina. Na fetalai mai le Alii, ‘Aua tou te manatu ua sili se tasi tino i se tasi tino; aua le manatu foi se tasi tagata ua sili o ia i se tasi.”21
Na faaa’oa’o mai e Iesu Keriso le uiga o le fai o le amiotonu ma le naunau i le alofa. Sa lei faatuaoia lona mafuta ma e agasala, taulima ma le mamalu i latou ma le faaaloalo. Sa Ia aoao atu le olioli i le tausiga o poloaiga a le Atua, ma sa saili e sii a’e nai lo le tausalaina o i latou o e sa tauivi. Sa ia ta’uvaleina i latou o e sa faitioina o Ia i le auauna atu i tagata na latou manatu e le agavaa.22 O sea faafiaamiotonu e faatiga ia te Ia ma o loo faia pea.23
Ina ia avea e faapei o Keriso, e fai e se tagata le amiotonu, e amio faamamalu ma le Atua faapea ma isi tagata. O se tagata amiotonu e tauagafau i upu ma faatinoga ma e aloaia eseesega po o talitonuga mai fafo, ma e le punia foi le agalelei ma faauooga mai le loto. O tagata e faia le amiotonu “e le i ai se manatu e faasaunoa le tasi i le isi, a e nonofo i le filemu”24 ma le tasi ma le isi.
Ina ia avea e faapei o Keriso, e naunau se tagata i le alofa. O tagata e naunau i le alofa e le faamasinosino; latou te faailoa atu le agaalofa i isi, aemaise ia i latou o e le taualoa, e tauagafau, e agalelei, ma aga faatamalii. O nei tagata latou te taulimaina ma le alofa ma le malamalama tagata uma, e tusa lava po o a o latou uiga e pei o lanu, itupa, sootaga faalelotu, faiā feusuai, tulaga faaletamaoaiga, ma ituaiga, itu’au, po o eseesega faaleatunuu. E fuaao e le alofa faaKeriso nei mea uma.
Ina ia avea e faapei o Keriso, e filifili e se tagata le Atua,25 e feoai faatasi ma Ia ma le faamaulalo, e saili e faafiafia o Ia, ma tausia feagaiga ma Ia. O tagata taitoatasi e feoai ma le faamaulalo ma le Atua, e manatua mea na faia e le Tama Faalelagi ma Iesu Keriso mo i latou.
Pe o lava mea o o’u faia? O a nisi mea e ao ona ou faia? O le faatinoga tatou te faia e tali atu ai i nei fesili, e totonugalemu i lo tatou fiafia i le olaga nei ma i le faavavau. E le finagalo le Faaola tatou te manatu faatauvaa i le faaolataga. Tusa foi pe ua uma ona tatou osia feagaiga paia, ae e i ai lava se avanoa e mafai ai ona paʼū o le tagata mai le alofa tunoa ma alu ese mai le Atua soifua.” O lea, “e ao ai ona tatou tatalo e lē aunoa” ia taumamao ai mai le pauu atu “i le faaosoosoga.”26
Ae o le taimi lava foi lea, e le finagalo ai lo tatou Tama Faalelagi ma Iesu Keriso e taofia i tatou e ala i le le mautinoa faifai pea i la tatou malaga i le olaga nei, ma tau manatunatu pe ua lava mea o tatou faia e laveaiina ai ma faaeaina. E moni lava la te le finagalo e faapuapuagatia i tatou i mea sese ia e tatau ai ona tatou salamo, ma mafaufau i ai o ni manu’a e le pēpē,27 pe ia soona atuatuvale foi faapea tatou te ono toe feto’i foi.
E mafai ona tatou iloiloina lo tatou lava alualu i luma. E mafai ona tatou iloaina “faapea o le ala o le olaga [o loo tatou] tulimata’ia ua tusa ai lea ma le finagalo o le Atua”28 pe a tatou fai le amiotonu, naunau e alofa, ma feoai ma le faamaulalo faatasi ma lo tatou Atua. Tatou te miti’ia uiga paia o le Tama Faalelagi ma Iesu Keriso i o tatou uiga, ma e tatou te fealofani.
Pe a oo ina outou faia nei mea, o le a outou mulimuli i le ala o feagaiga ma agavaa ai e “mau faatasi ma le Atua i se tulaga o le fiafia e le gata.”29 O le a faatumuina o outou agaga i le mamalu o le Atua ma le malamalama o le ola e faavavau.30 O le a faatumulia outou i le olioli e le mafaamatalaina.31 Ou te molimau atu o loo soifua le Atua ma o Iesu o le Keriso, o lo tatou Faaola ma le Togiola, ma o loo Ia faalauteleina mai ma le alofa ma le olioli Lona alofamutimutivale i tagata uma. E te le alofa ea i ai? I le suafa o Iesu Keriso, amene.